Mu Micheg ni Gur Reb e Tin Riyul’ i Gachalpen Jesus

“Ba ke gek’iy nib fel’ rogon e ra k’uf ma ba fel’ wom’engin, ma ba ken nde fel’ rogon e ra k’uf ma ba kireb wom’engin.”​—MATT. 7:17.

1, 2. Ngiyal’ ney ko tomur e uw rogon ni be gagiyel e n’en nib thil u thilin e tin riyul’ i gachalpen Jesus nge tin de riyul’?

 I YOG Jesus ni yira nang e n’en nib thil u thilin e tin riyul’ i gachalpen nge tin de riyul’ u daken e machib nge ngongol rorad. (Matt. 7:15-17, 20) Girdi’ e n’en ni yad ma suguy nga lanin’rad nge gum’ircha’rad e aram e n’en ni ma gagiyegnag e ngongol rorad. (Matt. 15:18, 19) Piin ni kan suguy lanin’rad ko machib nde riyul’ e taareb rogorad ko fare ke gek’iy nra k’uf ma ba “kireb wom’engin.” Machane piin ni kar filed e tin riyul’ e taareb rogorad ko fare ke gek’iy nra k’uf ma ba “fel’ wom’engin.”

² Ngiyal’ ney ko tomur e aray e ngiyal’ ni be gagiyel e gal mit i wom’engin ney. (Mu beeg e Daniel 12:3, 10.) Tin de riyul’ e Kristiano e ba thil rarogon Got u wan’rad ma yad ma dake yad be liyor ngak. Machane piin ni kar nanged e tin riyul’ e yad ma liyor ngak Got u daken gelngin nib thothup ngu fithik’ e yul’yul’. (John 4:24; 2 Tim. 3:1-5) Yad ma athamgil ni nge m’ug fel’ngin e Kristiano rorad. Ma gadad, e uw rogodad? Nap’an ni ga be lemnag fare lal i pow ko tin riyul’ e Kristiano ma ngam fithem ni nge lungum: ‘Ba puluw e ngongol rog nge n’en ni gu be machibnag ngak e girdi’ ko Thin Rok Got, fa? Ra guy e girdi’ e ngongol rog nge n’en ni gu ma machibnag ma yad ra adag e machib, fa?’

 Ngaum Par nib Puluw e Ngongol Rom ko Thin Rok Got

3. (a) Mang e ba m’agan’ Jehovah ngay? (b) Uw rarogon e tin riyul’ e Kristiano?

³ I yog Jesus ni gaar: “Gathi gubin e girdi’ ni ma piningeg ni ma lungurad Somol, Somol, e yad ra yan nga suwon Got u tharmiy, ya kemus ni piin ni yad ma rin’ e n’en ni baadag e Chitamag nu tharmiy ni ngar rin’ed e yad ra yan ngay.” (Matt. 7:21) Faanra kemus ni nga u mog ni gur reb e Kristiano ma dabi m’agan’ Jehovah ngay, ya ku thingari m’ug ko ngongol rom nriyul’ ni gur reb e Kristiano. Tin riyul’ i gachalpen Jesus e gubin ngiyal’ ni yad ma rin’ e tin thingari rin’ e Kristiano nib muun ngay rogon e salpiy u wan’rad, nge maruwel, nge pi n’en ni ma chuweg e chalban, nge boch e yalen nge madnom ni ma tay e fayleng, nge mabgol nge rogon thilrad boch e girdi’. Machane, Kristiano ni googsur e yad ma lem nrogon ni ma lem e fayleng ni aram e miti lem ni ke gel e ngiyal’ ney.​—Ps. 92:7.

4, 5. Uw rogon ni ngad folgad ko thin rok Jehovah ni bay ko Malaki 3:18?

⁴ I yoloy Malaki ni profet ni gaar: “Girdi’ rog e bay kur guyed bayay e n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngog nge en nder pigpig ngog.” (Mal. 3:18) Nap’an ni ga be fal’eg i lemnag e pi thin ney mag fithem ni nge lungum: ‘Taareb rogog ko girdi’ nu fayleng, fa gub thil? Gu ma ngongol ni bod rogon e bitir u skul ara girdi’ u tabon e maruwel, fa gu ma gay rogon ni nggu fol ko pi kenggin e motochiyel nu Bible mu gu weliy e tin ke michan’ug ngay ko ngiyal’ ni ke t’uf ni nggu weliy riy?’ (Mu beeg e 1 Peter 3:16.) Riyul’ ni dubdad ni nge m’ug ni gowa gad be dake gad ba mat’aw, machane susun ni nge m’ug ni gad ba thil ngak e piin nde t’uf Jehovah rorad ma darur pigpiggad ngak.

