Ti gi Odiechieng’ Kodiechieng’ mar Ngimani e Miyo Nyasaye Duong’

DAUDI jandik-zaburi nokwayo Jehova e lamo kama: ‘Mi abedi gi ng’wononi ka piny oru. Mi ang’e yo monego awuothie.’ (Zab. 143:8) Bang’ chiewo, sama igoyo ne Jehova erokamano kuom miyi odiechieng’ machielo e ngimani, be isaye kaka Daudi notimo, mondo otayi e ng’ado paro mabiro miyo itim gigo mowinjore moloyo? Onge kiawa ni ijatimo kamano.

Kaka jotich Jehova mosechiworene, kata bedi ni ‘wachiemo, wametho, kata watimo gimoro amora’ watemo matek mondo ‘watim duto ne duong’ mar Nyasaye.’ (1 Kor. 10:31) Wang’eyo ni kit ngimawa mapile nyalo miyo Jehova duong’ kata kelone wichkuot. Wang’eyo bende ni Wach Nyasaye nyiso ni Satan donjo ne owete Kristo—kendo mano bende e kaka otimo ne jotich Nyasaye duto me piny—“odiechieng’ gotieno.” (Fwe. 12:10) Kuom mano, wang’ado mar nyiso ni weche ma Satan donjonwago gin miriambo, kendo wadwaro miyo chuny Jehova mor kuom tiyo ne Wuonwa me polo “odiechieng’ gotieno.”—Fwe. 7:15; Nge. 27:11.

We wanon ane e yo machuok yore ariyo madongo mwanyalo tiyogo e miyo Nyasaye duong’ odiechieng’ kodiechieng’. Mokwongo otudore gi keto gik mowinjore obed motelo e ngimawa, to mar ariyo en nyiso chuny mar dewo jomoko.

Dak Kaluwore gi Singo Marwa

Kane wachiwore wawegi ne Jehova, ne wanyiso gombo ma wan-go e chunywa mar tiyone. Bende ne wasingone Jehova ni wabiro wuotho e yorene “ndalo ka ndalo”—ee, nyaka chieng’. (Zab. 61:5, 8) Omiyo, ere kaka wanyalo dak kaluwore gi singruokno? Ere kaka wanyiso ni wahero Jehova gi chunywa duto odiechieng’ kodiechieng’?

Wach Nyasaye nyiso maler ting’ mago ma Jehova dwaro ni wachopi. (Rapar 10:12, 13) Moko kuomgi ochan e sanduk miluongo ni, “Ting’ ma Nyasaye Dwaro ni Wachopi” e ite mar 22. Migepego duto gin ma Nyasaye ema omiyowa, omiyo dwarore ni wachopgi. Omiyo, ere kaka wanyalo ng’ado ni mane monego okaw thuolowa mokwongo sama ariyo kata mokalo kanyo dwaro thuolono?

Gik monego okaw thuolowa motelo gin mago motudore gi lamo maler, ma gin kaka puonjruok Muma, wuoyo gi Nyasaye e lamo, chokruoge mag Jokristo, koda tij lendo. (Math. 6:33; Joh. 4:34; 1 Pet. 2:9) En adier ni weche motudore gi lamo ok nyal kawo thuolowa duto e odiechieng’ mangima. Tich, skul, koda ting’ mamoko mag ot, bende onego obedi e chenrowa. Kata kamano, onego watim kar mwanyalo mondo wachan tijewa mag yuto koda yore mamoko, e yo mamiyo ok gibi monowa chopo ting’wa kaka Jokristo, kaka dhi e chokruoge mag Jokristo. Kuom ranyisi, sama wachano dhi e rusa kamoro, onego wane ni ok wabi bedo maonge e jumb limbe mar jarit-alwora, e chokruoge mag alwora, kata mar distrikt. Nitie kinde mwanyalo timo moko kuom ting’go karachiel. Kuom ranyisi, wanyalo keto migawo mar lwoko Od Romo obed kaka ting’ mar joodwa duto, kata wanyalo tiyo gi sa chiemo mar odiechieng’ e lendo ne jotich kata joskul wetewa. Kuom adier, sa asaya madwarore ni watim yiero moro e  ngimawa—kaka tich monego wati, timo yiero e weche somo, kata yiero osiepe—wadwaro ni wang’ad paro e yo manyiso ni wang’eyo gino mowinjore obed motelo ahinya e ngimawa—lamo Jehova, Wuonwa ma jahera.—Ekl. 12:13.

Nyis ni Idewo Jomoko

Jehova dwaro ni mondo wadew jomoko, kendo watimnegi maber. Mopogore kode, Satan to jiwo kido mar guondo. Piny moteloeni opong’ gi “jo moherore giwegi,” kendo “jo mohero mor mar piny” kaachiel gi jogo ‘ma chuoyo kuom ringruok.’ (2 Tim. 3:1-5; Gal. 6:8) Ji mang’eny ok par ahinya kaka gik ma gitimo nyalo hinyo jomoko. “Tim mag ringruok” nenore kamoro amora.—Gal. 5:19-21.

