Mulemeshenuña Nzambi muChihandilu Chenu Chejima

“DAVIDI ñimbi yamasamu walombeli kudi Yehova nindi: “Ntiyishi kumatu ami luwi lweyi nabudidi, ñilukishi njila yinukwenda.” (Mas. 143:8) Kufwana Davidi, neyi muhinduka budidi, komana mwamuhamekaña Yehova hawumi wunayinkiyi, nakulomba kudi Yehova kulonda yayikwashi kufuukulahu nikutonda njila yayiwahi? Chakadi nikujina dichimwelaña.

Hakwikala ambuña jaYehova, ‘hela tunakudya hela tunakunwa hela mutwelaña mwejima,’ twafwilaña ‘kwila yuma yejima kulonda kumulemesha Nzambi.’ (1 Kor. 10:31) Tweluka netu chitwahandaña hadaha tukumulemeshaña Yehova hela nehi. Cheñi tweluka netu Satana wayinkaña muloña ana kwaKristu, niambuña aNzambi ejima hamaseki, ‘mwaana niwufuku.’ (Chim. 12:10) Dichi, tunakufwila kumwakula Satana hanyiloña yatwinkañayi nikumutiyisha Yehova kuwaha kuhitila mukumukalakela Tata yetu wamwiwulu mudimu wajila ‘mwaana niwufuku.’—Chim. 7:15; Yish. 27:11.

Tushinshikenu chantesha hayuma yiyedi yalema mutwatela kumulemeshela Nzambi hefuku hefuku. Chatachi, chinabombelumu kutwamijaku yuma yitwalemesha nawa chamuchiyedi, kutoñojokelaku antu amakwawu.

Kuhemba Chikaninu Chetu

Chitwadihanini kudi Yehova, twamwekesheli mpwila yakukeña kumukalakelaña. Cheñi, twamukanini Yehova netu tukwendaña munjila jindi “hefuku hefuku,” haya nyaka. (Mas. 61:5, 8) Hanu dinu, twahembaña ñahi chikaninu chenichi? Twamwekeshaña ñahi hefuku hefuku netu twamukeña Yehova namuchima wetu wejima?

Izu daNzambi dashimuna hatooka nyidimu yakeñañayi Yehova nindi tukalakaleña. (Kuhit. 10:12, 13) Nyidimu yayivulu anayishimuni muchikasha chinakwila nawu “Nyidimu Yatwinkayi Nzambi,” hefu 22. Nzambi diyi watwinka nyidimu yeniyi, nawa yalema chikupu. Hanu dinu, mudimwinyi wutwasambilaña kuzata neyi chakwila nyidimu yiyedi hela yisatu yinakukeñeka kuyizata hampinji yoyimu?

Twasambilaña kukalakala mudimu wetu wajila, wabombelamu kudiza Bayibolu, kulomba, kuya kukupompa kwawakwaKristu nikuya mumudimu wakushimwina. (Mat. 6:33; Yow. 4:34; 1 Pet. 2:9) Hela chochu, hitunateli kukalakala nyidimu yakuspiritu ifuku damukumaku. Tunateli kuzata nyidimu yikwawu yidi neyi kuya kumudimu, kushikola nikuzata nyidimu yayivulu yahetala. Hela chochu, twazataña hakumina ñovu jetu kulonda kwikala nandandanda yakuzata nyidimu yakumujimba ninyidimu yikwawu chakwila yibuleña kuluwañesha mudimu wetu wajila, chidi neyi kuyaña kukupompa kwawakwaKristu. Chakutalilahu, neyi tunakukeña kuya nakunooka, hitwajiñaña mulungu wunakutwendela nkoñi wañinza, kupompa kwefuku dadimena, kupompa kwañinza hela kupompa kwankambuku. Mpinji jikwawu, nyidimu yetu yikwawu tunateli kuyikalakela hamu. Chakutalilahu, tunateli kufuukulahu kuwahishaña Itala daWanta hamu neyi chisaka hela kuzatisha mpinji yahachayili kumudimu hela hashikola kulonda kushimwinaña kudi antu itwazatañanawu hela akwetu akashikola. Mwamweni, neyi tunakukeña kufuukulahu hayuma yidi neyi kukeña nyidimu, kutonda shikola, hela amabwambu, kufuukulahu kwetu kwatela kushindamena hachuma chitwalemesha chikupu muchihandilu, kudifukula kudi Yehova, Tata yetu wukweti kukeña.—Mukwa. 12:13.

 Toñojokelenuñaku Antu Amakwawu

Yehova wakeñaña nindi twakameneña antu amakwawu nikuyilila kakawahi. Munjila yikwawu, Satana wakeñaña antu kwikala nachifwa. Kaayi kindi kenzala nawantu ‘adikeña aweni,’ nawa ‘akeñaña yakuditiyisha aweni kuwaha’ kubombelahu niantu ‘akuwilaña chisemwa chaheseki.’ (2 Tim. 3:1-5; Ŋal. 6:8) Antu amavulu hiyelukaña yuma yafumaña muyuma yakoñelañawu akwawuku. “Nyidimu yachisemwa chaheseki” yinakumwekana kwejima.—Ŋal. 5:19-21.

