Ambuluisha bana bebe bua kutantamena ntatu yabu

BANSONGA betu badi ne ntatu ya bungi. Badi munkatshi mua bantu babi badi ne lungenyi lua Satana, ne badi ne bua kuluisha “nkuka ya bansongalume.” (2 Tim. 2:22; 1 Yone 5:19) Bu mudibu basue ‘kuvuluka Mufuki wabu,’ bantu badi kabayi basue tshitendelelu tshiabu badi babaseka ne babatatshisha. (Muam. 12:1) Muanetu mukuabu diende Vincent udi uvuluka tshikondo tshivuaye nsonga wamba ne: “Kuvua anu muntu uvua untatshisha, unkanyina anyi ukeba kunduisha mvita bualu mvua Ntemu. Bua mushindu uvuabu bantatshisha, mvua ngumvua bintonda bua kuya mu kalasa.” *

Pa kumbusha ntatu idi ifumina kudi bena pa buloba apa, bana betu balela badi ne bua kuluisha dijinga dia kufuanangana ne bena mulongo nabu. Cathleen muanetu wa bakaji udi ne bidimu 16 udi wamba ne: “Kabitu bipepele bua kuikala mushilangane ne bakuabu  to.” Muanetu wa balume Alan udi wamba yeye ne: “Balongi nanyi bavua bambikila bikole bua tuetu kuya nabu mu luendu ku ndekelu kua lumingu, ne mvua ngumvua mua kuya nabu.” Pashishe dijinga dia kuditua mu manaya a kuibidija mubidi atubu balongolola mu tulasa ne adi mua kufikisha bansonga ku dipeta balunda babi didi mua kuikala dikole. Tanya muanetu wa bakaji udi wamba ne: “Ntu munange manaya a kuibidija mubidi bikole. Balongeshi betu ba malu a manaya bavua bakeba anu bua meme kubuela mu tshisumbu tshia tshilongelu tshietu. Bivua bikole bua meme kubenga.”

Baledi, mmushindu kayi unudi mua kuambuluisha bana benu bua kutantamenabu ntatu ya bungi idibu nayi? Yehowa mmunupeshe mudimu wa kubakolesha ne kubalongesha. (Nsu. 22:6; Ef. 6:4) Baledi badi batshina Nzambi badi ne bua kudienzeja bua kufikisha bana babu ku dikala ne dijinga dia kutumikila Yehowa. (Nsu. 6:20-23) Bobu benze nanku, nebabasake bua kubenga kulonda malu a pa buloba nansha padi baledi babu kabayipu.

Baledi badi ne lutatu lua kuikala eku bakebela bana biakudia, babakolesha bimpe ne batangila malu a mu tshisumbu. Kudi baledi badi badikoleshila bana nkayabu ne bakuabu badibu baluisha kudi babayabu anyi kudi bakaji babu badi kabayi bena Kristo. Nansha nanku, Yehowa udi ubalomba bua kukeba dîba dia kulongesha bana babu ne kubambuluisha. Kadi ntshinyi tshinudi mua kuenza bua kuambuluisha bana benu bua kabidikiji bena mulongo nabu, kabakuluki mu mateta ne kutantamena badi babatatshisha dituku dionso edi?

Badie bulunda ne Yehowa

Tshia kumpala, bansonga betu badi ne bua kumanya Yehowa ne kumumona bu muntu mulelela. Baledi badi ne bua kubambuluisha bua ‘kumona yeye udi kayi umueneka ku mêsu.’ (Ebelu 11:27) Vincent utudi batele kulu eku, udi uvuluka muvua baledi bende bamuambuluishe bua kudia bulunda ne Yehowa. Udi wamba ne: “Bakandongesha mushinga udi nawu disambila. Ndi mvuluka ne: kutuadijila pantshivua muana mutekete, mvua nsambila butuku buonso kumpala kua kulala. Yehowa  uvua muntu mulelela kundi.” Utuku usambila ne bana bebe anyi? Kuenaku mua kuikala uteleja bidibu bambila Yehowa padibu basambila nkayabu anyi? Badi ne tshilele tshia kuambulula anu mêyi amue amue anyi? Peshi badiku bamba malu adi aleja tshidibu bumvua bua Yehowa? Nuenu nuteleja masambila abu, nudi mua kumanya bikalabu badi benda bakolesha malanda abu ne Yehowa.

Bansonga badi kabidi bakolesha malanda abu ne Yehowa padibu badibadila Dîyi dia Nzambi. Cathleen utudi batele kulu udi wamba ne: “Kudibadila Bible mujima pantshivua muana nkungambuluishe. Kuvua kumpeshe dishindika dia ne: nansha bantu bobu banduisha, Yehowa udi unkuatshisha.” Bana bebe badiku ne ndongamu wa didibadila Bible anyi?​—Mus. 1:1-3; 77:12.

