!Rul Blong Jeova i Win!
!Rul Blong Jeova i Win!
“God ya we i hae we i hae, hem i rulum olgeta king long wol ya.”—DAN. 4:17.
1, 2. ?Wanem i soemaot se rul blong man i foldaon finis?
!RUL blong man i foldaon finis! Hemia i klia nomo. Wan bigfala risen blong samting ya, hemia from we ol man oli no gat waes we oli nidim blong oli save rul gud. Tede, yumi luksave klia we rul blong man i foldaon from we plante rula oli ‘tingbaot olgeta nomo, oli wantem mane tumas, oli man blong tok flas we tingting blong olgeta i go antap tumas, oli no save tingbaot God, oli man blong mekem i strong tumas oltaem long ol narafala man, oli man blong spolem nem blong narafala man, oli man blong lusum hed, oli wael olgeta, oli no wantem fasin we i gud, oli agens long hem, oli man blong spolem ol fren blong olgeta mo oli praod tumas.’—2 Tim. 3:2-4.
2 Longtaem bifo, faswan papa mo mama blong yumi tufala i sakemaot rul blong God. Taem tufala i mekem olsem, maet tufala i ting se tufala i jusum rod we tufala nomo i save bos long tufala, be samting we i rili hapen se tufala i putum tufala aninit long rul blong Setan. Blong sikis taosen yia, Setan we i “rulum wol ya,” i bos long ol man nao oli no rul gud nating. Ale, samting ya i mekem se ol man oli kasem trabol we i nogud bitim mak olsem yumi luk tede. (Jon 12:31) Wan buk (The Oxford History of the Twentieth Century) i tokbaot laef blong ol man tede, i talem se, i blong nating nomo we yumi “lukaot wan wol we i stret gud.” Buk ya i eksplenem se: “Yumi no save faenem wan wol olsem. Mo antap long hemia, taem man i stap traehad blong wokem wan wol olsem, oltaem i gat bigfala trabol, ol gavman oli bos strong tumas long laef blong ol man, mo ol faet oli kamaot we oli nogud olgeta.” !Toktok ya i soemaot klia we rul blong man i foldaon finis!
3. ?Rul blong God bambae i olsem wanem sipos Adam mo Iv tufala i no mekem sin?
3 !Sore tumas we faswan papa mama blong yumi tufala i sakemaot rul we i moagud, hemia rul blong God! I tru se yumi no save olsem wanem Jeova bambae i rulum wol sipos Adam mo Iv i bin stap tru long hem. Be yumi sua fulwan se sipos olgeta man long wol oli agri blong letem Jeova i rulum olgeta, bambae rul ya i stanap long lav mo i mekem i sem mak long olgeta man. (Wok 10:34; 1 Jon 4:8) From we Jeova i gat bigfala waes, yumi save sua tu se sipos ol man oli bin stap aninit long rul blong hem, bambae i no save gat ol mastik ya olsem ol rula blong wol oli stap mekem tede. Rul blong God bambae i givim evri samting long ol man blong “mekem olgeta evriwan oli harem gud.” (Sam 145:16) Yes, rul ya bambae i stret gud. (Dut. 32:4) !Sore tumas we ol man oli sakemaot rul ya!
4. ?Jeova i letem Setan blong i rul kasem wanem mak?
4 I gud blong tingbaot se nating we Jeova i letem ol man blong oli traem rul long olgeta, hem i neva lego raet we hem i gat blong rul long ol man long heven mo wol. Ol samting we i hapen long king blong Babilon i fosem hem tu blong luksave samting ya, nao hem i talem se: “God ya we i hae we i hae, hem i rulum olgeta king long wol.” (Dan. 4:17) Long en blong bisnes ya, Kingdom blong God bambae i mekem samting we God i wantem i kamtru. (Mat. 6:10) I tru, se blong smoltaem, Jeova i letem Setan i stap olsem “god blong wol ya,” blong givim wan ansa long hem from kwestin we hem i stanemap agens long God long Iden bifo. (2 Kor. 4:4; 1 Jon 5:19) Nating se i olsem, Setan hem i naf blong rul kasem mak we Jeova i letem nomo. (2 Kron. 20:6; skelem Job 1:11, 12; 2:3-6.) Mo oltaem, i gat sam man we oli jusum blong stap aninit long God, nating se oli laef long wol ya we Enemi blong God i rul long hem.
God i Rul Long Ol Man Isrel
5. ?Wanem promes we ol man Isrel oli mekem wetem God?
