Jehovap naalakkersueriaasia pitsaanerpaavoq
Jehovap naalakkersueriaasia pitsaanerpaavoq
‘Qutsinnerussaartup kunngeqarfik nunarsuarmiittoq naalagaaffigaa.’ — DANIELI 4:14.
1, 2. Inuit naalakkersuinerata iluatsissimannginneranut pissutaasut ilaat suuppat?
INUIT naalakkersueriaasiat iluatsissimanngilaq! Tamanna qularutissaanngilaq. Taamatut iluatsinnginnermut pissutaasoq pingaarneq tassaavoq inuit pitsaasumik naalakkersuinissamut naammattumik ilisimassuseqannginnerat. Naalakkersuisinnaannginnerat ingammik ullumikkut erseqqippoq, paasinarsisimavormi naalakkersuisut ilarpassui ‘namminissarsiortuusut, aningaaserituujusut, usorsitsaartuusut, anneruniartuusut, mitalliisuusut, saammartitassaanngitsuusut, naammatsiuitsuusut, qiningasuusut, ajunngitsunut akeraasut, killuussisuusut makitaniartuusullu’. — 2 Timotheusi 3:2-4.
2 Siuaasatta siulliit Guutip naalakkersueriaasia qangarsuarli ajattorsimavaat. Immaqa isumaqarsimapput taamaaliornermikkut namminersorluni inuuneq qinerlugu. Ilumoortumilli Saatanip naalakkersueriaasianut naalatsigitipput. Ukiut 6000-it ingerlaneranni inuit naalakkersueriaasii ajortut — silarsuup matuma naalagaaneranit, Saatanimit, sunnersimaneqangaartut — aqqusaartoreerlugit maanna inuiaat oqaluttuarisaaneranni pissutsit ajornerpaaffianniippugut. (Johannesi 12:31) Pissutsit inuit ullumikkut atugaat pillugit The Oxford History of the Twentieth Century-mi allassimasoqarpoq iluaqutaanngitsoq “silarsuarmik naammalluinnartumik ujaasinissaq. . . . Silarsuarmik taama ittoqanngiinnanngilaq, [silarsuarmilli taama ittumik] pilersitsiniarsarinerup kingunerisaanik ajunaarneqarlunilu kisermaassilluni naalakkersuisoqarlunilu ingasannerpaamik sorsuuttoqartarpoq”. Inuit naalakkersuinerata iluatsissimannginneranik nassuerutiginninneq unneqqarissaarnerungaarami!
3. Adami Evalu ajortuliorsimanngitsuuppata Guutip naalakkersueriaaserimasassaralua pillugu qanoq oqartoqarsinnaava?
3 Taamaattumik alianangaarami siuaasatta siulliit naalakkersueriaaseq atorsinnaasutuaq — Guutip naalakkersuinera — ajattormassuk! Soorunami naluarput Jehova Adamip Evallu aalajaaffigiuarsimappanni nunarsuarmut naalakkersuinerminut tunngatillugu qanorpiaq aaqqissuussisimassagaluarnersoq. Qularutiginngilluinnarsinnaavarpulli naalakkersueriaaseq Guutimeersoq inuiannit tamanit akuerineqartoq asanninnermik kinaassusersiunnginnermillu ilisarnaateqarsimassagaluartoq. (Apustilit Suliaat 10:34; 1 Johannesi 4:8) Guutip ilisimassusia asseqanngitsoq eqqarsaatigalugu aamma qularutiginngilluinnarsinnaavarput inuit naalakkersuinerannik illersuisut kukkuneri tamarmik pinngitsoorneqarsinnaasimassagaluartut, taakku taassuma naalakkersuineranik ajattuisimanngitsuuppata. Guutip naalakkersuineratigut, teokratii tunngavigalugu naalakkersuinikkut, ‘pinngortitat tamarmik kissaatigisaannik qaarsillartinneqartarsimasinnaagaluarput’. (Tussiaat 145:16) Naatsumik oqaatigalugu Guutip naalakkersuinera naalakkersuinerusimassagaluarpoq naammalluinnartoq. (5 Mosesi 32:4) Inuit tamatuminnga ajattuinerata alianassusia!