⁵ Faanra kam guy ni bay boch ban’en nib t’uf ni ngam thilyeg ko ngongol rom, ma ba t’uf ni ngam meybil mag gay e ayuw u daken e fol Bible nge muulung. Ra um fol ko Thin Rok Got u Bible ma aram e rayog ni nge yib wom’engin e ngongol rom nib “fel,” nib muun ngay ni ngaum “pining e magar nge sorok ngak Got.”​—Heb. 13:15.

Ngam Machibnag Murung’agen Gil’ilungun Got

6, 7. Mang e ba thil u thilin e tin riyul’ e Kristiano nge tin de riyul’ u rogon e machib ni yad ma tay?

⁶ I yog Jesus ni gaar: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:43) Mang fan ni tay Jesus ni Gil’ilungun Got e aram kenggin e machib rok? Ya manang ni kemus ni ir nge piin ni yad ra un ngak ko gagiyeg e yad ra chuweg lik’ngin urngin e magawon ko girdi’ ni aram e denen nge Satan. (Rom. 5:12; Rev. 20:10) Aram fan ni tay chilen ngak pi gachalpen ni ngar machibnaged murung’agen Gil’ilungun Got nge yan i mada’ nga tomuren e re m’ag ney. (Matt. 24:14) Girdi’ ni yad ma yog ni yad e Kristiano e darur uned ko re maruwel ney ya dabiyog. Mang fan? Bin som’on, dabiyog ni ngar machibnaged ban’en ndar nanged fan. Bin l’agruw, yooren i yad e de sobut’an’ ma dabiyog rok ni nge k’adan’ u puluwon e piin nra ur moningniged yad ma yad be togopuluw ngorad u nap’an e machib. (Matt. 24:9; 1 Pet. 2:23) Ma bin dalip e tin googsur e Kristiano e dariy gelngin Got rorad.​—John 14:16, 17.

⁷ Machane, tin riyul’ i gachalpen Jesus e yad manang ko mang e Gil’ilungun Got nge n’en nra rin’. Maku yad ma mon’eg Gil’ilungun Got u lan e yafas rorad, maku yad ma machibnag murung’agen u ga’ngin yang u fayleng u daken gelngin Jehovah. (Zek. 4:6) Ga ma un ko re maruwel ney ni gubin ngiyal’, fa? Ga be gay rogon ni ngam salap i machibnag murung’agen Gil’ilungun Got, ni bod ni ngam yoornag e tayim rom ko machib fa ngam gay rogon ni ngam salap boch ko machib, fa? Bay boch e girdi’ ni kar mon’oggad ko machib ni bochan e yad ma fanay e thin nu Bible. I mechameg apostal Paul ngak ni nga i weliy e thin nu Bible u nap’an ni i machib, me yog ni, “thin rok Got e ba fos ma ba’ gelngin ni ma maruwel.”​—Heb. 4:12; Acts 17:2, 3.

8, 9. (a) Mang boch ban’en ni ke buch ni be dag nrib ga’ fan ni ngaun beeg e Bible u nap’an e machib? (b) Uw rogon ni ngad salapgad i fanay e Thin Rok Got?

⁸ Nap’an e machib me mada’nag reb e walag ni pumoon be’ nib moon nib Katolik, ma aram me  beeg ngak fare thin u Daniel 2:44 me weliy ngak rogon nra yibnag Gil’ilungun Got e bin riyul’ e gapas nge pagan’ nga fayleng. Me gaar fare moon: “Kug felfelan’ ni bochan e gathi kemus ni ka mog ngog e n’en ni be yog e Bible, ya kum dag ngog e gin ni bay riy.” Maku immoy reb e walag nnap’an ni beeg reb e thin nu Bible ngak reb e ppin u yugu reb e teliw ma boor e deer ni fith fare pin. Miki fulweg e re walag ney nge ppin rok e pi deer nem u daken e thin nu Bible. Tomur riy me gaar fare pin: “Gimew manang ko mang fan ni kug adag ni nggu non ngomew? Bochan e kam bow nga tabinaw rog ni kam fekew e Bible ma kam beegew e thin riy ngog.”

