Ñamombaʼeguasúkena Ñandejárape opa mbaʼépe

RRÉI David oñemboʼe asy heʼívo: ‘Ára koʼẽre tañandu ne mborayhu. Ehechauka chéve mbaʼéichapa aikovaʼerã’ (Sal. 143:8). Oiméne nde repuʼãvo káda pyhareve reagradese Jehovápe omeʼẽ haguére ndéve nde rekove. Ha David ojapo haguéicha rejerure avei chupe tanepytyvõ redesidi porã ha rejapo hag̃ua opa mbaʼe hekopete.

La Biblia heʼi ñandéve: ‘Pekarúramo, térã peyʼúramo, térã oimeraẽ mbaʼe pejapóva, pejapo pemombaʼeguasu hag̃ua Ñandejárape’ (1 Cor. 10:​31, BNP). Ñande ningo jahechakuaa opa mbaʼe jajapóva rupive ikatuha ñamombaʼeguasu térã ñamotĩ Jehovápe. La Biblia omombeʼu avei Satanás otakyha “ára ha pyhare” Jesucristo ermanokuérare ha opavave oservívare Ñandejárape ko yvy ape ári (Rev. 12:10). Upévare jajedesidíma ñamombeʼutaha opavavépe Satanás ijapuha ha Jehovápe ñambovyʼataha ñamombaʼeguasúvo chupe “ára ha pyhare” (Rev. 7:15; Pro. 27:11).

Koʼág̃a jahecháta mokõi mbaʼe ikatúva jajapo ñamombaʼeguasu hag̃ua Ñandejárape koʼẽ koʼẽre. Primero jahecháta mbaʼépa ñamotenondevaʼerã, segundo katu mbaʼéichapa jahechauka jajepyʼapyha ñande rapichakuérare.

Mbaʼépa ñamotenonde ha mbaʼérepa ñañemeʼẽraʼe Ñandejárape

Ñañemeʼẽrõ guare Jehovápe ñande jaʼeñaína jaserviseha chupe. Ñapromete avei “opa árape” jaikotaha haʼe oipotaháicha, jaikove aja entéro voi (Sal. 61:​5, 8). Upéicharõ, mbaʼépa jajapoñaína ñakumpli hag̃ua upe promésa? Mbaʼéichapa káda día jahechauka jahayhuha Jehovápe ñande pyʼaite guive?

La Bíbliape ningo ohechauka porã mbaʼépa Jehová ohaʼãrõ ñandehegui (Deu. 10:​12, 13). Pe rrekuádro oĩva páhina 22-pe, heʼihápe “Umi mbaʼe Ñandejára oipotáva jajapo” ohechauka umi mbaʼe Jehová oipotáva jajapo ha enterovénte voi iñimportánte. Upéicharõ, mbaʼéichapa ikatu jaikuaa mbaʼépa ñamotenondéta oĩ jave mokõi térã mbohapy mbaʼe iñimportánteva jajapovaʼerã?

Ñande kristiáno ningo ñamotenonde Ñandejára servísio, umíva apytépe jastudia la Biblia, ñañemboʼe, ndajafaltái rreunionhápe ha japredika meme (Mat. 6:33; Juan 4:34; 1 Ped. 2:9). Péro jaikuaa ndaikatumoʼãiha umíva añónte jajapo. Ñande ningo ñambaʼapovaʼerã, jaha eskuélape ha heta ñane rembiapo ñande rogapýpe. Upéicharõ jepe ñañehaʼãmbaite ñamohenda porã ñane rembiapoita ani hag̃ua jafalta rreunionhápe ha jajapopa hag̃ua ambue mbaʼe Jehová servísiope. Pór ehémplo, jahaséramo de paséo jahechavaʼerã ani hag̃ua jajavy pe visíta de superintendénte de sirkuíto, ñande aty guasu un día, dos día ha tres diaguáva. Sapyʼánte ningo ikatu jaaprovecha jajapo hag̃ua mokõi tembiapo. Pór ehémplo ikatu jaha ñande rogayguakuéra ndive ñamopotĩ Salón del Reino ha jahasa porã oñondivepa. Ikatu avei japytuʼuha órape ñande travahohápe térã eskuélape japredika ñane kompañerokuérape. Upéicha avei jadesidíta jave mbaʼépepa ñambaʼapóta, mbaʼépa jastudiáta térã jaiporavóta jave ñane amigorã tekotevẽ ñamotenonde  Jehová servísio ha jajapo opa mbaʼe haʼe oipotahaichaite (Ecl. 12:13).

Jajepyʼapýkena ñande rapichakuérare

Jehová ningo oipota jajepyʼapy ñande rapichakuérare ha ñaipytyvõ chupekuéra. Satanás katu oipota ñapensa ñandejehénte. Ko múndo añáme ningo henyhẽ umi haʼenteséva, oikóva vyʼarã rapykuéri ha oikóva hete rembipota rapykuéri (2 Tim. 3:​1-5; Gál. 6:8). Hetápe noimportái umi mbaʼe ojapóva ombohasa asýramo jepe hapichápe. Upéva ningo opárupinte voi jahecha (Gál. 5:​19-21).

Umi ohejáva Jehová espíritu oisãmbyhy chupekuéra katu pyʼaporã ha mborayhúpe otrata hapichakuérape. Ajépa tuichaite la diferénsia! (Gál. 5:22.) La Biblia heʼi ñandéve ñamotenonde hag̃ua umi mbaʼe ñande rapichakuérape oipyʼapýva. Upévare jajepyʼapy ojuehe, péro ñañatende ani hag̃ua ñañentremete ogapy ahénope (1 Cor. 10:​24, 33; Fili. 2:​3, 4; 1 Ped. 4:15). Ñande ningo ñañehaʼã ñaipytyvõ ñane ermanokuérape umi mbaʼe oikotevẽvape, péro ñañehaʼã avei ñaipytyvõ umi ndoservírivape Jehovápe (Gál. 6:10). Koʼág̃a voi ningo ikatu ñanembaʼeporã ñande rapichándi. (Ikatu rehecha pe rrekuádro oĩva páhina 23-pe heʼihápe ‘Mávandipa ñanembaʼeporãvaʼerã’?)