4. Saatani qanoq naalakkersuitiginissamut akuerineqarsimava?
4 Pitsaassaarli eqqaamassallugu Jehovap inuit namminneq naalakkersuinissaat akuerigaluarlugu pinngortitaminut naalakkersuinissamut pisinnaatitaaffini sussakkeersimanngisaannaraa. Allaat Babylonimi kunngip pissaaneqangaartup nassuerutigisariaqarsimavaa pingaarnerpaamik “Qutsinnerussaartup kunngeqarfik nunarsuarmiittoq naalagaaffigigaa”. (Danieli 4:14) Guutip piumasaata pinissaa taassuma naalagaaffianit naggataatigut isumagineqarumaarpoq. (Matthæusi 6:10) Ilumoorpoq apeqqutit akerleriissutit Edenimi pilersinneqartut qularunnaarnartumik akissuteqarfigisinnaajumallugit Jehovap Saatanip piffissami sivikitsumi ‘silarsuarmi matumani guutiunissaa’ akuerigaa. (2 Korinthimiut 4:4; 1 Johannesi 5:19) Taamaakkaluartorli Saatani Jehovap akuerisaanik akimuisinnaasimanngisaannarpoq. (2 Nalunaarsuutit 20:6; naleqqiutikkit Jobi 1:11, 12; 2:3-6). Aamma inoqartuaannarsimavoq silarsuarmi Guutimut akerlilersuisorsuarmit aqunneqartumi inuugaluarlutik Guutimut naalatsigitinniarlutik aalajangertartunik.
Guutip Israelikkunnut naalakkersuinera
5. Israelikkut imminnut sumik Guutimut pisussaaffilerpat?
5 Abelip nalaaniit ataataanerpaat inuunerisa nalaannut inuppaaloqarsimavoq aalajaatsunik Jehovamik pallorfiginnittunik taassumalu inatsisaanik maleruaasunik. (Hebræerit 11:4-22) Mosesip nalaani ataataanerpaap Jaakup kinguaavi Jehovap angerfigeqatigai, taakkulu inuiaqatigiinngorput Israelikkut. 1513-imi Kr.in.si. Israelikkut Jehovap naalakkersuisutut akuerinissaanut imminnut pisussaaffilerput aamma kinguaatik tamatumunnga pisussaaffilerpaat, ima oqaramik: “[Jehovap] oqaasii tamaasa malillugit iliorumavugut.” — 2 Mosesi 19:8.
6, 7. Guutip Israelikkunnut naalakkersuineranut suut ilisarnaataappat?
6 Jehova Israelikkunnik innuttassamisut toqqaanerminut tunngatillugu aalajangersimasumik siunertaqarpoq. (Atuakkit 5 Mosesi 7:7, 8). Taakkuninnga qinersinera Israelikkut atugarissaarnissaannik soqutiginninnerinnarmik pissuteqanngilaq. Pingaaruteqarnerungaartunut, tassa aqqanut kisimilu oqartussaassusianut, tunngassuteqarpoq. Israelikkut kiffartussapput Jehovap Guutitut ilumoortutuaaneranik nalunaajaatiginnillutik. (Esaja 43:10; 44:6-8) Taamaattumik taassuma Mosesi aqqutigalugu inuiaqatigiit taakku ima oqarfigai: “Inuiaavusimi [Jehovamut] Guutissinnut pigititaallusi illernartitaasut. [Jehovap] inuiaat nunarsuarmiittut tamarmik akornanni qinersimavaasi pigisariumallusi.” — 5 Mosesi 14:2.
7 Jehovap Israelikkunnik siulersueriaasianit erserpoq taanna Israelikkut naammalluinnanngitsuunerat eqqarsaatigalugu iliuuseqartartoq, aamma naak inatsisini naammalluinnartuugaluartut pissusiminillu ersersitsigaluartut. Inatsisit Jehovap Mosesi aqqutigalugu tunniussai taassuma illernassusianik, naapertuilluarnermik nuannarinninneranik, isumakkeerfiginnikkumaneranik naammagittarneranillu erseqqissaapput. Kingusinnerusukkut, Josvap nalaani, Israelikkut Jehovap inatsisaanik maleruaapput eqqissinerlu anersaakkullu pilluaqqussuterpassuit nuannaarutigisinnaallugit. (Josva 24:21, 22, 31) Israelikkut oqaluttuarisaaneranni piffissami tamatumani ersersinneqarpoq Jehovap naalakkersueriaasianik malinninneq qanoq kinguneqarluartigisarnersoq.
