Chiyuulu chaYehova Anakuchihakwilaku!
Chiyuulu chaYehova Anakuchihakwilaku!
‘Mukwakubadika Mwiwulu diyi wayuulaña wanta wawantu.’—DAN. 4:17.
1, 2. Yumanyi yaletesha chiyuulu chawantu kukañanyi kuyuula?
CHIYUULU chawantu chinakañanyi. Hichakujinaku. Chuma chacheni chaletesha chiyuulu chawantu kukañanya chidi chakwila nawu antu hiyakweti maana akuyuula chachiwahuku. Chiyuulu chawantu chinakañanyi kuyuula makonu muloña anyuuli amavulu anakumwekesha nawu ekala ‘adikeña aweni, akwakufwila mali, akwakudisama, akwakudinka wanta, abula kujila, oma muchima, akwakutuñula akwawu, abulaña kudihemba, asweja kuzuwa, abulaña kukeña yayiwahi, anfukeji nawa akwakuditohesha.’—2 Tim. 3:2-4.
2 Kumafuku akunyima, anvwali jetu akusambila akaanini kuyiyuula kudi Nzambi. Hakwila mwenimu, atoñojokeli nawu akudiyuulaña awenawu. Komana dinu, ovwahilileña chiyuulu chaSatana. Hamakombakaji ayaaka atanu nadimu anahituhu, antu anakañanyi kuyuula chiwahi, hamuloña wakuyiluwañesha chikupu kudi “mwanta wayulaña mpata yamunu mwishina,” Satana—natufuntishi chikupu hanyima muchihandilu chejima chawantu. (Yow. 12:31) Kuhosha hachihandilu chawantu makonu, mukanda waThe Oxford History of the Twentieth Century wahosha nawu “kukeña kushakama mwituña daloña” hikudikabisha hohu. Walumbulula nawu: “Bayi neyi kukañanya kudiwana hohuku, ilaña kufwila kudiwana kunateli kuleta kukala kweneni, nfulumendi yawukatu, ninjita yasweja.” Awa mazu anamwekeshi chikupu nawu chiyuulu chawantu chinakañanyi kuyuula.
3. Tunateli kuhoshahu netudi kutalisha hadi Nzambi chadi kuyuulayi neyi Adama naEvu hiyavulumwinuku?
3 Chawushona hama, hakwila anvwali jetu akusambila akaanini chiyuulu chachiwahi, chayuulewaña naNzambi. Kafwampi, hitweluka chikupu Yehova chadi kuyuulañayi hadinu iseki neyi chakwila Adama naEvu atwalekeluhu kwikala ashinshika kudi Nzambi. Hela chochu, twatela kukuhwelela netu chiyuulu chaNzambi chetejawu antu ejima mwadi kwikala kukeñañana wumu namukwawu nikubula chaambu. (Yil. 10:34; 1 Yow. 4:8) Kwesekeja namaana aNzambi abadika, tunateli kukuhwelela cheñi netu neyi antu etejeli kuyuulewa naYehova, yiluwa yejima yakoñeli antu etejeli chiyuulu chawantu chiña hiyekala kwokuku. Chiyuulu chaNzambi, chadi kutwesha ‘kwikutisha yuma yejima yikweti wumi.’ (Mas. 145:16) Dikwila nawu, chadi kwikala chiyuulu chachiwahi. (Kuhit. 32:4) Chawushona hama hakwila nawu antu akaanini chiyuulu chenichi.
4. Indi Satana amwiteja kuyuula kushika hachipimwinyi?
4 Hela chochu, chachiwahi kwanuka netu hela chakwila Yehova wayitejeli antu kudiyuulu, halekeli kuyuula yileñaleña yinduku. Nimwanta wañovu waBabiloni wetejeli nindi mwalala, “Mukwakubadika Mwiwulu diyi wayulaña wanta wawantu.” (Dan. 4:17) Kumpinji yakumbidi, Wanta waNzambi wakakoña yuma yakeñañayi Nzambi. (Mat. 6:10) Mwalala, Yehova wamwiteja Satana kuyuula neyi “nzambi yampata yamakonu” hakampinji kantesha kulonda kwakula nsañu yavulumwiniyi iwu mukwakudimbulula. (2 Kor. 4:4; 1 Yow. 5:19) Hela chochu, Satana hiyamwiteja kukoña chuma chabula kumwitejawu kudi Yehovaku. (2 Kushi. 20:6; esekejenu Yoba 1:11, 12; 2:3-6.) Mpinji yejima kwekalaña antu afuukulañahu kumwovwahila Nzambi, hela chakwila ashakamaña mukaayi kayuulewaña nachilumbu muneni waNzambi.
