Rihuínnica jma jneza modo runi mandar gobiernu stiʼ Jiobá
Rihuínnica jma jneza modo runi mandar gobiernu stiʼ Jiobá
«Dios ni jma nandxóʼ nga runi mandar ca reinu ni nuu ndaaniʼ guidxilayú.» (DAN. 4:17)
1, 2. Xiñee qué ganda guni mandar ca gobiernu ca jneza.
MAʼ BIHUINNI qué ganda diʼ gacané ca gobiernu ca binni. Tobi de ca razón ca nga purtiʼ qué gannadícabe ximodo naquiiñeʼ gaca mandar. Yanna riʼ nga jma rihuinni qué zanda diʼ guni mandar ca políticu ca jneza. Xiñee yaʼ. Purtiʼ Biblia maca bizeeteʼ xi zuni stale de laacabe: «Zuyubi binni para laa si, ne nisi bidxichi zacá ique caʼ. Zuni ca laaca nandxóʼ ne zaca ca nayáʼ», «nin zanna ca pa nuu Dios», «qué ziá ca irutiʼ, ne nisi zazá ca zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni ne zaca nanalaʼdxi cabe irá ni jneza. Zutoo cabe xhamigu cabe» ne «zudxiiba cabe laca laacabe» (2 Tim. 3:2-4).
2 Maʼ raca stale siglu nga de bidxiideche primé bixhózenu ne jñaanu gobiernu stiʼ Dios. Zándaca guníʼ íquecabe maʼ guirutiʼ tu zuni mandar laacabe, peru qué liica nuxuiʼlúcabe pa ndaaniʼ naʼ Binidxabaʼ, dios «ni runi mandar ndaani» guidxilayú riʼ nga yeguiábacabe. Yanna, despué de xhoopaʼ mil iza de cadi jneza modo cayuni mandar ca políticu ca purtiʼ caguite Binidxabaʼ laacaʼ la? jmaruʼ si feu modo nabani binni (Juan 12:31). Pur modo nabáninu ca dxi riʼ la? ti libru ni láʼ Historia Oxford del siglo XX na pur gana si «guyubi binni chuʼ ti guidxilayú ra guibáninu galán». Ne laaca cusiéneni: «Nagana nga para ganda chuʼ ti guidxilayú zacá, peru cadi ngasi, neca huayuni binni stipa para gácani, qué huabeendúdicaʼ gastiʼ. Ne ni jma feu nga, nuu tiru riuu gobiernu ni riguixhe ley para gaca puru si ni racalaʼdxiʼ ne raca jma guerra». ¡Biáʼsipeʼ nga ni guníʼ libru ca de guiráʼ ca cosa malu nuu yanna dede dxi bizulú cayuni mandar hombre!
3. Ximodo ñuni mandar Dios ndaaniʼ Guidxilayú riʼ pa qué nuchee Adán ne Eva.
3 Triste nga guininu bidxiideche Adán ne Eva gobiernu stiʼ Jiobá, gobiernu riʼ nga ni jma jneza modo runi mandar. Qué ganna chaahuidinu ximódopeʼ nga niguixhe Dios ñuni mandar ndaaniʼ Guidxilayú riʼ pa qué nucheecabe. Peru nánnanu jneza nga modo ñuni mandarbe ca binni ruzuubaʼ diidxaʼ purtiʼ nadxiibe laacaʼ ne qué ñúnibe jma pur tobi que pur stobi (Hech. 10:34; 1 Juan 4:8). Cumu Dios si nga jma nuu xpiaaniʼ la? qué ñuu dxi ñúnibe nin tobi de ca cosa ni cadi jneza huayuni ca xaíque stiʼ ca políticu ca. Gobiernu stiʼ Dios ca ñanda nudii «guiráʼ ni racalaʼdxiʼ cani nabani» (Sal. 145:16). Laani nga ñácani gobiernu ni jma galán para binni (Deu. 32:4). ¡Stale nga ni biniti binni pur ni guca ca!
