Ke Tamilang nrib Fel’ Rogon ni Ma Gagiyeg Jehovah
Ke Tamilang nrib Fel’ Rogon ni Ma Gagiyeg Jehovah
“Got ni ir e Th’abi Tolang e ba’ gelngin ni nge gagiyegnag e gagiyeg ni be tay e pi pilung nu fayleng.”—DAN. 4:17.
1, 2. Mang boch i fan ni dabi fel’ e gagiyeg ni be tay e girdi’?
DARIY e maruwar riy nde yib angin e gagiyeg ni ma tay e girdi’. Bin th’abi ga’ i fan nde yib angin e gagiyeg rorad e bochan e dariy e gonop rorad. Yira nang nde yib angin e gagiyeg rorad ni bochan ni girdi’ e ngiyal’ ney e kemus ni ‘yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri ba ga’ farad; ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wan’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wan’rad, ma yad ba uf.’—2 Tim. 3:2-4.
2 Kakrom ma de fol Adam nge Efa rok Got. Nap’an ni kar togopuluwgow ma sana kar lemnagew ni yow e ngaur turguyew e n’en ni ngar rin’ew ma dariy be’ ni be gagiyegnagrow. Machane, bin riyul’ riy e Satan e be gagiyegnagrow. U lan nel’ biyu’ e duw ni girdi’ e yad be gagiyegnaged yad u lan e re fayleng ney ni Satan e “be gagiyegnag” ma ka ri gel e magawon ko girdi’. (John 12:31) Be yog reb e babyor nib m’ay fan ni “ngan gay bang ni ngan par riy ni dariy e magawon riy.” Miki yog ni gaar: “Gathi kemus ni dabiyog ni ngan pirieg bang ni aram rogon, ya ra ngan gay rogon ni ngan sunmiy e par ni aram rogon ma ra yib e gafgow nib gel, ma ra k’aring e mahl.” (The Oxford History of the Twentieth Century) Rib tamilang e n’en be yog u roy ni gagiyeg ni ma tay e girdi’ e ri dabi fel’.
3. Susun ra uw rogon e gagiyeg rok Got ni faan mang e de denen Adam nge Efa?
3 Rib gel e oloboch ni tay Adam nge Efa ya kar siyegew e gagiyeg rok Got ni ir e bin nib fel’ e gagiyeg. Dawor da nanged ko ri uw rogon nra gagiyegnag Jehovah e fayleng ni faan mang e dar togopuluwgow. Machane rayog ni nge mich u wan’dad nra gagiyegnag urngin e girdi’ u fithik’ e t’ufeg ni dariy e laniyan’ riy. (Acts 10:34; 1 John 4:8) Ma ku faan manga de togopluw e girdi’ ko gagiyeg rok Got ma dariy e kireb ni bod e chiney. Gagiyeg rok Got e susun rayog ni nge “pi’” urngin ban’en nib t’uf ko girdi’. (Ps. 145:16) Susun e rib fel’ e re gagiyeg rok Got nem. (Deut. 32:4) Rib gel e kireban’ riy ni bochan ni de fol e girdi’ rok Jehovah.
4. Uw n’umngin nap’an ni ke pag Got Satan ni nge gagiyeg?
4 Machane ba fel’ ni dab da paged talin ni yugu aram rogon ni ke pag Got e girdi’ ni ngar gagiyegniged yad machane dariy ba ngiyal’ ni ke darifannag mat’awun ko gagiyeg. Mus ko fare pilung nu Babylon nib gel gelngin e ke yog ni Jehovah e “Th’abi Tolang e ba’ gelngin ni nge gagiyegnag e gagiyeg ni be tay e pi pilung nu fayleng.” (Dan. 4:17) Ra munmun ma Gil’ilungun Got ra lebuguy e tin nib m’agan’ Got ngay. (Matt. 6:10) Riyul’ ni ke pag Jehovah Satan ni “fare kan nib kireb nu roy u fayleng” ni nge gagiyegnag e girdi’ ni fan e nge yog ni pithig fare magawon ni ke sum. (2 Kor. 4:4; 1 John 5:19) Machane kemus ni ke rin’ Satan e n’en ni ke pag Jehovah ni nge rin’. (2 Kron. 20:6; mu taareb rogonnag ko Job 1:11, 12; 2:3-6.) Ma gubin ngiyal’ ni bay e piin ni yad baadag ni ngar pigpiggad ngak Jehovah ni yugu aram rogon ni yad be par ko re fayleng ney ni Satan e be gagiyegnag.
