Ndaipóri Jehová goviérno rasaharã
Ndaipóri Jehová goviérno rasaharã
‘Ñandejára hína pe oisãmbyhýva ko yvy tuichakuére tetãnguéra goviérnope.’ (DAN. 4:17, ÑÑB.)
1, 2. Mbaʼérepa yvypóra goviérno osẽ vai katuete?
YVYPÓRA goviérno ningo osẽ vai katuete. Upéva oiko ndoikuaáigui hikuái mbaʼépa ojapovaʼerã oisãmbyhy porã hag̃ua. Koʼág̃a rupi ojekuaa porãvéntema umi goviérno ndaikatupyryiha ogoverna hag̃ua. Umi omandáva ‘opensa ijehénte, ipláta rayhu, ijejapo, oñemombaʼeguasu, ndoporohayhúi, oikovaisénte voi, oñeʼẽvai hapicháre, ndojejokokuaái, ipyʼahatã, itraisionéro ha ndohayhúi pe iporãva’ (2 Tim. 3:2-4).
2 Ñande sy ha ñande ru ypykue ningo omboykevaʼekue Jehovápe. Haʼekuéra oimoʼãneraʼe isãsotaha, péro opuʼãvo Ñandejárare oñemoĩhína Satanás poguýpe. Haʼéko hína ‘ko múndo ruvicha’. Seis mil áñoma yvypóra oĩ hague Satanás poguýpe ha koʼág̃a g̃uarã ivaivéntema la ñane situasión (Juan 12:31). Upévare peteĩ lívro hérava Historia Oxford del síglo XX heʼi ñañehaʼã reitaha ‘jahupyty peteĩ múndo iporãva’. Ha heʼi avei mbaʼérepa: “Ndaikatumoʼãi voi ningo jajapo upéva ha ñañehaʼãramo jepe ñasolusiona ñasẽ vai katuete. Ha oñesolusionaseha rupi oiko umi ñorairõ guasu ha oĩ avei umi ogovernáva hetaitereípe’. Ajépa añetete la heʼíva!
3. Mbaʼéichapa Jehová oisãmbyhyvaʼerãmoʼã ko yvy Adán ha Eva nopuʼãirire hese?
3 Ajépa ñambyasyete Adán ha Eva omboyke haguére Jehová sãmbyhy. Ndaipóri ningo Jehová goviérnogui iporãvéva. Ndajaikuaáiko añete mbaʼéichapa Jehová ojapovaʼerãmoʼã opa mbaʼe ko yvýpe Adán ha Eva nopuʼãirire hese. Péro katuete oisãmbyhyvaʼerãmoʼã mborayhu ha tekojojápe (Hech. 10:34; 1 Juan 4:8). Haʼe ningo iñarandueterei ha ndojavyivaʼerãmoʼã mbaʼevetépe umi polítiko ojavyháicha. Ñandejára goviérno omeʼẽvaʼerãmoʼã opa mbaʼe oikotevẽva umi ipoguýpe oikóvape (Sal. 145:16). Jaʼe porãsérõ g̃uarã, upéva la iporãvétavakuri (Deu. 32:4). Ajéiko ñambyasyete jajavy haguére ko mbaʼe porãite!
4. Mbaʼépa Jehová oheja Satanáspe ojapo?
4 Iporã ñanemanduʼa Jehová ohejánte hague yvyporakuérape oñogoverna, péro upéva ndeʼiseihína Jehová nogovernamoʼãveimaha chupekuéra. Ñandejára voi ningo ‘pe oisãmbyhýva ko yvy tuichakuére tetãnguéra goviérnope’. Pe rréi Babiloniagua tuichaite omandáva jepe ohechakuaavaʼekue upéva (Dan. 4:17). Amo ipahápe ningo ojejapomantevaʼerã Jehová rembipota (Mat. 6:10). Jehová ningo ohejánte Satanáspe oreko ipoguýpe ko múndo, ha upéicha ohechauka japu hague umi mbaʼe Satanás heʼivaʼekue (2 Cor. 4:4; 1 Juan 5:19). Péro Jehová ndohejáiva Satanáspe ohasa la rrája (2 Cró. 20:6; embojojami Job 1:11, 12 ha 2:3-6). Ha ymaite guive hetaiterei tapicha oĩ oñemoĩva ñande Apohare poguýpe jaikóramo jepe ko múndo oĩvape Satanás poguýpe.
