Say Pananguley nen Jehova—Apaneknekan a Sankaabigan!
Say Pananguley nen Jehova—Apaneknekan a Sankaabigan!
“Say Sankatagyan manuley ed panarian na saray totoo.”—DAN. 4:17.
1, 2. Anto so pigaran rason no akin a sinmaew so uley na too?
SAY uley na too et sinmaew! Segsegurado tayo ed satan. Say manunan rason et lapud andian na karunongan so totoo pian manuley a matalona. Nagkalalo lan sankanengneng itan ya isasaew diad sarayan panaon a dakel so manuley a ‘maaro ed inkasikaran dili, maaro ed kuarta, mapaspasirayew, mapaatagey, aliwan matoor, agdan balot labay so mipaknaan, managpauges, anggapoy panangontrol da ed dili, masesebeg, andian na aro ed kamaongan, traidor, tan makinon.’—2 Tim. 3:2-4, NW.
2 Nensaman, impulisay na inmunan atateng tayo so pananguley na Dios. Nen ginawa ra itan, nayarin say abaloan da et nagmaliw iran independente balet diad tua et nampasakop ira ed si Satanas. Say makapuy a sistema na too a binmayag la ed loob na anem libon taon, tan impluensyadon maong na “prinsipe na sayan mundo,” so sengegan no akin ya onia kairap so kipapasen tayo natan. (Juan 12:31) Nipaakar ed satan, imbaga na The Oxford History of the Twentieth Century ya anggapoy gunggona na “pampirawat ed perpekton mundo.” Inkuan ni na satan: “Likud ed ag-itan nagamoran, no salien itan a pawalaen, say resulta et desyang, diktatoryal, tan guerra ni ingen.” Agaylan matuan panangaksobi a sinmaew so uley na too!
3. Ideskribe pa no panon kasi panuley na Dios no agnankasalanan si Adan tan Eva.
3 Talagan makapaermen ta impulisay na inmunan atateng tayo so alenleneg a matalonan uley—say uley na Dios! Siempre, agtayo amta no anto kasi usaren na Dios a sistema ed panuley to diad dalin no nansiansian matoor si Adan tan Eva. Balet, makaseguro itayo a say uley na Dios a pampapasakopan na katooan et napno komon na aro tan anggapoy panangidumaduma. (Gawa 10:34; 1 Juan 4:8) Lapud agnaparaan so karunongan na Dios, segurado itayo met a no nansiansian matoor so katooan ed uley nen Jehova, apaliisan komon so amin a lingon ginawa na saramay manusuporta ed uley na too. Tan napepenek la komon na uley na Dios, salanti, say teokrasya, iray “pilalek na ami bengatlan mabilay.” (Sal. 145:16) Diad antikey, seguradon sakey itan a perpekton uley. (Deu. 32:4) Talagan makapaermen ta impulisay itan na totoo!
4. Anggad iner so inyabuloy nen Jehova nipaakar ed uley nen Satanas?
4 Balet, maabig no nodnonoten tayo ya anggano inabuloyan nen Jehova iray totoo ya uleyan day inkasikara, agton balot inikbanay kanepegan ton manuley ed saray pinalsa to. Anggan say makapanyarin ari na Babilonia et apilitan a mamidbir a talagan “say Sankatagyan [labat so] manuley ed panarian na saray totoo.” (Dan. 4:17) Diad kaunoran, sumpalen na Panarian na Dios no antoy linawa to. (Mat. 6:10) Tua ya aabuloyan nin magano nen Jehova si Satanas a magmaliw a “dios na sayan panaon” pian makapangiter na makakombinsin ebat ed saray isyu a pinalesa na satan a sumusumpa. (2 Cor. 4:4; 1 Juan 5:19) Balet, angangga labat si Satanas ed no antoy iyaabuloy nen Jehova. (2 Awa. 20:6; ikompara so Job 1:11, 12; 2:3-6.) Tan walan walaray totoon pipilien day manpasakop ed Dios, anggano manbibilay ira ed mundon uuleyan na manunan Kabusol na Dios.
