Puso ya Jehova I Boniswa ku ba ye Lukile!
Puso ya Jehova I Boniswa ku ba ye Lukile!
“Muambakani-ya-Pahami ki Yena ya na ni mubuso fahalimu a bulena bwa batu.”—DAN. 4:17.
1, 2. Ki mabaka mañi a bonisa kuli puso ya butu i palezwi?
PUSO ya batu i palezwi! Taba ye ha i koni ku kakanyiwa. Libaka le lituna puso ya batu ha i palezwi ki la kuli batu ha ba koni ku ipusa hande. Kwa iponelwa hande kacenu kuli batu ha ba koni ku ipusa kakuli babusi ba bañata ki ‘baitati, ba ba lata mali, ba ba itumbaeta ni ku ikuhumusa, banyefuli, ba ba na ni ñole, ba ba seba batu ka buhata, ba ba sa koni ku iswala, ba ba na ni buhali, ba ba toya batu ba bande, ni ba ba inuneka.’—2 Tim. 3:2-4.
2 Kwakale, bashemi ba luna ba pili ne ba hanile puso ya Mulimu. Ha ne ba eza cwalo, mwendi ne ba nahana kuli ne ba ka lukuluha. Kono niti kikuli ne ba ipeya mwatasaa puso ya Satani. Puso ya batu ye se bile teñi ka lilimo ze 6,000 i palezwi ku kondisa lika—i kukuezwa ki “mulena wa lifasi le,” Satani—mi i tahisize miinelo ye maswe hahulu ye li teñi mwa lifasi kacenu. (Joa. 12:31) Buka ye ñwi (The Oxford History of the Twentieth Century) ha i bulela za muinelo wa batu wa cwale, i li , ha ku na tuso ya “ku libelela kuli ku ka ba ni lifasi le li petehile.” I talusa kuli: “Lifasi le li petehile ha li koni feela ku fumanwa, kono ku lika ku li tahisa ku ka tahisa kozi ye tuna, ku ka tisa kuli ku be ni puso i liñwi ye hatelela batu kaufela, mi ku ka tumbula ndwa ye maswe hahulu.” Kaniti, manzwi ao a bonisa feela kuli puso ya butu i palezwi luli!
3. Lu kona ku bulelañi ka mo Mulimu naa ka buseza kambe bo Adama ni Eva ne ba si ka eza sibi?
3 Kacwalo, ki bumai kuli bashemi ba luna ba pili ne ba hanile puso i nosi feela ye nde—puso ya Mulimu! Ki niti kuli ha lu zibi hande mo Jehova naa ka onga-ongela puso ya hae fa lifasi kambe bo Adama ni Eva ne ba zwezipili ku sepahala ku yena. Kono lwa kona ku kolwa kuli puso ya Mulimu ha ne i ka amuhelwa ki batu kaufela ne i ka ba puso ya lilato ni ye si na ketululo. (Lik. 10:34; 1 Joa. 4:8) Ka ku lemuha butali bwa Mulimu bo butuna, lwa kona ku kolwa hape kuli kambe batu ne ba zwezipili mwatasaa puso ya Jehova, mafosisa kaufela a ezizwe ki batu ba ba tabela ku ipusa naa ka ambukiwa. Puso ya Mulimu ne i ka kondisa ka ku bona teñi kuli “ze pila kaufela za kula.” (Samu 145:16) Ka bukuswani, ne i ka ba puso ye petehile. (Deut. 32:4) Ki bumai kuli batu ne ba hanile puso yeo!