5 Stat long taem blong Ebel go kasem taem we Isrel i kam wan neson, i gat plante man lelebet we oli mekem wosip long Jeova mo obei long ol tok blong hem. (Hib. 11:4-22) Long taem blong Moses, Jeova i mekem wan promes wetem ol pikinini blong Jekob, nao oli kam neson blong Isrel. Long yia 1513 B.K.T., * ol man Isrel oli agri se Jeova bambae i Rula blong olgeta, wetem olgeta we oli kamaot biaen long olgeta. Ale oli talem se: “Bambae mifala i mekem olgeta samting we Hae God i talem.”—Eks. 19:8.
6, 7. ?Baebol i tokbaot taem we God i rulum ol man Isrel se i olsem wanem?
6 Jeova i gat wan tingting taem hem i jusum ol man Isrel blong oli kam ol man blong hem. (Ridim Dutronome 7:7, 8.) Jeova i no jusum ol man Isrel blong mekem laef blong olgeta i gud nomo. Hem i jusum olgeta tu from samting we i moa impoten, hemia blong leftemap nem mo hae rul blong hem. Ol man Isrel oli luk ol samting we Jeova i mekem we i soemaot se Jeova nomo i trufala God. (Aes. 43:10; 44:6-8) Taswe, Jeova i talem long neson ya se: ‘Yufala i tabu, yufala ol man blong mi. Mi mi jusumaot yufala finis long wol ya, blong yufala nao i prapa man blong mi.’—Dut. 14:2.
7 Taem God i rulum ol man Isrel, hem i tingbaot se olgeta oli no stret gud olgeta. Be ol loa blong Hem oli stret gud olgeta mo oli soemaot long ol man Isrel, ol fasin blong Man we i Givim ol loa ya. Ol komanmen we Jeova i talem long Moses blong hem i talemaot long ol man Isrel, oli soemaot klia se Jeova i tabu, i lavem stret fasin, i rere blong fogivim man, mo hem i gat longfala tingting. Biaen, long taem blong Josua mo ol man we oli laef semtaem wetem hem, neson ya i obei long ol tok blong Jeova, nao oli stap long pis mo Jeova i blesem olgeta bigwan. (Jos. 24:21, 22, 31) Taem ya long histri blong ol man Isrel i soemaot se rul blong Jeova i win.
Rul Blong Man i Karem Nogud Frut
8, 9. ?Wanem samting we i no waes nating we ol man Isrel oli askem long God, mo wanem frut i kamaot from?
8 Taem ol yia oli stap pas, ol man Isrel oli tanem baksaed plante taem long rul blong God nao God i no moa protektem olgeta. Oli gohed olsem gogo oli talem long profet Samuel se, oli wantem se wan man we oli save luk hem i kam king blong olgeta. Jeova i talem long Samuel blong folem tingting blong olgeta. Be Jeova i talem tu se: “I no yu we olgeta oli no wantem, be mi ya. Oli no wantem blong mi mi King blong olgeta.” (1 Saml. 8:7) Nating se Jeova i letem ol man Isrel blong oli gat wan king we oli save luk hem, be hem i givim woning long olgeta se bambae oli harem nogud aninit long rul blong wan man.—Ridim 1 Samuel 8:9-18.
9 Ol samting we i hapen long ol man Isrel i soemaot se woning we Jeova i givim i tru. Taem wan man i rul long Isrel olsem king blong olgeta, oli kasem plante bigfala problem, speseli taem king ya i no moa obei long Jeova. Taem yumi tingbaot ol trabol we ol man Isrel oli kasem, yumi no sapraes se long ol yia we oli pas finis kam kasem tede, ol gavman blong man we oli no save Jeova, oli no naf blong mekem ol man oli harem gud blong olwe. I tru se sam man blong politik oli askem long God blong i blesem traehad blong olgeta blong kasem pis mo seftaem. ?Be olsem wanem God i save blesem olgeta we oli no wantem stap aninit long rul blong hem?—Sam 2:10-12.
Wan Niufala Neson Aninit Long Rul Blong God
10. ?From wanem God i jusumaot wan narafala grup blong man blong i tekem ples blong neson blong Isrel?
