Jéhovah afa na gigi droit ti lo ti komande!
Jéhovah afa na gigi droit ti lo ti komande!
“Lo Ti Nduzu Ahon Kue akomande na royaume ti azo.”—DAN. 4:17.
1, 2. Ambeni raison ti tingo ti komandema ti azo ayeke so wa?
KOMANDEMA ti azo atï awe! A yeke ye ti dengo kite pëpe. Kota raison ti tingo so ayeke so azo ayeke na ndara pëpe ti komande na lege ni. Tingo ti komandema ti azo asigigi polele laso teti azo so akomande ayeke ‘azo so andoye gi tere ti ala wani, azo so andoye nginza, azo so abâ tere ti ala kota na ndo ti amba ti ala, azo ti baba, azo so ayeke abe-ta-zo pëpe, azo so aye oko pëpe ti mä tere na amba ti ala, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, azo ti kango amba ti ala, azo so wuma ti ala ahon ndo ni.’—2 Tim. 3:2-4.
2 Ngbene ye giriri, kozo babâ na mama ti e ake komandema ti Nzapa. Na sarango tongaso, ala bâ ti ala atene ala yeke duti yamba na Nzapa. Andâ, ti tâ tënë ni, ala zia tere ti ala na gbe ti komandema ti Satan. Teti angu saki omene, sioni komandema ti azo (so Satan, “mokonzi ti dunia so” asara ngangu mingi na ndo ni) asara si laso e azo e tï tâ na gbe ni mingi na yâ ti mbaï ti e (Jean 12:31). Mbeni mbeti (The Oxford History of the Twentieth Century) asara tënë na ndo ti dutingo ti azo laso; mbeti ni atene so a yeke ye senge ti “gi ti créé mbeni dunia so alingbi kue.” Mbeti ni afa ndani: “Atâa so e lingbi ti wara ni pëpe, me ti tara ti créé ni ayeke gue gi na e na kpale, komandema ti ngangu nga na bira.” Tâ tënë so mbeti so atene so afa polele so komandema ti azo atï na ngu awe!
3. E lingbi ti tene nyen na ndo ti lege so Nzapa alingbi fade ti komande na ni tongana Adam na Ève asara siokpari pëpe?
3 So tâ ye ti vundu ti bâ so kozo babâ na mama ti e ake oko nzoni komandema so alingbi na ala: komandema ti Nzapa! Biani, e hinga mbilimbili pëpe tongana nyen Jéhovah aleke ti komande sese tongana Adam na Ève angbâ fade be-ta-zo na lo. Ye oko, tongana azo kue ayeda na komandema ti Nzapa, kite ayeke pëpe so Nzapa ayeke komande fade azo kue na ndoye nga lo yeke sara kangbi na popo ti azo pëpe (Kus. 10:34; 1 Jean 4:8). Na bango ndara ti Nzapa so ye ti lingbi na ni ayeke pëpe, e lingbi nga ti hinga na bê ti e kue so tongana azo angbâ na gbe ti komandema ti Jéhovah, ka afaute kue so azo so amû peko ti komandema ti azo asara alingbi fade ti duti dä pëpe. Komandema ti Nzapa ayeke “mû [fade] ye alingbi na nzara ti ye kue so ayeke na fini.” (Ps. 145:16). Na nduru tënë, a yeke duti fade mbeni komandema so alingbi kue (Deut. 32:4). So ye ti vundu si azo ake komandema ti Nzapa!
4. Nzapa azia lege na Satan ti komande juska na ndo wa?
4 A yeke nzoni ti hinga so atâa so Jéhovah azia lege na azo ti komande tere ti ala wani, lâ oko lo zia droit ti lo ti komande acréature ti lo pëpe. Même ngangu gbia ti Babylone ayeda na peko ti aye ti ngangu so asi na lo so “Lo Ti Nduzu Ahon Kue akomande na royaume ti azo.” (Dan. 4:17). Nyen na nyen, fade Royaume ti Nzapa ayeke sara si ye so bê ti Nzapa aye a sara (Mat. 6:10). Biani, teti kete ngoi, Jéhovah azia lege na Satan ti sara ye tongana “nzapa ti aye ti ngoi so” si lo lingbi ti kiri tënë na mbeni lege so zo alingbi ti yeda na ni na ndo ti atënë so wato ti lo abi na sese (2 aCor. 4:4; 1 Jean 5:19). Ye oko, Satan awara lege lâ oko pëpe ti sara ye ahon ndo ti ye so Jéhovah azia lege na lo ti sara. (2 Chron. 20:6; bâ nga Job 1:11, 12; 2:3-6.) Ambeni zo ayeke dä lakue so asoro ti duti na gbe ti Nzapa, même atâa so ala yeke na yâ ti mbeni dunia so kota Wato ti Nzapa si akomande ni.