4. Pabiaʼtiʼ nga huayuni Binidxabaʼ ni racalaʼdxiʼ.
4 Peru galán guietenaláʼdxinu ti cosa: nécapeʼ bidii Jiobá lugar guni mandar binni laca laa la? qué huayuu dxi gunítibe derechu ni nápabe de guni mandarbe laacaʼ. Dede rey stiʼ Babilonia bidii cuenta dxandíʼ ni, ngue runi guníʼ: «Dios ni jma nandxóʼ nga runi mandar ca reinu ni nuu ndaaniʼ guidxilayú» (Dan. 4:17). Ne despué zuni Reinu ca ni na Dios ndaaniʼ Guidxilayú riʼ (Mat. 6:10). Dxandíʼ nga cudii Jiobá lugar gaca Binidxabaʼ dios stiʼ guidxilayú riʼ, purtiʼ zacatiʼ nga zahuinni tu laa zanda guni chaahuiʼ ca guendanagana ni bizulú dxi bicaalube Dios (2 Cor. 4:4; 1 Juan 5:19). Peru qué huayanda diʼ guni Binidxabaʼ guiráʼ ni racalaʼdxiʼ, sínuque huayúnibe biaʼ huadii si Jiobá lugar laabe (2 Cró. 20:6; zanda gúʼndaluʼ Job 1:11, 12 ne 2:3-6). Ne laaca huayuu stale binni ni rudii lugar guni mandar Dios laacaʼ, neca nabézacaʼ ndaaniʼ ti guidxilayú ni nuu lu naʼ xhenemígube riʼ.
Dxi biʼniʼ mandar Dios Israel
5. Xi gudxi ca israelita que Dios zúnicaʼ.
5 Dede ca dxi stiʼ Abel que hasta ca dxi bizulú guidxi Israel la? guyuu hombre ne gunaa ni biʼniʼ adorar Jiobá ne bíʼnicaʼ ni na ca mandamientu stibe (Heb. 11:4-22). Ca dxi stiʼ Moisés que, biʼniʼ Dios ti pactu ne ca xiiñiʼ Jacob, laacabe nga beeda gácacabe guidxi Israel. Lu iza 1513 ante gueeda Jesús, guníʼ ca israelita que zudiicaʼ lugar gaca Dios Rey sticaʼ ne zaqueca zuni ca xiiñicaʼ, dede guniʼcaʼ: «Maʼ gudixhe íquedu gúnidu guiráʼ ni maʼ guníʼ Jiobá» (Éxo. 19:8).
6, 7. Xi bisihuinni Dios pur modo biʼniʼ mandarbe guidxi Israel.
6 Maca nuu xi pur ngue gulí Jiobá Israel para gaca guidxi stibe (biindaʼ Deuteronomio 7:7, 8). Cadi bíʼnibe ni para si chuʼcaʼ galán, sínuque para ganna binni tu labe ne guihuinni nápabe derechu de guni mandarbe, ne nga nga ni jma risaca. Ca israelita que naquiiñeʼ nusihuínnicaʼ Jiobá nga Dios ni dxandíʼ (Isa. 43:10; 44:6-8). Ngue runi biquiiñeʼ Jiobá Moisés para gabi guidxi que ca diidxaʼ riʼ: «Nácaluʼ ti guidxi ni nayá para Jiobá Dios stiluʼ, ne maʼ gulibe lii para gácaluʼ ti guidxi ni jma risaca stibe, lade guiráʼ ca guidxi nuu lu guidxilayú» (Deu. 14:2).
7 Modo biʼniʼ mandar Dios ca israelita que bisihuínnini nánnabe binni ruchee laacaʼ. Ne laaca biquiiñebe Moisés para bidiibe laacaʼ caadxi ley ni rusihuinni nácabe ti Dios nayá, riuuláʼdxibe gaca ni jneza, rilaseláʼdxibe binni ne qué ridxiichibe nagueenda. Gudiʼdiʼ si iza, ca dxi stiʼ Josué que, bibani ca binni guidxi que nayecheʼ ne guyuucaʼ galán ne Dios purtiʼ bíʼnicaʼ guiráʼ ni biʼniʼ mandarbe laacaʼ (Jos. 24:21, 22, 31). Tiempu bibani ca israelita que nga bihuinni gobiernu si stiʼ Jiobá nga ni jma jneza modo runi mandar.
¡Gúpacabe stale guendanagana pur gulícabe ti binni para gaca rey!
8, 9. Xii nga ti cosa ni cadi jneza gunabaʼ Israel, ne xi bizaaca pur laani.
