A Zeova wilgame t’a naamã sɩd ka to ye!
A Zeova wilgame t’a naamã sɩd ka to ye!
“Yaa Sẽn-ka-to soabã n so ninsaalbã soolem.”—DAN. 4:14.
1, 2. Sõdg-y bʋʋm kẽer sẽn kɩt tɩ ninsaalbã naam yaa faoore.
NINSAALBÃ naam pa yãk neng ye! Rẽ yaa vẽenega. Bʋʋm wʋsg n kɩt tɩ yaa woto, la sẽn yɩɩd fãa, yaa tɩ ninsaal pa tar yam sẽn sek n tõe n dɩ naam tɩ yɩ sõma ye. Rũndã-rũndã yaa vẽeneg tɩ ninsaalbã naam sɩd pa tõe n wa ne yolsg ye. Bala nanambs wʋsg sɩd wilgdame tɩ b yaa ‘beed dãmba, ligd noangdba, wilg-m-mens rãmba, tɩtaam dãmba, pʋto-rãmba, tẽn-kãn-neba, neb sẽn ka tar yõk-m-menga, nin-sõamyã kisgdba, zãmb dãmb la wuk-m-mens rãmba.’—2 Tɩm. 3:2-4.
2 D yaab a Ãdem ne a Hawa yãka yam n tõdg tɩ Wẽnnaam kõn yɩ b naab ye. B sẽn wa n maand woto wã, tõe tɩ b ra tagsdame tɩ rẽ la b na n paam n soog b mense. La b belga b mense, bala yaa a Sʋɩtãan n lebg b naaba. Yʋʋm tus a yoob masã la a Sʋɩtãan sẽn yaa “dũniyã naabã” so ninsaalbã, n kɩt tɩ b lugl b goosneema rãmba. La b naamã rɩɩb sẽn pa zemsã kɩtame tɩ rũndã-rũndã, wẽnemã zẽk n ta a zug tẽn-sʋka. (Zã 12:31) Sebr a ye (The Oxford History of the Twentieth Century) goma ninsaalbã yɛlã sẽn yaa to-to rũndã-rũndã wã yelle, n yeel tɩ ka le tar yõod tɩ b “tẽ tɩ b tõe n waa ne dũni sẽn zems zãng” ye. B wilga gomdã võore, n yeel woto: “Pa b sẽn pa tõe n paam-a wã meng la yellã ye. Yaa tɩ modgr nins b sẽn maandã pʋd n wata ne yel-beedo, n kɩtdẽ tɩ nanambsã rɩt naamã ne toolem, la wat ne zab menga.” Ad woto wilgda vẽeneg tɩ b sɩd sak n deegame tɩ ninsaalbã naam yaa faoore!
3. A Ãdem ne a Hawa sã n da pa kɩɩsẽ Wẽnnaam, yɛlã ra na n yɩẽ-la wãn-wãna?
3 Dẽnd d tõe n yeelame tɩ d yaab a Ãdem sẽn zãgs Wẽnnaam naamã sẽn yaa naam ning sẽn yaa-a sõma wã, sɩd yaa bʋko! Yaa sɩd tɩ d pa mi Wẽnnaam sẽn da na n sigl a naamã to-to n ges tẽngã yelle, a Ãdem ne a Hawa sã n da kell sak-a wa a sẽn datã ye. La d tõe n kɩsa sɩd bal tɩ ninsaalbã sã n da sakẽ tɩ Wẽnnaam yɩ b naaba, a ra na n gesa b yell ne nonglem n pa tũus neb ye. (Tʋʋ. 10:34; 1 Zã 4:8) Wẽnnaam a Zeova yamã sẽn ka to wã yĩng kɩtame me tɩ d tõe n yeel tɩ ninsaalbã sã n da kell n sak t’a Zeova yɩ b naaba, d ra na n gila ninsaalbã naamã sẽn wa ne yɛl ninsã. Wẽnnaam naamã ra na n kɩtame tɩ ‘bõn-vɩɩsã fãa paam bark tɩ seke.’ (Yɩɩl 145:16) Koɛɛg-koɛɛga, ra na n yɩɩ naam sõmblem sẽn ka to. (Tõo. 32:4) Ad ninsaalbã sẽn zãgsã sɩd yaa bʋko!