Rogon ni Gagiyegnag Got Piyu Israel
5. Mang e ke micheg piyu Israel ngak Got?
5 Nap’an Abel nge mada’ nga nap’an ni ke sum fare nam nu Israel, ma i moy boch e girdi’ nib yul’yul’ ni ur pigpiggad ngak Jehovah ma ur folgad ko motochiyel rok. (Heb. 11:4-22) Nap’an Moses me fal’eg Jehovah ba m’ag u thilrad pi fak Jakob mar manged fare nam nu Israel. Duw ni 1513 B.C.E., ma piyu Israel e kar micheged ni lungurad: “Bay gu rin’ed urngin e tin ni ke yog Somol.”—Ex. 19:8.
6, 7. Mang e be m’ug u rogon ni i gagiyegnag Jehovah piyu Israel?
6 Bay fan ni ke mel’eg Jehovah piyu Israel ni ngar manged girdi’ rok. (Mu beeg e Deuteronomy 7:7, 8.) Ke rin’ e re n’em ni gathi kemus ni fan e nge fel’ rogon piyu Israel ya kub muun fithingan Got nge gagiyeg rok ngay, ma ireray e n’en ni rib ga’ fan. Piyu Israel e ur machibnaged ni kemus ni Jehovah e ir e bin riyul’ e Got. (Isa. 43:10; 44:6-8) Arfan ni gaar ngak piyu Israel: “Ba mil famed ngak Somol ni Got romed; ke mel’egmed u fithik’ gubin e girdi’ nu fayleng ni ngam manged girdi’ rok.”—Deut. 14:2.
7 Rogon ni i gagiyegnag Got piyu Israel e be m’ug riy ni be lemnag rarogorad. Ma ku pi motochiyel ni ke pi’ ngorad e ku be m’ug riy pi fel’ngin ni ir Got nib thothup, mab mat’aw ma ma n’ag fan e kireb ma ba gum’an’. Nap’an Joshua ma ur folgad ko pi motochiyel rok Jehovah ma ur pared u fithik’ e gapas min tow’athnagrad. (Josh. 24:21, 22, 31) Ngiyal’ nem ma ke yan i m’ug nib fel’ e gagiyeg rok Jehovah.
Wenegan e Gagiyeg ni i Tay e Girdi’
8, 9. Mang e ke ning piyu Israel, ma mang wenegan?
8 Boor yay ni daki fol piyu Israel ma aram ma daki ayuwegrad Jehovah. Munmun ma rogned ku Samuel ni yad baadag reb e pilung nib girdi’. Me yog Jehovah ngak Samuel ni nge fol ko n’en ni ka rogned. Machane ki gaar Jehovah: “Gathi gur e kar darifanniged gur; ya kar darifanniged gag ni gag e pilung rorad.” (1 Sam. 8:7) Yugu aram rogon ni ke pag Jehovah piyu Israel ni nge yog reb e pilung ngorad, ma ke yog ni ra sum e magawon riy.—Mu beeg e 1 Samuel 8:9-18.
9 Pi n’en ni ke buch ni kab kakrom i yib e be micheg ni riyul’ e n’en ni yog Jehovah. Ke yib e magawon ngorad nib gel, ni ba ga’ ni nap’an ni da i fol e pi pilung ko motochiyel rok Jehovah. Ere dab ni gin ngay ni pi Am nu fayleng e de yog rorad ni ngar chuweged urngin e magawon ko girdi’. Rriyul’ ni boch girdien e Am e yad ma ning e ayuw rok Got ni nge yog e gapas nge pagan’ ngorad, machane ba mudugil ni dabi ayuwegrad ya darur folgad rok.—Ps. 2:10-12.
Ba Nam nib Beech u Tan e Gagiyeg rok Got
10. Mang fan ni ke mel’eg Got boch e girdi’ ni nga ranod nga lon piyu Israel?
10 Fare nam nu Israel e daur yul’yul’gad ngak Jehovah. Munmun, mar n’aged fare Messiah ni ke dugliy Got, ma aram e ke n’agrad Jehovah me mel’eg ba ulung i girdi’ ni ngar manged fare nam nib beech. Ke sum fare ulung ni Kristiano ni kan dugliyrad ko duw ni 33 C.E. Re ulung nem e ke mang ba nam nib beech ni Jehovah e be gagiyegnagrad. I yog Paul ni kar manged e girdi’ nu ‘Israel u fithik’ i lanin’rad.’—Roma 2:29.
