Warmanchikta yanapasun sasachakuyninta atipananpaq

LLUMPAY sasachakuypim tarikunku mozo-sipaskunaqa. Satanaspa munaychakusqan mana allinkunapa chawpinpim kawsanku hinaspa sasachakunku ‘jovenkunapa munapayasqankuwanpas’ (2 Tim. 2:22; 1 Juan 5:19). Chaymantapas ‘Unanchaqninta yuyarinankupaq’ kallpanchakuptinkum, iñiyninkuta mana respetaqkuna burlakunku hinaspa mana allinta ruranankupaq hikutanku (Ecl. 12:1). Victor sutiyoq cristianom escuelanman risqanmanta yuyarispan, nin: “Testigo kasqayraykum sapa kuti pipas burlakuwaq otaq piñachiwaq. Wakinpiqa llumpayta hukmanyachiwaptinkum escuelaman riyta mana munarqanichu”, nispa. *

Mana allinkunata ruranankupaq hikutasqa kaspankupas, mozo-sipaskunaqa sasachakunkum hukkuna hina kayta munasqankuwan. Katy sutiyoq sipas Testigom nin: “Manam  gustoypaqchu hukmanta qawawasqankuqa”, nispa. Alan sutiyoq mozo cristianopas ninmi: “Estudiaqmasiykunam sapa kuti niwaqku semana tukuyta paykunawan lloqsinaykupaq, munarqanim paykunawan lloqsiytaqa”, nispa. Wakinkuqa munankupaschá imatapas gananankupaq escuelapi pukllayta, ichaqa yachankum paykunawan kayqa mana allin kasqanta chaymi mana pukllankuchu. Taniapas ninmi: “Munanim pukllaytaqa, profesorkunam hikutawaq pukllanaypaq. Manam ninaypaqmi sasachakurqani”, nispa.

Tayta-mamakuna, ¿imaynatam warmaykichikta yanapawaqchik sasachakuyta atipanankupaq? Jehová Diosmi kamachisunkichik paykunata yanapanaykichikpaq (Pro. 22:6; Efe. 6:4). Kallpanchakunaykichikmi Jehová Diosta sonqomanta kasukunankupaq (Pro. 6:20-23). Chaynapim paykunawan mana kaptikichikpas mana allin ruray munaykunata atipanqaku.

Manamá facilchu chay tiempollapi qollqe tariyqa, warmakunata uywayqa hinaspa congregacionpi rurayninchikta cumpliypas. Wakinkuqa chaytam sapallanku rurananku, mana iñiq qosan otaq señoran paypa contranpi churakuptinpas. Chaymantapas, Diosqa munanmi tayta-mamakuna tiempochakuspa wawa-churinkuta yachachinankuta hinaspa yanapanankutapas. Hinaptinqa, ¿imaynatam yanapawaqchik burlakuptinku, tentacionkuna kaptin hinaspa mana allinta rurananpaq hikutasqa kaspanku vencenankupaq?

Jehová Dioswan amistadninkum allin kanan

Puntataqa, churi-wawakunaqa yachanankum Jehová Dios cheqap kasqanta. Chaypaqqa ‘mana rikuna Diosta qawachkanmankupas hina’ kanankupaqmi yanapana (Heb. 11:27). Victorqa willantaqmi Dioswan allin amistad kananpaq tayta-maman yanapasqanmanta, ninmi: “Orakuy ancha allin kasqanmantam yachachiwarqaku. Warmachallaraq kaspaymi manaraq puñuchkaspay sapa tuta mañakuq kani. Diosqa cheqapmi  ñoqapaq karqa”, nispa. ¿Warmaykichikwan mañakunkichikchu? ¿Uyarinkichikchu mañakusqankuta? ¿Hina kaqllatachu sapa kuti mañakunku? ¿Mañakusqankupi qawachinkuchu Dios kuyasqankuta? Mañakusqankuta uyarispam yachankichik Dioswan amistadnin imayna kasqanmanta.

Chaynataq, Bibliata sapa punchaw leespankum Diosman astawan asuykunqaku. Katyqa nintaqmi: “Sipaschallaraq kaspay enteron Bibliata leesqaymi yanapawarqa hukkuna contraypi kaptinkupas Jehová Dios ñoqawan kasqanta yachanaypaq”, nispa. ¿Warmaykikuna tiempota rakirunkuñachu Bibliata sapa punchaw leenankupaq? (Sal. 1:1-3; 77:12.)

