Nọ Abasi Ubọn̄ Kpukpru Usen

EDIDEM DAVID ọkọbọn̄ akam ọnọ Jehovah ete: “Nam n̄kop ima fo ke usenubọk: . . . wụt mi usụn̄ eke n̄kpasan̄ade.” (Ps. 143:8) Ke ini esibọn̄de akam usenubọk ọkọm Jehovah ke ndinam esiere eyo, ndi emesinam nte David, eben̄e Jehovah ete an̄wam imọ inam nti ubiere ye se ifọnde? Imọfiọk ke emesinam.

‘Edide idia n̄kpọ m̀mê in̄wọn̄ n̄kpọ m̀mê inam n̄kpọ ekededi,’ imesidomo ‘ndinam kpukpru n̄kpọ nnọ Abasi ubọn̄’ sia idide mme asan̄autom esie oro ẹma ẹkeyak idem ẹnọ enye. (1 Cor. 10:31) Imọfiọk ke nte idude uwem ke usen ke usen ekeme ndinọ Jehovah ubọn̄ mîdịghe esuene enye. Imọfiọk n̄ko ke Ikọ Abasi ọdọhọ ke Satan ke odori nditọete Christ ye kpukpru mme asan̄autom Abasi emi ẹdude ke isọn̄ ikọ “uwemeyo ye okoneyo.” (Edi. 12:10) Ntre, nnyịn n̄ko imebiere ndinam n̄kpọ Jehovah “uwemeyo ye okoneyo” man inam esịt esie adat inyụn̄ iwụt ke kpukpru se Satan odoride nnyịn ẹdi nsu.—Edi. 7:15; N̄ke 27:11.

Ẹyak ineme ibio ibio iban̄a akpan usụn̄ iba emi ikemede ndinam se inọde Abasi ubọn̄ kpukpru usen. Akpa edi ndinam se inen̄erede idi akpan n̄kpọ ke uwem. Ọyọhọ iba edi ndikere mban̄a mbon en̄wen.

Du Uwem nte Owo Emi Ama Akayak Idem Ọnọ Abasi

Ndiyak idem nnọ Jehovah okowụt ke imenen̄ede iyom ndinam n̄kpọ esie. Ima inyụn̄ in̄wọn̄ọ ke iyanam n̄kpọ esie “kpukpru usen,” m̀mê ke nsinsi. (Ps. 61:5, 8) Didie ke ikeme ndidu uwem nte mbon emi ẹma ẹkeyak idem ẹnọ Abasi? Didie n̄ko ke ikeme ndiwụt Jehovah ke imama enye ke ofụri esịt kpukpru usen?

N̄wed Abasi asiak mme n̄kpọ emi Jehovah oyomde inam. (Deut. 10:12, 13) Oyokụt ediwak mmọ ke ekebe oro,  “Se Abasi Oyomde Nnyịn Inam,” ke page 22. Ana inam kpukpru se ẹbatde emi sia edide Abasi ọdọhọ inam. Edi edieke iba m̀mê ita ke otu emi ẹdide ẹdiduọ ini kiet, idisan̄a didie ifiọk m̀mê ewe ke ikpebem iso anam?

Nnyịn isibem iso inam n̄kpọ Abasi, emi esịnede ndikpep Bible, ndibọn̄ akam, ndidụk mme mbono esop, ye ndika ukwọrọikọ. (Matt. 6:33; John 4:34; 1 Pet. 2:9) Edi emi iwọrọke ndida ofụri hour 24 nnam n̄kpọ Abasi kpọt. Ana inam utom, ika n̄wed, inyụn̄ inam mme n̄kpọ eken n̄ko. Kpa ye oro, ana inam ndutịm ke usụn̄ emi mîdiyakke n̄kpọ ndomokiet ọbiọn̄ọ ndutịm utuakibuot nnyịn, nte edidụk mme mbono esop. Ke uwụtn̄kpọ, ke ini iyomde ndika nduọkodudu, ikpanaha inam utọ ndutịm oro ke urua n̄kọri, ye ke ini mbono, edide edi usen akpan mbono, m̀mê mbono circuit, m̀mê eke district. Enyene mme ini emi ikemede ndidian n̄kpọ iba m̀mê ita nnam ini kiet. Ke uwụtn̄kpọ, imekeme ndida utom edinam Ufọkmbono Obio Ubọn̄ asana nte utom ubon nnyịn, mîdịghe ida ini nduọkodudu uwemeyo ikwọrọ ikọ inọ mbon itieutom nnyịn, ke ini nditọ nnyịn ẹdade ini mbre udia mmọ ẹkwọrọ ikọ ẹnọ nditọ ufọkn̄wed mmọ. N̄kpọ ekededi oro iyomde ndinam, edide utom, ndika n̄wed, m̀mê ndidi ufan owo, ikpanaha iyak n̄kpọ ndomokiet  ọbiọn̄ọ nnyịn ndituak ibuot nnọ edima Ete nnyịn Jehovah, sia idụhe se idide akpan n̄kpọ nte n̄kpọ Abasi.—Eccl. 12:13.

Kere Ban̄a Mbon En̄wen

Jehovah oyom nnyịn ikere iban̄a mbon en̄wen inyụn̄ inam nti n̄kpọ inọ mmọ. Edi Satan oyom ikere iban̄a idem nnyịn kpọt. “Mme ama idem,” ‘mme ama inemesịt,’ ye mbon emi ‘ẹtọde ẹnọ obụkidem,’ ẹyọyọhọ ererimbot Satan emi. (2 Tim. 3:1-5; Gal. 6:8) Ediwak owo isikereke nte edinam mmọ editụkde mbon en̄wen. Idụhe ebiet emi mûdukwe mme owo ẹnamde “utom obụkidem.”—Gal. 5:19-21.