Say Uley na Dios ed Israel
5. Antoy insipan na Israel ed Dios?
5 Manlapud panaon nen Abel anggad panaon na saray patriarka, dakel a matoor a totoo so nandayew ed si Jehova tan tinmulok ed saray ganggan to. (Heb. 11:4-22) Nen panaon nen Moises, akisipanan si Jehova ed saray ilalak nen patriarkan Jacob, tan saraya so nagmaliw a nasyon na Israel. Nen 1513 B.C.E., insipan na saray Israelita tan saray ilalak da a si Jehova so awaten dan Manuley, ya inkuan da: “Amin a sinalita nen Jehova gawaen mi.”—Exo. 19:8.
6, 7. Antoran kualidad na Dios so nipabitar diad uley to ed Israel?
6 Walay gagala nen Jehova sanen pinili to ray Israelita a magmaliw a totoo to. (Basaen so Deuteronomio 7:7, 8.) Aliwa labat a say pankaabigan na saray Israelita so nalalanor ed saya, noag pati say ngaran tan soberanya na Dios, tan mas importante iraya. Say Israel so mantasi ed katuaan a si Jehova labat so tuan Dios. (Isa. 43:10; 44:6-8) Kanian oniay imbaga nen Jehova ed sayan nasyon: “Sakey ka a katooan a masantos a totoo nen Jehova a Dios mo, ta si Jehova pinili to ka ya ombaley a kayarian to a bukor, a nipatalonggaring ed amin na saray balbaley a wala ed tapew na dalin.”—Deu. 14:2.
7 Inkonsidera na Dios so ag-inkaperpekto na saray Israelita diad paraan na impanguley to. Balet siansia nin perpekto iray ganggan to tan ipapatnag na saratan iray kualidad to. Diad saray ganggan ya inter nen Jehova panamegley nen Moises et malinlinew a nipabitar so inkasanto na Dios, say aro to ed hustisya, say inkamabulos ton mamerdona, tan say inkamaanos to. Diad saginonor, nen panaon nen Josue, tinulok na nasyon na Israel iray ganggan nen Jehova tan nanggayagaan day kareenan tan espiritual iran bendisyon. (Jos. 24:21, 22, 31) Diad sarayan panaon ed bilay na saray Israelita et binmitar a say pananguley nen Jehova et matalona.
Uley na Too, Walay Katekep Ton Makapuy a Resulta
8, 9. Antoy agmakabat a kinerew na Israel, tan antoray katekep ton resulta?
8 Balet, diad inlabas na panaon, mabetbet ya agnampasakop iray Israelita ed uley na Dios kanian naandi proteksion to’d sikara. Asabi panaon, diad panamegley nen propeta Samuel et kinmerew ira na ari a nanengneng da, salanti, sakey a too. Imbaga nen Jehova ed si Samuel ya iter toy kekerewen da. Balet, oniay inyarum nen Jehova: “Agda ka pinugas [“impulisay,” NW] no ag-ingen siak so pinugas da pian agak manari ed sikara.” (1 Sam. 8:7) Anggaman inabuloyan nen Jehova so Israel a nawalaay nanengneng ya ari, pinasakbayan to ra a say uley na too et walay katekep ton makapuy a resulta.—Basaen so 1 Samuel 8:9-18.
9 Apaneknekan ed saray agawa a tua so impasakbay nen Jehova. Say uley na sakey a toon ari et nanresulta ed seryoso iran problema ed Israel, lalo la no aliwan matoor itan ya ari. No nonoten tayo iyan agawa, agtayo la pankelawan no akin a nensaman ni, say gobiernon uuleyan na totoon agmikabat ed si Jehova et agmakapangiiter na maabig tan permanente iran resulta. Tua a walaray politikon onkekerew na panamendisyon na Dios diad pansasagpot dan mamawalay kareenan tan seguridad, balet panon iran bendisyonan na Dios anta ag-ira manpapasakop ed pananguley to?—Sal. 2:10-12.
Sakey a Balon Nasyon ya Uuleyan na Dios
10. Akin et sinalatan na Dios so Israel bilang pinilin nasyon?
10 Apaneknekan ya agmabulos so nasyon na Israel a matoor a panlingkoran si Jehova. Ag-abayag, impulisay day Mesias a tinuro na Dios, tan impulisay met ira nen Jehova tan denesidi ton salatan ira na sakey a grupo na totoo a manugyop ed sakey a balon nasyon. Bilang resulta, nen 33 C.E. et niletneg so Kristianon kongregasyon na saray alanaan a managdayew nen Jehova. Satan a kongregasyon et nibagan sakey a balon nasyon ya uuleyan nen Jehova. Tinukoy itan nen Pablo bilang say “Israel na Dios.”—Gal. 6:16.