⁹ Riyul’ nib ga’ fan e pi babyor rodad ma susun e ngaud wereged. Machane Bible e aram e n’en ni gad ma fanay ni gubin ngiyal’. Ere, faanra dawori mecham ngom ni ngaum beeg e Bible rom u nap’an e machib, ma aram ban’en ni ngam nameg ni ngam rin’. Sana rayog ni ngam mel’eg in e thin nu Bible ni be weliy ko mang Gil’ilungun Got nge rogon nra pithig e magawon ko girdi’ u lan binaw rom. Ngemu’ mag beeg u nap’an ni kam man ko machib.

Mmachibnag Fithingan Got ni Gab Felfelan’

10, 11. Mang e ba thil u thilin Jesus nge piin ni yad ma yog ni yad pi gachalpen Jesus u rogon ni yad ma fanay fithingan Got?

¹⁰ “‘Gimed e mich rog. I gag e Got.’” (Isa. 43:12, 13) Jesus Kristus ni ir e bin som’on e Mich Rok Jehovah e i machibnag fithingan Got nib felfelan’ ngay. (Mu beeg e Exodus 3:15 *; John 17:6 *.) Bin riyul’ riy e bochan ni i machibnag Jesus fithingan e Chitamangin, ma aram fan ni ka nog “Faanem nib Yul’yul’” ngak.​—Rev. 1:5; Matt. 6:9.

¹¹ Boor e piin ni yad ma yog ni yad e tapigpig rok Got ni kar chuweged fithingan Got u Bible ni aram reb e ban’en nde fel’. Buchuuw kafram mu ku nog ko pi bishof ko Katolik “ndab kun fanay ara un pining fithingan Got ni kan yoloy ni YHWH.” * Rib kireb e n’en ni kar rin’ed!

12. Uw rogon ni ke gagiyel e tin riyul’ e tapigpig rok Jehovah ko duw ni 1931?

¹² Tin riyul’ e Kristiano e yad ba felfelan’ ngay ni nga u rogned fithingan Got, ni bod Kristus nge fapi “girdi’” ni ur moyed u m’on ku Kristus. (Heb. 12:1) Bin riyul’ riy, e nap’an fare duw ni 1931 ma kari gagiyel e tin riyul’ e tapigpig rok Jehovah ya aram e ngiyal’ ni kar fanayed fare ngachal ni Pi Mich Rok Jehovah. (Mu beeg e Isaiah 43:10-12.) Aram fan ni tin riyul’ i gachalpen Kristus e kar manged e piin ni ‘kan piningrad ni ngar manged girdien [Got].’​—Acts 15:14, 17.

13. Uw rogon ni nge puluw e ngongol rodad nga fithingdad ni ke pi’ Got?

¹³ Uw rogon ni nge puluw e ngongol rodad nga fithingdad ni ke pi’ Got? Reb riy e thingar da machibnaged murung’agen Got u fithik’ e yul’yul’. I  yoloy Paul ni gaar: “En nra pining fithingan [“Jehovah,” NW] ni nge ayuweg e ra fos ni ke thap ngak Got. Machane ra diin mi yad non ngak ni faanra dawori michan’rad ngak? Ma ra diin me michan’rad ni faanra dawor rrung’aged e thin rok? Ma ra diin mi yad rung’ag ni faanra danir machibnag e thin rok? Ma ra diin min machibnag e thin rok ni faanra dab nol’og e piin ni ngar machibniged e thin rok nga ranod ngar machibgad?” (Rom. 10:13-15) Maku reb e susun ni ngad gagiyelnaged e pi machib ko pi yurba’ i teliw ni googsur ni bod fare machib u murung’agen e nifiy ndabi math biid. Re machib nem e be kirebnag murung’agen Got, nib Got ko t’ufeg ma kan taarebnagrow Moonyan’.​—Jer. 7:31; 1 John 4:16; mu taareb rogonnag ko Mark 9:17-27.

