Yihooway Haariyo Ogee Suure Gidiyoogee Qoncciis!
Yihooway Haariyo Ogee Suure Gidiyoogee Qoncciis!
“Ubbaappe Xoqqiya Xoossai asaa naatu kawotetta ubbaa [haarees].”—DAANEELA 4:17.
1, 2. Asaa naatu haaroy ushachibeennaagau amarida gaasoy aybee?
ASAA naatu haaroy ushachibeenna! Hegee sirissiyaaba gidenna. Hegau waanna gaasoy suure haaruwau koshshiya aadhida eratettay asaa naatuyyo baynnaagaa. Asaa naatu haaroy ushachibeennaagee ha wodiyan keehippe qoncciis. Ayssi giikko, asaa naata haariya daroti ‘banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, geeshshatetti baynnaageeta, sigettennaageeta, zigirssanchata, banttana naagennaageeta, kehennaageeta, loˈˈobaa dosennaageeta, kashi erikke giyaageeta, otoruwan sugettiyaageeta.’—2 Ximootiyoosa 3:2-4.
2 Daro wodiyaappe kase, nu koyro aawaynne aayyiyaa Xoossay haariyo ogiyaa ixxidosona. Eti hegaadan oottiyoogan, laˈatettaa dooridabadan qoppennan aggokkona. Gidoppe attin, eti Seexaanaa haaruwau haarettidosona. Seexaanay, “ha sa7aa haariyaagee” asaa keehippe sugin, usuppun shaˈu layttau asaa naati maari baynna ogiyan haarido hanotay, asaa naatu taarikiyan ha wodee keehi shoraa xayanaadan oottiis. (Yohaannisa 12:31) Zi Okisford Histiri of zi Tiwentiz Sencheri giyo maxaafay ha wodiyan asaa hanotaa xeelliyaagan, “polo gidida alamiyaa hidootan naagiyoogee” aynne maaddennaagaa yootiis. Gujjidikka: “Hegee danddayettennaba gidiyoogaa xalla gidennan, hegaa ehaanau qoppiyoogee bashshaa, huqqunniya haaruwaa, hegaappekka aadhi iitidi olaa kaalettees” giidi qonccissiis. Hegee asaa naatu haaroy ushachibeennaagaa maayiyoogaa qoncciyan bessiyaaba!
3. Addaameenne Hewaana nagaraa oottibeennaakko, Xoossay haariyo ogiyaa xeelliyaagan woygana danddayiyoo?
3 Nu koyro aawaynne aayyiyaa, ushachiya mexi issi aysuwaa, Xoossaa haaruwaa ixxidoogee keehippe azzanttiyaaba! Addaameenne Hewaana ayyo ammanettidaba gidiyaakko, Yihooway ba haariyo ogiyaa saˈan waatidi giigissanaakko geeshshidi erokko. SHin asaa naati ubbay ufayttidi haarettiyo Xoossaa haaroy siiquwaaninne asa lagennaagan erettiyaagaa gidanaagaa ammanettoos. (Oosuwaa 10:34; 1 Yohaannisa 4:8) Laggetiyay baynna Xoossaa aadhida eratettaa qoppiyo wode, asaa naati Xoossaa haaruwan deˈidaba gidiyaakko, asaa haaruwaa kaafiyoogee kaalettido ubba metoy deˈana danddayennaagaakka ammanettoos. Xoossaa haaroy “paxa de7iyaageeta ubbaa amuwaa” alana shin. (Mazamure 145:16) Hara guussan, hegee polo haaro gidana shin. (Zaarettido Wogaa 32:4) Asaa naati hegaa ixxidoogee ayba azzanttiyaabee!