10 Neson blong Isrel i soemaot se hem i no wantem stap tru long Jeova. Samtaem biaen, oli sakemaot Mesaea ya we God i makemaot, mo Jeova tu i sakemaot olgeta mo i jusumaot wan narafala grup blong man, blong mekem wan niufala neson we bambae i tekem ples blong neson blong Isrel. Olsem nao, long yia 33 K.T., niufala neson ya i stat, hemia Kristin kongregesen blong ol man we Jeova i makemaot olgeta wetem tabu spirit blong hem. Kongregesen ya i wan niufala neson we i stap aninit long rul blong Jeova. Pol i tokbaot neson ya se “Isrel blong God.”—Gal. 6:16, NW.
11, 12. ?Wanem samting we i sem mak long saed blong Isrel bifo mo “Isrel blong God”?
11 Long saed blong prapa neson blong Isrel mo “Isrel blong God,” i gat sam samting we oli defdefren, mo sam samting we oli sem mak. Tu samting we i mekem Kristin kongregesen i defren long Isrel bifo, hemia se i no gat wan man long wol we i king blong hem, mo hem i no nidim blong givim ol anamol olsem sakrefaes blong tekemaot sin blong ol man. Wan samting we i sem mak long neson blong Isrel wetem Kristin kongregesen, hemia se oli gat ol olfala man no ol elda we oli lukaot long olgeta. (Eks. 19:3-8) Ol Kristin elda ya oli no rul long ol sipsip blong God. Defren olgeta, oli lukaot long kongregesen mo oli lidim ol Kristin wok. Wetem lav, oli lukaotgud long ol wanwan man long kongregesen, oli soem ona mo respek long olgeta.—2 Kor. 1:24; 1 Pita 5:2, 3.
12 Taem ol man long grup ya blong “Isrel blong God” mo ol fren blong olgeta hemia ol “narafala sipsip,” oli tingting dip long fasin we God i soemaot long ol man Isrel bifo, samting ya i mekem we oli lavem tumas Jeova mo fasin blong hem blong rul. (Jon 10:16) Olsem nao, ol stori blong ol man Isrel bifo oli soemaot se ol man we oli rul long olgeta oli pulum olgeta blong oli mekem samting we i gud no samting we i nogud. Samting ya i givhan long olgeta we oli gat wok blong lidim ol Kristin se, nating we oli no ol rula olsem ol king blong Isrel bifo, be oltaem oli mas soemaot wan gudfala eksampol long saed blong bilif.—Hib. 13:7.
?Olsem Wanem Jeova i Rul Tede?
13. ?Wanem bigfala samting i hapen long yia 1914?
13 Ol Kristin oli stap talemaot tede se rul blong man bambae i finis i no longtaem. Long yia 1914, Jeova i putumap Kingdom blong hem long heven we Jisas Kraes i King blong hem. Long taem ya, hem i givim paoa long Jisas blong i go ‘faet, blong bambae i win.’ (Rev. 6:2) God i talem long niufala King ya se: “Yu bambae yu rulum ol enemi blong yu.” (Sam 110:2) Sore tumas, ol neson oli stap strong blong no wantem stap aninit long rul blong Jeova. Oli gohed blong mekem ol samting olsem se “i no gat God nating.”—Sam 14:1.
14, 15. (a) ?Olsem wanem Kingdom blong God i rulum yumi tede? ?Taem yumi tingbaot samting ya, wanem ol kwestin we i gud yumi askem? (b) ?Olsem wanem yumi luksave tede se rul blong God i beswan?
14 Sam memba blong “Isrel blong God” oli laef yet tede, mo oli olsem ol brata blong Jisas. Olgeta ya oli gohed blong wok olsem ol “man blong karem tok blong Kraes.” (2 Kor. 5:20) Jisas i putumap grup blong olgeta olsem wan slef we i stret mo waes. Slef ya i givimaot save blong God we i olsem kakae mo i lukaotgud long olgeta we tabu spirit i makemaot olgeta, wetem bigfala kampani blong ol Kristin we naoia namba blong olgeta i kasem plante milian finis, mo we oli gat janis blong laef olwe long wol. (Mat. 24:45-47, NW; Rev. 7:9-15) Ol blesing we ol trufala man blong Jeova tede oli kasem, oli soemaot klia we Jeova i glad long wok blong slef ya.
