Nọ Yí Azán Dopodopo Zan Na Gigo Jiwheyẹwhe Tọn

PSLAM-KÀNTỌ Davidi hodẹ̀ hlan Jehovah dọmọ: “Hẹn mi sè dagbewanyi towe to afọnnu; . . . hẹn mi yọ́n aliho he ji yẹn na zinzọnlin gbọn.” (Ps. 143:8) Eyin a fọ́n to afọnnu bo dopẹna Jehovah dọ a mọ azán yọyọ devo, be a nọ vẹ̀ Jehovah nado deanana we to nudide towe lẹ mẹ podọ nado gọalọna we nado wà nuhe sọgbe dile Davidi wà do ya? Matin ayihaawe, a nọ wàmọ.

Taidi devizọnwatọ klandowiwe Jehovah tọn lẹ, “vlavo [mí] to dùdù kavi to nùnù kavi nudevo depope he [mí] to wiwà,” mí nọ tẹnpọn nado “wà onú lẹpo na gigo Jiwheyẹwhe tọn.” (1 Kọl. 10:31, NW) Mí yọnẹn dọ gbẹzan he zan mí te sọgan gbògbéna Jehovah kavi kọnmasin do yinkọ etọn go. Mí sọ flindọ Ohó Jiwheyẹwhe tọn dọ dọ Satani to whẹsadokọna mẹmẹsunnu Klisti tọn lẹ—podọ, na nugbo tọn, na devizọnwatọ Jiwheyẹwhe tọn he tin to aigba ji lẹpo—“to okle po ozán po.” (Osọ. 12:10) Enẹwutu, gbemima mítọn wẹ nado na gblọndo na whẹsadokọnamẹ agọ̀ Satani tọn lẹ bo hẹn homẹ Jehovah tọn hùn gbọn sinsẹ̀nzọn wiwe wiwà na Otọ́ olọn mẹ tọn mítọn “to okle po ozán po” dali.—Osọ. 7:15, NW; Howh. 27:11.

Mì gbọ mí ni gbadopọnna aliho titengbe awe delẹ he mẹ mí sọgan nọ yí azán dopodopo zan na gigo Jiwheyẹwhe tọn te to kleun mẹ. Tintan wẹ nado nọ ze nuhe jẹ lẹ do otẹn tintan mẹ, podọ awetọ wẹ nado nọ hò mẹdevo lẹ tọn pọ́n.

Gbẹninọ Sọgbe hẹ Opà Mítọn

To whenue mí klan míde do wiwe na Jehovah, mí do ojlo ahundopo tọn mítọn nado sẹ̀n ẹn hia. Mí sọ dopà na Jehovah dọ mí na nọ zinzọnlin to aliho etọn lẹ mẹ “egbesọegbesọ”—yèdọ kakadoi. (Ps. 61:5, 8) To whelọnu lo, nawẹ mí nọ nọgbẹ̀ sọgbe hẹ opà enẹ gbọn? Nawẹ mí nọ dohia egbesọegbesọ dọ mí yiwanna Jehovah sọn ahun mẹ wá gbọn?

Ohó Jiwheyẹwhe tọn do azọngban he Jehovah nọ donukun dọ mí ni hẹndi lẹ hia hezeheze. (Deut. 10:12, 13) Susu to yé mẹ yin sislẹ do apotin he tin to weda 22 ji, he hosọ etọn yin “Azọngban He Jiwheyẹwhe Dena Mí Lẹ.” Azọ́ndenamẹ ehe lẹpo wẹ wá sọn Jiwheyẹwhe dè, enẹwutu yé yin nujọnu. Nawẹ mí nọ wagbọn do de dehe na nọ otẹn tintan mẹ eyin awe kavi humọ wá biọ ayidonugo mítọn to ojlẹ dopolọ mẹ?

