Uża Kull Ġurnata taʼ Ħajtek għall-Glorja t’Alla
Uża Kull Ġurnata taʼ Ħajtek għall-Glorja t’Alla
“FIL-GĦODU agħmel li nismaʼ l-qalb tajba bl-imħabba tiegħek,” talab is-salmista David lil Ġeħova. “Għarrafni t-triq li għandi nimxi fiha.” (Salm 143:8) Meta tqum u tirringrazzja lil Ġeħova għal ġurnata ġdida taʼ ħajja, tagħmel int bħal David, billi titlob bil-ħniena lil Ġeħova biex jiggwidak fid-deċiżjonijiet li tieħu u biex tagħmel l-aħjar għażliet? Mingħajr dubju hekk tagħmel.
Bħala qaddejja dedikati taʼ Ġeħova, ‘jekk nieklu jew nixorbu jew nagħmlu xi ħaġa oħra,’ aħna nistinkaw biex ‘nagħmlu kollox għall-glorja t’Alla.’ (1 Kor. 10:31) Aħna nirrealizzaw li l-mod kif ngħixu l-ħajja taʼ kuljum jew se jonora lil Ġeħova jew se jiddiżonorah. Niftakru wkoll li l-Kelma t’Alla tgħid li Satana qed jakkuża lil ħut Kristu—u, fil-fatt, lill-qaddejja kollha t’Alla fuq l-art—“lejl u nhar.” (Riv. 12:10) Għalhekk, aħna determinati li nwieġbu l-akkużi foloz taʼ Satana u nferrħu qalb Ġeħova, billi nagħtu servizz sagru lil Missierna tas-sema “lejl u nhar.”—Riv. 7:15; Prov. 27:11.
Ejja nikkunsidraw fil-qosor żewġ modi importanti kif nistgħu nużaw kull ġurnata taʼ ħajjitna għall-glorja t’Alla. L-ewwel mod jinvolvi li nagħmlu prijoritajiet xierqa u t-tieni li nuru konsiderazzjoni lejn oħrajn.
Ngħixu fi Qbil mal-Wegħda Tagħna
Billi ddedikajna ruħna lil Ġeħova, aħna wrejna x-xewqa sinċiera tagħna li naqduh. Aħna wegħedna wkoll lil Ġeħova li se nimxu fil-mogħdijiet tiegħu “jum wara l-ieħor”—iva, għal dejjem. (Salm 61:5, 8) Imma kif nistgħu ngħixu fi qbil maʼ dik il-wegħda? Kif nuru li nħobbu lil Ġeħova b’qalbna kollha kuljum?
Il-Kelma t’Alla tidentifika b’mod ċar ir-responsabbiltajiet li Ġeħova jistenniena nwettqu. (Dt. 10:12, 13) Ftit minn dawn huma miktubin fil-kaxxa bit-titlu “ Responsabbiltajiet Mogħtijin Minn Alla,” f’paġna 22. Dawn l-inkarigi kollha ngħataw minn Alla, u b’hekk huma importanti. Kif se niddeċiedu liema waħda għandha tingħata prijorità meta tnejn jew iktar ikunu jeħtieġu l-attenzjoni tagħna fl-istess ħin?