14. Mang e rin’ boch e girdi’ u nap’an ni kar guyed fithingan Got u Bible?

¹⁴ Gab felfelan’ ngay ni ngam machibnag fithingan e chitamangidad nu tharmiy? Ma ga ma ayuweg boch e girdi’ ni ngar nanged fithingan Got nib thothup? Immoy reb e ppin u Paris, France ni ke rung’ag ni manang e Pi Mich Rok Jehovah fithingan Got. Ere nap’an ni yib reb e Mich nga tabinaw rok ma aram me yog ngak ni nge dag e re ngachal nem ngak u Bible. Nap’an ni beeg fare thin u Psalm 83:18 mi ri felfelan’. Ma aram me tabab ko fol Bible ma chiney e ke mang reb e walag ni be pi’ e ayuw ko machib u yugu reb e nam. Ku immoy reb e ppin nib Katolik u Australia nnap’an ni guy fithingan Got u lan e Bible ko som’on, mi ri yornag e felfelan’. Ma chiney e ke yoor e duw ni be pioneer. Ku dawori n’uw nap’an ni ke yan me dag e Pi Mich ngak be’ nib pin u Jamaica fithingan Got u Bible rok, miki yornag e felfelan’. Ere mu folwok rok Jesus, ngaum machibnag fithingan Got ni gab felfelan’ ya nge urngin e girdi’ me nang.

“Dabi T’uf Romed e . . . Fayleng”

15, 16. (a) Uw rogon e re fayleng ney u wan’ e tin riyul’ e Kristiano? (b) Mang boch e deer ni ngad fithed gadad riy?

¹⁵ “Dabi t’uf romed e tin ni ba’ u roy u fayleng ara n’en nib mil fan nga fayleng. Faanra t’uf romed e tin ni bay u fayleng, ma aram e de t’uf e en ni Chitamangiy romed.” (1 John 2:15) Re fayleng ney nge lem riy e ba togopuluw ngak Jehovah nge gelngin nib thothup. Machane tin riyul’ e Kristiano e gathi kemus ni yad ma par ni yad ba dar ko fayleng, ya ku de t’uf e tin nu fayleng rorad. Ya yad manang ni yog James nreb i gachalpen Jesus ni faan gad ra ‘m’ag fager ko fayleng ma aram e kad manged toogor rok Got.’​—Jas. 4:4.

¹⁶ Ba mo’maw’ ni ngad folgad ko thin rok James ni bochan e gad be par u ba fayleng ni boor ban’en riy nib kireb ni yima waliydad ngay. (2 Tim. 4:10) Aram fan ni yibilay Jesus pi gachalpen ni gaar: “Gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok Faanem nib Kireb. Gathi yad e girdi’ nu roy u fayleng ni bod gag ni gathi gag e girdi’ nu fayleng.” (John 17:15, 16) Ere mu fithem ni nge lungum: ‘Gu ma gay rogon ni nggu par ni gub dar ko fayleng, fa? Manang boch e girdi’ rogon lanin’ug ko pi madnom nge yalen nde puluw ko Bible nge tin ni ma m’ug rarogon e lem nu fayleng riy, fa?’​—2 Kor. 6:17; 1 Pet. 4:3, 4.

17. Mang e ra k’aring e piin riyul’ nri yad baadag e machib ni ngar uned nga ba’ rok Jehovah?

¹⁷ Gad ra fol ko motochiyel nu Bible ma dabi adag e girdi’ nu fayleng dakendad. Machane rayog ni nge k’aring boch e girdi’ ngar adaged ni ngar nanged murung’agen e n’en ni gad be machibnag. Maku reb e faan yad ra guy nib mich u wan’dad e thin nu Bible maku ba puluw e ngongol rodad ngay, ma rayog ni nga rogned ngak e piin ni kan dugliyrad ni lungurad: “Gamad baadag ni nggu uned ko gin ngam man ngay, ni bochan e kug rung’aged ni bay Got rom.”​—Zek. 8:23.

Nge M’ug e T’ufeg ko Tin Riyul’ e Kristiano Rom

18. Mang e ba muun ko ngad t’ufeged Jehovah nge en migid ngodad?

¹⁸ I gaar Jesus: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom” ma “thingari t’uf rom e en ni ir e mmigid ngom ni gowe gur.” (Matt. 22:37, 39) Re t’ufeg nem (ni a·gaʹpe ko thin ni Greek) e ba mat’aw ma ma k’aring be’ ni nge lemnag e n’en nib milfan ngak, me ngongol nrogon nib puluw ko motochiyel nib fel’. Machane, ba ga’ ni bin riyul’ e t’ufeg e ra k’aringey ni ngan rin’ e re n’ey. (1 Pet. 1:22) T’ufeg e ba math’ keru’ ko lem ni fel’ ngak ya ma m’ug ko thin nge ngongol ndariy e lem ni fel’ ngak riy.​—Mu beeg e 1 Korinth 13:4-7.