4. Rẽ yĩnga Wẽnnaam kõo a Sʋɩtãan sor t’a tõe n maan a sẽn datã fãa bɩ?
4 La yaa d bãng tɩ baa a Zeova sẽn bas ninsaalbã tɩ b rɩt naam taab zutã, pa rat n yeel t’a basa taale, n pa le tar sor n tõe n dɩ naam a bõn-naandsã zug ye. Baa Babilon rĩmã sẽn yɩ rĩm kãsengã wa n baas n sak n deegame tɩ “yaa Sẽn-ka-to soabã n so ninsaalbã soolem.” (Dan. 4:14) Baa kaoosda, Wẽnnaam Rĩungã na n wa kɩtame t’a raabã maane. (Mat. 6:10) Yaa sɩd t’a Zeova basa a Sʋɩtãan t’a lebg “dũni kãngã wẽnnaam” wakat bilf yĩnga, sẽn na yɩl n tõog n leok a sẽn wa ne no-koeemd ningã. (2 Kor. 4:4; 1 Zã 5:19) La baasgo, a Zeova sẽn kõ-a sor t’a tõe n maan bũmb ninsã tara koaka. (2 Kib. 20:6; Ges-y Zoob 1:11, 12; 2:3-6.) Sẽn paase, baa dũniyã sẽn be Wẽnnaam bɛ-kãsengã nugẽ wã, hal pĩnd n tãag masã, neb n be n sakd Wẽnnaam.
Wẽnnaam da yaa Israɛll naaba
5. Bõe la Israɛll nebã pʋlem Wẽnnaam?
5 Hal a Abɛll wakatã n tãag Wẽnnaam a Zeova sẽn wa n na n kɩt tɩ Israɛll lebg buud a sẽn so wã, neb n zĩnd n sɩd ra tũud-a ne pʋ-peelem, hal n da sakd a raabã. (Heb. 11:4-22) Yʋʋmd 1513 sẽn deng a Zezi rogmã, rat n yeel t’a Moiiz wakatã, a Zeova maana kaool ne a Zakoob yagensã, n kɩt tɩ b lebg buud a sẽn so. Wakat kãnga, Israɛll nebã naaga taab n pʋlem tɩ ‘bũmb nins fãa Zusoabã sẽn yeelã, bãmb na n maaname,’ tɩ wilgdẽ tɩ b sakame t’a Zeova na n yɩɩ bãmb ne b yagensã fãa naaba.—Yik. 19:8.
6, 7. A Zeova sẽn wa n dɩt naam Israɛll nebã zutã, yɛlã ra yaa a wãn-wãna?
6 A Zeova sẽn yãk Israɛll nebã tɩ b na n yɩ buud a sẽn so wã pa zaalem yĩng ye. A ra tara raab ne-ba. (Karm-y Tõod 7:7, 8.) A ra rata b neere, la pa rẽ yĩng bal ye. Sẽn yɩɩd fãa, ra yaa a yʋʋrã la a naamã na paam waoogr yĩnga. Israɛll nebã ra na n yɩɩ kaset sẽn wilgd t’a Zeova bal n yaa Wẽnnaam hakɩka. (Ezai 43:10; 44:6-8) Rẽ n so t’a Zeova kɩt tɩ b yeel-b woto: “Yãmb yaa neb sẽn welg toor Zusoab a Wẽnnaam yĩnga. Bãmb yãka yãmb buud nins sẽn be dũniyã zugã sʋka, n maan b meng neba.”—Tõo. 14:2.
7 Wẽnnaam sẽn da rɩt naam Israɛll nebã zugã, a ra wilgdame t’a miime tɩ b yaa koangdba. La baasgo, a noyã ra zemsa zãnga, n da kɩtdẽ tɩ b nee a sẽn yaa Wẽnnaam ning buudã. Tõod nins a Zeova sẽn kõ a Moiiz t’a taas-bã ra wilgda vẽeneg t’a yaa sõngo, t’a nonga tɩrlem, t’a sakd n kõta sugri, la t’a yaa su-mar soaba. Rẽ poore, a Zozue ne a rog-taasã zãmaanẽ wã, Israɛll nebã saka a Zeova noyã, tɩ kɩt tɩ b ra zĩ bãane, la b ra tar a barka. (Zoz. 24:21, 22, 31) Bark nins Israɛll nebã sẽn da paamd wakat kãngã wilgdame t’a Zeova naamã bal n sɩd yaa sõma.
Nebã naam wata ne zu-loeese
8, 9. Bõe la Israɛll nebã kos-yã, la rẽ waa ne bõe?
