Gamita ang Matag Adlaw sa Imong Kinabuhi sa Paghimaya sa Diyos

“SA BUNTAG ipadungog kanako ang imong mahigugmaong-kalulot,” miampo ang salmistang si David kang Jehova. “Ipahibalo kanako ang dalan nga akong pagalaktan.” (Sal. 143:8) Sa imong pagbangon ug pagpasalamat kang Jehova sa usa ka bag-ong adlaw, ikaw ba, sama kang David, naghangyo kang Jehova sa paggiya kanimo sa paghimog desisyon ug paglihok nga maalamon? Sa walay duhaduha, imo kanang gihimo.

Ingong dedikadong mga alagad ni Jehova, ‘kita man nagakaon o nagainom o nagabuhat sa bisan unsa,’ kita maningkamot nga ‘himoon ang tanang butang alang sa kahimayaan sa Diyos.’ (1 Cor. 10:31) Kita nahibalo nga ang atong pagkinabuhi sa matag adlaw mahimong magpasidungog o magpasipala kang Jehova. Nasayod usab kita nga ang Pulong sa Diyos nag-ingon nga si Satanas nag-akusar sa mga igsoon ni Kristo—ug sa pagkatinuod, sa tanang alagad sa Diyos sa yuta—“adlaw ug gabii.” (Pin. 12:10) Busa, kita determinado nga motaganag tubag sa bakak nga mga akusasyon ni Satanas ug lipayon ang kasingkasing ni Jehova pinaagi sa paghatag ug sagradong pag-alagad sa atong langitnong Amahan “adlaw ug gabii.”—Pin. 7:15; Prov. 27:11.

Atong hisgotan sa makadiyot ang duha ka hinungdanong paagi nga atong magamit ang matag adlaw sa atong kinabuhi sa paghimaya sa Diyos. Ang una naglangkit sa paghimog hustong mga prioridad ug ang ikaduha, sa pagpakitag konsiderasyon sa uban.

Pagtuman sa Atong Gisaad

Pinaagi sa pagpahinungod sa atong kaugalingon kang Jehova, atong gipakita ang atong tiunay nga tinguha nga alagaron siya. Kita misaad usab kang Jehova nga molakaw sa iyang mga dalan sa “adlaw-adlaw”—oo, hangtod sa kahangtoran. (Sal. 61:5, 8) Nan, sa unsang paagi atong matuman ang maong saad? Sa unsang paagi atong mapasundayag ang kinasingkasing nga gugma kang Jehova sa matag adlaw?

Tin-awng gipaila sa Pulong sa Diyos ang mga responsibilidad nga gidahom ni Jehova nga atong tumanon. (Deut. 10:12, 13) Ang pipila niana makita diha sa kahon nga nag-ulohang  “Hinatag-sa-Diyos nga mga Responsibilidad,” sa panid 22. Kining tanan hinatag sa Diyos ug busa hinungdanon. Unsaon nato pagtino kon unsay unahon sa dihang duha o kapin pang responsibilidad ang kinahanglang atimanon sa samang panahon?

Atong hatagag prioridad ang atong sagradong pag-alagad, nga naglakip sa pagtuon sa Bibliya, pag-ampo, pagtambong sa mga tigom, ug pagsangyaw. (Mat. 6:33; Juan 4:34; 1 Ped. 2:9) Bisan pa niana, dili mahimo nga lunlon espirituwal nga mga butang na lang ang atong buhaton sa tibuok adlaw. Ang pagpanarbaho, pag-eskuyla, ug mga buluhaton sa balay kinahanglang atimanon usab. Hinunoa, atong paningkamotan nga ang atong sekular nga trabaho ug uban pang kalihokan dili makabalda sa atong sagradong pag-alagad, sama sa pagtambong sa mga tigom. Pananglitan, sa dihang magplanong mobakasyon, atong tinoon nga dili nato masayloan ang duaw sa magtatan-aw sa sirkito, espesyal nga asembliya, sirkitong asembliya, o distritong kombensiyon. Usahay, mahimo natong dunganon ang pipila ka responsibilidad. Pananglitan, mahimong mag-uban ang pamilya sa paghinlo sa Kingdom Hall o gamiton ang tingpaniudto sa pagsangyaw sa mga kauban sa trabaho o eskolmet. Sa pagkatinuod, sa dihang kita kinahanglang mohimog desisyon—sama sa pagpangitag trabaho, pagpilig kurso o mga higala—buot nato nga maimpluwensiyahan ang atong desisyon sa labing importanteng butang sa atong  kinabuhi—ang pagsimba kang Jehova, ang atong mahigugmaong Amahan.—Eccl. 12:13.

Pakitaig Konsiderasyon ang Uban

Gusto ni Jehova nga kita magpakitag kahingawa sa uban ug mobuhat ug maayo kanila. Sa laing bahin, si Satanas nagpasiugda sa kahakog. Ang iyang kalibotan puno sa mga tawo nga ‘mahigugmaon sa kaugalingon’ ug ‘mahigugmaon sa kalipayan’ maingon man usab niadtong ‘nagapugas alang sa unod.’ (2 Tim. 3:1-5; Gal. 6:8) Daghan ang wala kaayo maghunahuna sa epekto sa ilang mga binuhatan ngadto sa uban. Kaylap kaayo “ang mga buhat sa unod.”—Gal. 5:19-21.