Ñandejára oisãmbyhy Israel
5. Mbaʼépa heʼi umi Israelgua Ñandejárape?
5 Yma Abel tiémpo guive oĩ heta kuña ha kuimbaʼe omombaʼeguasúva Jehovápe ha iñeʼẽrendúva chupe (Heb. 11:4-22). Ha Moisés tiémpope katu Jehová ojapo peteĩ kompromíso Jacob familiarekuéra ndive, umívagui ningo oikókuri pe tetã Israel. Amo áño 1513-pe Jesús ou mboyve umi Israelgua ha ifamiliakuéra heʼi oipotaha ñande Apohare oisãmbyhy chupekuéra. Heʼi voi hikuái: “Rojapóta opa mbaʼe heʼíva Ñandejára” (Éxo. 19:8).
6, 7. Mbaʼéichapa umi Israelgua oikovaʼekue Jehová oisãmbyhýrõ guare chupekuéra?
6 Jehová oiporavo pe tetã Israel imbaʼerã ikatu hag̃uáicha ojapo hembipota (jaleemína Deuteronomio 7:7, 8). Ndahaʼéi umi hénte rehehápente ojapóva upéva. Jehová ningo upe tetã rupive omombaʼeguasuse héra ha ohechaukase iporãveha haʼe oisãmbyhy yvyporakuérape. Ha umi Israelgua ohechakuaavaʼerã Jehová añoite haʼeha Ñandejára añetegua (Isa. 43:10; 44:6-8). Upévare Jehová heʼi chupekuéra: ‘Peẽ ningo pe tetã che aiporavovaʼekue chembaʼerã. Peiko hag̃ua chembaʼe teéramo mayma tetãnguéra apytépe oĩva guive ko yvy apére’ (Deu. 14:2, ÑÑB).
7 Jehová oisãmbyhýrõ guare umi Israelguápe imanduʼavaʼekue haʼekuéra yvypóra imperfektoha. Upéicharõ jepe, Moisés rupive omeʼẽ chupekuéra umi léi perféktova ha ohechaukáva haʼe hekomarangatu, oporohayhu, hekojoja, imbaʼeporã ha ipasiensiaha. Aremi rire, Josué tiémpope umi Israelgua oiko pyʼaguapýpe ha Jehová omeʼẽ chupekuéra heta mbaʼe porã iñeʼẽrendu rupi hikuái (Jos. 24:21, 22, 31). Upérõ ojehechakuaa Jehová goviérno iporãveha oimeraẽ goviérnogui.
Tuicha ojavy oiporavóvo yvypóra goviérno!
8, 9. Mbaʼépa ojerure umi Israelgua Jehovápe ha mbaʼépa ohupyty hikuái upévare?
8 Heta vése ningo umi Israelgua osẽ Jehová rapégui ha upévare haʼe noñangarekovéima hesekuéra. Proféta Samuel rupive umi hénte ojerure Jehovápe oisãmbyhy hag̃ua chupekuéra peteĩ yvypóra. Ha upérõ Jehová heʼi Samuélpe omeʼẽ hag̃ua umi héntepe la ojeruréva. Péro heʼi avei Samuélpe: ‘Nandévei nemboyke umi hénte, chévente chemboyke anive hag̃ua aiko chupekuéra Ijáraramo’ (1 Sam. 8:7). Jehová omeʼẽ umi héntepe la oipotáva, péro heʼi avei chupekuéra tuichaiterei ojavyha ha opagataha upévare (jaleemína 1 Samuel 8:9-18).
9 Umi mbaʼe oikóva upe rire ohechauka añeteha la Jehová heʼivaʼekue chupekuéra. Heta provléma ogueru umi yvypóra ogovernáva pe tetã Israel ha koʼýte umi rréi naiñeʼẽrendúiva Jehovápe. Ha heta áñorema ningo oiko upéicha opa tetãme. Umi ogovernáva noñemoĩriramo Ñandejára poguýpe, osẽ vai katuete. Péro oĩ umi polítiko heʼíva Ñandejára ovendesiha umi mbaʼe ojapóva hikuái ikatu hag̃uáicha yvyporakuéra oiko porã pyʼaguapýpe. Añetépa upéva? Umíva ningo noñemoĩri Jehová poguýpe ha upévare haʼe noipytyvõi chupekuéra (Sal. 2:10-12).
Peteĩ tetã pyahu Jehová ogovernáva
10. Mbaʼérepa Jehová oiporavo peteĩ tetã pyahu imbaʼerã?
10 Heta tiémpo rire ojehechakuaa umi Israelgua ndoserviseiha Jehovápe ipyʼaite guive. Amo ipahápe ningo haʼekuéra nomombaʼéi pe Mesías ha upévare Jehová omboyke chupekuéra ha oiporavo peteĩ tetã pyahu imbaʼerã. Upéicha rupi áño 33-pe omoñepyrũ pe kongregasión kristiána oĩhápe umi ungído. Ko tetã pyahu Jehová oisãmbyhývape apóstol Pablo ohenói ‘Israel Ñandejára mbaʼéva’ (Gál. 6:16, JMP).