8 La Israɛll nebã ra wae n kɩɩsda Wẽnnaam, tɩ kɩt t’a mi n wa bas b koglgo. Israɛll nebã wa n baas n yeela no-rɛɛs a Sãmwɛll tɩ b rata ned tɩ yɩ b rĩma. A Zeova yeela a Sãmwɛll t’a maan wa b sẽn kosã. La a paasa woto: “Ka foom la b kɩɩsẽ ye. Yaa maam la b ka le rat tɩ m yɩ b rĩma.” (1 Sãm. 8:7) Yaa sɩd t’a Zeova sakame tɩ Israɛll nebã na n paam rĩm sẽn yaa ninsaala, la a reng n keoog-b lame tɩ rẽ na n waa ne zu-loeese.—Karm-y 1 Sãmwɛll 8:9-18.
9 Israɛll nebã yɛl sẽn yɩ to-to rẽ poorã wilgda vẽeneg t’a Zeova sẽn yeel-bã yaa sɩda. Ninsaalbã sẽn sɩng naam dɩɩb Israɛll tɛkã, nin-buiidã paama zu-loees wʋsgo. Sẽn yɩɩd fãa, rĩmã sã n da pa sakd a Zeova. Woto kɩtame tɩ neb nins sẽn pa mi a Zeova wã naam sẽn pa tol n yãkd nengã pa lingd tõnd ye. Yaa sɩd tɩ nanambs kẽer mi n pʋʋsdame n kot Wẽnnaam t’a sõng-b tɩ b tõog tɩ laafɩ la bãan zĩnd b nin-buiidã sʋka. La rẽ yĩnga, Wẽnnaam na sak n sõng neb sẽn pa rat n sak a naamã sɩda?—Yɩɩl 2:10-12.
Bu-paalg Wẽnnaam sẽn so
10. Bõe yĩng tɩ Wẽnnaam yãk bu-paalg tɩ ledg Israɛlle?
10 Israɛll nebã manesem wilgame tɩ b ra pa rat n sak a Zeova ne b sũy fãa ye. B wa n zãgsa Mesi ning Wẽnnaam sẽn yãkã. Rẽ kɩtame t’a Zeova yeel tɩ b pa le yaa buud yẽ sẽn so, la t’a na n yãka neb sull sẽn na n yɩ bu-paalg n led b zĩigẽ. Sɩd me, yʋʋmd 33 soabã pʋgẽ, a Zeova zaeya neb sull sẽn da tũud-a ne a vʋʋsem sõngã, tɩ rẽ yɩ kiris-neb tigingã luglgu. Yaa tiging-kãng la bu-paalg ning sẽn sakd a Zeova naamã. Tʋm-tʋmd a Poll bool-a lame tɩ “Israɛll sẽn yaa Wẽnnaam dẽnda.”—Gal. 6:16.
11, 12. Wõneg bʋg n be “Israɛll sẽn yaa Wẽnnaam dẽndã” ne pĩnd Israɛllã sʋka?
11 Bu-paalgã ne pĩnd Israɛllã tara yɛl sẽn wõnd taaba, la zĩis kẽer me, b pa tol n wõnd taab ye. Wala makre, kiris-neb tigingã pa tar naab sẽn yaa ninsaal wa pĩnd wẽndẽ Israɛllã ye. Sẽn paase, b pa baood n kʋ rũms n maan maand b yel-wẽnã yĩng ye. Bũmb a ye sẽn kɩt tɩ pĩnd Israɛllã ne kiris-neb tigingã wõnd taaba, yaa tɩ b yiibã fãa pʋsẽ, b yãkda rap tɩ b yaa kãsem dãmba. (Yik. 19:3-8) Kiris-nebã tiging pʋgẽ, kãsem dãmbã pa tigingã nanambs ye. B geta tigingã neb yelle, la b lʋɩt taoor n tʋmd a tʋʋmã ne yamleoogo. B geta ned kam fãa yell ne nonglem, n wilgdẽ tɩ b nand-a lame la b waoogd-a.—2 Kor. 1:24; 1 Pɩɛ. 5:2, 3.
12 “Israɛll sẽn yaa Wẽnnaam dẽndã” nebã, n paas b tũud-n-taasã a Zezi sẽn boond t’a “piis a taabã” sã n bʋgsd a Zeova sẽn tall manesem ning ne pĩnd Israɛllã zugu, b manegd n nong-a lame la b nong a naamã n paasdẽ. (Zã 10:16) Wala makre, Israɛll nebã kibay wilgdame tɩ b sã n da tar dĩm-sõngo, nin-buiidã me tʋʋm yaa sõma, la b rĩmã sã n da yaa nin-wẽnga, nin-buiidã tʋʋm me yaa wẽnse. Woto kõta neb nins sẽn lʋɩt kiris-neb tigingã taoorã yam tɩ b miẽ tɩ baa b sẽn pa nanambsã, b segd n kõta mak-sõng tẽebã wɛɛngẽ wakat fãa.—Heb. 13:7.