Komandema ti Nzapa na ndo ti Israël
5. Zendo wa azo ti Israël amû na Jéhovah?
5 Ti londo na ngoi ti Abel juska na ngoi so mara ti Israël abâ gigi, mbeni wungo ti azo so ayeke be-ta-zo avoro Jéhovah na abata commandement ti lo (aHéb. 11:4-22). Na ngoi ti Moïse, Jéhovah ate mbele na hale ti Jacob, na ala ga mara ti Israël. Na ngu 1513 kozo ti Christ, azo ti Israël amû zendo ti tene ala na ahale ti ala kue amû Jéhovah tongana Gbia ti ala, ala tene: “Fade e sara ye kue so L’Éternel atene.”—Ex. 19:8.
6, 7. Komandema ti Jéhovah na ndo ti Israël ayeke lani tongana nyen?
6 Na sorongo Israël ti duti azo ti lo, Jéhovah ayeke na mbeni ye so lo leke ti sara na lege ti ala. (Diko Deutéronome 7:7, 8.) Tënë ti sorongo Israël abâ gi nzoni duti ti ala pëpe, a ndu aye mingi. A ndu nga iri ti Nzapa na droit ti lo ti komande, so ayeke akota tënë mingi. Jéhovah amû Israël ti duti témoin ti lo ti fa na azo kue so gi lo oko lo yeke tâ Nzapa (És. 43:10; 44:6-8). Tongaso, Jéhovah atene na ala: “I yeke azo so L’Éternel Nzapa ti i azia i nde teti Lo mveni. Na popo ti azo kue so ayeke na sese so, L’Éternel airi i ti ga azo ti Lo mveni.”—Deut. 14:2.
7 Lege so Nzapa akomande na azo ti Israël afa so lo hinga so ala yeke awasiokpari. Na oko ngoi ni, andia ti lo alingbi kue na afa na gigi asarango ye ti Lo so amû andia ni. Acommandement so Jéhovah amû na lege ti Moïse afa polele so Nzapa ayeke nzoni-kue, lo ndoye ye so ayeke mbilimbili, lo yeke nduru ti mû pardon, na lo yeke Nzapa ti kangango bê. Na pekoni, na ngoi ti Josué na ti awagame ti lo, mara ni abata acommandement ti Jéhovah na ala duti na siriri, na Nzapa airi tënë nzoni mingi na ndo ti ala (Jos. 24:21, 22, 31). Mbaï ti Israël na ngoi ni so afa so lege so Jéhovah akomande na ni ayeke nzoni.
Komandema ti zo aga na akpale
8, 9. Ye wa azo ti Israël ahunda so afa so ala yeke na ndara pëpe? Nyen la asi na pekoni?
8 Ye oko, na ambeni ngoi, fani mingi azo ti Israël ague nde na komandema ti Nzapa na ala bâ pasi teti so lo bata ala mbeni pëpe. Na nda ni, na lege ti prophète Samuel, Israël ahunda ti wara mbeni gbia so ayeke zo. Jéhovah atene na Samuel ti sara tongana ti so ala hunda. Me, Jéhovah atene nga: “Teti ala ke mo pëpe, me ala ke Mbi, si Mbi yeke gbia ti ala pëpe.” (1 Sam. 8:7). Atâa so Jéhovah azia Israël ti wara mbeni gbia so ayeke zo, lo gboto mê ti ala kozoni so komandema ti zo ayeke ga na akpale.—Diko 1 Samuel 8:9-18.
9 Mbaï afa so gbotongo mê so Jéhovah agboto ayeke tâ tënë. Komandema ti zo aga na akota kpale na Israël, mbilimbili tongana gbia ni so aduti be-ta-zo pëpe. Tongana e bata tapande ti Israël so na li ti e, bê ti e alingbi pëpe ti dö teti ngbene ye giriri, angorogbia so ayeke na maboko ti azo so ahinga Jéhovah pëpe aga na nzoni ye na azo oko pëpe. A yeke tâ tënë so ambeni zo ti poroso ahunda Nzapa ti iri tënë nzoni na ndo ti angangu so ala yeke sara ti ga na siriri na nzoni dutingo, me tongana nyen Nzapa alingbi ti iri tënë nzoni na ndo ti azo so ake ti woko tere na gbe ti komandema ti lo?—Ps. 2:10-12.
