Buligi an Iyo mga Anak nga Maatubang an Ira Damu nga Problema

DURO nga pagsulay an inaatubang han aton mga batan-on. Kalyap an espiritu han maraot nga kalibotan ni Satanas, ngan kinahanglan nira atohan an “binatan-on nga mga pagbati.” (2 Tim. 2:22, Maopay nga Sumat; 1 Juan 5:19) Dugang pa, tungod kay determinado hira nga ‘hinumdoman an ira Magburuhat,’ gin-iilob nira an pagtamay—panraugdaog pa ngani—hadton nakontra ha ira pagtoo. (Ekles. 12:1) Han nahinumdoman ni Vincent an iya pagkabatan-on, hiya nagsiring: “Tungod kay Saksi ako, pirme ako ginraraugdaog, gintatarhog, o gin-aaway. Damu ka beses nga duro gud ito salit diri ko na karuyag nga umiskwela.” *

Dugang pa ha mga pagsulay, bangin kinahanglan liwat atohan han aton mga anak an ira hingyap nga magin pariho han ira mga igkasi-batan-on. “Makuri gud kon para ha ira naiiba  ka,” siring han tinedyer nga bugto nga hi Cathleen. An batan-on nga hi Alan nagsiring: “Agsob ako imbitaron han akon mga kaeskwela ha pamasyada kon kataposan han semana, ngan karuyag ko gud umupod.” Labot pa hito, bangin makuri pugngan han mga batan-on an duro nga hilig nga umapi ha isport ha eskwelahan salit masayon la hira magkaada diri maopay nga kasangkayan. “Mahilig ako ha isport,” siring ni Tanya. “Ginpipirit ako pirme han mga coach ha eskwelahan nga umapi ha uyag. Makuri gud an pagdiri.”

Paonan-o niyo mabubuligan an iyo mga anak nga maatubang an ira damu nga problema? Ginsusugo ni Jehova an mga kag-anak nga giyahan an ira mga anak. (Prob. 22:6; Efe. 6:4) Tumong han mga kag-anak nga may kahadlok ha Dios nga mapatubo ha kasingkasing han ira mga anak an hingyap ha pagsugot kan Jehova. (Prob. 6:20-23) Pinaagi hito, mapapagios hira nga atohan an mga pagsulay bisan kon diri hira nakikita han ira mga kag-anak.

Makuri para ha mga kag-anak nga durunganon an pagpakabuhi, pag-ataman han pamilya, ngan pagtuman ha mga buruhaton ha kongregasyon. Ginbubuhat ito han iba sugad nga solo nga kag-anak o samtang ginkukontra han diri Saksi nga padis. Bisan pa hito, karuyag ni Jehova nga tutdoan ngan buligan nira an ira mga anak. Salit, paonan-o niyo mabubuligan hira nga maatohan ha kada adlaw an mga pagsulay, panraugdaog, ngan impluwensya han ira igkasi-batan-on?

Pagkaada Duok nga Relasyon kan Jehova

Siyahan ha ngatanan, kinahanglan makilala han mga batan-on hi Jehova sugad nga tinuod nga Persona. Sadang buligan hira nga makita an Dios nga ‘diri nakikita.’ (Heb. 11:27) Hi Vincent nga gin-unabi na, nahinumdom kon paonan-o hiya ginbuligan han iya mga kag-anak basi magkaada duok nga relasyon kan Jehova. Hiya nagsiring: “Gintutdoan ako nira nga importante gud an pag-ampo. Nahinunumdoman ko nga tikang ha akon kabata, nag-aampo ako kan Jehova kada gab-i antes kumaturog. Para ha akon, tinuod gud hi Jehova.” Nag-aampo ba kamo  upod an iyo mga anak? Mahimo ba niyo pamatian an ira mga pag-ampo? An ira ba mga pulong ginsubad la? Naipapahayag ba nira kon ano gud an ira inaabat mahitungod kan Jehova? Kon pamamatian niyo an ira mga pag-ampo, hibabaroan niyo kon tinuod ha ira hi Jehova.

An pagbasa han Pulong han Dios usa pa nga importante nga paagi basi magin duok kan Jehova an mga batan-on. Hi Cathleen nga gin-unabi na, nagsiring: “Nakabulig ha akon an padayon nga pagbasa han Biblia tikang ha kabata. Nagparig-on ito ha akon nga bisan kontrahon ako han mga tawo, hi Jehova nadapig ha akon.” May-ada ba kalugaringon nga eskedyol ha pagbasa han Biblia an iyo mga anak?—Sal. 1:1-3; 77:12.

Oo, iba-iba an reaksyon han mga anak ha pagtutdo han mga kag-anak. Nadepende liwat ha ira edad an pag-uswag ha espirituwal. Kondi, kon diri hira tututdoan, diri nira makikilala hi Jehova sugad nga tinuod nga Persona. Ha ngatanan nga higayon, kinahanglan talinguhaon han mga kag-anak nga masabtan gud han ira mga anak an katutdoan ni Jehova basi mabatian nira hiya, siring pa. (Deut. 6:6-9) Sadang hira tumoo nga nagtatagad gud hiya ha ira.