Nzambi Hayuulileñayi aIsarela
5. Chumanyi aIsarela chamukaninuwu Nzambi?
5 Kufuma hampinji yadiñaku Abeli kushika nimpinji yatachikili munza waIsarela, antu amavulu ashinshika adifukwileña kudi Yehova nikwovwahila nshimbi jindi. (Heb. 11:4-22) Mumafuku aMosi, Yehova wakasili chikaninu nanyana kankakulula Yakoba, nawa nyana yeniyi yekalili munza waIsarela. Mu 1513 B.C.E., aIsarela adikanini hamu nawanyanawu nakumwiteja Yehova kwikala nyuuli yawu, hahosheluwu nawu: “Mwejima mwanahoshiyi Yehova tukwilamu.”—Kwid. 19:8.
6, 7. Yililwinyi yamwekesheliyi Nzambi hayuulileñayi aIsarela?
6 Kudi chuma chamuleñeleli Yehova kutonda aIsarela kwikala antu jindi. (Tañenu Kuhituluka. 7:7, 8.) Kutonda kweniku kwabombelelumu yuma yayivulu kubadika hakuyakamena hohu aIsarela kumujimba. Ijina daNzambi niwanta windi wabombelelumu, nawa yumiyi yadiña yalema chikupu. A Isarela ekalili ayinsahu hamuloña wakwila nawu Yehova diyi Nzambi walala hohu. (Isa. 43:10; 44:6-8) Dichi, Yehova walejeli munza weniwu nindi: “Eyi wumuza wajila wakujilila Yehova Nzambi yeyi, Yehova nakutondi dehi wikali muza wambala wayena, chakubadika nyuza yejima yekala hewulu deseki.”—Kuhit. 14:2.
7 Nzambi hayuulileñayi aIsarela welukili nindi hiyawaninaku. Hampinji yoyimu, nshimbi jindi jadiñi jaloña nawa jamwekesheleña yililu yaMukwakuhana. Nshimbi jamwinkeluwu Mosi kudi Yehova jamwekesheli chikupu nawu Nzambi wajila, wakeña wuñaji, wanakenaña nawa hazuwaña swayuku. Mumafuku aYoshuwa niikiñu damumafuku indi, munza wovwahilileña nshimbi jaYehova nawa ashakamineña chawunda nikudiluñisha kuspiritu. (Yosh. 24:21, 22, 31) Hampinji yadiñaku aIsarela, Yehova wayuulileña chiwahi.
Yuma Yafumaña muChiyuulu chaWantu
8, 9. Chumanyi chaluwa chalombeluwu aIsarela nawa yumanyi yafuminumu?
8 Hela chochu, aIsarela akaanini chiyuulu chaNzambi mapampa kakavulu nawa Nzambi walekeli kuyikiña. Nkumininaku, aIsarela akeñeli nawu ayiyuuleña kudi muntu kuhitila mukumulomba kaprofwetu Samweli. Yehova wamulejeli Samweli kuyinka chuma chiyakeñeleña. Hela chochu, Yehova wabombeleluhu nindi: “Yeyi analekuwu wanyi, yami analekuwu, nibuli kwikala mwanta wawu wakuyiyulaña.” (1 Sam. 8:7) Hela chakwila Yehova wayitejeli aIsarela kuyiyuulaña kudi muntu, wayisoñamishili nindi muchiyuulu chawantu mwakafuma yuma yatama.—Tañenu 1 Samweli 8:9-18.
9 Yuma yamwekeni yamwekesheli walala wakusoñamisha kwaYehova. Hamuloña wakuyiyuula kudi muntu, kwaleñeleli aIsarela kumona kukala kwakweni, sweje-e hampinji mwanta yabuliliyi kwikala washinshika. Hakutoñojoka hachakutalilahu chawaIsarela, hitunateli kuhayama hakwiluka netu hayaaka yayivulu yinahituhu, nfulumendi jayuulewaña nawantu abula kumwiluka Yehova jinakañanyi kuleta yuma yayiwahi yahaya nyakaku. Mwamweni, akajipolitiki amakwawu alombaña kudi Nzambi kulonda yayikwashi aleti kuwunda nikukiñewa. Hanu dinu, Nzambi nateli kukiswila ñahi antu abulaña kwovwahila chiyuulu chindi?—Mas. 2:10-12.