4. Satani u lumelelizwe ku busa ha kuma kai?
4 Niteñi, lu hupuleñi kuli, Jehova niha naa tuhelezi batu ku ipusa, a li ku ba a tobohe tukelo ya hae ya ku busa libupiwa za hae. Mane nihaiba mulena wa Babilona ya maata, naa fitile fa ku lumela kuli “Muambakani-ya-Pahami ki Yena ya na ni mubuso fahalimu a bulena bwa batu.” (Dan. 4:17) Kwa mafelelezo, Mubuso wa Mulimu u ka tahisa kuli tato ya hae i eziwe. (Mat. 6:10) Ki niti, Jehova u lumelelize Satani ku ba sina “mulimu wa lifasi le” ka nakonyana kuli a kone ku fa kalabo ye kolwisa kwa litaba ze nee zusizwe ki mulwanisi yo. (2 Makor. 4:4; 1 Joa. 5:19) Nihakulicwalo, Satani haa si ka kona ku eza lika za si ka mu lumeleza Jehova. (2 Makol. 20:6; mu bapanye Jobo 1:11, 12; 2:3-6.) Mi mane kamita ku bile ni batu ba bañwi ba ne ba ketile ku ipeya ku Mulimu, niha ne ba pila mwa lifasi le li busiwa ki Sila se situna sa Mulimu.
Puso ya Mulimu Fahalimu A Isilaele
5. Ki buitamo mañi bwa naa itamile Isilaele ku Mulimu?
5 Ku zwa mwa nako ya Abele ku to fita fo ne si kalezi ku ba teñi sicaba sa Isilaele, batu ba bañata ba ba sepahala ne ba lapezi Jehova mi ne ba kutekile milao ya hae. (Maheb. 11:4-22) Mwa miteñi ya Mushe, Jehova naa itamile bulikani ni bana ba toho ya lubasi, Jakobo, mi ne ba tiloo bizwa sicaba sa Isilaele. Ka 1513 B.C.E., Maisilaele ni bana ba bona ne ba itamile kuli ba ka amuhela Jehova sina Mubusi, ka ku bulela kuli: “Zaa bulezi kaufela Muñaa Bupilo lu ka li eza.”—Ex. 19:8.
6, 7. Puso ya Mulimu fahalimu a Isilaele ne i zibahala cwañi?
6 Jehova naa na ni mulelo ha naa ketile Maisilaele kuli ba be batu ba hae. (Mu bale Deuteronoma 7:7, 8.) Keto ye ne i ama ze ñata ku fita feela buiketo bwa Maisilaele. Libizo la Mulimu ni bubusi bwa hae ni zona ne li amiwa, mi nee li za butokwa hahulu ni ku fita. Isilaele naa ka ba paki kwa taba ya kuli Jehova ki yena feela Mulimu wa niti. (Isa. 43:10; 44:6-8) Kacwalo, Jehova naa bulelezi sicaba seo kuli: “Ki wena sicaba se si kenile sa Muñaa Bupilo Mulimu wa hao; mi Muñaa Bupilo u ku ketile mwahalaa macaba kaufela mwa lifasi, kuli ibe wena sicaba sa hae tota.”—Deut. 14:2.
7 Mulimu naa busa Maisilaele ka nzila ye nee bonisa kuli naa utwisisa kuli ne ba si ka petahala. Ka nako ye swana, milao ya hae ne i petehile mi ne i bonisa mikwa ya Mufani wa yona. Milao ya naa file Jehova ka Mushe ne i bonisize hande bukeni bwa Mulimu, ku lata ku atula ka ku luka kwa hae, ku lata ku swalela kwa hae, ni pilu-telele ya hae. Hasamulaho, mwa miteñi ya Joshua ni batu ba mwa nako ya hae, sicaba ne si kutekile milao ya Jehova mi ne si ikozi kozo ni limbuyoti za kwa moya. (Josh. 24:21, 22, 31) Ze nee ezahezi ku Isilaele ka nako yeo ne li bonisize bunde bwa puso ya Jehova.
Ze Nee ka Zwa Mwa Puso ya Butu
8, 9. Ki kupo mañi ye si ka luka ya naa kupile Isilaele, mi ne ku zwileñi?
