Yeri Uzuazọ ra Kẹdẹ Kẹdẹ rọ kẹ Ọghẹnẹ Oruaro

DEVIDI ọso-ilezi na ọ lẹ se Jihova nọ: “Ru re me yo eme uyoyou ulogbo ra eva irioke frifri. . . . Wuhrẹ omẹ edhere nọ mẹ rẹ nya.” (Ol. 143:8) Nọ whọ tẹ be lẹ se Jihova evaọ ohiohiẹ, bi yere iei epanọ ọ rọ sẹro ra asohẹrioke, kọ wọhọ Devidi whọ be hai yare iẹe re o fi obọ họ kẹ owhẹ jẹ emamọ iroro je ru oware nọ u woma? Ababọ avro whọ be hai ru ere.

Wọhọ idibo Jihova nọ e roma mudhe no, ma rẹ jọ “eva emu ọriọ hayo eva edada hayo eva oware kpobi nọ [ma] re ruo,” daoma re ma “ru ai kpobi rọ kẹ Ọghẹnẹ oruaro.” (1 Kọr. 10:31) Ma riẹ inọ oghẹrẹ nọ ma bi yeri uzuazọ mai kẹdẹ kẹdẹ o rẹ sae wha orro hayo ekela se Jihova. Ma rẹ jẹ kareghẹhọ inọ Ebaibol e ta nọ “tuvo taso” Setan o bi gu inievo Kristi, te idibo Ọghẹnẹ kpobi nọ e rrọ otọakpọ. (Evia. 12:10) Fikiere ma gba riẹ mu no inọ ma re dhesẹ iguẹgu Setan fihọ erue je ru udu Jihova ghọghọ ẹkwoma udu mai kpobi nọ ma rẹ rọ gọ Ọsẹ obọ odhiwu mai “taso tuvo.”—Evia. 7:15; Itẹ 27:11.

Joma ta ẹme kpẹkpẹe kpahe obọdẹ idhere ivẹ jọ nọ ma sae rọ rehọ edẹ uzuazọ mai kpobi kẹ Ọghẹnẹ oruaro. Orọ ọsosuọ họ epanọ ma rẹ rọ rehọ eware nọ e mai wuzou karo evaọ uzuazọ, orọ avivẹ kọ epanọ ma re ro dhesẹ ororokẹ.

Joma Ru Eyaa Mai Gba

Oma nọ ma ro mudhe kẹ Jihova u dhesẹ nọ u no omai eva ze re ma gọe. Ma tẹ jẹ ya eyaa kẹ Jihova inọ ma ti ru oreva riẹ “no ẹdẹ te ẹdẹ” koyehọ bẹdẹ bẹdẹ. (Ol. 61:5, 8) Kọ ẹvẹ ma rẹ sai ro ru eyaa yena gba? Ẹvẹ ma re ro dhesẹ kẹdẹ kẹdẹ inọ ma you Jihova no udu ze?

Ebaibol e fodẹ eware nọ Jihova ọ gwọlọ mi omai. (Izie. 10:12, 13) Eware nana buobu e rrọ ẹkpẹti na “Eware nọ Ọghẹnẹ Ọ Gwọlọ Mi Omai,” evaọ ẹwẹ-obe avọ 22. Ọghẹnẹ họ ọnọ ọ gwọlọ eware nana kpobi mi omai, fikiere i wuzou. Ẹvẹ ma rẹ rọ riẹ onọ ma rẹ kaki ru otẹrọnọ eware ivẹ hayo esa e rrọ otọ k’omai?