Inuit naalakkersuinerat akisusimavoq
8, 9. Israelikkut silatusaarnatik sumik piumasaqarpat, qanorlu kinguneqarpa?
8 Piffissarli ingerlatillugu Israelikkut Guutip naalakkersuineranik tunussisaqattaarput taassumanngalu sernissorneqarunnaartarlutik. Pruffiiti Samueli aqqutigalugu Israelikkut naggataatigut piumasaqaateqarput takussaasumik nunamiusumik kunngeqarnissamik. Jehovap Samueli peqquaa taakkua piumasaannik tuneqqullugit, imali nangippoq: “[Illit] pinnatit uanga narrugaannga kunngigiumananga.” (1 Samueli 8:7) Jehovap akueraa Israelikkut takussaasumik kunngeqalernissaat, mianersoqquaali naalagaaffik nunamiusumik kunngilik akisujumaartoq. — Atuakkit 1 Samueli 8:9-18.
9 Oqaluttuarisaanermi erserpoq Jehova pissutissaqarluarluni mianersoqqusisimasoq. Israelikkut nunamiusumik kunngeqarnertik sualuttunik ajornartorsiuteqalissutigisarpaat, ingammik kunngiusoq aalajaanngikkaangat. Israelikkut misigisimasaat eqqarsaatigigaangatsigit tupinnarneq ajorpoq naalagaaffiit piffissap ingerlanerani inunnit Jehovamik ilisarisimanninngitsunit siulersorneqartut ataavartunik angusaqarluartannginnerat. Ilumoorpoq politikerit ilaasa Guuti torlorfigisimagaat eqqissinermik isumannaassusermillu angusaqarniarsarinertik pilluaqqoqqullugu, Guutilli naalakkersueriaatsiminut naalatsigitinngitsut qanoq ililluni pilluaqqusinnaagamigit? — Tussiaat 2:10-12.
Inuiaqatigiit nutaat Guutimit naalakkersorneqartut
10. Sooq Israelikkut inuiaqatigiinnik allanik Guutip qinigaanik taarserneqarpat?
10 Israelikkut ersersippaat aalajaallutik Jehovamut kiffartornissamut piumassuseqarnatik. Naggataatigut Missiarsimik taassuma toqqagaanik ajattuipput, Jehovallu taakku ajattorpai eqimattanillu inuiaqatigiinngortunik allanik taarserlugit. Tamatuma kingunerisaanik tanitat ilagiissaat kristumiut ukiumi 33-mi Kr.in.king. pilersinneqarput. Ilagiit taakku tassaapput inuiaqatigiit nutaat Jehovap oqartussaaneranut naalakkersuineranullu naalatsigitittut. Paulusip taakku ‘Israelitut Guutip pigisaatut’ eqqartorpai. — Galatiamiut 6:16.
11, 12. Israelikkut ‘Israelillu Guutip pigisaata’ siulersuinermut nakkutilliinermullu tunngatillugu suut assigiissutigaat?
11 Aallaqqaammut Israelikkuugaluartut ‘Israelilu Guutip pigisaa’ nutaaq assigiinngillat, assigiissuteqarpulli. Assersuutigalugu itsaq Israelikkutut pinnatik ilagiit kristumiut nunamiusumik kunngeqanngillat ajortuliortullu iluaqutissaannut uumasunik pilliuteqartariaqaratik. Israelikkut ilagiillu kristumiut assigiissutaasa ilagaat utoqqaanertanik aaqqissuussaq. (2 Mosesi 19:3-8) Utoqqaanertat taakku savaatinut naalagaanngillat. Ilagiinnik paarsisuupput kristumiutullu kiffartornermi uummatikkut iluunngarlutik siuttuullutik. Ilagiinniittut tamaasa immikkut asannittumik isumassorpaat, kikkunnik tamanik ataqqinnillutik. — 2 Korinthimiut 1:24; 1 Petrusi 5:2, 3.
12 Jehovap Israelikkunnik qanoq pinnittarneranik eqqarsaatiginneqqissaarnikkut ‘Israelimut Guutip pigisaanut’ ilaasut taakkualu suleqataat, ‘savat allat’, taassuminnga taassumalu naalakkersueriaasianik pingaartitsinerulertarput. (Johannesi 10:16) Oqaluttuarisaanermit erserpoq Israelimi naalakkersuisut nunamiusut innuttaminnut sunniuteqangaartartut, ajunngitsumik ajortumillu. Tamanna kristumiunut siuttuusunut erseqqissaataavoq taakku itsaq kunngisut naalakkersuisuunngikkaluarlutik uppernikkut maligassaajuartariaqarnerannut. — Hebræerit 13:7.