 Nañahaʼarõivaʼerã oiko raẽ peteĩ mbaʼe ni peteĩ ára ñanembaʼeporã hag̃ua ñande rapichakuéra ndive (Gál. 6:2; Efe. 5:2; 1 Tes. 4:​9, 10). Upéva rangue ñañehaʼãvaʼerã akóinte jahecha mbaʼépa ohasa ñande rapichakuéra ha mbaʼépepa ikatu ñaipytyvõ chupekuéra, jajesakrifikátaramo jepe upearã. Jaiporuvaʼerã avei ñane tiémpo, umi mbaʼe jarekóva ha ñandekatupyry ñaporopytyvõ hag̃ua. Ha ñanemanduʼavaʼerã Jehová ipojerataha ñanendive, ñande avei ñandepojeráramo ñande rapichakuéra ndive (Pro. 11:25; Luc. 6:38).

Jaservíkena Jehovápe ‘ára ha pyhare’

Jahecháma la Biblia ñanemokyreʼỹha jaservi hag̃ua Jehovápe ‘ára ha pyhare’. Péro ikatu piko jajapo upéva? Ikatu, ñamotenondéramo Jehová servísio ñande rekovépe ha jajapóvo opa mbaʼe Haʼe ojeruréva ñandéve (Hech. 20:31). Upéva heʼise jaleevaʼerãha káda día la Biblia ha jajepyʼamongeta hese, ñañemboʼe meme, ndajafaltái rreunionhápe ha ijahápe ñandéve jaaprovechavaʼerãha japredika hag̃ua (Sal. 1:2; Luc. 2:37; Hech. 4:20; 1 Tes. 3:10; 5:17).

Jaservipañaína upéicha Jehovápe? Oimérõ upéicha, opa mbaʼe jaʼe, ñapensa ha jajapóvape jahechaukáta ñambovyʼaseha Jehovápe ha pyʼaguasúpe jaʼéta Satanás ijapuha. Upéicharõ ñañehaʼãmbaitékena ñamombaʼeguasu Jehovápe opa mbaʼe jajapóva ha jahasáva rupive. Ha jaheja Jehovápe tohechauka ñandéve Iñeʼẽ rupive mbaʼéichapa jaikovaʼerã ha mbaʼéichapa jajotratavaʼerã. Jaheja avei chupe tañanepytyvõ jadesidi porã hag̃ua. Jaagradesékena Ñandejárape ñanepytyvõ ha oñangareko haguére ñanderehe, jajerovia hese ha ñañemeʼẽmbaite iservísiope. Ñahendúkena avei umi konsého Jehová omeʼẽva ñandéve ha jahejákena chupe tañandekorrehi jajavy jave ñaneimperfékto rupi (Sal. 32:5; 119:97; Pro. 3:​25, 26; Col. 3:17; Heb. 6:​11, 12).

Opa mbaʼe jajapóvapekena ñamombaʼeguasu Ñandejárape. Upéicha ñandepiroʼýta ha jaikóta vyʼápe oñangareko rupi ñanderehe Jehová pe ñande Ru ñanderayhuetéva (Mat. 11:29; Rev. 7:​16, 17).

[Taʼanga ha rrekuádro oĩva páhina 22-pe]

Umi mbaʼe Ñandejára oipotáva jajapo

• Pyʼỹi ñañemboʼe (Rom. 12:12).

• Jalee la Biblia, ñahesaʼỹijo ha jajapo umi mbaʼe ñaaprendéva (Sal. 1:2; 1 Tim. 4:15).

• Ñamombaʼeguasu Jehovápe kongregasiónpe (Sal. 35:18; Heb. 10:​24, 25).

• Ñamoĩ ñane famíliape opa mbaʼe oikotevẽva (1 Tim. 5:8).

• Ñamombeʼu pe marandu porã ha ñaipytyvõ ñande rapichápe oiko hag̃ua chugui Jesús remimboʼe (Mat. 24:14; 28:​19, 20).

• Ñañangareko ñandejehe ñaneresãi hag̃ua, ñande jerovia imbarete ha ñañeñandu porã hag̃ua. Upearã jaiporavo porã vaʼerã avei ñande vyʼarã (Mar. 6:31; 2 Cor. 7:1; 1 Tim. 4:​8, 16).

• Jajapo porã ñane rembiapo kongregasionpegua (Hech. 20:28; 1 Tim. 3:1).

• Ñañangareko ha ñamopotĩ ñande róga ha Salón del Reino (1 Cor. 10:32).

[Taʼanga ha rrekuádro oĩva páhina 23-pe]

Mávandipa ñanembaʼeporãvaʼerã?

• Umi ijedámavandi oĩva kongregasiónpe (Lev. 19:32).

• Umi hasýva ha umi ndovyʼavéiva ndive (Pro. 14:21).

• Umi ermáno oikotevẽ asýva ndive ñaipytyvõ chupekuéra (Rom. 12:13).

• Umi ñande rogaygua ndive (1 Tim. 5:​4, 8).

• Umi ñane ermáno térã ermána viúdava ndive (1 Tim. 5:9).

• Peteĩ ansiáno ikatupyrýva ndive oĩva ñane kongregasiónpe (1 Tes. 5:​12, 13; 1 Tim. 5:17).