8 Kono hamulaho wa nako, Maisilaele ba kala ku fulalela puso ya Mulimu mi ni yena a tuhela ku ba sileleza. Mafelelezo, Maisilaele ba ikupela mulena wa butu ka ku itusisa mupolofita Samuele. Jehova a bulelela Samuele ku ba fa ze ne ba kupa. Kono Jehova a ekeza kuli: “Ha ba hani wena, kono ba hanile Na, kuli ni si ke na ba mulenaa bona.” (1 Sam. 8:7) Nihaike kuli Jehova naa lumelelize Maisilaele ku ba ni mulena wa butu, naa ba lemusize ze nee ka ezahala ha ne ba ka busiwa ki mulena wa butu.—Mu bale 1 Samuele 8:9-18.
9 Ze nee ezahezi hasamulaho ne li bonisize buniti bwa temuso ya Jehova. Ku busiwa ki mutu ne ku tahiselize Isilaele matata a matuna, sihulu mulena yo ha naa sa sepahali. Mutala wa Isilaele wo u bonisa libaka ha ku sa komokisi kuli mwahalaa lilimo ze fitile, mibuso ye etelezwi ki batu ba ba sa zibi Jehova i palezwi ku eza lika ze nde, ze inelela. Ki niti kuli ba lipolitiki ba bañwi ba kupanga Mulimu kuli a ba fuyaule ha ba nze ba ikataza ku tahisa kozo ni buiketo, kono Mulimu u kona ku fuyaula cwañi batu ba ba sa lateleli puso ya hae?—Samu 2:10-12.
Sicaba se Sinca Mwatasaa Puso ya Mulimu
10. Ki kabakalañi sicaba sa Isilaele se ne si ketilwe ki Mulimu ha ne si yolilwe ki sicaba si sili?
10 Sicaba sa Isilaele ne si iponahalize kuli ne si sa tabeli ku sebeleza Jehova ka busepahali. Kwa mafelelezo, ne si hanile Mesia ya naa ketilwe ki Mulimu, mi Jehova a si hana mi a lela ku si yolisa ka sikwata sa batu ba ne ba bile sicaba se sinca. Kabakaleo, mwa silimo sa 33 C.E. puteho ya Sikreste ya balapeli ba Jehova ba ba tozizwe ya tomiwa. Mi yona puteho yeo ya ba sona sicaba se sinca se ne si li mwatasaa puso ya Jehova. Paulusi naa si bizize kuli ki “Isilaele wa Mulimu.”—Magal. 6:16.
11, 12. Isilaele ni “Isilaele wa Mulimu” li swana cwañi ka za taba ya tamaiso?
11 Ku na ni lika ze ñwi ze swana ni ze shutana mwahalaa sicaba sa Isilaele sa makalelo ni se sinca sa “Isilaele wa Mulimu.” Puteho ya Sikreste i shutana ni Isilaele wa kwaikale, kakuli yona ha i na mulena wa butu mi ha i tokwi kuli batu ba fe matabelo a lifolofolo ha ba ezize sibi. Nto ye ñwi ye swana mwahalaa sicaba sa Isilaele ni puteho ya Sikreste ki tukiso ya baana-bahulu, kamba maeluda. (Ex. 19:3-8) Maeluda ba Sikreste ba ba cwalo ha ba busi mutapi. Kono ba lisa puteho mi ba etelela ka ku tala mwa misebezi ya Sikreste. Ba sebelisana ka lilato ni mañi ni mañi mwa puteho, mi ba kuteka batu kaufela.—2 Makor. 1:24; 1 Pit. 5:2, 3.
12 Ku yeya mwa naa sebelisanela Mulimu ni Maisilaele, ku tusa ba sikwata sa “Isilaele wa Mulimu” ni balikani ba bona ba “lingu ze ñwi” ku itebuha hahulu Jehova ni nzila yaa busa ka yona. (Joa. 10:16) Ka mutala, ze ezahezi li bonisa kuli babusi ba butu ba mwa Isilaele ne ba kona ku susueza hahulu ba ne ba busiwa, inge cwalo ku ba susueza ku eza ze nde kamba ze maswe. Taba yeo i tusa ba ba etelela mwahalaa Bakreste kuli, nihaike kuli haki babusi sina malena bao ba kwaikale, kamita ba swanela ku toma mutala o munde wa tumelo.—Maheb. 13:7.