Manamá lliw mozo-sipaskunachu tayta-mamankupa yanapasqanman hina chaynallata ruranku. Wakinpiqa hayka watayoq kasqankumantam iñiyninkupi ñawparisqankuqa. Tayta-mamakuna mana yanapaptinqa manam cheqap kaqpaqchu Diosta qawanqaku. Tayta-mamakunaqa Diospa nisqankunatam warmankuman yachachinanku, chaynapi maypiña kaspankupas Diospa munasqanman hina ruranankupaq (Deu. 6:6-9). Warmaykichikkunaqa convencesqam kananku paykunapi Jehová Dios interesakusqanmanta.

Rimasqaykichikmi allinpuni kanan

Churi-wawakunataqa yanapanchiktaqmi paykunawan allinta rimaspapas, chayqa manamá rimayllachu. Aswanqa tapunanchikmi hinaspa pacienciawan uyarina, niwasqanchikkuna munasqanchikman hina mana kaptinpas. Iskay wawayoq Anam nin: “Tapukuykunatam rurani piensasqankutawan sasachakuyninkuta entiendenaykama”, nispa. ¿Uyarinkichikchu paykuna rimaptinku? Taniaqa nintaqmi: “Tayta-mamaymi allinta uyariwaq, yuyaqkum nisqaykunatapas. Yachaqkum estudiaqmasiykunapa sutinta hinaspam tapuwaqku imayna kasqankumanta  chaynataq paykunamanta rimasqayku asuntokunamantapas”, nispa. Chaymi, warmakunawan rimasqanchik allinpuni kananpaqqa uyarina hinaspa yuyana.

Achka familiakunam cuentata qokunku mikusqanku hora rimanankupaq allin kasqanta. Victormi nin: “Ñoqaykupaqqa mikuy horapi huñulla kayqa ancha allinpunim karqa. Kallpanchakurqanikum llapallayku kuska kanaykupaq. Mikuspaykuqa manam televisionta qawanaykuchu, radiotapas uyarinaykuchu nitaq leenaykupaschu karqa. Kusikuywan hinaspa hawkallam imamantapas rimaq kaniku, chaymi yanapawarqa escuelapi kaq sasachakuykunata qonqanaypaq”, nispa. Nintaqmi: “Mikuy horapi tayta-mamaywan sapa kuti rimasqayraykum mana manchakuspa imamantapas willakuq kani”, nispa.

Tapukuychik: “¿Hayka kutitam semanapi kuskayku mikuniku?”, nispa. Astawan chaynata ruraptikichikqa, aswan allinmi kanqa warmaykichikwan rimasqaykichik.

Allinpunim imayna contestanankupaq ensayayqa

Sapa semana familiawan Diosta yupaychaymi familiata yanapan aswan allinta rimanankupaq, mozo-sipaskunatapas yanapanmi sasachakuyninkunata atipanankupaq. Alanqa nintaqmi: “Estudiasqayku tiempotam tayta-mamayku servichikuqku imayna tarikusqaykuta yachanankupaq. Necesitasqaykuman hinam yachachikuykunata akllaqku”, nispa. Alanpa mamanmi nin: “Familiawan Bibliata estudiasqaykupim tiempota rakiq kaniku ensayanaykupaq. Chay rurasqaykum warmaykuta yanaparqa iñiyninkuta defiendenankupaq hinaspa creesqanku cheqap kasqanta qawachinankupaq. Chaynapim preparasqa tarikurqaku sasachakuykunata atipanankupaq”, nispa.

Mozo-sipaskunata estudiaqmasinkuna mana allinkunata ruranankupaq hikutaptinkuqa manachá “manam” nispallachu pasakunqaku. Yachanankum creesqankumanta imayna willayta hinaspa religionninmanta  burlakuptinku ima ruranankutapas. Chaynapim kallpanchasqa tarikunqaku Jehová Diosman sonqo kanankupaq. Ensayasqankum yanapanqa seguro hinaspa preparasqa kanankupaq.

 Chunka pusaqniyoq paginapi rikurimuq recuadropim qawachichkan Familiantin Diosta Yupaychanapaq tutapi warmaykichikwan imakunamanta ensayanapaq. Ensayasqaykichik allinpuni kananpaqqa paykunapa sasachakusqanman hina ruraychik. Estudiawaqchikmi Diosta ñawpaq tiempopi serviqkunapa ejemplonkumantapas. Ensayasqaykichikmi warmaykichikkunata yanapanqa escuelapi otaq maypipas sasachakuyninkuta atipanankupaq.

¿Wasikichikpi hawkayay kanchu?