11, 12. No nipaakar ed uksoyan ed panangasikaso, antoray pamparaan na Israel tan say “Israel na Dios”?
11 Walaray pandumaan tan pamparaan na orihinal a nasyon na Israel tan say balon “Israel na Dios.” Aliwan singa say Israel nensaman, say Kristianon kongregasyon et ag-uuleyan na sakey a toon ari tan ag-itan kaukolan a mangiyapay na ayayep parad saray makasalanan. Say sakey a pamparaan na nasyon na Israel tan say Kristianon kongregasyon et say uksoyan nipaakar ed pakawalaay mamasiken, odino mamatatken. (Exo. 19:3-8) Sarayan Kristianon mamatatken et agda uuleyan so pulok, noagta papastolan day kongregasyon tan mabulbulos dan idadaulo iray Kristianon aktibidad. Sikaray maaron midedeneng ed kada membroy kongregasyon, ya amin et tratratoen da tekep na galang tan dignidad.—2 Cor. 1:24; 1 Ped. 5:2, 3.
12 No dalepdepen na saray membroy “Israel na Dios” tan saray kaiba ran ‘arum a karnero’ so paraan na impideneng na Dios ed Israel, lalon naapresya ra si Jehova tan say pananguley to. (Juan 10:16) Singa bilang, diad Israel nensaman, saray totoon manuley et balbaleg so impluensya ra ed saray uuleyan da, balanglan parad pankaabigan odino pankaugsan. Lapud satan, nipurek ed saramay mangidadaulo ed saray Kristiano ya anggaman aliwa iran manuley a singa saraman ya ari, nepeg a naynay iran mangipanengneng na maong ya ehemplo ed pananisia.—Heb. 13:7.
No Panon a Manuuley si Jehova Natan
13. Anton importantin ebento so agawa nen 1914?
13 Saray Kristiano natan et ipapakabat da ed interon mundo a magano lan manampot so uley na too. Nen 1914, inletneg nen Jehova so Panarian to diad tawen ya uuleyan na tinuro ton Ari a si Jesu-Kristo. Diad saman et inikdan toy Jesus na autoridad a ‘manaltalo, tan pian manalo.’ (Apo. 6:2) Oniay imbaga na Dios ed balon nitronon Ari: “Manuley ka ed pegley na saray kakabusol mo.” (Sal. 110:2) Makapaermen ta agnin siansia manpapasakop iray nasyon ed uley nen Jehova. Mantutultuloy iran onkikiwas a singano “anggapo so Dios.”—Sal. 14:1.
14, 15. (a) Panon itayon uuleyan na Panarian na Dios natan, tan antoray nepeg tayon itepet ed inkasikatayo? (b) Antoy pakapatnagan natan a say uley na Dios so sankaabigan?
14 Wala ni nakekeraan a pigaran membro na “Israel na Dios,” tan bilang agagi nen Jesus, itutultuloy dan susumpalen so betang da bilang “embahador a kasandi nen Kristo.” (2 Cor. 5:20, NW) Sikaray tinuro bilang matoor tan makabat ya aripen a mangasikaso tan mangitaryay espiritual a tagano ed saray alanaan tan ed ondarakel iran Kristiano a walaay ilalon manbilay na andi-anggaan diad dalin, a natan et minilyon la. (Mat. 24:45-47; Apo. 7:9-15) Say inkaaligwas ed espiritual na saray tuan managdayew natan et paneknek labat a bebendisyonan nen Jehova itan ya uksoyan.