4. Seexaanay haaranaadan imettida maatay ay keenee?
4 SHin asay bana barkka haaranaadan Yihooway paqqadikkokka, i ba meretata haariyo maataa awudenne aggibeenna. Baabiloone biittaa wolqqaama kawoykka, “Ubbaappe Xoqqiya Xoossai asaa naatu kawotetta ubbaa haariyoogaa” wolqqan ammaniis. (Daaneela 4:17) Wurssettan, Xoossaa Kawotettay a shenee polettanaadan oottana. (Maatiyoosa 6:10) Seexaanay denttido oyshaa ammanttiya ogiyan zaaranau, he morkkee guutta wodiyau ‘ha saˈaa xoossaa’ gidanaadan Yihooway paqqadidoogee tuma. (2 Qoronttoosa 4:4; 1 Yohaannisa 5:19) Gidikkokka, Yihooway ayyo paqqadidobaappe Seexaanay kanttidi aynne oottana danddayibeenna. (2 Odiya 20:6; Iyyooba 1:11, 12; 2:3-6ra gatta xeella.) Xoossau waanna Morkkee haariyo alamiyan deˈiyaaba gidikkonne, Xoossaayyo haarettanau dooridaageeti ubba wodiyaanikka deˈidosona.
Xoossay Israaˈeeleta Haarido Ogiyaa
5. Israaˈeeleti Xoossaayyo ayba qaalaa gelidonaa?
5 Aabeela wodiyaappe biidi Israaˈeelen xeegettiya deree doommido wodiyaa gakkanaashin, ammanettida daro asati Yihoowayyo goynnidosonanne a higgiyau azazettidosona. (Ibraawe 11:4-22) Muuse wode, Yihooway Yaaqooba naatuura maachaa maacettiis; yaatin eti Israaˈeele dere gididosona. Israaˈeeleti 1513 K.K., “GODAI giidobaa ubbaa nuuni oottana” yaagidi, etinne eta zerettay Yihoowa Haaruwau haarettanaagaa qaalaa gelidosona.—Kessaabaa 19:8.
6, 7. Yihooway Israaˈeeleta haarido ogee aybin erettii?
6 Yihooway Israaˈeeleti ba asa gidanaadan halchuwan dooriis. (Zaarettido Wogaa 7:7, 8 nabbaba.) He dooroy Israaˈeeleta goˈˈiyoogaappekka aadhiyaabaa gujjees. Hegee Xoossaa sunttaaranne i ubbabaa haariyo maataara gayttidaba; qassi hegee keehi koshshiyaaba. Yihoowa xallay tumu Xoossaa gidiyoogaa Israaˈeeleti markkattana koshshiis. (Isiyaasa 43:10; 44:6-8) Hegaa gishshau, Yihooway he deriyau: “Intte GODAASSI, intte Xoossaassi, geeshsha asa; GODAI inttena ba asa gidanaadan, biittan de7iya asa ubbaappe dooridi wottiis” yaagiis.—Zaarettido Wogaa 14:2.
7 Xoossay Israaˈeeleta haaridoy, eti polo gidennaagaa akeekiyoogaana. Hegaadankka, a higgee polo; qassi Immidaagaa eeshshaa qonccissiyaagaa. Muuse baggaara imettida Yihoowa higgee, Xoossaa geeshshatettaa, i suure pirddaa dosiyoogaa, i atto gaanau koyiyaagaa gidiyoogaanne a danddayaa loytti qonccissiis. Guyyeppe, Yaasu wode, he deree Yihoowa higgiyau azazettidi, sarotettaanne ayyaanaaban anjjuwaa demmiis. (Yaasu 24:21, 22, 31) He wode deˈida Israaˈeeletu taarikee Yihooway haariyo ogee ushachiyoogaa qonccissiis.
Asaa Haaroy Qohuwaa Kaalettiis
8, 9. Israaˈeeleti eratetti paccido ayba oyshaa oychidonaa; hegee ay kaalettidee?
