Inagew-agew ya Usaren so Bilay Yo Parad Kigloriaan na Dios

“IPANONOT mo pa’d siak kapag kabuasan so agmanguman a panangarom,” so impikasi na salmistan David ed kinen Jehova. “Iturom pa’d siak so dalan a nepeg kon laen.” (Sal. 143:8, Maung a Balita) Sano ombangon kayo ed kabuasan tan misalamat ed si Jehova lapud balon agew na bilay, kasin singa si David et kekerewen yo ed si Jehova so panangigiya to sano manggagawa kayo na desisyon, tan sano mamipili kayo na sankaabigan a kiwas? Andi duaruwan ontan so gagawaen yo.

Bilang dedikadon lingkor nen Jehova, “balanglan mamangan odino oniinum odino manggagawa [itayo] na antokaman ni,” panggunaetan tayon gawaen “so amin a bengatla parad kigloriaan na Dios.” (1 Cor. 10:31, NW) Namomoria tayo a say paraan na inagew-agew a panagbilay tayo et nayarin mangigalang odino agmangigalang ed si Jehova. Amta tayo met ya ibabaga na Salita na Dios ya “agew tan labi” et aakusaan nen Satanas iray agagi nen Kristo, tan aliwan sikara labat, noagta pati amin a lingkor na Dios ed dalin. (Apo. 12:10) Sirin, determinado itayon mamaneknek a palso iray akusasyon nen Satanas, tan paliketen tayo so puso nen Jehova panamegley na pangiyapay na sagradon serbisyo ed mangatatawen ya Ama tayo diad “agew tan labi.”​—Apo. 7:15; Uli. 27:11.

Konsideraen tayo pa so duaran importantin paraan no panon tayon nausar so kada agew na bilay tayo parad kigloriaan na Dios. Say unona et lalanoren toy pangiletneg na dugan prayuridad, tan say komadua et nipaakar ed panangipanengneng na konsiderasyon ed arum.

Pambilay Unong ed Sipan Tayo

Sanen indedika tayoy bilay tayo ed si Jehova, imbalikas tayoy impapuson pilalek a manlingkor ed sikato. Insipan tayo met ed sikato a manakar itayo ed saray dalan to diad “agew tan labi,” on, legay bilay. (Sal. 61:5, 8) Panon tayo sirin a natoor itan a sipan? Panon tayon nipatnag so sigpot puson panangaro ed si Jehova kada agew?

Malinlinew ya akasulat ed Biblia iray responsabilidad ya iilaloan nen Jehova a sumpalen tayo. (Deu. 10:12, 13) Say arum ed saraya et akasulat ed kahon ya apauloan na  “Inter na Dios Iran Responsabilidad,” diad pahina 22. Sarayan asainmin et importante lapud nanlapu iraya ed Dios. Panon tayon desidien no anto so iprayuridad tayo sano manbansag so duara odino onsulok ni ed sarayan responsabilidad?

Iyuuna tayo ed bilay so sagradon serbisyo, a mangilalaktip ed panagaral na Biblia, pikakasi, saray Kristianon pantitipon, tan say ministeryo tayo. (Mat. 6:33; Juan 4:34; 1 Ped. 2:9) Balet, aliwan sarayan espiritual a bengatla labat so gagawaen tayo’d sanagew. Kaukolan tayo met ya iyeskedyul so pantrabaho, paneskuela, tan dakel ni ran kimey ed ayaman tayo. Anggaman ontan, gagawaen tayoy anggaay nayarian tayo a mangiyeskedyul ed sekular a trabaho tan arum niran aktibidades pian ag-amperen na saratan so sagradon serbisyo tayo a singa say iyatendi ed saray Kristianon pantitipon. Alimbawa, no manplaplano itayon manbakasyon, seguroen tayon agnaapektoan na satan so iyatendi tayo ed bisita na manangasikaso na sirkito, agew na espisyal ya asemblea, sirkiton asemblea, odino distriton kombension. No maminsan, sarag tayon pambansagen iray responsabilidad tayo. Singa bilang, nayarin gawaen a proyekto na pamilya tayo so panlinis ed Kingdom Hall odino legan na panangugto diad trabaho tan eskuelaan et sarag tayon pulongan iray katrabaho odino kaeskuelaan tayo. On, kada manggawa itayo na desisyon, a singa say pananap na trabaho, paneskuelaan, odino pikaaroan, labay tayon say mangimpluensya ed sikatayo et say prayuridad tayo  ed bilay, salanti, say panagdayew ed si Jehova, say maaron Ama tayo.​—Ecl. 12:13.