Ma rẹ rọ eware nọ i kpomahọ egagọ mai karo, eware wọhọ uwuhrẹ Ebaibol, olẹ, iwuhrẹ Ileleikristi, gbe usiuwoma ota. (Mat. 6:33; Jọn 4:34; 1 Pita 2:9) Ghele na, orọnikọ eware nọ i kpomahọ egagọ mai ọvo ma re ru okikpo ho. Iruo mai, isukulu, gbe iruẹru uwou yọ eware jọ nọ e r’oja. O make rrọ ere, ma rẹ kuvẹ hẹ re eware nana e rehọ oke egagọ Ọghẹnẹ, wọhọ iwuhrẹ. Wọhọ oriruo, ma tẹ be m’omaa erẹ, ma rẹ ruẹ nnọ o kie fihọ oke iweze ọsẹro okogho ho, hayo oke okokohọ. Ẹsejọ ma rẹ sai ru eware ivẹ ẹsiẹvo. Wọhọ oriruo, uviuwou mai o rẹ sae gbaemu inọ ma re ru Ọgwa Uvie na fo hayo rehọ oke emuọriọ evaọ obọ iruo hayo obọ isukulu ta usiuwoma kẹ ibe-iruiruo mai hayo ibe emọ-isukulu mai. Evaọ uzẹme, iroro nọ ma be jẹ kpobi evaọ uzuazọ, wọhọ iruo nọ ma re ru, isukulu nọ ma rẹ nya, hayo egbẹnyusu, u fo inọ egagọ Jihova, Ọsẹ oyoyou mai,  oye u re kpomahọ iroro-ejẹ mai.—Ọtausi. 12:13.

Wo Ororokẹ

Jihova ọ gwọlọ nọ ma wo ororokẹ je ru eware ezi kẹ amọfa. Rekọ Setan o bi ru ahwo wo uruemu oriobọ. Akpọ nọ Setan o bi su ọ vọ avọ ahwo nọ a “you oma-obọrai, je you igho,” gbe enọ e be kọ “kẹ iwo.” (2 Tim. 3:1-5; Gal. 6:8) Ahwo buobu a rẹ daezọ oghẹrẹ nọ iruemu rai i re kpomahọ amọfa ha. “Iruo uwo” e da eria kpobi fia.—Gal. 5:19-21.

Rekọ wo ohẹriẹ, ahwo nọ ẹzi Jihova o bi su a be rọ uyoyou, ẹwo, gbe ewoma yeri kugbe amọfa. (Gal. 5:22) Ebaibol i wuhrẹ omai nọ ma rehọ ẹgwọlọ amọfa karo. Fikiere ma rẹ gwọlọ ewoma amọfa, dede na orọnikọ eme rai kpobi ma re dhomahọ họ. (1 Kọr. 10:24, 33; Fil. 2:3, 4; 1 Pita 4:15) Ewoma ibe eg’Ọghẹnẹ mai ma rẹ mae gwọlọ. Rekọ u te no inievo mai no, ma rẹ jẹ daoma fi obọ họ kẹ amọfa. (Gal. 6:10) Kọ whọ sae gwọlọ edhere jọ nẹnẹ nọ who re ro fi obọ họ kẹ ohwo jọ?—Rri  ẹkpẹti na “Dhesẹ Ọdawẹ Kẹ Ae,” evaọ ẹwẹ-obe avọ 23.

 Orọnikọ evaọ obọdẹ oke jọ hayo uyero jọ ọvo ma re jo dhesẹ ọdawẹ hẹ. (Gal. 6:2; Ẹf. 5:2; 1 Tẹs. 4:9, 10) Ukpoye, ma rẹ daoma kẹdẹ kẹdẹ re ma muẹrohọ iyero amọfa, ma ve je fi obọ họ kẹ ae o tẹ make rọnọ ere oruo o te dina jọ bẹbẹ kẹ omai. U fo re ma rehọ eware nọ ma wo kpobi ro fi obọ họ, oke mai, ekwakwa efe mai, eriariẹ, gbe areghẹ mai. Jihova ọ k’omai imuẹro inọ ma te bi ru ọghọ kẹ amọfa, o ti ru ọghọ kẹ omai re.—Itẹ 11:25; Luk 6:38.

Ru Iruo Ọghẹnẹ “t’Aso t’Uvo”

Kọ o ginẹ lọhọ re ma ru iruo kẹ Jihova “t’aso t’uvo”? Ee, ẹkwoma oma kpobi nọ ma rẹ rọ kẹ abọ sa-sa ọrọ egagọ mai. (Iruẹru 20:31) Ma rẹ sae rọ oma kpobi kẹ iruo Ọghẹnẹ ẹkwoma Ebaibol nọ ma re roro kpahe kẹdẹ kẹdẹ, olẹ nọ ma rẹ lẹ ẹsikpobi, iwuhrẹ nọ ma rẹ daoma kpohọ kẹse kẹse, gbe uvẹ kpobi nọ ma rẹ rọ ta usiuwoma.—Ol. 1:2; Luk 2:37; Iruẹru 4:20; 1 Tẹs. 3:10; 5:17.