¿Warmaykichikkuna munankuchu escuelankumanta wasikichikman kutimuyta? Wasikichikpi hawkayay kaptinqa churi-wawakunaqa yanapaytam tarinqaku sasachakuyninkuta atipanankupaq. Betel wasipi llamkaq huk cristianam nin: “Wasiypim amparasqa tarikurqani, chaymi yanapawarqa escuelapi sasachakuyniyta atipanaypaq. Escuelapi llumpay sasachakuypi tarikuspaypas wasiyman chayaruspayqa hawkayaytam tarirqani”, nispa. ¿Imaynataq wasikichikpi kankichik? ¿Piñanakuyta, lirianakuyta hinaspa rakinakuytachu hatarichinkichik, icha ‘kuyanakuqchu, kusikuqchu [hinaspa] hawkallachu’ kankichik? (Gal. 5:19-23.) Familiaykichikpi mana hawkayay kaptinqa, kallpanchakuychik wawa-churikichik wasikichikpi amparasqa tarikunankupaq.

Churi-wawakunataqa yanapachwantaqmi allin amistadkunawan reqsinakunankupaqpas. ¿Manachu kusirikunaykichikpaq tukuy sonqonkumanta Diosta kuyaq cristianokunata wasikiman invitawaq? Ichapas mikunaykichikpaq invitawaq congregacionkunata watukuq ancianota otaq tukuy tiemponkuwan Diosta serviqkunatapas. ¿Reqsinkuchu churi-wawaykikuna misionerokunata otaq Betelpi llamkaqkunata chaynapi cartawan, Internetwan otaq telefonowan rimaspanku amistadta ruranankupaq? Chayna amistadkunam yanapanqa allin ñanpi purinankupaq hinaspa Dios serviyninkupi ñawparinankupaqpas. Yuyariychik, Timoteo mozollaraq kachkaptin Pablopa yanapasqanmanta (2 Tim. 1:13; 3:10). Allin amistad kasqankum Timoteota yanaparqa Diosta astawan servinanpaq (1 Cor. 4:17).

Churi-wawaykichikta alabaychik

Satanaspa munaychakusqanpi mozo-sipaskuna allinta ruranankupaq kallpanchakusqankuta qawaspanmi Diosqa kusikun (Sal. 147:11; Pro. 27:11). Qamkunapas kusikunkichikchá allin rurayta akllaptinkuqa (Pro. 10:1). Kuyasqaykichikta qawachiychik hinaspa kallpanchaychik. Jehová Diosmi allin ejemplo tayta-mamakunapaq. Jesus bautizakuptinmi nirqa: “Qanmi kanki kuyasqay Churiy, qamraykum kusisqa kachkani”, nispa (Mar. 1:11). Maynatachá Taytanpa chayna nisqanqa Jesusta kallpancharqa, payqa achka sasachakuykunapim tarikunan karqa. Qamkunapas chaynata ruraychik: niychik kuyasqaykichikta hinaspa paykunarayku kusisqa kasqaykichiktapas.

Manamá burlakusqankumanta, mana allinkuna ruranankupaq hikutasqankumantaqa tukuy tiempo amparaytaqa atinkichikchu. Ichaqa yachachiwaqchikmi sasachakuykunata atipanankupaq. Yanapaychik Jehová Dioswan amistad kanankupaq. Kallpanchakuychik rimasqaykichik allinpuni kananpaq, familiawan estudiasqaykichik paykunapaq hina kananpaq chaynataq wasipi hawkayay kananpaqpas. Chaynata ruraptikichikmi, wawa-churikichikkuna preparasqa kanqaku sasachakuykunata atipanankupaq.

[Willakuy]

[18 kaq paginapi dibujo hinaspa recuadro]

 ENSAYANAPAQ

Familiantin Diosta Yupaychana tutapi imakuna ensayanamanta qawasun.

▸ Warmaykichiktam profesornin ninman escuelanmanta pukllananpaq.

▸ Wasikiman kutimuchkaptinmi warmaykiman estudiaqmasin cigarrota munachinman.

▸ Warmaykitam huk warmakuna amenazanman kaqlla predicaqta rikuspanku maqarunankupaq.

▸ Wasin-wasin predicachkaptinmi warmi warmaykipa estudiaqmasin lloqsiykamunman.

▸ Warmaykitam ninmanku estudiaqmasinkunapa ñawpaqninpi banderata mana saludasqanmanta rimananpaq.

▸ Warmayki Testigo kasqanmanta warmamasin burlakunman.

[17 kaq paginapi dibujo]

¿Warmaykikuna tiemponkuta rakirunkuñachu Bibliata sapakama leenankupaq?

[19 kaq paginapi dibujo]

¿Kusirikunaykichikpaq invitankichikchu Dios kuyaq iñiqmasikichikta?