Jehova ullumikkut qanoq naalakkersuisoq
13. Pingaarutilik suna 1914-imi anguneqarpa?
13 Ullumikkut kristumiut silarsuarmut tamarmut oqaluussissutigaat inuit naalakkersuinerata naggatissaat qanilliartoripput. 1914-imi Jehovap naalagaaffini qilammi pilersippaa Jiisusimik Kristusimik kunnginngortitsinermigut. Tamatuma nalaani taassuma Jiisusi piginnaatippaa ‘aallarluni ajugaajuarnissaanut’. (Saqqummersitat 6:2) Kunnginngortinneqaqqammersoq taanna ima peqquneqarpoq: “Naalagaagit akeqqavit akornanni.” (Tussiaat 110:2) Ajoraluartumik inuiaat Jehovap naalakkersuineranut naalatsigitikkumanngilluinnarput. ‘Guuteqanngitsutut’ pissusilersortuarput. — Tussiaat 14:1.
14, 15. (a) Ullumikkut Guutip naalagaaffianit qanoq naalakkersorneqarpugut, taamaattumillu imminut qanoq aperisariaqarpugut? (b) Guutip naalakkersuinerata pitsaanerungaarnera allaat ullumikkut qanoq takuneqarsinnaava?
14 ‘Israelimut Guutip pigisaanut’ ilaasunik tanitanik suli nunarsuarmiittoqarpoq, Jiisusimullu qatanngutaagamik ‘Kristusi sinnerlugu oqariartortitatut’ kiffartortuarput. (2 Korinthimiut 5:20) Taakku inussiaqatigiittut aalajaallutillu silatuutut tanitanik nunarsuarmilu naassaanngitsumik inuunissamik neriugisalinnik maanna millioniliusunik amerliartortunik isumassuisussanngortitaallutillu anersaakkut inuussutissanik pilersuisussanngortitaapput. (Matthæusi 24:45-47; Saqqummersitat 7:9-15) Ullumikkut Guutip kiffaasa anersaakkut pigissaarnerat Jehovap aaqqissuussamik tamatuminnga pilluaqqusineranut uppernarsaataavoq.
15 Silatusaassaagut tamatta immikkut imminut ima aperigutta: ‘Ilagiinni kristumiuni akisussaaffiga akuerilluinnarpara? Guutip naalakkersueriaasianik ilumut tapersersuivunga? Guutip naalagaaffiani innuttaaneq tulluusimaarutigaara? Sapinngisara tamaat taassuma naalagaaffianik allanut oqaluussissutiginnittuarnissara aalajangiusimavara?’ Uagut eqimattatut Siulersuisoqatigiit uagutsinnut siunnersuutigisartagaannik kajumilluta malinnittarpugut, aamma utoqqaanertat toqqakkat ilagiinniittut suleqatigisarpavut. Taamaalilluta ersersittarparput Guutip naalakkersueriaasianik akuerinnilluta. (Atuaruk Hebræerit 13:17). Kajumilluta naalatsigitinnerput silarsuarmi avissaartuuffiusumi matumani silarsuaq tamakkerlugu asseqanngitsumik ataasiussuseqalersitsisarpoq. Aamma eqqissineqalersitsisarlunilu naapertuilluassuseqalersitsisarpoq, aamma Jehovamut ataqqinaataavoq, taassuma naalakkersueriaasiata pitsaanerpaarpaajuneranut uppernarsaataagami.
Jehovap naalakkersuinera ajugaajumaarpoq
16. Ullumikkut inuit tamarmik immikkut qanoq aalajangertariaqarpat?
16 Piffissaq akerleriissutit Edenimi pilersinneqartut aalajangiiffigineqarfissaat qanilliartupallappoq. Taamaattumik maanna piffissaavoq inuit aalajangernissaannut. Inuit tamarmik immikkut aalajangertariaqarput Jehovap naalakkersueriaasianik akuerinnissanerlutik inuilluunniit naalakkersuinerannik aalajangiusimannissanerlutik. Eqqortuliorusuttut eqqortumik aalajangernissaannut ikiornissaat uagut immikkut pisinnaatitaaffigaarput. Qanittukkut Harmagedoni nalliuppat naalakkersueriaatsit inunnit pilersinneqarsimasut Saatanimillu sunnerneqarsimasut Jehovap naalakkersueriaasianik ataavartumik taarserneqassapput. (Danieli 2:44; Saqqummersitat 16:16) Inuit naalakkersuinerat atorunnaassaaq, Guutillu naalagaaffia nunarsuarmut tamarmut naalakkersuissaaq. Jehovap naalakkersueriaasiata pitsaanerpaanera qularutigineqarunnaarluinnarsimassaaq. — Atuakkit Saqqummersitat 21:3-5.