Mwaa Buseza Jehova Kacenu
13. Ki kezahalo mañi ya butokwa ye nee bile teñi ka 1914?
13 Bakreste kacenu ba sweli ba kutaza kwa batu kuli puso ya butu fahalimu a batu i tuha i fela. Ka 1914, Jehova naa tomile Mubuso wa hae mwa lihalimu mi a keta Jesu Kreste kuli a be Mulena wa wona. Ka yona nako yeo, naa file Jesu maata a ku “ya kwa ku tula.” (Sin. 6:2) Mulena yo munca yo naa bulelezwi kuli: “Toma puso ya hao mwahalaa lila za hao.” (Samu 110:2) Ka bumai, macaba a zwezipili ku hana ku etelelwa ki puso ya Jehova. A zwezipili ku ikezeza lika inge kuli “ha ku na Mulimu.”—Samu 14:1.
14, 15. (a) Lu busiwa cwañi ki Mubuso wa Mulimu kacenu, mi ka ku ba cwalo, ki lipuzo mañi ze lu swanela ku ipuza? (b) Ku ipitela kwa puso ya Mulimu ku iponelwa cwañi nihaiba kacenu?
14 Palonyana ya ba sikwata sa “Isilaele wa Mulimu” ba sa li teñi fa lifasi, mi ka ku ba banyani ba Kreste, ba zwelapili ku sebeza sina “mandumeleti a Kreste.” (2 Makor. 5:20) Ba ketilwe ku sebeza sina sitopa sa mutanga ya sepahala, ya na ni kutwisiso kuli ba babalele ni ku fepa ka lico za kwa moya batoziwa ni ba buñata bo butuna bwa Bakreste ba ba zwelapili ku ekezeha ili bao cwale ba kopanyeleza bolule-lule ba ba na ni sepo ya ku pila fa lifasi ku ya ku ile. (Mat. 24:45-47; Sin. 7:9-15) Jehova u fuyozi tukiso ye, mi taba yeo ya iponelwa hande ka buiketo bwa kwa moya bo ba ikola balapeli ba niti kacenu.
15 Mañi ni mañi wa luna u ka eza hande ku ipuza kuli: ‘Kana naa lemuha buikalabelo bo ni swanela ku peta mwa puteho ya Sikreste? Kana naa yemela hande puso ya Jehova? Kana na tabela ku ba mubusiwa wa Mubuso wa Jehova o sweli ku busa? Kana ni ikatulezi ku taluseza ba bañwi ka za Mubuso wa Mulimu ka mo ni konela kaufela?’ Ka sikwata, lu itatela ku ba mwatasaa ketelelo ya Sitopa se si Etelela ni ku swalisana ni maeluda ba ba ketilwe mwa liputeho. Ka ku eza cwalo, lu bonisa kuli lwa amuhela puso ya Mulimu. (Mu bale Maheberu 13:17.) Ku ipeya kwatasaa tamaiso ka ku itatela ku tahisa swalisano ye ipitezi mwa lifasi kaufela ye siyo mwa lifasi le li aluhani le. Hape ku tahisa kozo ni ku luka mi ku lumbekisa Jehova, ili ku bonisa kuli puso ya ki yona ye nde ka ku fitisisa.