Yililu yawantu alombolewaña naspiritu yaYehova yambukaku chikupu, amwekeshaña kukeña, luwi, nikuwaha neyi anakuzata nawakwawu antu. (Ŋal. 5:22) Izu daNzambi datulejaña kutwamijaku kukala kwawakwetu. Dichi, twelaña yuma yamwekeshaña nawu twakeña akwetu, hela chochu hitwadiñijaña munsañu jawantuku. (1 Kor. 10:24, 33; Fwi. 2:3, 4; 1 Pet. 4:15) Twatoñojokelañaku akwetu akakwitiya. Hela chochu, twazataña cheñi nañovu kulonda kukwashaku antu abula kwitiya. (Ŋal. 6:10) Komana kwila muwana njila yakumwekeshelamu luwi kudi muntu imunadibulakani nindi nehi?—Talenu chikasha chinakwila nawu “Yakamenenuña,” hefu 23.

 Hitwakamenaña hohu antu neyi kudi yuma yinamwekanuku. (Ŋal. 6:2; Efwes. 5:2; 1 Tesa. 4:9, 10) Ilaña, mafuku ejima twafwilaña kwiluka yuma yinakumwekena antu amakwawu nikunyakala kuyikwasha neyi anakankili, hela chakwila kwila mwenimu kunateli kutuluwañesha. Twatela kuhana yuma yidi yejima yitukweti, mpinji, yuma yakumujimba, yakuhumañana nimaana. Yehova watukana nindi neyi tuhanaña yuma kudi antu, niyena wakatwinka.—Yish. 11:25; Luka 6:38.

Kukalakala Mudimu Wajila ‘Mwaana niWufuku’

Komana chaswayi kumukalakela Yehova mudimu wajila ‘mwaana niwufuku’? Eña, kuhitila mukukalakalaña nañovu nyidimu yejima yakundama kukudifukula kwetu. (Yil. 20:31) Twatela kukalakalaña mudimu wajila kuhitila mukutañaña nikutoñojoka chikupu Hezu daNzambi mafuku ejima, kulombaña chikupu, kuyaña kukupompa kwejima, nikushimwinaña kudi antu ejima itwawanaña.—Mas. 1:2; Luka 2:37; Yil. 4:20; 1 Tesa. 3:10; 5:17.

Komana tunakumukalakela Yehova mudimu weniwu wajila hamuntu hamuntu? Neyi dimu, kufwila kwetu kwakumutiyisha Yehova kuwaha nikumwakula Satana hanyiloña yindi, kukumwekenaña muyuma yitwelaña muchihandilu chetu. Twafwilaña kumulemesha Yehova muyuma yejima yitwelaña nimuyuma yatumwekenaña. Twetejaña nshimbi jindi kulonda kutuleñela kuhoshaña yuma yayiwahi, kwikala nayililu yayiwahi nikutulombolaña muyuma yitwafuukulaña. Twamuhamekaña Yehova hakutwakamena nikutukwasha kuhitila mukumukuhwelela nikumukalakela hakumina ñovu jetu. Twetejaña kufumba kwindi, neyi tumotoka nshimbi jindi hamuloña wakubula kuwanina.—Mas. 32:5; 119:97; Yish. 3:25, 26; Kol. 3:17; Heb. 6:11, 12.

Dichi, mafuku ejima tumulemesheña Nzambi. Neyi twilaña mwenimu, twakamona kunooka munyichima yetu nawa Tata yetu wamwiwulu wakatwakamenaña haya nyaka.—Mat. 11:29; Chim. 7:16, 17.

[Chikasha/Nyevulu yidi hefu 22]

Nyidimu Yatwinkayi Nzambi

• Lombenuña mafuku ejima.—Rom. 12:12.

• Kutaña nikudiza Bayibolu, nikuzatishaña yuma yitunakudiza.—Mas. 1:2; 1 Tim. 4:15.

• Kudifukulaña kudi Yehova muchipompelu.—Mas. 35:18; Heb. 10:24, 25.

• Kwakamenaña antu amuchisaka chetu kutalisha hayuma yakumujimba, kuspiritu nimuyitoñojoka.—1 Tim. 5:8.

• Kushimwinaña nsañu yayiwahi yaWanta nikwilisha atumbanji.—Mat. 24:14; 28:19, 20.

• Kudakamenaña kumujimba, kuspiritu, hamu tuhu nikuhema.—Maku 6:31; 2 Kor. 7:1; 1 Tim. 4:8, 16.

• Kwakamenaña nyidimu yamuchipompelu.—Yil. 20:28; 1 Tim. 3:1.

• Kuwahishaña hetala detu niItala daWanta.—1 Kor. 10:32.

[Chikasha/Mwevulu wudi hefu 23]

Yakamenenuña

• Mana kwetu hela muhela kashinakaji.—Lev. 19:32.

• Muntu wunakukata kumujimba hela wudi nachineñi.—Yish. 14:21.

• Muntu wamuchipompelu wunakukeñeka kumukwasha.—Rom. 12:13.

• Kwakamena ntaña yenu.—1 Tim. 5:4, 8.

• Kwakamena mukwetu mukakwitiya wunafwishi mwinikwindi.—1 Tim. 5:9.

• Kwakamena eluda wadikitaña chikupu muchipompelu chenu.—1 Tesa. 5:12, 13; 1 Tim. 5:17.