Mí nọ ze sinsẹ̀nzọn wiwe mítọn, he bẹ Biblu pinplọn, dẹ̀hiho, opli Klistiani tọn lẹ po lizọnyizọn lọ po hẹn, do otẹn tintan mẹ. (Mat. 6:33; Joh. 4:34; 1 Pita 2:9) Ṣogan, mí ma sọgan pò na nuwiwa gbigbọmẹ tọn lẹ kẹdẹ to gbẹzan mítọn mẹ gba. Mí sọ dona mọ whenu na agbasazọ́n, wehọmẹ po whégbè-zọ́n susu lẹ po. Etomọṣo, mí nọ wà nuhe go mí pé lẹpo nado basi tito agbasazọ́n po nuwiwa devo lẹ po tọn to aliho de mẹ bọ yé ma nọ yitẹn to sinsẹ̀nzọn wiwe mítọn, taidi opli Klistiani tọn lẹ yìyì si gba. Di apajlẹ, eyin mí to tito gbọjẹyíyí tọn basi, mí nọ hẹn ẹn diun dọ dlapọn nugopọntọ lẹdo tọn, plidopọ vonọtaun, plidopọ lẹdo tọn, kavi agbegbe tọn de ma na gbọ mí go. To whedelẹnu, e sọgan yọnbasi nado kọ̀n azọngban mítọn delẹ dopọ. Di apajlẹ, whẹndo de sọgan de nado yí tito Plitẹnhọ Ahọluduta tọn hinhẹn do wiwe ji tọn do basi nuwiwa pọmẹ tọn de, kavi mí sọgan nọ yí gbọjẹ whemẹ tọn lẹ zan to azọ́n mẹ kavi to wehọmẹ nado dekunnuna azọ́nwatọgbẹ́ kavi wehọmẹvigbẹ́ mítọn lẹ. Na nugbo tọn, whedepopenu he mí jlo na basi nudide de to gbẹzan mítọn mẹ—taidi agbasazọ́n de dindin, wepinplọn, kavi họntọn lẹ dide—mí dona dike nudide mítọn lẹ ni sinai do nuhe tin to otẹn tintan mẹ na mí hugan to gbẹzan mítọn mẹ ji, enẹ wẹ sinsẹ̀n-bibasi na Otọ́ owanyinọ mítọn Jehovah.—Yẹwh. 12:13.

 Nọ Hò Mẹdevo lẹ Tọn Pọ́n

Jehovah nọ jlo dọ mí ni hò mẹdevo lẹ tọn pọ́n bo wà dagbe na yé. To alọ devo mẹ, Satani nọ na tuli ṣejannabi. Aihọn he tin to anademẹ etọn glọ gọ́ na gbẹtọ he yin “wanyina mẹdetiti tọ́” po “wanyina gbẹdudu tọ́” po lẹ gọna mẹhe to “didó sọgbe hẹ agbasalan” lẹ. (2 Tim. 3:1-5; Gal. 6:8, NW) Mẹsusu ma nọ lẹnnupọndo lehe nuyiwa yetọn lẹ sọgan bẹpla mẹdevo lẹ do ji. “Azọ́n agbasalan tọn lẹ” wẹ gbayipe to filẹpo.—Gal. 5:19-21, NW.

Lehe walọ mẹhe gbigbọ wiwe Jiwheyẹwhe tọn nọ whàn nado do owanyi, homẹdagbe po dagbewà po hia to nuyiwa yetọn hẹ mẹdevo lẹ mẹ lẹ tọn gbọnvo do sọ! (Gal. 5:22) Ohó Jiwheyẹwhe tọn na mí tuli nado nọ ze ayidonugo do nuhudo mẹdevo lẹ tọn ji jẹnukọnna mítọn titi lẹ. Enẹwutu, mí nọ tindo ojlo nujọnu tọn to ode awetọ mẹ, dile etlẹ yindọ mí nọ tin to aṣeji ma nado donù whẹho mẹdetiti tọn lẹ mẹ. (1 Kọl. 10:24, 33; Flp. 2:3, 4; 1 Pita 4:15) Na taun tọn, mí nọ hò yisenọ hatọ lẹ tọn pọ́n. Ṣogan, mí sọ nọ tẹnpọn nado gọalọna mayisenọ lẹ. (Gal. 6:10) Be a sọgan dín dotẹnmẹ hundote de to egbehe nado do homẹdagbe hia mẹhe a dukosọ hẹ de ya?—Pọ́n apotin lọ “Nọ Hò Yetọn Pọ́n,” to weda 23 ji.

E ma yin ojlẹ tangan kavi ninọmẹ vonọtaun delẹ kẹdẹ mẹ wẹ mí na nọ hò mẹdevo lẹ tọn pọ́n te gba. (Gal. 6:2; Efe. 5:2; 1 Tẹs. 4:9, 10) Kakatimọ,  mí nọ tẹnpọn nado doayi ninọmẹ mẹdevo lẹ tọn go egbesọegbesọ bo nọ gọalọna yé eyin e ma tlẹ bọawuna mí nado wàmọ. Mí dona wleawufo nado yí nudepope he mí tindo zan nado wà dagbe na mẹdevo lẹ—yèdọ whenu, nutindo, numimọ po nuyọnẹn mítọn po. Jehovah hẹn mí deji dọ eyin mí nọ wà dagbe na mẹdevo lẹ, ewọ lọsu na wà dagbe na mí.—Howh. 11:25; Luku 6:38.