Kon Paonan-o Magigin Mapulsanon an Komunikasyon

An komunikasyon importante liwat basi mabuligan an iyo mga anak. Syempre, an maopay nga komunikasyon diri kay pakiistorya la ha ira. Nag-uupod ito hin pagpakiana ngan pagpamati hin maopay ha ira mga baton bisan kon diri ito an imo karuyag mabatian. “Nagpapakiana ako tubtob nga masabtan ko an ira ginhuhunahuna ngan ginbubuhat,” siring ni Anne nga may duha nga anak. Inaabat ba han iyo mga anak nga ginpapamatian gud hira? Hi Tanya nga gin-unabi na, nagsiring: “An akon mga kag-anak namamati gud ngan nahinunumdom han amon gin-istoryahan. Maaram hira han ngaran han akon mga kaklase. Nangungumusta hira mahitungod ha ira ngan ha iba nga amon gin-istoryahan  hadto.” An pamati ngan paghinumdom importante ha malampuson nga komunikasyon.

Damu nga pamilya an nakaobserba nga an pangaon maopay nga higayon ha mapulsanon nga pag-iristorya. “Importante ha amon pamilya an durungan nga pangaon,” siring ni Vincent. “Kinahanglan an bug-os nga pamilya ada ha lamesa kon posible. Diri puydi magkita hin TV, mamati hin radyo, o magbasa samtang nangangaon. Tungod kay kasagaran nga nakakarepresko an iristorya, nakabulig ito ha akon nga maatubang an mga problema ngan pagsulay ha eskwelahan kada adlaw. Pirme kami nag-iiristorya han akon mga kag-anak samtang nangangaon ngan nakabulig liwat ito ha akon nga magin komportable ha pakiistorya ha ira kon may-ada ako problema.”

Pakianhi an iyo kalugaringon, ‘Pira ka beses ha usa ka semana durungan nga nangangaon an amon pamilya?’ Mas magkakaada ba kamo panahon ha pakiistorya hin maopay ha iyo mga anak kon maghihimo kamo hin mga pagbag-o?

Kon Kay Ano nga Importante Gud an Pagpraktis

Ha sinemana nga Pagsingba han Pamilya may-ada higayon an ngatanan ha pag-iristorya hin maopay ngan nakakabulig ito ha kabataan nga maatubang an partikular nga problema. Hi Alan nga gin-unabi na, nagsiring: “Ha pag-aram han pamilya gin-aaghat kami han amon mga kag-anak nga mag-istorya han amon inaabat. Katapos, ira ginhihisgotan an mga punto nga angayan para hito.” An nanay ni Alan nagsiring: “Ha amon pag-aram may-ada kami pagpraktis. Nakabulig ito ha amon mga anak nga mahibaro ha pagdepensa han ira pagtoo ngan ha pagpamatuod nga an ira gintotoohan amo an kamatuoran. Salit nagkaada hira hin kompyansa nga ginkikinahanglan ha pagsulbad han ira mga problema.”

Kon an kabataan ginsusulay han igkasi-batan-on, kasagaran nga diri igo an pagdiri la ngan pagbaya dayon. Kinahanglan mahibaro hira pagbaton han mga pakiana sugad han kay ano ngan kay ano nga diri. Kinahanglan liwat nga maaram hira han ira bubuhaton kon  gintatamay tungod han ira pagtoo. Kon diri nira madidepensahan an ira gintotoohan, diri hira makakatindog hin marig-on dapig ha tinuod nga pagsingba. Makakabulig an pagpraktis basi mahibaro hira ha pangatadongan.

Mababasa ha  kahon ha pahina 18 an pipira nga kahimtang nga mahimo bansayon durante han Pagsingba han Pamilya. Ipahiuyon ini ha aktuwal nga nahitatabo pinaagi ha pag-aghat han imo mga anak nga isaysay kon kay ano nga ito an ira baton. Samtang nagpapraktis hisguti an praktikal nga mga leksyon nga igintututdo han mga ehemplo ha Biblia. Pinaagi hito nga pagbansay sigurado nga maaandam an iyo mga anak nga maatubang an mga problema ha eskwelahan ngan ha bisan diin.

Sugad ba hin Arayopan an Iyo Balay?