A Zeova sẽn dɩt naam to-to rũndã-rũndã
13. Yʋʋmd 1914 soabã pʋgẽ, yel-bʋg sẽn yaa kãseng n zĩndi?
13 Rũndã-rũndã, kiris-neb hakɩkã moonda dũniyã gill zug tɩ ninsaalbã naam na n saa ka la bilfu. Yʋʋmd 1914 soabã pʋgẽ, a Zeova lugla a Rĩungã saasẽ, n kɩt t’a Zezi Kirist yaa Rĩung kãng Rĩma. Biiblã yeelame tɩ rẽ tɛka, a kõo a Zezi noor t’a kẽng n tɩ zabe, la a paas t’a “tara tõogre.” (Wil. 6:2) A Zezi sẽn deeg a naamã paalmã, b yeel-a lame t’a ‘rɩ naam a bɛɛbã sʋka.’ (Yɩɩl 110:2) Bʋko, dũniyã nanambs ket n zãgsdame tɩ b kõn sak a Zeova naamã ye. B ket n maanda wa “Wẽnnaam ka ye.”—Yɩɩl 14:1.
14, 15. a) Wãn to la Wẽnnaam Rĩungã rɩt naam kiris-nebã zug rũndã-rũndã, la rẽ kɩtame tɩ d segd n sok d mens sogs-bʋse? b) Wãn to la d ne rũndã-rũndã meng tɩ Wẽnnaam naamã la sõma?
14 “Israɛll sẽn yaa Wẽnnaam dẽnda” neb b sẽn boond t’a Zezi sam-biisã kẽer n ket tẽngã zugu. Nin-kãensã yaa “Kirist tʋm-tʋmdb” tẽngã zugu. (2 Kor. 5:20) Yaa bãmb sullã la tʋm-tʋmd sẽn tũud sɩd la sẽn tar yamã. Bãmb n segd n ges sẽn paam-b vʋʋsem sõngã zaeebã tẽeb yelle, la b ges kʋʋn-kãsengã neb sõor sẽn tar paasgo, n lebg milyõ rãmbã rũndã-rũndã wã me tẽeb yelle, rat n yeel tɩ sẽn na n vɩɩmd-b wakat sẽn kõn sa tẽng zugã. (Mat. 24:45-47; Wil. 7:9-15) Bark nins Kiris-neb hakɩkã sẽn paamd Wẽnnaam tũudmã wɛɛngẽ wã wilgda vẽeneg t’a sɩd sõngda tʋm-tʋmdã sull a tʋʋmdã pʋgẽ.
15 Tõnd ned kam fãa segd n soka a meng woto: ‘Rẽ yĩnga mam sɩd miime tɩ m tara m sẽn segd n maan kiris-neb tigingã pʋgẽ bɩ? Mam teenda a Zeova sẽn dɩt a naamã to-to wã wa a sẽn datã bɩ? Mam kɩsa sɩd tɩ m sẽn paam n yaa a Zeova Rĩungã nedã yaa zu-zẽkr bɩ? Rẽ yĩnga mam yãka yam n na n ket n moond nebã Wẽnnaam Rĩungã koɛɛg wa m sẽn tõe tɛk bɩ?’ D fãa sẽn naag taab sakd n tũuda Siglgã taoor lʋɩtb Sull sẽn wilgd-d bũmb ninsã, la d sakd tigimsã pʋsẽ kãsem dãmb saglse. D sẽn maand woto wã, d wilgdame tɩ d sakda Wẽnnaam sẽn dɩt a naamã to-to wã. (Karm-y Hebre dãmb 13:17.) D sẽn sakd ne yamleoogã kɩtame tɩ baa dũni kãngã sẽn pid ne welsgã, d tũuda Wẽnnaam ne yam a yembre. Woto kɩtame me tɩ laafɩ la tɩrlem be d sʋka, la pẽgd a Zeova, tɩ wilgdẽ tɩ yaa yẽ naamã bal n yaa sõma.