11, 12. Mbaʼépepa ojojogua pe Israel ymaguare ha pe ‘Israel Ñandejára mbaʼéva’?
11 Heta mbaʼépe ningo ojojogua pe tetã Israel ymaguare ha pe tetã pyahu ‘Israel Ñandejára mbaʼéva’, péro heta mbaʼépe ndojojoguái avei. Pór ehémplo pe kongregasión kristiána ndorekovéima peteĩ yvypóra oisãmbyhýva rréiramo ha ndosakrifikavéima avei mymba ipekádo rehehápe. Péro pe Israel ymaguaréicha koʼág̃a avei oĩ umi ansianokuéra kongregasiónpe (Éxo. 19:3-8). Haʼekuéra ningo nohekomboʼéi mbaretépe ermanokuérape. Upéva rangue oñangareko hesekuéra ha omoĩ ehémplo porã opa mbaʼépe kristianoháicha. Ohechauka hikuái omombaʼe, ohayhu ha orrespetaha opavave ermanokuérape (2 Cor. 1:24; 1 Ped. 5:2, 3).
12 Umi ‘Israel Ñandejára mbaʼéva’ ha ‘ambue ovechakuéra’ iporã ojepyʼamongeta mbaʼéichapa Jehová otratavaʼekue umi Israelguápe. Upéva ñanepytyvõta ñamombaʼeve hag̃ua Jehovápe ha umi mbaʼe haʼe oiporúva ñanesãmbyhy hag̃ua (Juan 10:16). Yma ningo umi oisãmbyhýva Israelguápe ojapóramo iporãva térã ivaíva, umi ipoguýpe oĩva ojapo avei upéicha. Mbaʼépa omboʼe upéva ansianokuérape? Haʼekuéra ndahaʼéiramo jepe rréi, omoĩvaʼerãha ehémplo ermanokuérape ha ohechauka ojeroviaha Jehováre (Heb. 13:7).
Ñandejára goviérno koʼag̃agua
13. Mbaʼépa oiko áño 1914-pe?
13 Opárupi umi oservíva Ñandejárape omombeʼu koʼẽrõitéma oñehunditaha yvyporakuéra goviérno. Áño 1914-pe Jehová oñepyrũma ogoverna yvágape omoĩvo Itaʼýra Jesucrístope rréiramo. Upe áñope Jehová omeʼẽ Jesúspe autorida ‘osẽ hag̃ua ipuʼaka iñenemigokuérare ha omohuʼã hag̃ua iñorairõ’ ha upéicha oisãmbyhy ‘umi ijaʼeʼỹva hese apytépe’ (Rev. 6:2; Sal. 110:2). Ñambyasýramo jepe umi tetãnguéra oñemombarete ha noñemoĩséi Jehová poguýpe. Upéicha ohechauka chupekuéra g̃uarã ‘ndaiporiha Jehová’ (Sal. 14:1).
14, 15. a) Mbaʼéichapa Ñandejára goviérno ñanesãmbyhy koʼág̃a rupi ha mbaʼépa iporã ñañeporãndumi? b) Mbaʼéichapa ojehechakuaa ndaiporiha rréi ogoverna porãvéva Jehovágui?
14 Saʼipaitéma ningo hemby umi ungído ko yvy ape ári. Koʼã oĩva ‘Israel Ñandejára mbaʼévape’ ningo “Cristo rembijokuái” (2 Cor. 5:20). Opa koʼã ungído haʼehína pe tembiguái jeroviaha ha iñarandúva. Haʼekuéra ningo omboʼe Ñandejára rembipota umi ambue ungídope ha umi oĩvape pe aty guasúpe. Ha umi oĩva pe aty guasúpe ningo ohaʼarõhína oikove opa ára g̃uarã ko yvy ape ári (Mat. 24:45-47; Rev. 7:9-15). Umi mbaʼe porã jahupytýva koʼág̃a rupi ohechauka Jehová ovendesiha pe tembiguái jeroviahápe.
15 Iporã ningo enterove ñañeporandumi: “Ajapo porãmbápa aína che rembiapo kongregasiónpe? Avyʼápa aime haguére Jehová rréino poguýpe ha ahechaukápa amombaʼeha che ñeʼãite guive? Añehaʼãtapa opa ikatuháicha akóinte añeʼẽ hag̃ua che rapichakuérape upévare?”. Ñande ningo jajapovaʼerã opa mbaʼe pe Cuerpo Gobernante heʼihaichaite ha ñambaʼapo kyreʼỹ ansianokuéra ndive kongregasiónpe. Jajapóramo upéicha jahechaukañaína jaipotaha Jehová ñanesãmbyhy (jaleemína Hebreos 13:17). Jahejáramo Jehová ñanesãmbyhy ningo jaikóta peteĩ ñeʼẽme, pyʼaguapy ha tekojojápe ko múndo añáme. Ha ojehechávo koʼã mbaʼe oñemombaʼeguasúta Jehovápe ha ojehechakuaáta ndaiporiha rréi ogoverna porãvéva chugui.