Puso ya Jehova I Sweli ya Tula
16. Ki katulo mañi ya tokwa ku eza mañi ni mañi kacenu?
16 Nako i sweli ya atumela ka bubebe kuli taba ye nee zusizwe mwa simu ya Edeni i tatululwe. Kacwalo, ye ki nako ya kuli batu ba eze katulo. Mañi ni mañi u swanela ku ikatulela ka za haiba u ka amuhela puso ya Jehova kamba u ka kumalela kwa puso ya butu. Lu na ni tohonolo ya ku tusa batu ba ba ishuwa ku eza katulo ye nde. Ona cwale-cwale, fa Armagedoni, puso ya Jehova i ka yola lipuso za batu ze zamaiswa ki Satani. (Dan. 2:44; Sin. 16:16) Puso ya butu i ka fela, mi Mubuso wa Mulimu u ka zamaisa lifasi kaufela. Puso ya Jehova i ka boniswa ku ba ye lukile.—Mu bale Sinulo 21:3-5.
17. Ki litaba mañi ze tusa batu ba ba ishuwa ku eza katulo ye nde ka za bubusi?
17 Ba ba si ka eza kale katulo ye tiile ya ku ba kwa lineku la Jehova ba swanela ku nyakisisa limbuyoti ze i ka tisa puso ya Mulimu kwa batu. Puso ya butu i palezwi ku tatulula butata bwa bukebenga, ku kopanyeleza cwalo ni likezo ze sabisa ze situhu. Puso ya Mulimu i ka zwisa ba ba maswe kaufela mwa lifasi. (Samu 37:1, 2, 9) Puso ya butu i tahisize lindwa ze sa feli, kono puso ya Mulimu i ka ‘yemisa lindwa mane ni kwa mafelelezo a lifasi.’ (Samu 46:9) Mi mane puso ya Mulimu i ka kutisa sinca kozo mwahalaa batu ni lifolofolo! (Isa. 11:6-9) Bunjebwe ni tala li zwezipili ku kataza batu mwa puso ya butu, kono puso ya Mulimu i ka li felisa. (Isa. 65:21) Nihaiba babusi ba butu ba ba na ni milelo ye minde ba palezwi ku felisa makulanu ni lifu, kono mwa puso ya Mulimu, basupali ni bakuli ba ka taba ha ba ka kutisezwa maata a kwa bunca. (Jobo 33:25; Isa. 35:5, 6) Kaniti, lifasi li ka ba paradaisi ili mo ku ka ba ni zuho ya bafu.—Luka 23:43; Lik. 24:15.
18. Lu kona ku bonisa cwañi kuli lwa lumela kuli puso ya Mulimu ki yona ye nde ka ku fitisisa?
18 Kaniti, puso ya Mulimu i ka felisa bumaswe kaufela bo bu tisizwe ki Satani ha naa kukuelize bashemi ba luna ba pili kuli ba kwenuhele Mubupi wa bona. Mi mu nahane feela, Satani u tahisize bumaswe ka lilimo ze batoo likana 6,000, kono Mulimu, ka Kreste, u ka felisa bumaswe bo kaufela mwa lilimo ze 1,000! Bo ki bupaki bo butuna bo bu bonisa ku ipitela kwa puso ya Mulimu! Ka ku ba Lipaki za Mulimu, lu mu amuhela sina Mubusi wa luna. Kacwalo, ha lu boniseñi mwa bupilo bwa luna bwa ka zazi ni zazi, ka nako ni nako kuli lu balapeli ba Jehova, lwa tabela ku busiwa ki Mubuso wa hae, mi ha lu swabeli ku ba Lipaki za hae. Mi ha lu itusiseñi kolo kaufela ku taluseza ba ba lata ku teeleza, kuli puso ya Jehova ki yona ye nde ka ku fitisisa.
Ka za Puso ya Mulimu, lu Itutileñi ka ku Bala . . .
[Lipuzo za Tuto]
[Maswaniso a fa likepe 29]
Jehova u zwezipili ku busa ka nako kaufela
[Siswaniso se si fa likepe 31]
Ku itatela ku ipeya kwatasaa puso ya Jehova ku tahisa swalisano mwa lifasi kaufela