Hemen U Aôndo Hemba Doon!
Hemen U Aôndo Hemba Doon!
“Uhembansha ngu a tahav sha tartor u ior.”—DAN. 4:17.
1, 2. Ka atôakyaa agen a nyi a ne ve hemen u uumace u gbe bo?
HEMEN u uumace gba bo! Akperan nga sha kwagha la ga. Ityôkyaa i vesen i uumace ve kan shio u hemen sha gbenda u vough yô, ka sha ci u ve ban a kwaghfan u hemen tsembelee. Se nenge a gbev mbu hemen u uumace wang, hemban cii je yô nyian u mbahemen tar kpishi ve lu ‘mbawan ayol a ve ikyo tseegh man mba inyaregh ki doo ve ishima man mbahagher sha akaa man mbagengese iyol man mbalun wang ga, man mba ve soo u himen iyongo kpaa ga man mbakôron ayol a ve tsaha ga man anomaior a bo man mba kwagh u dedoo a doo ve ga man mbawan uma ve ikyo ga man mbamoron ayol a ve la.’—2 Tim. 3:2-4.
2 Ngise ngise la, mbamaren asev mba hiihii mbara venda hemen u Aôndo. Alaghga yange vea hen ér u̱ eren nahan la una na vea lu sha tseeneke ve. Nahan kpa, jighilii yô, ve lu wan ayol a ve sha Ikyev i hemen u Satan. Anyom dubu ataratar a Satan, tor u tar ne a tuur uumace ve hemen ayol a ve sha tindi ga ne na yô, se nyôr ken mlu u vihin u hemban cii, u se lu ker hegen ne. (Yoh. 12:31) Takerada u i yer ér The Oxford History of the Twentieth Century la ôr kwagh sha mlu u uumace ér “u keren er tar u lu vough la,” ka gbilin kwagh. Takerada shon pase ér: “Gban Kan kwagh u se kan shio u eren tsô ga, kpa u se nôngon ser se sôr tar vough la una va a va a kwaghbo man tswam, shi alaghga je yô, ityav kpa mbia pev.” Nenge imba u lumun ér hemen u uumace gba bo la sha wono!
3. Luun er Adam man Ifa yange vea er isholibo ga yô, Aôndo ma a hemen tar nena?
3 Nenge i vihi, er mbamaren asev mba hiihii mbara yange ve venda hemen u Aôndo, u yange ma wase ve la sha wono! Fan yô, se fatyô u fan er yange Adam man Ifa vea til sha mimi her ve Yehova ma hemen tar ga. Nahan cii kpa, se fatyô u lun a vangertiôr ser, uumace cii vea lumun hemen u Aôndo yô, ma a hemen a msange shio man sha dooshima kpaa. (Aer. 10:34; 1 Yoh. 4:8) Sha ci u kwaghfan u Aôndo u hemban cii la yô, shi se fatyô u lun a vangertiôr ser, uumace vea we ayol a ve sha ikyev i hemen u Aôndo yô, anzughul a hemen u uumace u ve a mi la ma a lu ga. Hemen u Aôndo ma u “ne hanma kwagh u uma sha isharen na [ma i] kom un.” (Ps. 145:16) Sha kpôô yô, Hemen la ma u lu u vough. (Dut. 32:4) Ka kwagh u vihin kpishi er uumace ve vende hemen la yô!
4. Satan ngu a ian i hemen tar ne kuma shighe nena?
4 Nahan cii kpa, doo u se umbur ser, shin er Yehova a ne uumace ian i hemen ayol a ve nahan kpa, shighe môm ngu a gema tahav nav mbu hemen akaa a a gbe la a na orgen ga. Tor u Babilon u lu a tahav kpishi la je kpa, er nenge a tahav mbu Yehova yô, mase kaven ér “Uhembansha ngu a tahav sha tartor u ior.” (Dan. 4:17) Ken hemen yô, Tartor u Aôndo ua na a gema eren ishima na. (Mat. 6:10) Ka mimi, Yehova na Satan ian sha anshighe kpuaa ér a lu “aôndo u tar ne” sha er una tese ken igbar er ikyaa i orhendan ne yange due a mi sha a na la lu mimi ga yô. (2 Kor. 4:4; 1 Yoh. 5:19) Nahan kpa, kwagh u Yehova a ne Satan ian i eren ga yô, mayange je una fatyô u eren ga. (2 Kron. 20:6; nenge Yobu 1:11, 12; 2:3-6.) Shi hanma iaven cii, ior ka ve lu mba ve tsough u wan ayol a ve sha ikyev i Aôndo yô, shin er ka ve lu ken tar u Orihyom u Aôndo u vesen a tem tor sha u ne nahan kpaa.