Pagkalahi gayod sa tinamdan niadtong napalihok sa balaang espiritu ni Jehova, kinsa nagpakitag gugma, kalulot, ug pagkamaayo sa ilang pagpakiglabot sa uban! (Gal. 5:22) Ang Pulong sa Diyos nag-awhag kanato sa pag-una sa panginahanglan sa uban. Busa, kita magpakitag interes sa usag usa, apan mag-amping nga dili manghilabot sa personal nga mga butang. (1 Cor. 10:24, 33; Filip. 2:3, 4; 1 Ped. 4:15) Kita ilabinang magpakitag konsiderasyon sa atong mga isigkamagtutuo. Apan, maningkamot usab kita sa pagtabang sa mga dili-magtutuo. (Gal. 6:10) Nganong dili mangitag kahigayonan karong adlawa sa pagpakitag kaayo sa uban?—Tan-awa ang kahong  “Pakitai Silag Konsiderasyon,” sa panid 23.

Ang pagpakitag konsiderasyon dili lamang himoon  sa usa ka linaing panahon o situwasyon. (Gal. 6:2; Efe. 5:2; 1 Tes. 4:9, 10) Kondili, matag adlaw magmahunahunaon kita sa kahimtang sa uban ug magmaandam sa pagtabang kanila kon gikinahanglan, bisan pa tingalig dili kana kombenyente kanato. Gusto natong magmahinatagon sa bisan unsa nga atong nabatonan—atong panahon, materyal nga mga butang, kasinatian, ug kaalam. Gipasaligan kita ni Jehova nga kon kita manggihatagon sa uban, siya magmanggihatagon usab kanato.—Prov. 11:25; Luc. 6:38.

Sagradong Pag-alagad “Adlaw ug Gabii”

Posible ba gayod ang paghatag ug sagradong pag-alagad kang Jehova “adlaw ug gabii”? Oo, kon kita regular ug makugihon sa tanang bahin sa atong pagsimba. (Buh. 20:31) Magamit nato ang atong kinabuhi diha sa sagradong pag-alagad pinaagi sa pagbasa ug pagpamalandong sa Pulong sa Diyos matag adlaw, pag-ampo nga walay-hunong, pagtambong kanunay sa mga tigom, ug sa pagpahimulos sa tanang kahigayonan nga makahatag ug pamatuod.—Sal. 1:2; Luc. 2:37; Buh. 4:20; 1 Tes. 3:10; 5:17.

Kita ba nagahatag ug sagradong pag-alagad kang Jehova? Kon mao, ang atong tinguha sa pagpahimuot kaniya ug pagtaganag tubag sa mga akusasyon ni Satanas madayag diha sa tanang bahin sa atong adlaw-adlawng pagkinabuhi. Atong paningkamotan nga himayaon si Jehova diha sa tanan natong ginahimo ug sa bisan unsang kahimtang. Atong tugotan ang iyang mga prinsipyo sa paggiya sa atong sinultihan, panggawi, ug sa mga desisyon nga atong himoon. Atong ikapakita ang atong pagpabili sa iyang mahigugmaong pag-atiman ug pagsuportar pinaagi sa bug-os nga pagsalig kaniya ug paggamit sa atong kusog sa pag-alagad kaniya. Ug atong dawaton ang iyang tambag ug disiplina sa dihang, tungod sa atong pagkadili-hingpit, kita dili makaabot sa iyang mga sukdanan.—Sal. 32:5; 119:97; Prov. 3:25, 26; Col. 3:17; Heb. 6:11, 12.

Magpadayon kita sa pagkinabuhi matag adlaw alang sa kahimayaan sa Diyos. Sa pagbuhat niana, kita makakaplag ug kahayahay alang sa atong mga kalag ug makatagamtam sa mahigugmaong pag-atiman sa atong langitnong Amahan hangtod sa kahangtoran.—Mat. 11:29; Pin. 7:16, 17.

[Kahon/Mga hulagway sa panid 22]

 Hinatag-sa-Diyos nga mga Responsibilidad

• Pag-ampo kanunay.—Roma 12:12.

• Pagbasa ug pagtuon sa Bibliya, ug pagpadapat niana.—Sal. 1:2; 1 Tim. 4:15.

• Pagsimba kang Jehova diha sa kongregasyon.—Sal. 35:18; Heb. 10:24, 25.

• Pagtagana sa materyal, espirituwal, ug emosyonal nga panginahanglan sa atong pamilya.—1 Tim. 5:8.

• Pagsangyaw sa maayong balita sa Gingharian ug paghimog mga tinun-an.—Mat. 24:14; 28:19, 20.

• Pag-atiman sa pisikal, espirituwal, ug emosyonal nga kahimsog, nga naglakip sa paggahin ug panahon alang sa mapuslanong paglingawlingaw.—Mar. 6:31; 2 Cor. 7:1; 1 Tim. 4:8, 16.

• Pag-atiman sa mga responsibilidad sa kongregasyon.—Buh. 20:28; 1 Tim. 3:1.

• Pag-atiman sa atong balay ug Kingdom Hall.—1 Cor. 10:32.

[Kahon/Hulagway sa panid 23]

 Pakitai Silag Konsiderasyon

• Usa ka tigulang nga igsoon.—Lev. 19:32.

• Usa nga nag-antos sa pisikal o emosyonal nga balatian.—Prov. 14:21.

• Usa ka membro sa kongregasyon nga nanginahanglag tabang.—Roma 12:13.

• Usa ka membro sa pamilya.—1 Tim. 5:4, 8.

• Usa ka isigkamagtutuo nga namatyag kapikas.—1 Tim. 5:9.

• Usa ka kugihang ansiyano sa kongregasyon.—1 Tes. 5:12, 13; 1 Tim. 5:17.