15 Balang sakey ed sikatayo et nepeg ton tepetan so inkasikato: ‘Amtak kasi iray responsabilidad a nepeg kon sakbaten ed loob na Kristianon kongregasyon? Kasin susuportaan ko ed dugan paraan so pananguley nen Jehova? Maliket ak kasin magmaliw a sakop na manuuley lan Panarian nen Jehova? Determinado ak kasin mantultuloy a mangipulong ed Panarian na Dios ed anggaay nayarian ko?’ Bilang grupo, mabulbulos itayon manpapasakop ed panangidirehi na Mananguley ya Ulop tan mikokoopera ed saray aturon mamatatken diad kongregasyon. No gagawaen tayo iraya, ipapatnag tayon aawaten tayoy pananguley na Dios. (Basaen so Hebreos 13:17.) Say mabulos a panagpasakop et manreresulta ed sankamundoan a pankakasakey, a mataltalag a nanengneng ed sayan mundon anggapoy pantutunosan. Mamapawala met itan na kareenan tan katunongan, tan kirarayewan itan nen Jehova, a mangipapanengneng labat a say pananguley to so sankaabigan.
Matalona so Uley nen Jehova
16. Anton desisyon so nepeg a gawaen na balang sakey natan?
16 Asingsingger lan naresolbe iray isyun pinalesa ed Eden. Kanian natan la so panaon pian mandesisyon iray totoo. Kada indibidual et nepeg a mandesisyon no awaten toy pananguley nen Jehova odino mansiansia ed uley na too. Pribilehyo tayon tulongan iray mauyamo a manggawa na dugan desisyon. Agla manbayag, diad Armagedon, say gobierno na too ya impluensyado nen Satanas et permanente lan salatan na pananguley nen Jehova. (Dan. 2:44; Apo. 16:16) Say uley na too et manampot, tan say Panarian na Dios la so manuley ed interon dalin. Diad satan et sigpot lan napaneknekan a say pananguley nen Jehova so lawas sankaabigan.—Basaen so Apocalipsis 21:3-5.
17. Antoran impormasyon so makatulong ed saray mauyamo pian makapandesisyon na maabig nipaakar ed pananguley?
17 Saramay agni akapandesisyon ya ondapag ed si Jehova et nepeg dan nodnonoten tekep na pikakasi no antoray nagunggona na katooan ed pananguley na Dios. Agnasolusyonan na uley na too iray problema, a singa say krimen tan terorismo. Balet, ekalen na uley na Dios so amin a mauges ed dalin. (Sal. 37:1, 2, 9) Say uley na too et nanresulta ed agmanundan guerra, balet say uley na Dios et “patundaen to so bakabakal angga ed sampot na dalin.” (Sal. 46:9) Ipawil ni ingen na uley na Dios so kareenan ed baetan na totoo tan ayayep! (Isa. 11:6-9) Diad uley na too et agnanaandi so kairapan tan eras, ingen ta ekalen iratan na uley na Dios. (Isa. 65:21) Anggano maong met iray intension na saray manuley a too, agda sarag ya ekalen so sakit tan patey, balet diad uley na Dios, ompawil ed kaksilan iray maedad la tan mansasakit. (Job 33:25; Isa. 35:5, 6) Magmaliw a paraiso so dalin, tan diad satan et anggan saray inaatey so napaoli.—Luc. 23:43; Gawa 24:15.
18. Panon tayon nipanengneng a kombinsido itayon say pananguley nen Jehova so sankaabigan?
18 On, sigpot ya ekalen na uley na Dios iray mauges a resulta na ginawa nen Satanas sanen inimpluensyaan to ray inmunan ateng tayo a mangibeneg ed Manamalsa ra. Tan isipen pa, amin a probleman papawalaen nen Satanas ed loob la na manga 6,000 taon et solbaren na Dios ed loob labat na 1,000 taon diad panamegley nen Kristo! Mabisbiskeg iyan ebidensya ed inkasuperyor na uley na Dios! Bilang saray Tasi na Dios tayo, sikatoy aawaten tayo bilang Manuley. Sirin, diad kada agew, on kada oras na bilay tayo et ipanengneng tayon sikatayoy managdayew nen Jehova, sakop na Panarian to, tan agtayo ibabaing a Tasi to itayo. Tan usaren tayo so kada pankanawnawa ya ibaga ed siopaman ya ondengel a say pananguley nen Jehova so sankaabigan.
Nipaakar ed Pananguley, Anto so Naaralan Tayo Diad Impanbasa ed . . .
[Tepetepet Parad Panagaral]
[Saray litrato ed pahina 29]
Agbalot inikbanan nen Jehova so autoridad ton manuley
[Litrato ed pahina 31]
Say mabulos a panagpasakop ed pananguley nen Jehova et manreresulta ed sankamundoan a pankakasakey