Bushuwa, bana bonso kabatu batumikila mibelu ya baledi babu mushindu umue to. Pashishe, malanda adibu badia ne Yehowa adi alonda bidimu biabu. Kadi baledi bobu kabayi babalongesha, mbikole bua kufikabu ku dimanya Yehowa ne kumumona bu muntu mulelela. Baledi badi ne bua kulongesha bana Dîyi dia Nzambi bua bafike ku dimanya meji a Yehowa miaba yonso idibu. (Dut. 6:6-9) Bana bebe badi ne bua kutuishibua ne: Yehowa udi ulama yonso wa kudibu.

Mushindu wa kuyukila nabu bimpe

Kuyukila ne bana kudi paku kubambuluisha bikole. Kadi kuyukila nabu kakuena kumvuija anu kubambila malu to. Kudi kumvuija kubela nkonko ne kuteleja ne lutulu mandamuna abu, nansha wowu mashilangane ne tshinudi basue banuandamune. Anne udi mamu wa bana babidi ba balume udi wamba ne: “Ntu mbela nkonko too ne pandi mfika ku diumvua meji abu ne ntatu idibu nayi.” Bana bebe batuku bamona ne: utu ubateleja bimpe padibu bakukuatshila malu anyi? Tanya utudi batele kulu udi wamba ne: “Baledi banyi bavua banteleja bimpe ne bavuluka malu atuvua tuyukila nabu. Bavua bamanye  mêna a balongi betu. Bavua bebeja malu avua abatangila ne makuabu atukavua bayukila nabu.” Kuteleja ne kuvuluka binudi nuyukila ne bana benu kudi kuambuluisha bua kuyukila bimpe.

Bena mu mêku a bungi mbamone ne: tshikondo tshia kudia ntshikondo tshimpe tshidibu mua kuyukila. Vincent udi wamba ne: “Kudia pamue kuvua ne mushinga wa bungi mu dîku dietu. Baledi betu bavua bajinga bua muntu yonso ikale ku mêsa pavuaku mushindu. Bavua batukandika bua kutangila televizion, kuteleja tshisanji anyi kubala patuvua tudia. Bu mutuvua tuyukila malu a tshianana dîba dituvua tudia pamue, bivua bimpetesha tshikondo tshia ditalala dituku dionso tshivua tshingambuluisha bua kutantamena ntatu imvua mpeta mu kalasa.” Udi wamba kabidi ne: “Bu mumvua ne tshibidilu tshia kuyukila ne baledi banyi patuvua tudia, tshivua ngumvua binkolela bua kuyukila nabu malu avua antonda to.”

Diebeja ne: ‘Ntu ndia ne bana banyi misangu bungi munyi ku lumingu?’ Wewe mushintulule tshibidilu tshiebe, udi mua kupeta mushindu wa kuyukila bimpe ne bana bebe.

Mushinga wa Ntendelelu wa mu dîku

Dilolo dia dituku dinutu nuenza Ntendelelu wa mu dîku didi mua kunuambuluisha bua kuyukila bimpe ne bana benu ne kubambuluisha bua kumanya mua kupita ne ntatu kampanda idibu nayi. Alan utudi batele kulu udi wamba ne: “Baledi banyi bavua badienzeja bua kumanya bidi munda muetu patuvua tulonga mu dîku. Bavua balongolola malu avua apetangana ne ntatu ituvua nayi.” Mamuende wa Alan udi wamba ne: “Misangu mikuabu dîba dia dilonga tuvua tuenza manaya avua ambuluisha bana betu bua kumanya mua kumvuija malongesha abu ne kuleja ne: malu avuabu bitabuja mmalelela. Bivua bibambuluisha bua kuikala ne dikima dia kutantamena bualu buonso buvua mua kubakuata.”

Bansonga kabena anu ne bua kubenga patupu tshidi bansonga nabu babambila ne kumbuka muaba udibu to. Badi ne bua kumanya mua kuandamuna nkonko bu mudi bua tshinyi ne bua tshinyi kanutu. Badi kabidi ne bua kumanya bimpe tshidibu ne bua kuenza  padibu babaseka bua tshitendelelu tshiabu. Bobu kabayi bamanye kumvuija malongesha abu, nebikale bikole bua bobu kulamata ntendelelu mulelela. Manaya mimpe a tshilejilu adi mua kubambuluisha bua kuikala ne dikima.

 Kazubu kadi mu dibeji dia 18 kadi kaleja amue malu anudi mua kuenza mu manaya panudi nuenza Ntendelelu wa mu dîku. Nuenze bua manaya aa enzeke anu mutu malu enzeka, ne nubele nkonko itu bantu bela. Pa kumbusha manaya a tshilejilu, nudi kabidi mua kukonkonona malu adi bilejilu bia mu Bible bilongesha. Kulonga ne bana ku mbelu mushindu eu nekubambuluishe bua kutantamena ntatu idibu bapeta mu kalasa anyi miaba mikuabu.

Ku mbelu kuenu kudi ditalala anyi?