11, 12. Mang e n’en nib taareb rogon ko fare nam nu Israel kakrom nge piin ni yad yu ‘Israel u fithik’ i lanin’rad.’?
11 Bay ban’en nib thil maku bay ban’en nib taareb rogon ko fare nam nu Israel nge piin ni yad e ‘Israel u fithik’ i lanin’rad.’ Fare nam nu Israel kakrom e bay e pilung rorad, ma ulung ko Kristiano e dariy, maku de t’uf ni ngar pied e gamanman ni maligach ni fan ko denen. Ma fare nam nu Israel nge ulung ni Kristiano e taareb rogon ni bay e piin ni piilal riy ni ma ayuwegrad. (Ex. 19:3-8) Piin piilal e dab ra guyed rogon ni ngar suweyed fare ulung. Yad ma pi’ e athamgil ko girdi’ u lan e ulung maku yad ma pow’iyrad. Yad ma t’ufegrad ma yad ma tay farad.—2 Kor. 1:24; 1 Pet. 5:2, 3.
12 Piin ni yad e ‘Israel u fithik’ i lanin’rad’ nge “yugu boch e saf” e kar felfelan’gad u rogon ni ma ayuwegrad Jehovah ya yad manang rogon ni i ayuweg piyu Israel kakrom. (John 10:16) Ni bod ni, be weliy e Bible ni faanra ba fel’ reb e pilung ni be gagiyegnag piyu Israel kakrom ma ra yoor e girdi’ nib fel’, ma faanra ba kireb fare pilung ma aram e boor e girdi’ e ra kireb. Re n’ey e be puguran ngak e piin piilal u lan e ulung nib t’uf ni ngar daged e ngongol nib fel’.—Heb. 13:7.
Rogon ni Be Gagiyeg Jehovah e Ngiyal’ Ney
13. Mang e n’en nib ga’ fan ni buch ko duw ni 1914?
13 Pi Kristiano e yad be machibnag ni ke chugur ni nge m’ay e ngiyal’ ni be gagiyeg e pi am. Nap’an e duw ni 1914 me sunmiy Jehovah Gil’ilungun ni Jesus Kristus e Pilung riy. Ngiyal’ nem ma ke pi’ Jehovah mat’awun Jesus ni “nge yan ko mahl nge gel.” (Rev. 6:2) Ka nog ngak Jesus nni gaar: “Gur e bay mu gagiyeg nga daken e pi toogor rom.” (Ps. 110:2, BT) Machane ri dabun e pi nam ni nge gagiyegnagrad Jehovah. Ka yad be ulul ngaur ngongolgad ni gowa “Dariy e Got!”—Ps. 14:1.
14, 15. (a) Uw rogon ni be gagiyegnagdad Gil’ilungun Got e ngiyal’ ney, ma mang boch e deer ni ngad fithed gad riy? (b) Uw rogon ni kan guy ni gagiyeg rok Got e th’abi fel’?
14 Boch e girdi’ ni yad bang ko ‘Israel u fithik’ i lanin’rad’ ni ka yad ba fas e ku yad be “weliy e thin rok Kristus.” (2 Kor. 5:20) Yad fare tapigpig nib yul’yul’ mab gonop ni kan dugliyrad ni ngar pied e tirok Got ban’en ngak e pi Kristiano ni yad ra yan nga tharmiy nge bokum milyon e girdi’ ni yad ra par u fayleng ni manemus. (Matt. 24:45-47; Rev. 7:9-15) Ba tamilang ni be tow’athnag Jehovah e re yaram ney ya ke mon’og e pi tapigpig rok ko tirok Got ban’en e ngiyal’ ney.
15 Ra bagadad ma nge fith ir: ‘Ri gu manang e maruwel u lan e ulung nib mil fan ngog ni nggu rin’? Ri gu ma fol u rogon ni ma gagiyeg Jehovah? Ba ga’ fan u wan’ug ni kug mang bang ko piin ni be gagiyegnagrad Jehovah? Kug dugliy ni nggu ulul i weliy murung’agen Gil’ilungun Got u rogon ni rayog rog?’ Ba m’agan’dad ngay ni ngad folgad ko thin ni ma yog e Piin ni Ma Pow’iyey ma ku gad ma fol ko piin piilal u lan e ulung. Re n’ey e be dag nib fel’ u wan’dad e gagiyeg rok Got. (Mu beeg e Hebrews 13:17.) Bochan ni gad ma fol, ma aram e kad pared nib taareban’dad ni gad ba thil ko re fayleng ney ni ke yoor raba’ e girdi’ riy. Ma aram e kad pared ni gad ba gapas ni gad be rin’ e tin nib mat’aw ma rayog ni nga nog e sorok ngak Jehovah ni bochan. Ma re n’ey e be micheg ni gagiyeg rok e rib fel’.