To mano kaka jogo mitayo gi roho maler mar Jehova to opogore kodgi, nimar gin ginyiso hera, miwafu, kendo gitimo maber ne jomoko! (Gal. 5:22) Wach Nyasaye wachonwa ni waket dwaro mag jomoko otel ne magwa wawegi. Kuom mano, watimo ne jomoko gik manyiso ni wadewogi, to kata kamano watang’ ahinya mondo kik wadonjre e maling’ling’ mag jomoko. (1 Kor. 10:24, 33; Fili. 2:3, 4; 1 Pet. 4:15) Jogo ma walemo godo ema onego wadew moloyo. Kata kamano, watemo matek bende mondo wakony jogo maok walem godo. (Gal. 6:10) Donge kawuono  inyalo manyo thuolo mar nyiso ng’at miromogo ng’wono?—Ne sanduk man bathe mawacho ni “Nyisgi ni Idewogi.”

Dewo jomoko ok en mana gima itimo e chal moro, kata e kinde moro makende. (Gal. 6:2; Efe. 5:2; 1 Thes. 4:9, 10) Kar mano, pile ka pile watemo nono chal mar jomoko ka waikore mar konyogi, kata mana ka timo kamano kelonwa pek. Wadwaro ni wabed jochiwo kuom gigo ma wan-go—thuolowa, mwanduwa, lony, koda rieko. Jehova singonwa ni ka wabedo jochiwo ne jomoko, en bende obiro timonwa kamano.—Nge. 11:25; Luka 6:38.

Tiyo ne Nyasaye “Odiechieng’ gi Otieno”

Be tiyo ne Jehova ‘odiechieng’ gotieno’ en gima nyalore? Ee, kuom timo kinda e yorewa duto mag lamo maok wabare. (Tich 20:31) Wanyalo miyo ngimawa opong’ gi weche motudore gi tiyo ne Nyasaye, kuom somo kendo paro matut kuom Wach Nyasaye pile ka pile, wuoyo kode e lamo maok wawe, timo kinda mar dhi e chokruoge duto maok wabare, kendo tiyo gi thuolo moro amora moyudore e chiwo neno.—Zab. 1:2; Luka 2:37; Tich 4:20; 1 Thes. 3:10; 5:17.

Be wan wawegi watiyo ne Jehova e yo ma kamano? Ka en kamano, gombo marwa mar more kendo chiwo dwoko kuom weche ma Satan nodonjonwago biro nenore e kit ngimawa duto. Watimo matek miyo Jehova duong’ e duto mwatimo koda e weche duto mayudowa. Waweyo mondo chike koda puonjge ochik weche mwawacho, timbewa, kendo tayo paro mwang’ado. Wanyiso ni wamor gi rit momiyowa e yor hera kuom keto genowa duto kuome, kendo tiyo gi tekowa duto e tiyone. Kendo warwako puonj koda siem momiyowa sama waboth kuom chopo yorene nikech richowa.—Zab. 32:5; 119:97; Nge. 3:25, 26; Kol. 3:17; Hib. 6:11, 12.

Weuru wadhi nyime dak odiechieng’ kodiechieng’ e miyo Nyasaye duong’. Kuom timo kamano, wabiro yudo yueyo e chunywa kendo wabiro winjo maber kuom rit ma Wuonwa me polo miyowa e yor hera.—Math. 11:29; Fwe. 7:16, 17.

[Sanduk/Picha manie ite mar 22]

Ting’ ma Nyasaye Dwaro ni Wachopi

• Lem pile.—Rumi 12:12.

• Som kendo puonjri Muma, kitiyo gi weche misomo.—Zab. 1:2; 1 Tim. 4:15.

• Lam Jehova ei kanyakla.—Zab. 35:18; Hib. 10:24, 25.

• Pidh joodi e yor ringruok, e wach Nyasaye, koda e tego chunygi.—1 Tim. 5:8.

• Land wach maber mar Pinyruoth kendo tim ji jopuonjre.—Math. 24:14; 28:19, 20.

• Tim gigo madwarore mondo omi irit dwaroni mag ringruok, yore mag Nyasaye, koda e tego chunyi, moriwo koda loso chenro mag manyo mor koda yueyo.—Mari. 6:31; 2 Kor. 7:1; 1 Tim. 4:8, 16.

• Chop ting’ magi mag kanyakla.—Tich 20:28; 1 Tim. 3:1.

• Rito ler mar odwa koda Od Romo.—1 Kor. 10:32.

[Sanduk/Picha manie ite mar 23]

Nyisgi ni Idewogi

• Owadwa kata nyaminwa moro hike ng’eny.—Lawi 19:32.

• Ng’at moro machandore nikech tuwo kata kuyo moro.—Nge. 14:21.

• Jakanyo mar kanyakla madwaro kony moro minyalo chiwo.—Rumi 12:13.

• Achiel kuom joodu.—1 Tim. 5:4, 8.

• Jakristo wadu ma jaode otho.—1 Tim. 5:9.

• Jaduong’ kanyaklau matiyo matek.—1 Thes. 5:12, 13; 1 Tim. 5:17.