Munza Wawuha Wunakuyuulewa naNzambi
10. Muloñadi Isarela chamuhiñishililuwu namunza watondeliyi Nzambi?
10 Munza waIsarela wamwekesheli nawu hiwakeñeleña kumukalakela Yehova nakashinshuku. Nkumininaku akaanini Mesiya atondeluwu kudi Nzambi, nawa Yehova wayikaanini nawa wafuukwiluhu kuhiñishahu izanvu dawantu ekalili munza wawuha. Chafuminumu, muchaaka cha 33 C.E. chipompelu chawakwaKristu chawakwakudifukula awayishewa chatachikili. Chipompelu chenichi, chekalili munza wawuha wunakuyuulewa naYehova. Pawulu wateneni munza weniwu nindi ‘aIsarela ambala aNzambi.’—Ŋal. 6:16.
11, 12. Kudifwananyi kutalisha hawunlomboli kwekala hakachi kawaIsarela “niaIsarela ambala aNzambi”?
11 Hekala chaambu nikudifwana hakachi kamunza waIsarela nimunza wawuha, ‘aIsarela ambala aNzambi.’ Kwambukaku naIsarela wakushankulu, chipompelu chawakwaKristu hichekala namwanta wayiyuulañaku, nawa hiyalambulaña anyama neyi antu avulumunaku. Kudifwana kumu kwekala hakachi kamunza waIsarela nachipompelu chawakwaKristu kudi kwakwikala nawakulumpi, hela aeluda. (Kwid. 19:3-8) Aeluda akwaKristu wenawa hiyayuulaña anyikokuku. Ilaña, abiñaña chipompelu nikwakamena chikupu nyidimu yawakwaKristu. Akamenaña nikulemesha antu ejima amuchipompelu.—2 Kor. 1:24; 1 Pet. 5:2, 3.
12 Kutoñojoka chikupu hanochu Nzambi chayuulileñayi aIsarela, nichayuulañayi ‘aIsarela ambala aNzambi’ nialundanawu “anyikoku acheñi,” kwaleñelaña kumuhameka Yehova chikupu nichiyuulu chindi. (Yow. 10:16) Chakutalilahu, nsañu yakunyaka yamwekeshaña nawu anyuuli awantu amuIsarela aleñeleleña antu jawu kukoña yuma yayiwahi hela yatama. Amana kwetu alombolaña hakachi kawakwaKristu atela kudizila kunichi chuma nawu, hela chakwila hiyekala anyuuli neyi chadiña anyanta akushankuluku, atela kwimika chakutalilahu chachiwahi chakwikala ashinshika.—Heb. 13:7.
Yehova Chayuulañayi Makonu
13. Yumanyi yalema yamwekeni mu 1914?
13 Makonu, akwaKristu ashimwinaña mukaayi nawu chiyuulu chawantu keña chikumi. Mu 1914, Yehova wemikili Wanta windi mwiwulu, wayuulewaña naMwanta watondayi, Yesu Kristu. Hayina mpinji, wamwinkeli Yesu ñovu jakuya “nakwimika mushindu kulonda nawa akemikaña mushindu ho-o.” (Chim. 6:2) Mwanta wamuha waswanikiluwu amulejeli nawu: “Ikalaku mwanta hadi ayilumbu jeyi.” (Mas. 110:2) Chawushona, nyunza yatwalekahu kukaana kwovwahila chiyuulu chaYehova. Anatwalekuhu kukoña yuma wukwila neyi ‘Yehova kwosi.’—Mas. 14:1.
14, 15. (a) Indi Wanta waNzambi watuyuulaña ñahi makonu, nawa malwihwinyi itwatela kudihula? (b) Yumanyi yinakumwekesha nawu chiyuulu chaNzambi dichabadika chikupu?
14 Awayishewa antesha ‘aIsarela ambala aNzambi’ achidi hanu hamaseki, nawa hakwikala amana kwaYesu, atwalekahu kukalakala neyi ‘añimeni jaKristu.’ (2 Kor. 5:20) Ayitonda kwikala nduñu wamaana nikashinshi kulonda kwakamena nikuhana yakudya yakuspiritu kudi awayishewa niizaza dawakwaKristu anakuvulilaku, akweti kuchiñeja kwakushakama haya nyaka hanu hamaseki. (Mat. 24:45-47; Chim. 7:9-15) Maheta akuspiritu adiluñishañawu akwakudifukula alala anakumwekesha nawu Yehova nakukiswila iyi ntanjikilu.