Kọ ma bi gine ru eware nana kpobi evaọ egagọ Jihova? Otẹrọ ere, amọfa a rẹ jọ uzuazọ mai kẹdẹ kẹdẹ ruẹ nnọ ma gwọlọ ru eva were Ọghẹnẹ, ma vẹ jẹ rọ ere dhesẹ Setan fihọ ọtọrue. Evaọ eware kpobi nọ ma bi ru gbe evaọ otọ uyero kpobi, ma rẹ daoma rọ oruaro kẹ Jihova. Ma rẹ kuvẹ re izi riẹ e kpọ ẹmeunu gbe uruemu mai, e vẹ jẹ kpọ iroro kpobi nọ ma be jẹ. Ma re dhesẹ edẹro kẹ ẹruọsa gbe uketha riẹ kpobi ẹkwoma eva kpobi nọ ma re fihọ iẹe, ma vẹ rehọ ẹgba kpobi ru iruo riẹ. Yọ ma te ruthọ fiki sebaẹgba, ma rẹ jẹ ohrẹ gbe ọwhọkuo riẹ rehọ.—Ol. 32:5; 119:97; Itẹ 3:25, 26; Kọl. 3:17; Hib. 6:11, 12.

Evaọ kẹdẹ kẹdẹ, joma yeri uzuazọ nọ o rẹ wha orro se Ọghẹnẹ. Ma te bi ru ere, ma ti wo omosasọ, ma vẹ jẹ reawere uvi ẹruọsa ọrọ Ọsẹ obọ odhiwu mai bẹdẹ bẹdẹ.—Mat. 11:29; Evia. 7:16, 17.

[Ẹkpẹti/Iwoho nọ e rrọ ẹwẹ-obe avọ 22]

Eware nọ Ọghẹnẹ Ọ Gwọlọ Mi Omai

• Lẹ ẹsikpobi.—Rom 12:12.

• Roma totọ se Ebaibol na, je roro kpahe epanọ o ro kie kpahe owhẹ.—Ol. 1:2; 1 Tim. 4:15.

• Hai kpohọ iwuhrẹ ẹsikpobi.—Ol. 35:18; Hib. 10:24, 25.

• Rẹrote ahwo uviuwou ra evaọ abọ-iwo, abọ-ẹzi, gbe abọ efa kpobi.—1 Tim. 5:8.

• Hae ta usiuwoma Uvie na re who je ru ilele.—Mat. 24:14; 28:19, 20.

• Rẹrote oma ra evaọ k’abọ k’abọ, onọ o rẹ gwọlọ aruọzaha nọ o rẹ sasa oma na.—Mak 6:31; 2 Kọr. 7:1; 1 Tim. 4:8, 16.

• Ru iruo nọ i te owhẹ evaọ ukoko na.—Iruẹru 20:28; 1 Tim. 3:1.

• Rẹrote uwou ra gbe Ọgwa Uvie na.—1 Kọr. 10:32.

[Ẹkpẹti/Uwoho nọ e rrọ ẹwẹ-obe avọ 23]

 Dhesẹ Ọdawẹ Kẹ Ae

• Oniọvo nọ ọ kpako no.—Izerẹ 19:32.

• Ohwo jọ nọ ọ be mọ hayo ọnọ ọ rrọ ọkora.—Itẹ 14:21.

• Oniọvo jọ nọ ọ gwọlọ oware jọ kpata kpata, onọ who wo.—Rom 12:13.

• Ohwo jọ evaọ uviuwou ra.—1 Tim. 5:4, 8.

• Oniọvo nọ ọzae hayo aye o whu ku.—1 Tim. 5:9.

• Ọkpako ukoko nọ ọ roma kẹ iruo ukoko na.—1 Tẹs. 5:12, 13; 1 Tim. 5:17.