8 Gidikkokka, guyyeppe Israaˈeeleti Yihoowa haaruwaappe darotoo kiyin, i naagibeenna gishshau tuggatidosona. Wurssettan, Israaˈeeleti hananabaa yootiya Sameeli etau kawo immanaadan oychidosona. Eti giidoogaadan oottanaadan Yihooway Sameelayyo yootiis. SHin Yihooway gujjidi: “Taani eta bolli kawotennaadan, eti tana ixxidosonappe attin, nena ixxibookkona” yaagiis. (1 Sameela 8:7) Israaˈeeleta kawoy haaranaadan Yihooway paqqadidaba gidikkonne, asaa haaroy gattiyo qohuwaakka yootiis.—1 Sameela 8:9-18 nabbaba.
9 Yihooway giidobay tuma gidiyoogaa taarikee qonccissiis. Asan haarettiyoogee, ubba qassi haariya kawoy ammanettennaagaa gidiyo wode, Israaˈeeletu bolli wolqqaama metuwaa kaalettiis. Israaˈeeletu hanotan qonccida ha leemisuwaa qoppiyo wode, Yihoowa erenna asaa naati haariyo aysoy taarike wode ubban asaa adussa wodiyau goˈˈiyabaa ehaana danddayibeennaagee garamissenna. Haariya issoti issoti sarotettaanne woppatettaa ehaanau baaxetiyo wode, Xoossay banttana anjjanaadan woossoosona; shin Xoossay ba haaruwau aqennaageeta waatidi anjjana danddayii?—Mazamure 2:10-12.
Xoossay Haariyo Ooratta Deriyaa
10. Xoossay Israaˈeeleta aggidi hara deriyaa ayssi dooridee?
10 Israaˈeele deree Yihoowayyo ammanettidi oottanau koyennaagee qoncciis. Wurssettan, eti Xoossay sunttido Masiyaa ixxidosona; yaatin Yihooway eta ixxidi, eta gishshaa ooratta dere gidiya asaa citaa dooranau halchiis. Hegaappe denddidaagan, 33 M.Ln, Yihoowayyo goynniya, ayyaanan tiyettidaageetu Kiristtaane gubaaˈee eqqiis. He gubaaˈee Yihooway haariyo ooratta dere giyoogaa mala. PHauloosi he gubaaˈiyaa “Xoossaa Israaˈeele” yaagiis.—Galaatiyaa 6:16, NW.
11, 12. Israaˈeelatanne “Xoossaa Israaˈeele” asaa kaalettiyoogaara gayttidaagan issi mala gididabay aybee?
11 Beni Israaˈeele deriyaanne ooratta “Xoossaa Israaˈeele” deriyaa issi mala oottiyaabinne dummayiyaabi deˈees. Beni Israaˈeeletuppe dumma hanotan, Kiristtaane gubaaˈiyaa kawo gididi haariya asi baawa; qassi nagaranchatuyyo mehiyaa yarshshuwaa yarshshiyoogaa koshshenna. Israaˈeele deriyaanne Kiristtaane gubaaˈiyaa issi mala oottiyaabatuppe issoy cimata sunttiyo giigissuwaa. (Kessaabaa 19:3-8) He Kiristtaane cimati wudiyaa haarokkona. Hegaappe dumma hanotan, gubaaˈiyaa heemmoosona; qassi Kiristtaane oosuwaa sintta xeera gididi wozanappe kaalettoosona. Eti gubaaˈiyan deˈiya ubbaa bonchuwaaninne siiquwan oyqqoosona.—2 Qoronttoosa 1:24; 1 PHeexiroosa 5:2, 3.
12 Xoossay Israaˈeeleta oyqqido hanotaa wotti denttidi qoppiyoogan, “Xoossaa Israaˈeele” yametinne etaara oottiya ‘hara dorssati’ Yihoowanne i haariyo ogiyaa keehippe nashshoosona. (Yohaannisa 10:16) Leemisuwau, Israaˈeeleta haaridaageeti bantta haariyo asay loˈˈobaa woykko iitabaa oottanaadan gaaso gididoogaa taarikee qonccissees. Kiristtaane gubaaˈiyaa sintta xeera gididi kaalettiyaageeti beni kawotuugaadan haarana xayikkonne, ubbatoo ammanuwan loˈˈo leemiso gidana bessiyoogaa he hanotay akeekissees.—Ibraawe 13:7.