Fini mara so Nzapa akomande
10. Ngbanga ti nyen Nzapa asoro mbeni mara nde ti mû place ti Israël?
10 Mara ti Israël aduti be-ta-zo na Jéhovah pëpe. Na nda ni, ala ke Messie ti Nzapa, na Jéhovah ake ala na lo leke ti zia mbeni groupe ti azo na place ti ala ti ga mbeni fini mara. Tongaso, na ngu 33 congrégation ti aChrétien so Jéhovah asoro ala ti gue na yayu abâ gigi. Congrégation so ayeke biani mbeni fini mara so ayeke na gbe ti komandema ti Jéhovah. Paul asara tënë ni tongana “Israël ti Nzapa.”—aGal. 6:16.
11, 12. Kpango tere wa so andu mungo li ni ayeke na popo ti Israël ti giriri na “Israël ti Nzapa”?
11 Kangbi na kpango tere ayeke na popo ti mara ti Israël ti giriri na fini “Israël ti Nzapa”. Nde na Israël ti giriri, congrégation ti aChrétien ayeke na gbia pëpe na ayeke na bezoin ti mû sandaga ti anyama pëpe teti awasiokpari. Mbeni kpango tere so ayeke na popo ti mara ti Israël na congrégation ti aChrétien ayeke a-ancien so a zia na popo ti ala (Ex. 19:3-8). A-Chrétien so ayeke a-ancien akomande na ndo ti kundu ni pëpe. Nde na so, ala bata congrégation na ala sara kua ngangu ti mû li ni na yâ ti akusala ti aChrétien. Ala sara ye na ndoye na zo oko oko na yâ ti congrégation, ala ne azo kue.—2 aCor. 1:24; 1 Pi. 5:2, 3.
12 Tongana ala gbu li na ndo ti sarango ye ti Nzapa na mbage ti Israël, amembre ti “Israël ti Nzapa” na akamarade ti ala “ambeni ngasangbaga” akiri ane mingi Jéhovah nga lege so lo komande na ni (Jean 10:16). Na tapande, mbaï afa so sarango ye ti agbia ti Israël alingbi ti sara si azo ti gbe ti ala asara nzoni wala sioni. Ye so amû lege na azo so ayeke mû li ni na popo ti aChrétien ti bâ so, atâa so ala yeke komande tongana agbia ti Israël ti giriri pëpe, a lingbi ala zia mbeni nzoni tapande ti mabe.—aHéb. 13:7.
Lege so Jéhovah akomande na ni laso
13. Kpengba ye wa asi na ngu 1914?
13 Laso, aChrétien ayeke fa na azo ti dunia so komandema ti azo aga nduru ti hunzi awe. Na ngu 1914, Jéhovah azia Royaume ti lo ti yayu na gbe ti Gbia so lo soro, Jésus Christ. Na ngoi ni so, lo mû komandema na Jésus ti sigigi “ti sö benda ti gue na ni nga ti hunzi songo benda ni.” (Apoc. 6:2). A tene na fini Gbia so a zia lo na mbata ti gbia: “Komande na popo ti awato ti Mo.” (Ps. 110:2). Mawa ni ayeke so, amara angbâ lakue ti ke ti duti na gbe ti komandema ti Jéhovah. Ala ngbâ ti sara ye mo bâ mo tene “Nzapa ayeke pëpe.”—Ps. 14:1.
14, 15. (a) Na lege wa Royaume ti Nzapa akomande e laso? Atënë wa a lingbi e hunda tere ti e na ni fadeso? (b) A bâ kota ti komandema ti Nzapa laso tongana nyen?
14 Mbeni kete wungo ti amembre ti “Israël ti Nzapa” ade ge na sese, na teti ala yeke aita ti Jésus, ala ngbâ ti sara kua tongana “alembe na place ti Christ.” (2 aCor. 5:20). A zia ala tongana ngbâa be-ta-zo so ayeke sara ye na ndara ti bâ lege na ti mû kobe ti yingo na ala so a soro ala ti gue na yayu nga na aChrétien mingi so wungo ti ala angbâ ti gue na li ni so fadeso wungo ti ala asi kutu mingi, na ala ayeke na beku ti wara fini ti lakue lakue na ndo ti sese (Mat. 24:45-47; Apoc. 7:9-15). Tongana e bâ maïngo na lege ti yingo ti atâ wavorongo Nzapa laso, a fa biani so tënë nzoni ti Jéhovah ayeke na ndo ti ye so lo leke.