Aħna nagħtu prijorità lis-servizz sagru tagħna li jinkludi l-istudju tal-Bibbja, it-talb, il-laqgħat Kristjani, u l-ministeru. (Mt. 6:33; Ġw. 4:34; 1 Pt. 2:9) Madankollu, l-attivitajiet spiritwali ma jistgħux jiħdulna l-ħin kollu tal-ġurnata. Irridu nsibu ħin ukoll għall-impjieg, l-iskola, u d-diversi xogħlijiet tad-dar. Minkejja dan, aħna nagħmlu l-aħjar li nistgħu biex nirranġaw ix-xogħol sekulari u attivitajiet oħrajn b’tali mod li ma jtellfux is-servizz sagru tagħna, bħal li nattendu l-laqgħat Kristjani. Pereżempju, meta nippjanaw vaganza nagħmlu żgur li ma nitilfux iż-żjara tal-indokratur tas-circuit, il-jum t’assemblea speċjali, l-assemblea tas-circuit, jew il-konvenzjoni distrettwali. Kultant nistgħu ngħaqdu xi ftit mir-responsabbiltajiet tagħna flimkien. Pereżempju, nistgħu nagħmlu t-tindif tas-Sala tas-Saltna bħala proġett tal-familja, jew nużaw il-brejk tax-xogħol jew tal-iskola biex nagħtu xhieda lill-kollegi jew lill-istudenti sħabna. Tabilħaqq, kull meta jkollna bżonn nagħmlu għażla f’ħajjitna—bħal li nsibu xogħol, nagħżlu x’edukazzjoni se nieħdu, jew l-għażla tal-ħbieb—irridu li d-deċiżjonijiet tagħna jkunu influwenzati mill-akbar prijorità tagħna fil-ħajja—il-qima lil Ġeħova, Missierna kollu mħabba.—Ekk. 12:13.
Uri Konsiderazzjoni Lejn Oħrajn
Ġeħova jridna nuru konsiderazzjoni lejn oħrajn u nagħmlulhom il-ġid. Satana, min-naħa l-oħra, jippromwovi l-egoiżmu. Id-dinja tiegħu hi mimlija nies li “jħobbu lilhom infushom” u “jħobbu l-pjaċiri,” kif ukoll nies li ‘qed jiżirgħu għal laħamhom.’ (2 Tim. 3:1-5; Gal. 6:8) Ħafna nies ftit li xejn jaħsbu dwar l-effetti li l-azzjonijiet tagħhom ikollhom fuq oħrajn. “L-għemejjel tal-laħam” jidhru ċari kullimkien.—Gal. 5:19-21.
Kemm hi differenti l-attitudni taʼ dawk li, imqanqlin mill-ispirtu qaddis taʼ Ġeħova, juru mħabba, qalb tajba, u tjubija meta jittrattaw m’oħrajn! (Gal. 5:22) Il-Kelma t’Alla tgħidilna biex niffokaw fuq il-bżonnijiet t’oħrajn qabel ma niffokaw fuq tagħna. Għalhekk, għandna nuru interess f’xulxin, imma rridu noqogħdu attenti li ma nindaħlux f’affarijiet persunali. (1 Kor. 10:24, 33; Flp. 2:3, 4; 1 Pt. 4:15) Aħna nuru konsiderazzjoni b’mod partikulari lejn sħabna fit-twemmin. Xorta waħda, nistinkaw biex inkunu t’għajnuna għal dawk li m’għandhomx l-istess twemmin tagħna. (Gal. 6:10) Illum, tistaʼ tfittex opportunità biex turi qalb tajba maʼ xi ħadd li tiltaqaʼ miegħu?—Ara l-kaxxa “ Urihom Konsiderazzjoni,” f’paġna 23.
M’għandniex nuru konsiderazzjoni biss f’xi Gal. 6:2; Efes. 5:2; 1 Tess. 4:9, 10) Minflok, kuljum nipprovaw inkunu konxji taċ-ċirkustanzi t’oħrajn u nkunu lesti li ngħinuhom jekk ikollhom bżonn. Nagħmlu dan anki meta forsi jkun skomdu għalina. Aħna rridu nkunu ġenerużi b’dak kollu li għandna għad-dispożizzjoni tagħna—il-ħin, l-affarijiet materjali, l-esperjenza, u l-għerf tagħna. Aħna għandna l-assiguranza taʼ Ġeħova li meta nkunu ġenerużi m’oħrajn, hu jkun ġeneruż magħna.—Prov. 11:25; Lq. 6:38.