17. Piviusut suut eqqortuliorusuttut ajunngitsumik aalajangernissaminnut iluaqutigissavaat?
17 Jehovamik illersuiniarlutik suli aalajangivinngitsut Guutip naalakkersueriaasiata inunnut qanoq iluaqutaajumaarnera qinunikkut eqqarsaatigisariaqarpaat. Ajornartorsiutit pinerluttuliortarnernut, ilaatigut peqqarniisaarniarnernut, tunngassuteqartut inuit naalakkersuineratigut aaqqinneqarsinnaasimanngillat. Guutip naalagaaffiata tamakku tamaasa nunarsuarmit peerumaarpai. (Tussiaat 37:1, 2, 9) Inuit naalakkersuinerata kingunerisaanik sorsuuttoqartuarsimavoq, Guutilli naalakkersuineratigut ‘nunarsuarmi tamarmi sorsunnerit soraarsinneqarumaarput’. (Tussiaat 46:10) Allaat Guutip naalakkersuineratigut inuit uumasullu eqqisseqatigiileqqissapput. (Esaja 11:6-9) Inuit naalakkersuineranni piitsuussuseqartuarlunilu kaattoqartuarsimavoq, Guutilli naalakkersuineratigut pissutsit tamakku nungutinneqassapput. (Esaja 65:21) Naalakkersuisut nunamiusut ajunnginnerpaamik siunertaqaraluartulluunniit nappaatinik toqumillu atuukkunnaarsitsisinnaasimanngillat, Guutilli naalakkersuinerani utoqqaat napparsimasullu inuusukkallarnermissut nukittornertik nuannaarutigisinnaassavaat. (Jobi 33:25; Esaja 35:5, 6) Aap, nunarsuaq paratiisinngorumaarpoq allaat toqusimasunik makititsiffiusoq. — Lukasi 23:43; Apustilit Suliaat 24:15.
18. Qanoq ililluta ersersissinnaavarput Guutip naalakkersueriaasiata pitsaanerpaanera upperalugu?
18 Tassa Saatanip, siuaasatsinnik siullernik Pinngortitsisumik tunussisitsigamili, ajoqusiinerisa tamarmik sunniutaat Guutip naalakkersuineratigut atorunnaassapput. Aamma eqqarsaatigiuk Saatanip ukiuni 6000-ini ajoqusiisimaneri Guutip Kristusi aqqutigalugu ukiut 1000-iinnaat ingerlaneranni aaqqikkumaarai! Tamanna Guutip naalakkersueriaasiata naalakkersueriaatsinik allanik tamanik akimuineranut uppernarsaataalluavippoq! Guutitsinnut nalunaajaasuugatta taanna naalakkatsitut akueraarput. Taamaattumik ullut tamaasa, aap akunnerit tamaasa, ersersitsigu Guutimik pallorfiginnittuulluta, taassuma naalagaaffianut naalatsigitilluta taassumunngalu nalunaajaasuunerput tulluusimaarutigalutigu. Aamma periarfissat tamaasa atorlugit tusarnaarumasut oqaluttuutsigik Guutip naalakkersueriaasia pitsaanerpaajusoq. (w10 01/15-E)
Guutip naalakkersueriaasia pillugu uku sumik ilinniarfigaavut?
• 5 Mosesi 7:7, 8
• 1 Samueli 8:9-18
[Atuaqqissaarnermi apeqqutit]
[Qupp. 28-mi assiliartat]
Jehovap naalakkersuinissamut pisinnaatitaaffini sussakkeersimanngisaannarpaa
[Qupp. 30-mi assiliartaq]
Jehovap naalakkersueriaasianut kajumilluta naalatsigitinnerput silarsuaq tamakkerlugu ataasiussuseqalersitsisarpoq