15 A yeke nzoni zo oko oko na popo ti e ahunda tere ti lo: ‘Mbi hinga mbilimbili kusala so a lingbi mbi sara na yâ ti congrégation ti aChrétien? Mbi yeke mû maboko na lege ni na komandema ti Jéhovah? A nzere na mbi ti duti na gbe ti komandema ti Royaume ti Jéhovah? Mbi leke na bê ti mbi ti ngbâ ti fa na amba ti mbi tënë na ndo ti Royaume ti Nzapa tongana ti so mbi lingbi ti sara?’ Tongana mbeni groupe ti azo, e yeke nduru ti woko tere ti e na gbe ti fango lege ti Bebungbi na ti sara kua maboko na maboko na a-ancien ti congrégation. Na sarango tongaso, e yeke fa so e yeda na lege so Nzapa ayeke komande na ni. (Diko aHébreu 13:17.) So e yeke nduru ti woko tere ti e asara si e kue na ndo ti sese e yeke beoko na yâ ti dunia so akangbi. A sara nga si e duti na siriri, e sara ye mbilimbili, na a mû gonda na Jéhovah, so afa so gi komandema ti lo si ayeke nzoni mingi.
Hongo na ngangu ti komandema ti Jéhovah
16. Desizion wa ayeke na gbele ti zo oko oko laso ti mû?
16 Ngoi ayeke ga na loro mingi ti tene a leke tënë so abâ gigi na Éden. Tongaso, a yeke ngoi fadeso teti azo ti mû desizion. A yeke na zo oko oko ti soro ti mû mbage ti komandema ti Jéhovah wala ti mû mbage ti komandema ti zo. A yeke kusala ti e ti mû maboko na azo so ayeke na tâ be-ti-molenge ti mû nzoni desizion. Na yâ ti kete ngoi, na Harmaguédon, fade ngorogbia ti Jéhovah ayeke mû biani biani place ti angorogbia ti azo so ayeke na gbe ti Satan (Dan. 2:44; Apoc. 16:16). Komandema ti azo ayeke hunzi, na Royaume ti Nzapa ayeke komande na ndo ti sese kue. Na ngoi ni so, fade Jéhovah ayeke fa na gigi droit ti lo ti komande.—Diko Apocalypse 21:3-5.
17. Ye wa amû maboko na azo ti tâ be-ti-molenge ti mû nzoni desizion so andu tënë ti komandema?
17 Azo so adë ti mû desizion teti Jéhovah pëpe, a lingbi ala sambela ti bâ anzoni ye so komandema ti Jéhovah ayeke ga ande na ni na azo ti sese kue. Komandema ti azo alingbi pëpe ti leke kpale ti kengo ndia, nga na kusala ti bingo kpale na tere ti azo. Komandema ti Nzapa ayeke zi azo ti sioni kue na ndo ti sese (Ps. 37:1, 2, 9). Komandema ti azo aga gi na gbâ ti bira, me fade komandema ti Nzapa ayeke “sara si bira awe juska na nda ti sese”. (Ps. 46:10). Nzapa ayeke zia siriri na popo ti azo na anyama (És. 11:6-9). Yere na nzara ayeke lakue na gbe ti komandema ti azo, me komandema ti Nzapa ayeke zi ni kue (És. 65:21). Même agbia so ayeke na nzoni bibe ti sara ye ala lingbi pëpe ti zi kobela na kui, me na gbe ti komandema ti Nzapa, ambakoro na azo ti kobela ayeke duti na ngia ti kiri ti wara ngangu ti ala ti maseka (Job 33:25; És. 35:5, 6). Biani, sese ayeke ga ande paradis so na yâ ni a yeke zingo même akuâ.—Luc 23:43; Kus. 24:15.
18. Tongana nyen e lingbi ti fa so e mä na bê so gi komandema ti Jéhovah la ayeke nzoni ahon atanga ni kue?
18 Biani, fade komandema ti Nzapa ayeke zi asioni so Satan aga ni na ngoi so lo handa akozo babâ na mama ti e ti ke Wasarango ala. Na bâ ye so, Satan asara sioni teti ngu 6000, me na lege ti Christ, Nzapa ayeke zi asioni so kue na yâ ti ngu 1000! Bâ tongana nyen komandema ti Nzapa ayeke kota! E so e yeke aTémoin ti Nzapa, e mû lo tongana Gbia ti e. Tongaso, zia e fa lâ na lâ, même ngbonga oko oko na yâ ti fini ti e so e yeke awavorongo Jéhovah, e yeke azo so ayeke na gbe ti Royaume ti lo, na a nzere na e ti duti aTémoin ti lo. Zia e gbu alege kue so azi na e ti tene na azo kue so komandema ti Jéhovah la ayeke nzoni ahon atanga ni kue.
E manda nyen na ndo ti komandema ti Nzapa tongana e diko . . .
[Ahundango tënë ti manda na ye]
[Foto na lembeti 29]
Lâ oko Jéhovah azia droit ti lo ti komande pëpe
[Foto na lembeti 31]
Dutingo nduru ti woko tere ti e na gbe ti komandema ti Jéhovah asara si e duti beoko na ndo ti sese kue