8 Stale biaje bixeleʼ ca israelita que de Dios, ngue runi maʼ qué ñápadibe laacaʼ. Gúdxicabe Samuel gabi Dios racaláʼdxicabe gápacabe tuuxa ni gaca rey ládecabe. Gudxi Jiobá laabe gúnibe ni canabaʼ ca binni que, peru laaca guníʼ Jiobá ca diidxaʼ riʼ: «Cadi lii diʼ nga cudxiidéchecabe, sínuque naa nga cudxiidéchecabe casi rey stícabe» (1 Sam. 8:7). Nécapeʼ biʼniʼ Dios ni canábacabe que la? gudxi laacabe zápacabe stale guendanagana pur laani (biindaʼ 1 Samuel 8:9-18).
9 Guiráʼ ni bizaaca ca israelita que bisihuínnini dxandíʼ ni na ca diidxaʼ que. Nabé stale guendanagana gupa Israel pur ca rey ni biʼniʼ mandar guidxi que, jmaruʼ si ora bicheené ca rey que Dios. Lu ca siglu ni maʼ gudiʼdiʼ ca ngaca nga ni rihuinni: ti gobiernu ni qué rudii lugar gacané Dios laa la? qué rindaa diʼ ca cosa galán ni runi pur xquidxi. Peru xi zanda guininu de ca políticu ni riníʼ riguu Dios ndaayaʼ ni rúnicaʼ para guibani xquídxicaʼ nayecheʼ ne sin tíndecaʼ yaʼ. Cumu cadi cayúnicabe ni na Jiobá la? qué racanédibe laacaʼ (Sal. 2:10-12).
Ti guidxi cubi ra cayuni mandar Dios
10. Xiñee gulí Jiobá sti guidxi lugar stiʼ Israel.
10 Ra gudiʼdiʼ tiempu bihuinni cadi dxandíʼ diʼ ngue racalaʼdxiʼ ca israelita que gúnicaʼ ni na Dios. Cumu bidxiidéchecabe Mesías que la? laaca bidxiideche Jiobá laacabe ne gulí sti guidxi cubi chuʼ lugar stícabe. Ngue runi bizulú ti grupu de ca xpinni Cristu lu iza 33, laacabe nga ca binni ni maʼ gulí Dios pur espíritu. Pablu gulee lá guidxi cubi ni cayuni mandar Jiobá riʼ «Israel stiʼ Dios» (Gál. 6:16, NM).
11, 12. Ximodo nga zeeda gaca «Israel stiʼ Dios» cásica guidxi Israel ni guyuu dxiqué.
11 «Israel stiʼ Dios» ni nacubi riʼ, beeda gácani cásica Israel ni guyuu dxiqué, peru laaca nuu xcaadxi cosa ni qué ñuni primé guidxi que. Ca xpinni Cristu riʼ qué gápadicaʼ ti binni casi rey ne qué ruuticaʼ maniʼ para guixá donda sticaʼ. Peru, cásica guyuu ca israelita que la? laaca nuu hombre ni runi dxiiñaʼ casi binnigola ládecabe (Éxo. 19:3-8). Ca binnigola riʼ qué rácacaʼ naduxhuʼ ne ca xpinni Cristu ora gábicaʼ laacabe xi gúnicabe. Primé ca laacaʼ nga rúnicaʼ xiixa dxiiñaʼ lade ca binni ridagulisaa. Rusisácacaʼ laacabe, rannaxhiicaʼ laacabe ne runi respetarcaʼ laacabe (2 Cor. 1:24; 1 Ped. 5:2, 3).
12 Ca xpinni Cristu ni naca de «Israel stiʼ Dios» ne «xcaadxi dendxu» ca, galán guiníʼ íquenu ximodo guyuu Jiobá ne ca israelita que. Zacá zannaxhiinu laabe jma ne ziuuláʼdxinu modo runi mandarbe xquídxibe (Juan 10:16). Pur ni biʼniʼ ca rey ni guyuu Israel que la? bicaani ca binni de guidxi que gúnicaʼ stale cosa, cásica ni jneza zaqueca ni cadi jneza. Xi riziidiʼ ca binnigola ni nuu lade ca binni ridagulisaa de ni bizaaca riʼ yaʼ. Nécapeʼ cadi rey laacabe la? naquiiñeʼ gusihuínnicabe nácacabe binni ni napa fe (Heb. 13:7).