Ata mme Christian itiehe ntre sia edisana spirit Jehovah anam mmọ ẹnyene ima, ẹfọn ido, ẹnyụn̄ ẹnam n̄kpọ ye mbon en̄wen ke eti usụn̄. (Gal. 5:22) Ikọ Abasi ọdọhọ ikam ibem iso ikere iban̄a ufọn mbon en̄wen. Ke ntre, imesinam n̄kpọ ndiwụt ke imenen̄ede ikere iban̄a mbon en̄wen, okposụkedi emi mînọhọ nnyịn isọn̄ ndinọhọ ke mbubehe mmọ. (1 Cor. 10:24, 33; Phil. 2:3, 4; 1 Pet. 4:15) Kpa ye oro isinen̄erede in̄wam nditọete nnyịn, imesinyụn̄ in̄wam mbonan̄wa n̄ko.  (Gal. 6:10) Yom usụn̄ fọn ido ye owo ekededi emi edisobode mfịn.—Se ekebe oro  “N̄wam,” ke page emi.

Akpana isikere iban̄a mbon en̄wen kpukpru ini. (Gal. 6:2; Eph. 5:2; 1 Thess. 4:9, 10) Kpukpru usen, imesikere iban̄a se isitịbede inọ mme owo inyụn̄ idomo ndin̄wam mmọ ekpededi oro oyom n̄waidem. Iyom ndinọ mme owo se ededi oro inyenede, edide ini, inyene, ye ifiọk nnyịn. Jehovah ọdọhọ ke edieke nnyịn inọde owo n̄kpọ, ke imọ iyọnọ nnyịn n̄kpọ n̄ko.—N̄ke 11:25; Luke 6:38.

Ndinam N̄kpọ Abasi “Uwemeyo ye Okoneyo”

Ndi owo ekeme ndinam n̄kpọ Jehovah “uwemeyo ye okoneyo”? Ih ekeme, edieke enye esịnde ifịk anam kpukpru se Abasi oyomde mme andituak ibuot nnọ enye ẹnam. (Utom 20:31) Emi esịne ndikot Bible kpukpru ini nnyụn̄ ntie n̄kere se ikotde, ndibọn̄ akam kpukpru ini, ndisịn ukeme ndụk kpukpru mbono esop, nnyụn̄ ndomo ndikwọrọ ikọ nnọ kpukpru owo oro isobode.—Ps. 1:2; Luke 2:37; Utom 4:20; 1 Thess. 3:10; 5:17.

Ndi imesinam n̄kpọ Jehovah ntre? Edi ntre, iyodu uwem kpukpru usen ke usụn̄ oro adatde Jehovah esịt onyụn̄ owụtde ke Satan edi osu nsu. Imesidomo ndinọ Jehovah ubọn̄ ke kpukpru n̄kpọ ye ke idaha ekededi. Isida edumbet esie ibiere nte itịn̄de ikọ, idude uwem, ye se ibierede ndinam. Ndinyene ọyọhọ mbuọtidem ke Jehovah nnyụn̄ nnen̄ede nsịn ukeme nnam n̄kpọ esie owụt ke imadara ima ye un̄wam esie. Ndien ke ini unana mfọnmma anamde inam ndudue, imesidara ntụnọ ye item esie.—Ps. 32:5; 119:97; N̄ke 3:25, 26; Col. 3:17; Heb. 6:11, 12.

Ẹyak ika iso inọ Abasi ubọn̄ kpukpru usen. Edieke inamde emi, Jehovah eyese aban̄a nnyịn ke nsinsi, iyonyụn̄ ikụt nduọkodudu inọ ukpọn̄ nnyịn.—Matt. 11:29; Edi. 7:16, 17.

[Ekebe/Ndise ke page 22]

 Se Abasi Oyomde Nnyịn Inam

• Bọn̄ akam kpukpru ini.—Rome 12:12.

• Kot nyụn̄ kpep Bible, nyụn̄ nam se ekpepde.—Ps. 1:2; 1 Tim. 4:15.

• Dụk mbono esop.—Ps. 35:18; Heb. 10:24, 25.

• Se ban̄a ubon fo ke n̄kan̄ eke obụk ye ke n̄kan eke spirit.—1 Tim. 5:8.

• Kwọrọ eti mbụk Obio Ubọn̄ Abasi nyụn̄ nam mbet.—Matt. 24:14; 28:19, 20.

• Se ban̄a idem fo ke n̄kan̄ eke spirit ye n̄kan̄ eke obụk, emi esịne ndisio ini nda ndia uwem esisịt ke eti usụn̄.—Mark 6:31; 2 Cor. 7:1; 1 Tim. 4:8, 16.

• Nam se ẹnọde fi ke esop. —Utom 20:28; 1 Tim. 3:1.

• Nam ufọk fo asana, nyụn̄ sitiene nam Ufọkmbono Obio Ubọn̄ asana.—1 Cor. 10:32.

[Ekebe/Ndise ke page 23]

 N̄wam

• Eyenete oro ama ọkọsọn̄.—Lev. 19:32.

• Owo emi ọdọn̄ọde, m̀mê emi n̄kpọ afịnade.—N̄ke 14:21, NW.

• Eyenete emi ananade n̄kpọ emi afo ekemede ndinọ.—Rome 12:13.

• Mbon ufọk mbufo.—1 Tim. 5:4, 8.

• Eyenete emi edide ebeakpa m̀mê n̄wan-akpa.—1 Tim. 5:9.

• Ebiowo emi anamde utom ọkpọsọn̄ ke esop mbufo.—1 Thess. 5:12, 13; 1 Tim. 5:17.