Sadila Konso Lumbu mu Vana Nkembo kwa Nzambi
Sadila Konso Lumbu mu Vana Nkembo kwa Nzambi
DAVIDI wa ntozi a nkunga wasamba kwa Yave vo: “Ungwis’owu wa walakazi waku e menemene, . . . Unzayisa nzila ina ndiatila.” (Nku. 143:8) Vava osikamanga yo vutula matondo kwa Yave mu kuma kia lumbu kiampa, nga olombanga kwa Yave kasadisa mu baka nzengo zambote yo vanga owu wambote nze una kavanga Davidi? Ka lukatikisu ko vo i wau ovanganga.
Wau vo tu selo yayiyekola kwa Yave, ‘kana tudia, kana tunua, konso owu tuvanga,’ tusiang’e ngolo za ‘vangila mawonso muna nkembo a Nzambi.’ (1 Kor. 10:31) Tuzeye dio vo mana tuvanganga konso lumbu malenda yangidika yovo kendeleka Yave. Tusungamenanga mpe dina kevovanga o Nkand’a Nzambi vo Satana ofundanga mpangi za Kristu “fuku yo mwini,” kumosi ye selo yawonso ya Nzambi ova ntoto. (Lus. 12:10) Muna kuma kiaki, tukwamanana vana e mvutu muna mfundu mialuvunu mia Satana yo yangidika ntim’a Yave, muna sadilanga S’eto ezulu e salu kiavauka “fuku yo mwini.”—Lus. 7:15; Nga. 27:11.
Yambula twafimpa mpila zole tulenda sadila konso lumbu kia zingu kieto mu vana nkembo kwa Nzambi. E mpila yantete, i sikidisa mambu tufwete sia va fulu kiantete, eyi yazole, vwanga akaka o mfunu.
Zingila e Ngwizani ye Kukiyekola Kweto
Vava twakiyekola kwa Yave, twasonga luzolo lweto lwa kunsadila ye ntima mosi. Twasia mpe o nsilu kwa Yave vo tukangalela muna nzila zandi “lumbu ke lumbu,” i sia vo, yakwele mvu. (Nku. 61:5, 8) Aweyi tulungisilanga nsilu wau? Aweyi tusongelanga zola kwa nsi a ntima kuna kwa Yave muna konso lumbu?
O Nkand’a Nzambi utoma songanga dina Yave kevavanga vo twavanga. (Nsi. 10:12, 13) Maka muna mambu mama mayikilu muna babu kina yo ntu a diambu vo “Salu Twavewa kwa Nzambi,” muna lukaya lwa 22. E salu yayi yawonso Nzambi watuvana yo, i kuma vo mfunu yina. Aweyi tuzayilanga e salu tufwete sia va fulu kiantete, vava divavanga vo twasala salu yayingi muna ola mosi?
Tufwete sianga e salu kieto kiavauka va fulu kiantete, i sia vo, longoka Nkand’a Nzambi, sambu, tukutakanu tw’Akristu ye salu kia umbangi. (Mat. 6:33; Yoa. 4:34; 1 Pet. 2:9) Ediadi ka disongele ko vo tufwete sala e salu ya mwanda e lumbu kiawonso. Muna nkubika zeto tufwete sianga mpe salu ya yeto kibeni, sikola, ye salu yakaka ya mu nzo. Kana una vo i wau, tufwete vanga wawonso kimana e salu kia yeto kibeni ye salu yakaka yalembi vunzanesa e salu kieto kiavauka nze kwenda muna tukutakanu tw’Akristu. Kasikil’owu, vava tukubikanga una tusadila e lumbu ya vundu, ka tufwete vilakananga ko e nkingula ya nkengi a zunga, lukutakanu lwa lumbu kimosi, ye lwa zunga yovo lukutakanu lwa mvivu. Ezak’e ntangwa, tulenda sala salu yayingi muna nkumbu mosi. Kasikil’owu, tulenda kubika esi nzo eto mu velelesa Eseka dia Kintinu yovo sadila ntangwa vunda kuna salu yovo kuna sikola mu sia umbangi kw’akundi a salu yovo a sikola. Konso ntangwa tuzolele bak’e nzengo muna zingu kieto, nze vava salu, mpila sikola tuzolele tanga yovo sola akundi, tufwete yambulanga vo mambu masundidi o mfunu muna zingu kieto, i sia vo, e nsambil’a Yave wa S’eto anzodi yakalanga vana fulu kiantete.—Kim. 12:13.
Vwanga Akaka o Mfunu
Yave zolele vo twavwanga akaka o mfunu yo kubavangila oma mambote. Kansi, o Satana onungununanga e fu ki’eloko. E nza ya Satana yazala ye “akwa kuzola,” “azodi ekembo” y’awana ‘bekuninanga mu nitu.’ (2 Tim. 3:1-5; Ngal. 6:8) Ndonga ke beyindulanga ko una mavangu mau malenda vanga kw’akaka. “O mavangu ma nitu” memonekanga mu fulu yawonso.—Ngal. 5:19-21.