Bana benu batuku bajinga kualukila ne lukasa ku mbelu patubu bapatuka mu kalasa anyi? Koku kuikala ditalala, nebibambuluishe bua kutantamena ntatu idibu bapeta matuku onso. Muanetu wa bakaji mukuabu udi mpindieu ku Betele udi wamba ne: “Pantshivua muana, bualu buvua butamba kungambuluisha buvua bua ne: kuetu kuvua ditalala. Nansha meme mupete bualu bubi bua mushindu kayi mu kalasa, mvua mumanye ne: pamvua ngalukila kuetu, malu onso avua enda bimpe.” Ku mbelu kuenu kutu bishi? Mmuaba udi ‘tshiji, kutapuluka ne mpata,’ peshi mmuaba udi mumanyike bua ‘dinanga, disanka ne ditalala’? (Gal. 5:19-23) Koku kakuyi ditalala, kuenaku mua kudienzeja bua kushintulula malu adi akengela bua bana bebe bikale badiumvuaku bimpe anyi?

Mushindu mukuabu wa kuambuluisha bana benu bua kutantamena ntatu nkubambuluisha bua kupeta balunda bimpe. Tshilejilu, udi mua kubikila bana betu ba bakaji ne ba balume ba mu tshisumbu badi bashindame mu ditabuja bua nuenu kujikija nabu lutetuku. Anyi udi mua kubikila batangidi bena ngendu anyi bana betu bakuabu badi mu mudimu wa ku dîba ne ku dîba bua kudia nabu. Udiku mumanye bamisionere anyi bena ku Betele badi mua kudia bulunda ne bana bebe, nansha biobi mu difundilangana mikanda anyi dibikilangana ku telefone anyi? Balunda ba mushindu eu badi mua kuambuluisha bana benu bua kuludika njila yabu bimpe ne kudifundila bipatshila mu mudimu wa Nzambi. Ela meji muvua bulunda bua mupostolo Paulo buambuluishe Timote pavuaye nsonga. (2 Tim. 1:13; 3:10) Buakamuambuluisha bua kudifundila bipatshila bimpe mu mudimu wa Nzambi.​—1 Kol. 4:17.

Ikala wela bana bebe kalumbandi

Yehowa udi usanka padiye umona bansonga balamata ku malu mimpe nansha mudibu babatatshisha kudi bena mu bulongolodi bua Satana. (Mus. 147:11; Nsu. 27:11) Kakuyi mpata, wewe pebe udi usanka paudi umona bansonga betu basungula njila muimpe. (Nsu. 10:1) Ambila bana bebe muudi udiumvua bua bualu buabu ne ikala ubela kalumbandi ne dinanga dionso. Yehowa udi upesha baledi tshilejilu tshimpe. Pavua Yezu mutambule, Yehowa wakamuambila ne: “Wewe udi Muana wanyi munanga, wewe udi unsankisha bimpe.” (Mâko 1:11) Mêyi a Tatuende aa avua mua kuikala mamupeshe bukole bua kutantamena ntatu ya bungi ikavuaye pa kupeta. Bia muomumue, ambila bana bebe muudi mubanange ne ikala wanyisha malu mimpe adibu benza.

Numanye ne: kanuena mua kulama bana benu ku ntatu yonso idibu bapeta to. Kadi nudi mua kubambuluisha bikole. Mushindu kayi? Nubambuluishe bua kudiabu bulunda ne Yehowa. Nubambuluishe bua bikala bayukila nenu badilekelele. Ikalayi nuenza Ntendelelu wa mu dîku mu mushindu muimpe ne nuenze bua ku mbelu kuenu kuikale ditalala. Nuenu benze nunku, nenuambuluishe bana benu bua kutantamena ntatu ya bungi idibu bapeta.

[Mêyi adi kuinshi]

[Kazubu/​Tshimfuanyi mu dibeji 18]

 MANAYA A TSHILEJILU ADI MUA KUBAMBULUISHA

Bilejilu bidi bilonda ebi bidi bileja imue ntatu itu bana betu balela bapeta. Nudi mua kulonda amue a ku malu aa bua kuenza manaya a tshilejilu panudi nuenza Ntendelelu wa mu dîku.

▸ Mulongeshi wa malu a manaya a dibidija mubidi udi wambila muanebe wa bakaji bua kubuela mu tshisumbu tshia tshilongelu.

▸ Badi bapesha muanebe wa balume makanya mu njila padiye ufuma mu kalasa.

▸ Bansongalume bakuabu badi bakanyina muanebe wa balume bua kumukuma bobu bamumona uyisha kabidi.

▸ Muanebe wa bakaji udi upetangana ne mulongi wabu padiye uyisha ku nzubu ne ku nzubu.

▸ Badi bapitshisha muanebe wa bakaji kumpala mu kalasa ne bamuebeja bua tshinyi katu ukosela dibendele mpala.

▸ Kudi nsongalume mukuabu udi upuekesha muanebe wa balume milongo misangu yonso bualu udi Ntemu.

[Tshimfuanyi mu dibeji 17]

Bana bebe batuku ne ndongamu wa didibadila Dîyi dia Nzambi anyi?

[Tshimfuanyi mu dibeji 19]

Utuku ubikila bantu bakadi bashindame mu ditabuja bua nuenu kujikija nabu lutetuku anyi?