15 Ejima wetu twatela kudihula netu: ‘Komana neluka chikupu nyidimu yinatela kukalakala muchipompelu chawakwaKristu? Komana nahakwilañaku chikupu chiyuulu chaYehova? Komana natiyaña kuwaha kuyuulewa naWanta waYehova wunakuyuula? Komana inakufwila kutwalekahu kushimwina antu haWanta waNzambi hakumina ñovu jami? Hamu neyi izaza, twovwahilaña nshimbi jatwinkañawu kudi Izaza Dalombolaña nikuzatila hamu nawaeluda atondawu muyipompelu. Kwila mwenimu, chamwekeshaña nawu tunakwiteja chiyuulu chaNzambi. (Tañenu Aheberu 13:17.) Kwovwahila kwaleñelaña kudinuña mukaayi kejima nawa chumichi chalema chikupu mukanu kaayi mwabula kunuñañanawu antu. Cheñi, kwovwahila kwaletaña kuwunda, kushakama chiwahi nikumulemesha Yehova, nikumwekesha nawu chiyuulu chindi dichalala chikupu.
Chiyuulu chaYehova Chinashindi
16. Yumanyi yafuukulañahu antu ejima makonu?
16 Mpinji yakumanisha kukala kwatachikiluwu muEdeni yinakuswina kwakwihi. Dichi, ayinu diyi mpinji yatela kufuukulahu antu mwakwilila. Muntu wudi wejima watela kufuukulahu neyi chakwila watela kwiteja chiyuulu chaYehova hela wukukakela kuchiyuulu chawantu. Tukweti kukooleka kwakukwashaku antu adizoza kulonda afuukuluhu yuma yayiwahi. HaAmagedoni, chiyuulu chaYehova chakahiña haya nyaka nfulumendi jawantu jinakuyuulewa naSatana. (Dan. 2:44; Chim. 16:16) Chiyuulu chawantu chakakuma, nawa Wanta waNzambi wakayuula iseki dejima. Izu daNzambi dikashikijewa chikupu, chiyuulu chaYehova akachihakwilaku.—Tañenu Chimwekeshu 21:3-5.
17. Yumanyi yakwashaña antu adizoza kufuukulahu chiwahi kutalisha hachiyuulu?
17 Antu achidi kanda afuukuluhu kumukalakela Yehova atela kulomba chikupu kulonda kutoñojoka hankisu yakaleta chiyuulu chaNzambi kudi muchidi wamuntu. Chiyuulu chawantu chinakañanyi kumanisha wubanji, kubombelahu nimadombu. Chiyuulu chaNzambi chakafumishahu antu atama ejima hanu hamaseki. (Mas. 37:1, 2, 9) Chiyuulu chawantu chinaleñeli majita kutwalekahu, ilaña chiyuulu chaNzambi ‘chikakumisha majita mwakumina iseki dejima.’ (Mas. 46:9) Chiyuulu chaNzambi chakaleta cheñi kuwunda hakachi kawantu nawanyama. (Isa. 11:6-9) Wuzweñi ninzala hiyuma yinatwalekuhu muchiyuulu chawantu, hakwila chiyuulu chaNzambi chakamanisha yuma yeniyi. (Isa. 65:21) Anyuuli awantu afwilaña kumanisha kukala anakañanyi kumanisha yikatu nikufwa, hakwila muchiyuulu chaNzambi, atushinakaji niakata akatiya kuwaha kufunta cheñi kuwukwenzi. (Yoba 33:25; Isa. 35:5, 6) Mwalala, iseki akadilisha kwikala paradisa nawa afu akayisañula.—Luka 23:43; Yil. 24:15.
18. Tunateli kumwekeshaña ñahi netu chiyuulu chaNzambi dichalala chikupu?
18 Chakadi nikujina, chiyuulu chaNzambi chakamanisha kukala kwejima kwaleteliyi Satana haluwañesheliyi anvwali jetu akusambila kulonda kumukaana Nleñi yawu. Ilukenu nenu, Satana nakojeji kukala hadi yaaka 6,000, ilaña Nzambi wakazatisha Kristu, kufumishahu kukala kwejima muyaaka 1,000. Yuma yeniyi yinakumwekesha nawu chiyuulu chaNzambi dichaloña hohu. Hakwikala aYinsahu jaNzambi yetu, twamwitejaña netu hiNyuuli yetu. Dichi, muchihandilu chetu chejima tumwekesheña netu tudi akwakudifukula aYehova, antu akayuulewa naWanta windi, nikutiya kuwaha hakwikala aYinsahu jindi. Nawa, neyi tunawani muntu wudi wejima wukutiya nsañu yayiwahi, twatela kumushimwina netu chiyuulu chaYehova dichalala chikupu.
Kutalisha haChiyuulu chaNzambi Yumanyi Yitunadizi Kuhitila Mukutaña . . .
[Malwihu aKuzatisha haKudiza]
[Nyevulu yidi hefu 29]
Yehova natwalekuhu kuyuula
[Mwevulu wudi hefu 31]
Kwovwahila chiyuulu chaYehova kwaleñelaña kudinuña mukaayi kejima