Nswaswani yo wantu awaya, awana befilwanga kwa mwand’avelela a Yave besonganga zola, walakazi, ye unsongi muna nkal’au y’akaka. (Ngal. 5:22) Nkand’a Nzambi ukutuvovesanga vo twasiang’e nsatu z’akaka va fulu kiantete ke mu zeto ko. Muna kuma kiaki, tusi’e ngolo za songa vo tuvwanga akaka o mfunu, kansi tufwete keba kimana twalembi kuyisia mu mambu mangani. (1 Kor. 10:24, 33; Fili. 2:3, 4; 1 Pet. 4:15) Tuvwanga kikilu ampangi zeto o mfunu. Kana una vo i wau, tusianga mpe e ngolo za sadisa mindembi kwikila. (Ngal. 6:10) Nga lenda vava elau konso lumbu mu songa walakazi kwa konso muntu owananene yandi?—Tala e babu kina yo ntu a diambu vo, “Ubavwanga o Mfunu,” muna lukaya lwa 23.
O vwa akaka mfunu ke kuna mu ntangwa ko yovo mu diambu. (Ngal. 6:2; Ef. 5:2; 1 Tes. 4:9, 10) Kansi, lumbu yawonso tufwete vavanga zaya una wina e zingu ki’akaka yo kubavana lusadisu bavwidi o mfunu, kana nkutu vava dikalanga diampasi kwa yeto mu vanga wo. Tuzolele kayila akaka konso kina tuna kiau, kana ntangwa eto, mavwa yovo ngangu zeto. Yave wasia nsilu vo, avo tuvanina akaka kuna mvevo, yandi mpe osinga kutuvanina kuna mvevo.—Nga. 11:25; Luka 6:38.
Salu Kiavauka “Fuku yo Mwini”
Nga dilendakana dia sadila Yave salu kiavauka “fuku yo mwini”? Elo. Muna siang’e sungididi muna mambu mawonso ma nsambil’eto. (Mav. 20:31) Tulenda sala salu kiavauka muna zingu kieto muna tanganga yo badika e Diambu dia Nzambi lumbu yawonso, sambanga ntangwa zawonso, siang’e ngolo za kala mu tukutakanu twawonso yo sadila konso elau mu sila umbangi.—Nku. 1:2; Luka 2:37; Mav. 4:20; 1 Tes. 3:10; 5:17.
Nga tusadilanga Yave e salu kiaki kiavauka? Avo i wau, luzolo lweto lwa kunyangidika yo vana e mvutu muna mfundu mia Satana lumoneka muna mambu mawonso ma zingu kieto kia konso lumbu. Tusi’e ngolo za vana nkembo kwa Yave muna mawonso tuvanganga, kana nkutu nkia diambu ditubwididi. Yambula e nkanikinu miandi miafila e mvovo mieto ye nkal’eto yo kutusadisa muna konso dina tuzolele vanga. Tusonganga luyangalalu lweto muna zola yo lusadisu lwandi vava tukumbundang’e vuvu yo sadila ngolo zeto muna salu kiandi. Tutambulwilanga luludiku y’elongi diandi, vava tukululanga nkanikinu miandi mu kuma kia usumuki weto.—Nku. 32:5; 119:97; Nga. 3:25, 26; Kol. 3:17; Ayib. 6:11, 12.
Yambula twakwamanana vana nkembo kwa Nzambi konso lumbu kia zingu kieto. Avo tuvangidi wo, tusolola e vundu kia mioyo mieto yo yangalela zola kwa S’eto ezulu yakwele mvu.—Mat. 11:29; Lus. 7:16, 17.
[Mvovo mia Fwaniswa mina muna lukaya lwa 22]
Salu Twavewa kwa Nzambi
[Mvovo mia Fwaniswa mina muna lukaya lwa 22]
• Sambanga ntangwa zawonso. —Roma 12:12.
• Tanga ye longoka Nkand’a Nzambi, sadila mana otanganga.—Nku. 1:2; 1 Tim. 4:15.
• Sambila Yave muna nkutakani.—Nku. 35:18; Ayib. 10:24, 25.
• Lungisa e nsatu za esi nzo zeto muna nitu ye mwanda.—1 Tim. 5:8.
• Samun’e nsangu zambote za Kintinu yo kitula wantu s’alongoki. —Mat. 24:14; 28:19, 20.
• Lunga- lunga o vimpi weto wa nitu ye wa mwanda yo vaulanga e ntangw’a nsaka.—Maku 6:31; 2 Kor. 7:1; 1 Tim. 4:8, 16.
• Lungisa kiyekwa muna nkutakani.—Mav. 20:28; 1 Tim. 3:1.
• Velelesa e nzo zeto y’Eseka dia Kintinu.—1 Kor. 10:32.
[Foto ina muna lukaya lwa 23]
Ubavwanga o Mfunu
[Foto ina muna lukaya lwa 23]
• Mpangi una vo se nunu. —Fuka 19:32.
• Muntu oyelanga yovo wakendalala.—Nga. 14:21.
• Mpangi muna nkutakani ovwidi mfunu a lekwa tuna kiau. —Roma 12:13.
• Yitu kiaku.—1 Tim. 5:4, 8.
• Mpangi ofwidilu nkento yovo yakala.—1 Tim. 5:9.
• Nkuluntu osalanga kwayingi muna nkutakani.—1 Tes. 5:12, 13; 1 Tim. 5:17.