19, 20. Mu weliy boch ban’en ni ke buch ni be dag nrib gel e t’ufeg ni bay ko Kristiano.

 ¹⁹ Tin riyul’ e Kristiano e taareb rogon gubin e girdi’ u wan’rad ni yugu aram rogon nib thil raen dowrad nge yalen rorad nge am rorad, ni bochan e t’ufeg ni bay rorad e aram reb i wom’engin gelngin Got nib thothup. Ireray boch ban’en ndabiyog ni nge rin’ e yug girdi’. (Mu beeg e John 13:34, 35; Gal. 5:22) Piin ni yad bod e saf e yad ra guy e t’ufeg ni aray rogon ma ma k’aringrad ni ngar adaged e tin riyul’. Immoy reb e pumoon u Israel ni ir reb e Jew nnap’an ni un ko muulung ko yay ni som’on mi ri gin nga rogon ni be pigpig e pi walag ni Jew nge Arab u taabang ngak Jehovah. Angin ni yib riy e aram e tabab ni nga i un ko muulung ni gubin ngiyal’, miki un ko fol Bible. Ga ma t’ufeg e pi walag u lan e ulung ni aray rogon, fa? Ma ga ma gay rogon ni ngam dag ngak e piin ni ka yad ba beech ko muulung ni kam felfelan’ ni kam guyrad ndemtrug ko yad e girdi’ nu uw nge uw rarogorad, fa?

²⁰ Thingar da t’ufeged gubin e girdi’ ni bochan e gadad e tin riyul’ e Kristiano. Immoy reb e walag u El Salvador nib fel’ yangaren ni ur filew reb e ppin ni 87 e duw rok e Bible. Re ppin nem e rib m’ing ko Katolik. Ere, taw nga ba ngiyal’ me m’ar nrib gel ma aram mi nin’ nga aspital. Nap’an nni pag u aspital ni sul nga tafen, ma aram mi i yan e Pi Mich nga tafen ni ngar nanged salpen ma yad be ayuweg ko tin nib t’uf rok. Aram e n’en ni ur rin’ed u lan reb e pul. Machane ri dariy be’ ko teliw rok fare pin ni ma yan i nang salpen. Ere mang e buch? I kunuy urngin e liyos ni bay u tafen nge n’ag, me chuweg fithingan ko teliw rok, ma aram me sul ngki fil e Bible bayay. Riyul’ nrib gel e t’ufeg ni bay ko Kristiano ya rayog ni nge thilyeg e lem ko girdi’ nib thil nga rogon ni gad ra machibnagrad.

21. Uw rogon ni nge mudugil e yafas rodad ko gabul nge langlath?

²¹ Dabki n’uw nap’an ma ra gaar Jesus ngak e piin ni gathi riyul’ ni yad ma liyor ngak: “Ri da gu nangmed. Mu chuwgad rog, gimed e piin ni gimed ma rin’ e kireb!” (Matt. 7:23) Ere, thingar ud ngongolgad u rogon ni yira pining e sorok riy ngak e en Chitamangiy nge Fak. I gaar Jesus: “Gubin e girdi’ ni rung’ag e pi thin rog ney mi yad fol riy e yad bod be’ nib gonop ni toy e naun rok nga daken e war.” (Matt. 7:24) Riyul’ ni faan gad ra micheg ni gad e tin riyul’ i gachalpen Jesus ma gad ra fel’ u wan’ Got ma ra mudugil e yafas rodad ko gabul nge langlath ni bod ba naun ni kan toy nga daken e war!

[Footnotes]

Ka Ga Manang?

• Uw rogon nib thil e tin riyul’ i gachalpen Jesus ko tin de riyul’?

• Mang boch “wom’engin” e tin riyul’ e Kristiano?

• Mang e ngam nameg ya nge yog ni m’ug wom’engin e tin riyul’ e Kristiano ko ngongol rom?

[Study Questions]

[Picture on page 19]

Kam mechameg ngom ni ngaum beeg e Bible rom u nap’an e machib, fa?

[Picture on page 21]

Manang boch e girdi’ rogon lanin’um ko pi madnom nde puluw ko Bible, fa?