Ñandejára goviérno osẽ porã
16. Mbaʼépa koʼág̃ama káda uno jadesidivaʼerã?
16 Koʼẽrõitéma ningo Jehová ohechauka porãta japu hague opa mbaʼe Satanás heʼivaʼekue pe hardín de Edénpe. Ha koʼág̃ama ñande káda uno jadesidivaʼerã ko mbaʼe: “Ahejátapa Jehová chesãmbyhy térãpa añemoĩta yvypóra goviérno poguýpe?”. Ñande jaservíva Jehovápe ningo ikatu ñaipytyvõ umi ñande rapicha ipyʼaporãvape odesidi porã hag̃ua. Koʼẽrõitéma ningo og̃uahẽta pe Armagedón ha upépe Ñandejára Rréino oipeʼapaitéta umi goviérno koʼág̃a oĩva (Dan. 2:44; Rev. 16:16). Umi goviérno Satanás poguýpe oĩva oñehundipaitéta ha Ñandejára ogovernáta ko yvy tuichakue. Upe vove, enterovete ohechakuaáta ndaiporiha Ñandejára goviérno rasaharã (jaleemína Revelación 21:3-5).
17. Mbaʼépa oipytyvõta umi ipyʼaporãvape ohechakuaa hag̃ua máva goviérnopa iporãve?
17 Heta ningo oĩ ndojedesidíriva gueteri oñemoĩtapa Jehová poguýpe. Oiméramo ñande upéicha, iporãta ñañemboʼe ha upe rire jajepyʼamongeta umi mbaʼe porã oguerútavare Ñandejára goviérno. Koʼág̃a ningo heta oĩ mondaha ha terrorísta, ha umi polítiko ndaikatúi osolusiona umi mbaʼe. Péro Ñandejára goviérno ohundipaitéta umi mbaʼe vai apohápe (Sal. 37:1, 2, 9). Umi goviérno koʼag̃agua pyʼỹinte oñorairõ, péro Ñandejára ‘oipeʼáta opaichagua ñorairõ’ (Sal. 46:9). Ha oiko jeýta avei pyʼaguapýpe oñondive yvyporakuéra ha umi mymbakuéra (Isa. 11:6-9). Ñandejára ogoverna vove ndaiporimoʼãvéima avei imboriahúva ha omanóva ñembyahýigui. Koʼã mbaʼe ningo umi yvypóra goviérno ndaikatúi osolusiona (Isa. 65:21). Opavave avei hesãita, ndaitujái térã naig̃uaig̃uimoʼãvéima ha ndaiporimoʼãvéima omanóva (Job 33:25; Isa. 35:5, 6). Péro umi omanomavaʼekuépe oñemoingove jeýta ko yvy ape ári peteĩ lugár neporãmba jepévape (Luc. 23:43; Hech. 24:15).
18. Mbaʼéichapa jahechaukáta ndaiporiha Ñandejára goviérno rasaharã?
18 Péicha jahecha Ñandejára goviérno osolusionambaitetaha opa mbaʼe vai Satanás ojapoukáva Adán ha Eva opuʼã guive Jehováre. Satanás ningo seis mil áñoma ojapohikóni heta mbaʼe vai, péro mil áño Jesús ogoverna vove Jehová osolusionambaitéta koʼã mbaʼe. Péicha jahecha ndaiporiha Ñandejára goviérno rasaharã! Ñande ningo ñanderéra voi testigos de Jehová ha upéicha jahechauka mávapa la ñanesãmbyhýva. Upévare opa árape jahechaukavaʼerã javyʼaha ñamombaʼeguasu haguére Jehovápe, ñañemoĩ haguére ipoguýpe ha jaiko haguére itestígoramo. Jaaprovechákena upéicharõ ha ñamombeʼu mayma ñanerendúvape ndaiporiha Ñandejára goviérno rasaharã!
Mbaʼépa heʼi ñandéve Ñandejára goviérnore...
[Porandu ñahesaʼỹijóva]
[Nóta oĩva taʼanga ndive páhina 29]
Jehová ningo ymaite guive haʼe pe Mburuvicha Guasu
[Nóta oĩva taʼanga ndive páhina 31]
Ñañemoĩ rupi Jehová poguýpe jaiko peteĩ ñeʼẽme oparupigua ermanokuéra ndive