Sinsẹ̀nzọn Wiwe Wiwà “to Okle po Ozán Po”

Be e yọnbasi nugbonugbo nado nọ wà sinsẹ̀nzọn wiwe na Jehovah “to okle po ozán po” ya? Mọwẹ, mí sọgan wàmọ eyin mí nọ tindo mahẹ to adà sinsẹ̀n-bibasi mítọn tọn lẹpo mẹ to gbesisọ mẹ po sọwhiwhe po. (Owalọ 20:31, NW) Mí sọgan yí gbẹzan mítọn lẹpo do wà sinsẹ̀nzọn wiwe gbọn Ohó Jiwheyẹwhe tọn hihia bo nọ lẹnayihamẹpọn deji egbesọegbesọ dali, podọ gbọn dẹ̀hiho to whepoponu, vivẹnudido nado tin to opli lẹpo ji po dotẹnmẹ hundote lẹpo yiyizan nado dekunnu po dali.—Ps. 1:2; Luku 2:37; Owalọ 4:20; 1 Tẹs. 3:10; 5:17.

Be dopodopo mítọn to sinsẹ̀nzọn wiwe mọnkọtọn wà na Jehovah ya? Eyin mọ wẹ, ojlo mítọn nado hẹn homẹ etọn hùn bo na gblọndo na whẹsadokọnamẹ Satani tọn lẹ na nọ sọawuhia to adà gbẹzan egbesọegbesọ tọn mítọn lẹpo mẹ. Mí nọ tẹnpọn nado na gigo Jehovah to nudepope he mí to wiwà mẹ podọ to ninọmẹ depope he mẹ mí mọ míde te. Mí nọ dike nunọwhinnusẹ́n etọn lẹ ni deanana mí to ohó po walọ po mẹ, podọ to nudide mítọn lẹ mẹ. Mí nọ dohia dọ mí yọ́n pinpẹn nukunpedomẹgo owanyinọ po godonọnamẹ etọn po tọn gbọn jidide mlẹnmlẹn do ewọ go po huhlọn mítọn lẹpo yiyizan to sinsẹ̀nzọn etọn mẹ po dali. Podọ mí nọ kẹalọyi ayinamẹ po mẹplọnlọdomẹgo etọn po eyin mí gboawupo nado jẹ nubiọtomẹsi etọn lẹ kọ̀n na mapenọ-yinyin mítọn wutu.—Ps. 32:5; 119:97; Howh. 3:25, 26; Kọl. 3:17; Heb. 6:11, 12.

Mì gbọ mí ni zindonukọn nado nọ yí azán dopodopo zan na gigo Jiwheyẹwhe tọn. Eyin mí to mọwà, mí na mọ kọfanamẹ na alindọn mítọn bo nasọ to vivi nukunpedomẹgo owanyinọ Otọ́ olọn mẹ tọn mítọn tọn dù kakadoi.—Mat. 11:29; Osọ. 7:16, 17.

[Yẹdide to weda 22]

Azọngban He Jiwheyẹwhe Dena Mí Lẹ

• Nọ hodẹ̀ whẹwhẹ.—Lom. 12:12.

• Nọ hia Biblu bo nọ plọn ẹn bosọ nọ yí i zan to gbẹzan towe mẹ.—Ps. 1:2; 1 Tim. 4:15.

• Nọ sẹ̀n Jehovah to agun mẹ.—Ps. 35: 18; Heb. 10:24, 25.

• Nọ penukundo hagbẹ whẹndo towe tọn lẹ go to agbasa-liho, gbigbọ-liho podọ to numọtolanmẹ-liho.—1 Tim. 5:8.

• Nọ dọyẹwheho wẹndagbe Ahọluduta lọ tọn, bo nọ hẹn gbẹtọ lẹ zun devi.—Mat. 24:14; 28:19, 20.

• Nọ penukundo nuhudo towe lẹ go to agbasa-liho, gbigbọ-liho podọ to numọtolanmẹ-liho, ehe bẹ tito ayidedai tọn bibasi hẹn.—Malku 6:31; 2 Kọl. 7:1; 1 Tim. 4:8, 16.

• Nọ penukundo azọngban agun tọn lẹ go.—Owalọ 20:28; 1 Tim. 3:1.

• Nọ penukundo owhé towe po Plitẹnhọ Ahọluduta tọn po go.—1 Kọl. 10:32.

[Yẹdide to weda 23]

Nọ Hò Yetọn Pọ́n

• Mẹmẹsunnu kavi mẹmẹyọnnu yọnhonọ de.—Lev. 19:32.

• Mẹhe to azọ̀n agbasa tọn kavi apọ̀nmẹ tọn de jẹ.—Howh. 14:21.

• Hagbẹ agun tọn de he tindo nuhudo nude tọn he a sọgan mọ na ẹn.—Lom. 12:13.

• Hagbẹ whẹndo towe titi tọn de.—1 Tim. 5:4, 8.

• Yisenọ hatọ de he alọwlemẹ etọn damlọn.—1 Tim. 5:9.

• Mẹho agun tọn azọ́n sinsinyẹn watọ de to agun towe mẹ.—1 Tẹs. 5:12, 13; 1 Tim. 5:17.