żmien speċjali jew f’sitwazzjoni partikulari. (Servizz Sagru “Lejl u Nhar”
Huwa tassew possibbli li nagħtu servizz sagru lil Ġeħova “lejl u nhar”? Iva, jekk inkunu regulari u diliġenti fl-aspetti kollha tal-qima tagħna. (Atti 20:31) Aħna nistgħu nimlew ħajjitna bis-servizz sagru billi naqraw il-Kelma t’Alla u nimmeditaw fuqha kuljum, nitolbu bla waqfien, nistinkaw biex nattendu l-laqgħat kollha, u billi nieħdu kull opportunità biex nagħtu xhieda.—Salm 1:2; Lq. 2:37; Atti 4:20; 1 Tess. 3:10; 5:17.
Qegħdin aħna personalment nagħtu servizz sagru lil Ġeħova? Jekk iva, ix-xewqa tagħna biex nogħġbuh u nagħtu tweġiba lill-akkużi taʼ Satana se tkun riflessa fl-aspetti kollha tal-ħajja taʼ kuljum tagħna. Aħna nistinkaw biex nagħtu glorja lil Ġeħova f’kulma nagħmlu u f’kull sitwazzjoni li nsibu ruħna fiha. Aħna nħallu l-prinċipji tiegħu jiggwidaw il-kliem u l-kondotta tagħna u jiggwidawna fid-deċiżjonijiet li nieħdu. Aħna nuru l-apprezzament tagħna għall-mod kif jieħu ħsiebna u jappoġġana bl-imħabba billi jkollna fiduċja sħiħa fih u nużaw is-saħħa li jkollna fis-servizz tiegħu. U nilqgħu l-pariri u d-dixxiplina tiegħu meta, minħabba l-imperfezzjonijiet tagħna, ma nilħqux il-livelli tiegħu.—Salm 32:5; 119:97; Prov. 3:25, 26; Kol. 3:17; Ebr. 6:11, 12.
Ejja nkomplu ngħixu kull ġurnata għall-glorja t’Alla. Billi nagħmlu dan, aħna se nsibu serħan għal ruħna u se ngawdu l-mod kif Missierna tas-sema jieħu ħsiebna bi mħabba għal dejjem.—Mt. 11:29; Riv. 7:16, 17.
[Kaxxa/Stampa f’paġna 22]
Responsabbiltajiet Mogħtijin Minn Alla
• Itlob spiss.—Rum. 12:12.
• Aqra u studja l-Bibbja u applika personalment dak li titgħallem minnha.—Salm 1:2; 1 Tim. 4:15.
• Qim lil Ġeħova fil-kongregazzjoni.—Salm 35:18; Ebr. 10:24, 25.
• Ħu ħsieb il-membri tal-familja tiegħek materjalment, spiritwalment, u emozzjonalment.—1 Tim. 5:8.
• Ipprietka l-aħbar tajba tas-Saltna, u agħmel dixxipli.—Mt. 24:14; 28:19, 20.
• Ħu ħsieb is-saħħa fiżika, spiritwali, u emozzjonali tiegħek, li jinkludi wkoll li tippjana rikreazzjoni bnina.—Mk. 6:31; 2 Kor. 7:1; 1 Tim. 4:8, 16.
• Ħu ħsieb ir-responsabbiltajiet fil-kongregazzjoni.—Atti 20:28; 1 Tim. 3:1.
• Ħu ħsieb id-dehra tad-dar u tas-Sala tas-Saltna tiegħek.—1 Kor. 10:32.
[Kaxxa/Stampa f’paġna 23]
Urihom Konsiderazzjoni
• Aħwa mdaħħlin fiż-żmien.—Lev. 19:32.
• Xi ħadd li qed isofri minn marda fiżika jew emozzjonali.—Prov. 14:21.
• Membru tal-kongregazzjoni li għandu bżonn urġenti taʼ xi ħaġa li tistaʼ tipprovdilu.—Rum. 12:13.
• Membru tal-familja tiegħek.—1 Tim. 5:4, 8.
• Ħu li mititlu l-mara.—1 Tim. 5:9.
• Anzjan li jaħdem iebes fil-kongregazzjoni tiegħek.—1 Tess. 5:12, 13; 1 Tim. 5:17.