15 Yumi wanwan i mas askem se: ‘?Mi mi luksave wok we mi mas mekem insaed long Kristin kongregesen? ?Mi mi rili sapotem rul blong Jeova? ?Mi mi glad blong stap aninit long rul blong Kingdom blong Jeova? ?Mi mi gat strong tingting blong gohed blong tokbaot Kingdom blong God long ol narafala, kasem mak we mi mi naf blong mekem?’ Olsem wan grup, yumi glad blong letem Hed Kampani i lidim yumi mo blong wokgud wetem ol elda long ol kongregesen. Long rod ya, yumi soemaot se yumi sapotem rul blong God. (Ridim Hibrus 13:17.) Taem yumi glad blong stap aninit long rul blong Jeova, samting ya i mekem se, nating we wol i no gat fasin joengud, be yumi ol Kristin yumi joengud long fulwol. Samting ya i mekem se i gat pis mo stret fasin tu, i givim ona i go long Jeova, mo i soemaot se rul blong Jeova i beswan.
Rul Blong Jeova i Win
16. ?Evri man tede oli mas jusum wanem?
16 I no longtaem nao, kwestin ya we i bin kamaot long garen blong Iden bambae i kasem ansa blong hem. Taswe, naoia i taem we ol man oli mas mekem wan desisen. Wanwan man i mas jusum sipos hem i wantem we Jeova i rul long hem, no i wantem we man i rul long hem. Yumi gat janis blong halpem ol man we oli gat tingting daon blong oli jus gud. I no longtaem, long Amagedon, rul blong Jeova bambae i tekem ples blong ol gavman blong man we Setan i bos long olgeta, mo rul blong Jeova bambae i stap blong olwe. (Dan. 2:44; Rev. 16:16) Rul blong man bambae i finis, mo Kingdom blong God bambae i rul long fulwol. Rul blong Jeova bambae i win fulwan.—Ridim Revelesen 21:3-5.
17. ?Wanem ol samting we oli save halpem man we i gat tingting daon, blong mekem wan gudfala desisen long saed blong rul we hem i wantem?
17 Olgeta we oli no mekem wan stret desisen yet blong sapotem rul blong Jeova, oli mas tokbaot desisen ya long prea, mo oli mas tingbaot ol blesing we rul blong God bambae i karem i kam long ol man. Rul blong man i no naf blong finisim problem blong raf fasin we wan haf blong hem hemia wok blong ol teroris. Rul blong God bambae i spolem olgeta rabis man long wol ya. (Sam 37:1, 2, 9) Rul blong man i mekem ol rabis faet oli kamaot, be rul blong God bambae i mekem “ol faet i finis long olgeta ples long wol.” (Sam 46:9) !Rul blong God bambae i putumbak pis bitwin ol man mo ol anamol tu! (Aes. 11:6-9) Aninit long rul blong man, ol man oli pua mo oli hanggri, be rul blong God bambae i finisim samting ya. (Aes. 65:21) Mo tu, nating se ol rula blong wol ya oli wantem finisim sik mo ded, oli no naf blong mekem olsem. Be aninit long rul blong God, ol man we oli olfala mo we oli sik bambae oli kam yangfala bakegen, mo bodi blong olgeta bambae i strong. (Job 33:25; Aes. 35:5, 6) Yes, wol ya bambae i kam wan paradaes, mo ol dedman bambae oli laef bakegen long ded tu.—Luk 23:43, NW; Wok 24:15.
18. ?Olsem wanem yumi save soemaot se yumi bilif we rul blong God i beswan?
18 Yes, rul blong God bambae i finisim ol nogud samting we Setan i kam stamba blong hem, taem hem i pulum faswan papa mama blong yumi blong tanem baksaed long Man ya we i Wokem tufala. Traem tingbaot. !Setan i mekem trabol blong 6,000 yia finis, be God bambae i finisim olgeta trabol ya long 1,000 yia nomo! Hemia wan bigfala pruf se rul blong God i moagud. Yumi, we yumi Witnes blong God blong yumi, yumi wantem we hem i Rula blong yumi. Taswe, i gud we yumi soemaot evri dei, yes, long evri aoa blong laef blong yumi se yumi wosipim Jeova, yumi stap aninit long Kingdom blong hem, mo yumi glad blong stap olsem ol Witnes blong hem. Mo yumi mas tekem evri janis blong talemaot long ol man we oli glad blong lesin long yumi se rul blong Jeova i beswan.
[Futnot]
^ par. 5 B.K.T. i minim Bifo Kristin Taem.
?Long Saed Blong Rul Blong God, Yumi Lanem Wanem Taem Yumi Ridim . . .
• Hibrus 13:17?
[Kwestin]
[Tok blong pija long pej 28]
Jeova i stap king olwe
[Tok blong pija long pej 29]
Taem yumi glad blong stap aninit long rul blong Jeova, yumi joengud long fulwol