Mtemtor u Aôndo sha Iserael
5. Mbaiserael yange ve er iceghzwa a Aôndo ér nyi?
5 Hii sha ayange a Abel la zan zan ar sha shighe u Mbaiserael hingir ikyurior la, ior mba jighjigh lu mba ve civir Yehova shi ve kuran atindi a na yô. (Heb. 11:4-22) Sha ayange a Mose la, Yehova ya ikyur aa kov u tertamen Yakob, man lu kov ne va hingir ikyurior i Iserael ye. Ken inyom i 1513 C.S.Y. (Cii man Shighe u Yesu) la, Mbaiserael man ikyov ve cii tsegha zwa ér vea lumun Yehova a tema tor sha ve, ve kaa ér: “Akaa a TER A kaa cii sé er.”—Eks. 19:8.
6, 7. Mtemtor u Aôndo sha Iserael yange lu nena?
6 Yehova yange lu a awashima u na ve tsua Mbaiserael ér ve lu ior nav yô. (Ôr Duteronomi 7:7, 8.) Yange tsua Mbaiserael sha ci u i kpe ve iyol di tsô ga. Iti i Aôndo man hemen na kpa lu ken ikyaa ne, man lu kwagh u hemba lun hange hange je la. Lu u Mbaiserael vea lu mba eren shiada ér ka Yehova tseegh a lu Aôndo u mimi ye. (Yes. 43:10; 44:6-8) Sha nahan yô, Yehova kaa a ikyurior i Iserael ér: “Gadia u ngu TER, Aôndo Wou, icighanikyurior je; ken akuraior sha won cii, ka we, TER A tsough u, u hingir ikyurior Na jim ye.”—Dut. 14:2.
7 Aôndo yange tema tor sha Iserael, kpa umbur er ve lu ior mba yinan yô. Atindi a na kpaa, shi lu vough sha inja i mlu u Or u nan a la. Atindi a Aôndo na sha ikyev i Mose la tese icighanmlu na man mdoo u mimi a doo un ishima la, man er a keghen a kegh iyol u den kwaghbo shi a we ishima kpaa yô. Sha ayange a Yosua lu uma la cii, man sha ayange a mbatamen mba ve lu uma heregh er Yosua kpe kera la ikyurior i Iserael kura atindi a Yehova, nahan ver ve doo doo shi na ve bem kpaa. (Yos. 24:21, 22, 31) Mlu u Mbaiserael sha shighe la tese er Aôndo a hemen sha gbenda u vough yô.
Hemen u Uumace Va a Ican
8, 9. Lu nyi Mbaiserael sôn sha lana, man lu nyi i due kere?
8 Shighe kar yô, Mbaiserael zer vendan hemen u Aôndo acin imôngo, nahan a kera kura ve ga. Ken masejime yô, Mbaiserael sôn tor sha ikyev i Samuel. Yehova kaa a Samuel ér a na ve kwagh u ve sen la. Nahan kpa Yehova gema kaa ér: “Gadia ka we ve vende ga, kpa ka Mo ve vende er M̱ de lu tor ve ga ye.” (1 Sam. 8:7) Shin er Yehova na Iserael ian ér ve lu a tor u vea nengen a mi nahan kpa, a ta ve icin ér orumace u nana tema tor sha a ve la nana er ve atsan kpishi.—Ôr 1 Samuel 8:9-18.
9 Akaa a yange er Mbaiserael sha ayange a tsuaa la tese mimi u icintan i Yehova la. Mbaiserael nyôr ken mbamzeyol mba vesen sha ci u utor mba ve hemen ve la, hemban je yô, shighe u tor yange nana kera tile sha mimi ga yô. Er u lu a ikyav i Mbaiserael la ken ishima yô, a kera kpiligh we iyol er ugomoti mba uumace mba ve fe Yehova ga la cii ve kan shio u van a msertar u igbekeke sha ikyov ikyov ga la ga. Ka mimi, mbapatii mbagenev ka ve sôn Aôndo iveren sha iniôngon ve i van a bem man mkpeyol la, kpa a er nan ve Aôndo una ver mba ve vende u wan ayol a ve sha ikyev i hemen na la doo doo?—Ps. 2:10-12.
Ikyurior i He sha Ikyev i Hemen u Aôndo
10. Aôndo yange tsua ikyurior igen sha ityough ki Mbaiserael sha ci u nyi?
10 Ikyurior i Iserael venda u civir Yehova sha mimi. Ken masejime yô, ve va venda Mesiya u Aôndo tsua la, nahan Aôndo kpa venda ve shi wa ishima u veren nongoior ugen sha ityough vev ér u̱ lu ikyurior i he. Kwagh ne na yô, ken inyom i 33 la, i ver tiônnongo u Kristu u mbacivir Yehova mba i shigh ve mkurem yô. Tiônnongo la maa hingir ikurior i he i i̱ lu sha ikyev i tahav mbu hemen u Yehova yô. Paulu or kwagh u ikyurior la ér ka “Iserael u Aôndo.”—Gal. 6:16.