A Zeova naamã tõogdame
16. Bõe la ned kam fãa segd n maan rũndã-rũndã?
16 Wakat ning b sẽn na n welg no-koeemd ning sẽn zĩnd Edɛnnã kolgda tao-tao. Woto yĩnga, yaa masã la ned kam fãa segd n yãk a sã n na n saka a Zeova naamã bɩ a na n kell n teela ninsaalbã naam. Tõnd n segd n sõng sik-m-mens rãmbã tɩ b bãng b sẽn segd n maanega. Ka la bilfu, Armagedõ sã n ta, a Zeova na n menesa ninsaalbã naam a Sʋɩtãan sẽn so wã, t’a Rĩungã led b zĩigẽ wakat fãa yĩnga. (Dan. 2:44; Wil. 16:16) Ninsaalbã naam sɩd na n saame, tɩ Wẽnnaam Rĩungã soog dũniyã gilli. Wakat kãng la na n tolg n lebg vẽeneg nebã fãa nifẽ t’a Zeova naamã n sɩd yaa sõma.—Karm-y Wilgr 21:3-5.
17. Bõe n tõe n sõng sik-m-mens rãmbã tɩ b bãng n yãk b sẽn na n teel-a soaba?
17 Neb nins sẽn ket n nan pa wilg vẽeneg tɩ yaa a Zeova la b teendã segd n bʋgsa a naamã sẽn na n wa ne bark ninsã zug neere, la b kos a sõngre. Ninsaalbã naam pa tõog n kɩt tɩ teerorismã la tʋʋm-kɛg a taabã baa a ye sa ye. La Wẽnnaam naamã na n kɩtame tɩ wẽnem buudã fãa sa dũniyã gill zugu. (Yɩɩl 37:1, 2, 9) Ninsaalbã naam kɩtame tɩ yaa zab wakat fãa, la Wẽnnaam naamã na n kɩtame tɩ “zabr sɛ hal dũniyã tɛk fãa.” (Yɩɩl 46:10) Wẽnnaam naamã na n kɩtame meng tɩ laafɩ le zĩnd ninsaalbã ne rũmsã sʋka! (Ezai 11:6-9) Ninsaalbã naam kɩtame tɩ wakat fãa, naong la kom namsd neb wʋsgo, la Wẽnnaam naamã na n kɩtame tɩ rẽ fãa sa. (Ezai 65:21) Baa nanambs nins sẽn sɩd da rat nin-buiidã neerã pa tõog tɩ bãasã la kũumã sa ye. La Wẽnnaam naamã na n kɩtame tɩ sẽn kʋʋl-bã lebs n paam keelem ning b sẽn da tar b bɩ-bɩɩlem wakatã, tɩ bãad rãmbã me paam laafɩ la keelem. (Zoob 33:25; Ezai 35:5, 6) Sɩd me, dũniyã tõr na n lebga arzãn tɩ baa sẽn ki-bã vʋʋge.—Luk 23:43; Tʋʋ. 24:15, NW.
18. Wãn to la d tõe n wilg tɩ d kɩsa sɩd tɩ Wẽnnaam naamã sõmblem sɩd ka to?
18 A Ãdem ne a Hawa sẽn sak a Sʋɩtãan n kɩɩs b Naandã waa ne zu-loees wʋsgo, la Wẽnnaam naamã na n yẽesa rẽ fãa. Tags-y n ges-y-yã! Yaa hal sẽn na maan yʋʋm 6 000 woto masã la a Sʋɩtãan sẽn kɩt tɩ ãdem-biisã namsdẽ wã, la ne Kiristã maasem, Wẽnnaam na n manega rẽ fãa yʋʋm 1 000 pʋgẽ bala. Ad woto yaa bũmb sẽn wilgd vẽeneg tɩ Wẽnnaam naamã sõmblem sɩd ka to ye! Tõnd sẽn yaa Wẽnnaam Kaset rãmbã, d sakame tɩ yaa yẽ la d Rĩma. Woto yĩnga, bɩ d wilg wakat fãa la zĩig fãa tɩ d tũuda a Zeova, tɩ d sakda a Rĩungã la d wilgdẽ tɩ d sẽn paam n yaa a Kaset rãmbã yaa zu-zẽkre. Bɩ d tũnugd ne segb buud fãa n wilgd sẽn dat-bã t’a Zeova naamã sõmblem sɩd ka to ye.
Bõe la vɛrse nins sẽn pʋgdã wilgd tõnd Wẽnnaam naamã wɛɛngẽ?
• Tõod 7:7, 8.
• Wilgr 21:3-5.
[Zãmsgã sogsgã]
[Foto, seb-neng 29]
A Zeova yaa naab wakat fãa
[Foto, seb-neng 31]
Tõnd sẽn sakd a Zeova naamã kɩtame tɩ d zemsd taab dũniyã gill zugu