Ke Yib Angin e Gagiyeg ni Be Tay Jehovah
16. Mang e thingari dugliy gubin e girdi’?
16 Dabki n’uw nap’an ma yira pithig fare magawon ni sum u Eden. Ere ireray e ngiyal’ nra be’ ma nge dugliy e n’en ni nge rin’, ko ra fol u rogon ni be gagiyeg Jehovah fa danga’. Ere rib fel’ ni ngad ayuweged e piin nib sobut’an’ ni ngar dugliyed e tin nib fel’. Nap’an Armageddon ma ra chuweg Jehovah e am ko girdi’ me mang birok e am e par ni dariy n’umngin nap’an. (Dan. 2:44; Rev. 16:16) Ma ra gagiyegnag e fayleng ni ga’ngin. Ma ireray e tayim ni ngari tamilang nrib fel’ rogon ni ma gagiyeg Jehovah.—Mu beeg e Revelation 21:3-5.
17. Mang boch ban’en nra ayuweg e girdi’ ni ngar dugliyed e tin nib fel’ ni ngar rin’ed?
17 Piin ni dawora dugliyed ni ngar folgad rok Jehovah e thingar ra fal’eged i lemnag boch e tow’ath ni ra yibnag Gil’ilungun Got. Girdi’ e de yog rorad ni ngar pithiged e magawon ni bugel nge ngongolen e terrorist. Gagiyeg rok Got e ra chuweg urngin e kireb u fayleng. (Ps. 37:1, 2, 9) Gagiyeg ko girdi’ e ke yibnag boor e mahl machane gagiyeg rok Got e ra “taleg e pi mahl ni yibe tay u fayleng i yan.” (Ps. 46:9) Maku gagiyeg rok Got e ra yibnag e gapas nga thilin e girdi’ nge gamanman. (Isa. 11:6-9) Nap’an ni be gagiyeg e girdi’ ma gubin ngiyal’ ni bay e piin gafgow, machane gagiyeg rok Got e ra chuweg urngin ban’en ni be gafgow e girdi’ riy. (Isa. 65:21) Mus ko pi tayugang’ ni riyul’ ni yad baadag ni ngar ayuweged e girdi’, machane dabiyog rorad ni ngar chuweged e m’ar nge yam’, kemus ni goo gagiyeg rok Got e rayog ni nge chuweg e m’ar, ma girdi’ ni kar pilibthirgad e ra sul nge pagel bayay. (Job 33:25; Isa. 35:5, 6) Bin riyul’ riy e ra paradis e fayleng ma yira faseg e piin ni kar m’ad.—Luke 23:43; Acts 24:15.
18. Uw rogon ni ngad daged ni kari mich u wan’dad ni gagiyeg ni ma tay Got e th’abi fel’?
18 Riyul’ ni gagiyeg rok Got e ra chuweg urngin e magawon ni ke yibnag Satan. A mu lemnag, Satan e k’aring ni nge yib e magawon ko girdi’ ni sogonap’an 6,000 e duw machane ra chuweg Got urngin e pi magawon ney u lan 1,000 e duw. Re n’ey e be micheg ni gagiyeg rok Got e th’abi fel’. Gadad e Pi Mich rok Got, ma ke m’agan’dad ngay ni nge mang Pilung rodad. Ere gubin ngiyal’ ni ngad daged ni gadad e pi tapigpig rok Jehovah, ni gadad be par u tan Gil’ilungun, ma gadad ba felfelan’ ni kad manged e Pi Mich rok. Gubin ngiyal’ ni ngad athamgilgad nga dogned ngak e girdi’ ni gagiyeg rok Jehovah e aram e bin th’abi fel’ e gagiyeg.
Mang e Kad Filed u Murung’agen e Gagiyeg Rok Got ko N’en ni Kad Beeged u . . .
[Study Questions]
[Picture on page 29]
Gubin ngiyal’ ni ma gagiyeg Jehovah
[Picture on page 31]
Ke taareban’ e pi tapigpig rok Jehovah u ga’ngin e fayleng ya ke m’agan’rad ngay ni ngar pared u tan e gagiyeg rok