11, 12. Ka mbamlu mba sha kwagh u hemen mba nyi ve lu kwagh môm hen atô u Mbaiserael man ‘Iserael u Aôndoo?’
11 Iserael u tsuaa la kaha kposo a “Iserael u Aôndo” u he ne sha igbenda igen, kpa sha igbenda igen di yô, shi mba kwaghmôm. Mkposo u Iserael u tsuaa la a tiônnongo u Kristu yô, tiônnongo u Kristu ngu a tor ken uumace ga, shi ngu a ityôkyaa i nan nagh sha uile sha ci u mbaasorabo ga. Gbenda môm u Iserael u tsuaa la a lu kwaghmôm a tiônnongo u Kristu yô, ka mbatamen mba i ver la. (Eks. 19:3-8) Mbatamen mba ve lu Mbakristu mban mba tem tor sha ikyumile ga. Nahan kpa, ka ve hemen sha u eren ityom i Mbakristu sha dooshima. Mba eren kwagh a hanma or ken tiônnongo sha dooshima man sha icivir.—2 Kor. 1:24; 1 Pet. 5:2, 3.
12 U gbidyen kwar sha gbenda u Yehova eren kwagh a Mbaiserael la na mba ve lu “Iserael u Aôndo” la man “iyôngo igen” i i lu akar a ve la hemba mban a iwuese sha gbenda u Yehova a hemen ior nav la. (Yoh. 10:16) Ikyav i tesen yô, tsegh ku mbayiase tese ér uumace mba ve tema tor sha Mbaiserael la hemen ve sha u eren kwagh u bo shin u dedoo. Kwagh ne wase mba ve hemen ken Mbakristu mbara u fan ér shin er ve tem tor er ator a tsuaa la ga nahan kpa, gba u vea ver ikyav i dedoo i jighjigh u nan.—Heb. 13:7.
Er Yehova a Hemen Nyian La
13. Ka kwagh u injaa u vesen u nyi yange er ken inyom i 1914 laa?
13 Nyian Mbakristu mba pasen tar cii ér hemen u mtemtor u uumace la zurum u kuren. Ken inyom i 1914 la, Yehova ver tartor na sha, nahan a na Yesu Kristu Tor u Tartor shon. Hen shighe la Yehova na Yesu tahav due, “lu hemban, man lu sha u una hemba kpaa.” (Mpa. 6:2) I kaa a tor u í sember veren un la ér: “Tema tor hen atô u mbaihyomov Ou!” (Ps. 110:2) Nahan kpa, kwagh er vihi yô, akuraior zer vendan u wan ayol a ve sha ikyev i hemen u Yehova. Ve za hemen u eren kwagh inja er “Aôndo ngu ga” nahan.—Ps. 14:1.
14, 15. (a) Tartor u Aôndo ngu hemen se nyian nena, man ka mbampin mba nyi i doo u se pine ayol a ase sha kwagh nee? (b) Nyian kpa, mba nengen a mhembe u tartor u Aôndo nena?
14 Mba ve lu “Iserael u Aôndo” la ve shi her kpuaa shin tar ne, man anmgbianev mba Yesu mban za hemen u lun “mbaôronkwagh sha ci u Kristu” her. (2 Kor. 5:20) I ver ve mba nongo u wanakiriki u jighjigh man u fan kwagh, mba eren tom u nan kwaghyan u ken jijingi hen mba i shigh ve mkurem la man ikpela i Mbakristu mba ve lu umiliôn imôngo mba ve lu a ishimaverenkeghen i va lun uma shin tar gbem sha won la. (Mat. 24:45-47; Mpa. 7:9-15) Mkpeyol u ken jijingi u ior mba Yehova ve lu ker la tese ér Yehova ngu veren tom ne doo doo.
15 Hanmô wase yô nana̱ pine iyol i nan ér: ‘m fa ityom i i gbe u me eren ken tiônnongo kpa? M ngu suen hemen u Yehova tsembelee kpa? Doom u pasen ken igbar mer m ngu suen tartor u Yehova u ú lu hemen hegen ne kpa? M kange ishima mer me za hemen u ôron mbagenev kwagh u tartor u Aôndo sha afatyô wam cii kpa?’ Se cii, se mba dondon kwaghwan u Mbahemenev mba Shin Tine a mkighir shio, shi se mba eren kwagh ken mzough vea mbatamen mba i ver ve ken atôônanongo la. Kwagh ne tese ér se lumun hemen u Aôndo. (Ôr Mbaheberu 13:17.) Ka sea ungwan imo i mbahemenev a mkighir shio yô, kwagh la a na se lu ken mzough u a kaha kposo a tar u ú mgbough a mpav yum ne. Shi kwagh ne ka a va a bem man perapera shi a va Yehova a icivir; shi a tese ér hemen na hemba doon a u uumace ica je.