Yihooway Ha Wodiyan Haariyo Ogiyaa
13. Nu wodiyan, 1914n polettida keehippe gitabay aybee?
13 Asaa naatu haaroy mata wode xayanaagaa Kiristtaaneti ha wodiyan asau yootoosona. Yihooway 1914n, i sunttido Kawoy, Yesuus Kiristtoosi haariyo ba Kawotettaa saluwan essiis. He wode, i Yesuusi “xooniiddinne qassikka xoonanau” kiyanaadan aawatettaa immiis. (Ajjuutaa 6:2) Ooratta Kawoy ‘ba morkketu giddon haaranaadan’ i yootiis. (Mazamure 110:2) Asay ubba wode Yihoowayyo haarettennan ixxidoogee azzanttiyaaba. Eti “Xoossai baawa” giyooba malabaa oottiyoogaa aggibookkona.—Mazamure 14:1.
14, 15. (a) Ha wodiyan Xoossaa Kawotettau nuuni haarettiiddi deˈiyoy ayba ogiyaanee? Hegaara gayttidaagan woygiya oyshata nuna oychana koshshii? (b) Xoossaa haaroy aybippenne aadhiyoogee ha wodiyan waanidi qonccidee?
14 Ayyaanan tiyettida “Xoossaa Israaˈeele” yametuppe ha wodiyan deˈiya guuttati, Yesuusa ishantta gidiyoogaadan, ubbatoo “Kiristtoosa gishshaa haasayiya i kiittidoogeeta” gididi oottoosona. (2 Qoronttoosa 5:20) Ayyaanan tiyettidaageetuyyoonne saˈan merinau deˈiyo hidootay deˈiyo miilooniyan qoodettiya, dariiddi deˈiya asau koshshiyaabaanne ayyaana qumaa giigissanau eti ammanettida wozannaama ashkkara gididi sunttettidosona. (Maatiyoosa 24:45-47; Ajjuutaa 7:9-15) He giigissuwaa Yihooway anjjidoogee, tumu ogiyan goynniyaageeti ha wodiyan ayyaanaaban demmido ishaluwan qonccidi beettees.
15 Nuuni ubbay nuna hagaadan oychana koshshees: ‘Taani Kiristtaane gubaaˈiyan kiyana koshshiyo aawatettaa loyttada akeekidanaa? Yihooway haariyo ogiyaa suure kaafiyaanaa? Haariiddi deˈiya Yihoowa Kawotettau ufayssan haarettiyaanaa? Tau danddayettida keenan Xoossaa Kawotettaabaa haratuyyo ubbatoo yootanau murttidanaa?’ Nuuni cita xekkan, Bollaara Heemmiyaagaa kaaletuwaa ufayttidi kaalloos; qassi gubaaˈiyan sunttettida cimatuura ufayssan hashetoos. Hegaadan oottiyoogan, Yihoowa haaruwau aqidoogaa bessoos. (Ibraawe 13:17 nabbaba.) Ufayssan haarettiyoogee, issippetetti baynna alamiyan keehippe dumma gidida alame yuusho issippetettay deˈanaadan oottees. Qassi sarotettaynne xillotettay deˈanaadan ootteesinne Yihooway haariyo ogee aybippenne aadhidi loˈˈo gidiyoogaa qonccissiyoogan a bonchissees.