Nalilipay gud ba an iyo mga anak nga umuli dayon katapos han ira klase kada adlaw? Kon an iyo balay sugad hin arayopan, mabulig ito ha ira nga maatubang an ira mga problema ha kada adlaw. Usa nga bugto nga nag-aalagad na ha Bethel yana an nagsiring: “Han batan-on pa ako, nakabulig gud ha akon an pagin sugad hin arayopan han amon balay. Bisan ano kakuri an kahimtang ha eskwelahan, maaram ako nga pag-abot ko ha balay, mag-oopay na an akon pag-abat.” Ano an kasagaran nga kahimtang ha iyo balay? Agsob ba nga nahitatabo an “mga kasina, mga paglaris, [ngan] mga pagbulag,” o pirme ito may-ada “gugma, kalipay, [ngan] pakigdait”? (Gal. 5:19-23) Kon agsob nga waray kamo kamurayawan, nangangalimbasog gud ba kamo nga maghimo hin mga pagbag-o basi an iyo balay magin sugad hin arayopan han iyo mga anak?

An usa pa nga makakabulig ha iyo mga anak ha pag-atubang han mga problema amo an paghimo hin paagi nga magkaada hira makaparig-on nga kasangkayan. Pananglitan, mahimo ba niyo iupod ha pagpahalibway han iyo pamilya an pipira nga iyo kakongregasyon nga hamtong ha espirituwal? O mahimo ba niyo imbitaron ha simple nga pangaon ha iyo balay an paramangno han sirkito o iba pa nga aada ha bug-os panahon nga pag-alagad? May-ada ba kamo kilala nga mga misyonero o Bethelite nga puydi magin sangkay han iyo mga anak, bisan pinaagi la han surat, e-mail, o pakiistorya ha telepono? Makakabulig hira ha iyo mga anak nga magbuhat hin husto ngan magkaada espirituwal nga mga tumong. Hinumdumi an maopay nga impluwensya ni apostol Pablo ha batan-on nga hi Timoteo. (2 Tim. 1:13; 3:10) An ira pagin duok nakabulig kan Timoteo nga makab-ot an iya espirituwal nga mga tumong.—1 Kor. 4:17.

Kumendasyoni an Iyo mga Anak

Nalilipay hi Jehova ha mga batan-on nga determinado pagbuhat han husto bisan pa han mga pagsulay ha kalibotan ni Satanas. (Sal. 147:11; Prob. 27:11) Sigurado nga nalilipay liwat kamo nga ginpipili han aton mga batan-on an husto nga pagkinabuhi. (Prob. 10:1) Isumat ha iyo mga anak an iyo inaabat mahitungod ha ira ngan mahigugmaon nga kumendasyoni pirme hira. Hi Jehova nagpakita hin maopay nga susbaranan ha mga kag-anak. Han ginbawtismohan hi Jesus, hi Jehova nagsiring: “Ikaw amo an akon Anak nga hinigugma; ha imo nalilipay gud ako.” (Mar. 1:11) Sigurado nga an ginsiring han iya Amay nagparig-on gud ha iya ha pag-atubang ha damu nga kasakitan nga maabot! Ha pariho nga paagi, sadang niyo isumat ha iyo mga anak nga hinigugma niyo hira, ngan kumendasyoni hira han ira nabubuhat.

Syempre, diri niyo bug-os nga mapapanalipdan an iyo mga anak ha mga pagsulay, panraugdaog, ngan pagtamay. Bisan pa hito, daku gud an iyo maibubulig ha ira. Ha ano nga paagi? Buligi hira nga mapatubo an duok nga relasyon kan Jehova. Pangalimbasugi nga magkaada kamo panahon ha pag-iristorya hin maopay. Pahimulusi an Pagsingba han Pamilya, ngan talinguhaa nga magin sugad hin arayopan an iyo balay. Hito nga paagi, sigurado nga maaandam an iyo mga anak ha pag-atubang han ira mga problema.

[Footnote]

[Kahon/Retrato ha pahina 18]

 MAKAKABULIG AN PAGPRAKTIS

Ini an pipira han sitwasyon nga naieksperyensyahan han aton mga batan-on. Mahimo ba niyo praktison ini ha iyo Pagsingba han Pamilya?

▸ Ginsisidngan han coach an iyo anak nga babaye nga umapi ha isport ha eskwelahan.

▸ Gintatanyagan hin sigarilyo an iyo anak nga lalaki han tipauli hiya tikang ha eskwelahan.

▸ Gintatarhog hin mga batan-on an iyo anak nga lalaki nga kakastiguhon hiya kon magsangyaw utro.

▸ Samtang nagsasangyaw an iyo anak nga babaye, iginkita niya an iya kaeskwela.

▸ Ginpapasaysay an iyo anak nga babaye ha atubangan han iya mga kaklase kon kay ano nga diri hiya nasaludo ha bandera.

▸ Usa nga batan-on an nagtatamay pirme han iyo anak nga lalaki tungod kay Saksi hiya.

[Retrato ha pahina 17]

May-ada ba kalugaringon nga eskedyol ha pagbasa han Biblia an iyo mga anak?

[Retrato ha pahina 19]

Igin-uupod ba niyo ha iyo mga pagpahalibway an mga hamtong ha espirituwal?