Modo runi mandar Jiobá yanna
13. Xi bizaaca lu iza 1914.
13 Lu guidubi nacaʼ Guidxilayú, ca xpinni Cristu caniʼcaʼ maʼ cadi candaa diʼ para guinitilú ca gobiernu nuu yanna. Lu iza 1914, bizulú biʼniʼ mandar Reinu stiʼ Jiobá ora bicuibe Jesucristu casi Rey stini. Iza que bidiibe laa poder para «[qui]xhe dxí cani ucaa lú laa» ne para guni mandar «lade ca xhenemigu» (Apo. 6:2; Sal. 110:2). Triste nga guidúʼyanu qué liica naʼ ca guidxi ca gápacaʼ Jiobá casi Rey sticaʼ. Ni cayúnicabe ca rusihuínnini qué runi crédicabe pa nuu Jiobá (Sal. 14:1).
14, 15. 1) Ximodo runi mandar Reinu stiʼ Dios laanu yanna, ne xi naquiiñeʼ guinabadiidxanu laca laanu pur nga. 2) Xi rusihuinni gastiʼ nin sti gobiernu casi Reinu stiʼ Dios.
14 Ndaaniʼ Guidxilayú riʼ nuuruʼ xcaadxi de ca biʼchiʼ ne bizaʼnaʼ Jesús ni bibí pur espíritu santu. Ca binni de «Israel stiʼ Dios» riʼ nga cayúnicaʼ dxiiñaʼ bisaanané Cristu laacaʼ (2 Cor. 5:20). Guirácabe nga nácacabe mozo ni nuu xpiaaniʼ ne ni runi jneza. Ne bidii Cristu laacabe dxiiñaʼ de gápacabe ne gusiidicabe laca laacabe casi xpinni Cristu ni gulí Dios pur espíritu santu. Laaca cayápacabe ne cusiidicabe ca millón de xpinni Cristu ni cabeza guibani sin gati ndaaniʼ ti Paraísu (Mat. 24:45-47; Apo. 7:9-15). Guiráʼ ca ndaayaʼ ni napa cani dxandíʼ runi adorar Jiobá rusihuínnicani riuuláʼdxibe modo cayuni mozo ca dxiiñaʼ.
15 Cada tobi de laanu galán guinabadiidxanu laca laanu: «Ñee runeʼ guiráʼ ca dxiiñaʼ ni naquiiñeʼ guneʼ lade ca binni ridagulisaa la? Ñee riecheʼ purtiʼ nuaa lade ca binni ni chiguibani ndaaniʼ guidxilayú ra chiguni mandar Reinu stiʼ Dios ne runeʼ xhiiñaʼ ni de guidubi ladxiduáʼ la? Ñee maʼ gudixheʼ iqueʼ guinieeʼ de Reinu ca biaʼ gándatiʼ la?». Guiranu naquiiñeʼ gúninu ni riníʼ Grupu ni Zaniruʼ ne gacanenu ca binnigola ni nuu ra ridagulisaanu. Zacá zusihuínninu racaláʼdxinu guni mandar Jiobá laanu (biindaʼ Hebreos 13:17). Ora rúninu ni nabe de guidubi ladxidoʼno la? riuʼnu tobi si, ribáninu nayecheʼ ne rizíʼdinu gúninu ni jneza, nga nga caadxi cosa ni qué liica rihuinni ndaaniʼ guidxilayú ni nuu lu naʼ Binidxabaʼ riʼ. Modo nabani ca xpinni Cristu riʼ rusisácacani Jiobá ne rusihuínnicani laasibe nga Rey ni jma jneza modo runi mandar.