Tartor u Yehova Ua Hemba sha Won Cii
16. Kanyi i gbe u hanma or nyian nana tsua u erene?
16 Shighe u a va kure ikyaa i ken Eden la kera vese ga. Sha nahan yô, hegen ka shighe u ior vea tsua kwagh u vea er yô. Gba u hanma or nana tsua u dondon hemen u Yehova shin dondon hemen u uumace. Se mba a ian i civirigh i wasen mbaasemaleghlegh u tsuan hemen u vough u vea lumun a mi yô. Ica a gba ga tsô, hemen u Aôndo ua kar a ugomoti mba uumace mba ve lu sha ikyev i Satan ne kera sha shighe u Armagedon. (Dan. 2:44; Mpa. 16:16) Hemen u uumace ua kure, man Tartor u Aôndo ua kar a hemen tar cii. Hen shighe la a paa mtemtor u Aôndo iyol elegh elegh.—Ôr Mpase 21:3-5.
17. Ka akaa a mimi a nyi a wasen mbaasemaleghlegh u tsuan gbenda u injaa sha kwagh u hemen u voughloo?
17 Mba ve lu a tsua u tan ikyaa a hemen u Aôndo ga yô, ve sôn Aôndo a wase ve u eren nahan shi ve time sha averen a hemen u Aôndo ua va uumace a mi la. Hemen u uumace kan shio u karen a ifer kera, kua tswam u eren kpaa. Hemen u Aôndo ua kar a ifer shin tar ne kera cii. (Ps. 37:1, 2, 9) Hemen u sha ikyev i uumace va a ityav mbi í nenge hanma shighe la, kpa hemen u Aôndo yô, ua er ‘ityav mbi[a] bee zan zan [a] ar hen ikighir i tar je.’ (Ps. 46:9) Shi hemen u Aôndo ua va a bem hen atô u uzendenya man uumace! (Yes. 11:6-9) Ibanave man ijen ka akaa a a dumbur ken hemen u uumace yô, kpa hemen u Aôndo ua kar akaa ne cii kera. (Yes. 65:21) Utor mba tar ne mba ka vea lu a mbaawashima mba hemban doon je kpa, ka ve kan shio u been a angev man ku, kpa sha hemen u Aôndo yô, mbabeenyol man mbauangev cii a saan ve iyol shighe u inyam ve ia hide a hingir hegh, á hemba i wanye kpaa la. (Yobu 33:25; Yes. 35:5, 6) Sha kpôô yô, tar ne ua hingir paradiso, ape mbakpenev je kpa á nder ve shin ku yô.—Luka 23:43; Aer. 24:15.
18. Se tese ser se na jighjigh ser hemen u Yehova hemba doon nena?
18 Sha mimi yô, hemen u Aôndo ua kar a mvihi u Satan va a mi zum u mee mbamaren asev mba hii ve gema ijime a Orgban ve la. Shi Satan ndera vihin tar anyom 6,000, kpa Aôndo una kar a kwaghbo u satan a ve a mi la cii kera sha ikyev i Kristu ken anyom 1,000 tseegh! Nenge kwagh ne a lu shiada u tesen wanger wanger er hemen u Aôndo u hembe sha wono! Er se lu Mbashiada mba Aôndo wase yô, se lumun ser un ngu Orhemen wase. Nahan yô, hanma iyange man hanma ihwa ken uma wase cii, se tesen nen ser se mba mbacivir Yehova man mbasuen Tartor na, shi se tese ser doo se u lun Mbashiada nav kpaa. Shi hanma ian i í dugh cii, se yar tom a mi u pasen hanma or u nana soo u ungwan cii nana̱ fa er hemen u Yehova ú hembe doon yô.
Se Hen Nyi sha Kwagh u Mtemtor u Aôndo sha u Ôron . . .
• Duteronomi 7:7, 8?
• 1 Samuel 8:9-18?
• Mpase 21:3-5?
[Mbampin Mba Ngeren u Henen]
[Ufoto u sha peeji 29 la]
Hemen u Yehova ngu a gema ga
[Foto u sha peeji 31 la]
U dondon hemen u Yehova la va a mzough sha tar cii