Yihoowa Haaroy Xoonees
16. Ha wodiyan ubba asay ayba kuushsha kuuyana koshshii?
16 Edenen Yihoowa bolli denddida mootoy giigiyo wodee keehippe matattiis. Hegaa gishshau, hagee asay kuuyanau bessiyo wode. Ubba asay Xoossay haariyo ogiyaa kaafiyaakko woy asaa haaruwaa minttidi kaafiyaakko kuuyana koshshees. Ashkke asati suure kuushshaa kuuyanaadan nuuni maaddiyo maataa demmida. Mata wode, Armmageedoona olan, Seexaanay kaalettiyo, asaa haaroy Yihoowa haaruwan merinau laamettana. (Daaneela 2:44; Ajjuutaa 16:16) Asaa haaroy xayin, Xoossaa Kawotettay kumetta saˈaa haarana. Yihooway haariyo ogee suure gidiyoogee kumetta hanotan qonccana.—Ajjuutaa 21:3-5 nabbaba.
17. Haaruwaara gayttidaagan ashkketi loˈˈo kuushshaa kuuyanau aybi maaddana danddayii?
17 Hano gakkanau Yihoowa ufayssiya ogiyan minttidi qofaa qachibeennaageeti, Xoossaa haaroy asaa naatussi ehaana goˈˈaabaa woosan qoppana koshshees. Asaa naatu haaroy shabbirssaa gujjin, danoy kaalettiyo metuwaa xayssana danddayibeenna. Xoossaa haaroy iitatetta ubbaa saˈaappe xayssana. (Mazamure 37:1, 2, 9) Asaa haaroy zarbbenna olaa kaalettiis; shin Xoossaa haaroy “sa7aa gaxaa gakkanaassi de7iya olaa teqqees.” (Mazamure 46:9) Xoossaa haaroy asaynne doˈaykka sarotettan deˈanaadan oottana! (Isiyaasa 11:6-9) Hiyyeesatettaynne namisay asaa naatu haaruwan xayi erennaba; shin Xoossaa haaroy hegeeta mule xayssana. (Isiyaasa 65:21) Asaa naatu haaroy harggiyaanne hayquwaa xayssanau keehippe koyiyaabaa gidikkokka, xayssanau danddayibeenna; shin cimidaageetinne harggiyaageeti Xoossaa haaruwan yelagatetta wolqqau simmidi ufayttana. (Iyyooba 33:25; Isiyaasa 35:5, 6) Saˈay gannate gidana; hayqqidaageetikka denddana.—Luqaasa 23:43; Oosuwaa 24:15.
18. Yihooway haariyo ogee aybippenne aadhiyoogaa nuuni ammaniyoogaa waatidi bessana danddayiyoo?
18 Ee; Seexaanay nu koyro aawaanne aayyiyo eta Medhidaagaappe haassidoogaa gaasuwan gakkida qoho ubbaa Xoossaa haaroy xayssana. Seexaanay 6,000 layttau qohuwaa gattiiddi takkiis; shin Xoossay he qoho ubbaa Kiristtoosa baggaara 1,000 laytta giddon xayssana! Hagee, Xoossay haariyo ogee aybippenne aadhiyoogaa loytti qonccissiyaaba! Xoossaa Markkata gidiyoogaadan, nuuni a nuna Haariyaagaa oottidi ekkoos. Hegaa gishshau, ubba galla, ubba qassi ubba saatiyan, nu deˈuwan Yihoowayyo goynniyaageeta gidiyoogaa, a Kawotettau haarettiyaageeta gidiyoogaanne a Markkata gidiyoogan ufayttiyoogaa bessiyaageeta gidoos. Qassi ezggiya ubbau Yihooway haariyo ogee aybippenne aadhiyoogaa yootanau, demmido injje ubbaa goˈettiyaageeta gidoos.
Kaalliya Xiqiseta Nabbabiyoogan Xoossaa Haaruwaa Xeelliyaagan Ay Tamaaridoo?
[Oyshata]
[Sinttaa 29n deʼiya misiliyaa]
Yihooway ubba wodekka haariyaagaa
[Sinttaa 31n deʼiya misiliyaa]
Yihoowa haaruwau ufayssan haarettiyoogee alame yuusho issippetettay deˈanaadan oottees