Ora maʼ guni ganar gobiernu stiʼ Jiobá
16. Xi naquiiñeʼ guiníʼ ique cada binni.
16 Maʼ cadxiña dxi gaca chaahuiʼ guiráʼ ca guendanagana ni bizulú dede dxi bicaalú Binidxabaʼ Dios ndaaniʼ jardín ni guyuu Edén que. Yanna nga tiempu para guiníʼ ique cada binni sicaríʼ: «Ñee zudieeʼ lugar guni mandar Jiobá naa la? o zuneʼ ni na ca gobiernu nuu ndaaniʼ guidxilayú riʼ». Laanu, ca xpinni Cristu, nápanu ti dxiiñaʼ nabé risaca: gacanenu ca binni nadóʼ ca gánnacaʼ xii nga ni jma jneza gúnicaʼ. Mayaca gaca guerra ni láʼ Armagedón, racá nga gunitilú Reinu ca guiráʼ gobiernu nuu yanna (Dan. 2:44; Apo. 16:16). Para dxi ca maʼ qué ziuuruʼ modo runi mandar ca políticu ni nuu lu naʼ Binidxabaʼ, ne Dios si nga guni mandar lu guidubi naca Guidxilayú. Zahuinni dxíchica gobiernu si stiʼ Dios nga ni jma jneza modo runi mandar (biindaʼ Apocalipsis 21:3-5).
17. Ximodo zanda ganna ca binni nadóʼ ca gunáʼ nga gobiernu ni jma jneza modo runi mandar.
17 Ca binni ni caʼruʼ quixhe ique guni mandar Jiobá laacaʼ naquiiñeʼ guni orarcaʼ ne guiníʼ íquecaʼ guiráʼ ca ndaayaʼ guedané gobiernu ca. Ca políticu ca qué huayanda diʼ cueecaʼ guiráʼ ca terrorista ne ca binni ni rucheené ley. Peru Reinu ca huaxa zunitilú guiráʼ binni runi cosa malu (Sal. 37:1, 2, 9). Ca xaíque stiʼ ca guidxi nuu yanna riʼ dxi gueelaʼ cadíndecaʼ, peru Dios zabee «guendaridinde stiʼ ca guidxi ca dede ra jma zitu de guidxilayú» (Sal. 46:9). Dede zacaneni para guibani binni ne maniʼ tobi si, cásica gúcani dxiqué (Isa. 11:6-9). Laaca zabeeni chupa de ca cosa ni qué ganda cuee ca gobiernu ca: guendapobre ne guendarindaana (Isa. 65:21). Ne zuni Reinu ca ti cosa ni qué huayanda guni ca políticu ni jma nuu xpiaaniʼ: zacaneni binni guibani nazaaca, zabeeni guendarioʼxhoʼ ne guendaguti (Job 33:25; Isa. 35:5, 6). Peru cadi ngasi, laaca ziasa ca gueʼtuʼ ca para guibánicaʼ ndaaniʼ Guidxilayú riʼ ora maʼ nácani ti paraísu (Luc. 23:43; Hech. 24:15).
18. Ximodo rusihuínninu gobiernu si stiʼ Dios nga ni jma jneza modo runi mandar.
18 Casi maʼ bidúʼyanu ca, zuni chaahuiʼ Reinu stiʼ Dios guiráʼ ca cosa malu bizulú dede dxi bicaa Binidxabaʼ Adán ne Eva gucheenecaʼ Dios. Maʼ ziné Binidxabaʼ xhoopaʼ mil iza de cayuniná binni, peru lu ti mil iza si zuni chaahuiʼ Jiobá guiráʼ ni ne zaquiiñebe Jesús para gúnibe ni. ¡Guiráʼ cani maʼ bizéʼtenu ca nga ni rusihuinni gobiernu si stiʼ Dios nga ni jma jneza modo runi mandar! Cumu nácanu testigu stiʼ Jiobá la? nga rusihuinni tuu nga runi mandar laanu. Nga runi, naquiiñeʼ gusihuínninu guiráʼ dxi, ne guiráʼ ora, nuunu nayecheʼ purtiʼ runi adorarnu laabe, runi mandarbe laanu ne nácanu testigu stibe. ¡Cadi gusaana de gábinu guiráʼ binni ni chuulaʼdxiʼ gucaadiaga laanu gástiruʼ sti gobiernu cásica stiʼ Dios!
Xi rusiidiʼ ca versículo riʼ laanu de gobiernu stiʼ Dios.
• Deuteronomio 7:7, 8
[Guendarinabadiidxaʼ stiʼ párrafo]
[Ca dibuju/foto ni zeeda lu yaza 29]
Qué huayuu dxi gusaana Jiobá de guni mandar
[Dibuju/foto ni zeeda lu yaza 31]
Ora rudiʼnu lugar guni mandar gobiernu stiʼ Jiobá laanu la? riuʼnu tobi si ne guiráʼ ca xpinni Dios ni nuu lu Guidxilayú