Ipanengneng so Konsiderasyon ed Arum

Labay nen Jehova ya ipatnag tayoy panangiyansakit ed arum, tan manggawa na maong parad pankaabigan da. Si Satanas balet et iyaalibansa toy inkasiblet. Say mundo to et napno na totoon ‘maaro ed saray lamalaman da tan maaro ed saray likeliket,’ ontan met ed totoon ‘mantatanem na nipaakar ed laman dan dili.’ (2 Tim. 3:1-5; Gal. 6:8) Dakel met so mangibabaliwala ed epekto na saray kagagawa ra ed arum. Tan walad amin a pasen iray “gawa na laman.”​—Gal. 5:19-21.

Talagan midumaan a tuloy so ugali na saramay papakiwasen na masanton espiritu nen Jehova a mangipatnag na aro, kaabigan, tan kamaongan diad pidedeneng da’d arum! (Gal. 5:22, NW) Ibabaga na Biblia ya iyuna tayo so pankaukolan na arum imbes a say sikatayo. Kanian ipapatnag tayoy interes ed balang sakey, balet ta manaalwar itayo pian agnapibabalian iray personal a bengatla. (1 Cor. 10:24, 33; Fil. 2:3, 4; 1 Ped. 4:15) Ipapatnag tayoy peteg a konsiderasyon ed saray kapananisiaan tayo. Balet ta panggunaetan tayo met so ontulong ed saray agmananisia. (Gal. 6:10) Kasin walaray pankanawnawa a nipanengneng yoy kaabigan ed saramay napipilimogan yo?​—Nengnengen so kahon ya  “Ipanengneng ed Sikaray Konsiderasyon,” diad pahina 23.

 Agtayo lambengat ipapatnag so konsiderasyon ed espisyal iran panaon odino diad apili iran situasyon. (Gal. 6:2; Efe. 5:2; 1 Tes. 4:9, 10) Imbes, regular tayon aamtaen so kipapasen na arum tan lawas itayon akaparaan ya ontulong, anggaman aliwan mainomay so panggawa ed satan. Labay tayoy magmaliw a mabunlok ed antokaman a walad sikatayo, salanti, panaon, materyal a kaykayarian, eksperiensya, tan kakabatan. Papaseguroan itayo nen Jehova a no mabulos itayon mangiter ed arum, sikatoy mabulos met a mangiter ed sikatayo.​—Uli. 11:25; Luc. 6:38.

Sagradon Serbisyo ed “Agew tan Labi”

Talaga kasin posible so pangiyapay na sagradon serbisyo ed si Jehova diad “agew tan labi”? On, diad pagmaliw tayon regular tan makuli ed amin ya aspekto na panagdayew tayo. (Gawa 20:31) Nausar tayo so bilay tayo ed sagradon serbisyo diad panamegley na inagew-agew a pambasa tan pandalepdep ed Salita na Dios, panggunaet a naatendian so amin a pantitipon, tan panganamot ed amin a pankanawnawa pian makapanpulong.​—Sal. 1:2; Luc. 2:37; Gawa 4:20; 1 Tes. 3:10; 5:17.

Kasin personal tayon iyaapay ed si Jehova irayan sagradon serbisyo? No ontan, say pilalek tayon mamaliket ed sikato tan mangitarya na ebat ed saray akusasyon nen Satanas et napatnagan ed amin ya aspekto na inagew-agew a kabibilay tayo. Panggugunaetan tayon igloria si Jehova diad amin a gagawaen tayo tan ed amin a kipapasen a kipapaarapan tayo. Aabuloyan tayo iray prinsipyo to a mangigiya ed panagsalita, kondukta, tan panagdesisyon tayo. Ipapatnag tayoy apresasyon tayo ed maaron panangasikaso tan suporta to diad sigpot a panmamatalek tayo ed sikato tan panguusar ed biskeg tayo a panlingkor ed sikato. Tan aawaten tayoy simbawa tan disiplina to, sano lapud ag-inkaperpekto et agtayo nadampot iray estandarte to.​—Sal. 32:5; 119:97; Uli. 3:25, 26; Col. 3:17; Heb. 6:11, 12.

Itultuloy tayo so pambilay ya inagew-agew parad kigloriaan na Dios. Diad ontan, makaromog itayoy pakainawaan na kamarerwa tayo tan napanggayagaan tayo ed andi-anggaan so maaron panangasikaso na mangatatawen ya Ama tayo.​—Mat. 11:29; Apo. 7:16, 17.

[Kahon/Saray litrato ed pahina 22]

 Inter na Dios Iran Responsabilidad

• Maparanay a manpikasi.​—Roma 12:12.

• Basaen tan aralen so Biblia, tan iyaplika.​—Sal. 1:2; 1 Tim. 4:15.

• Pangidayew ed si Jehova diad kongregasyon.​—Sal. 35:18; Heb. 10:24, 25.

• Itarya so materyal, espiritual, tan emosyonal a pankaukolan na pamilya.​—1 Tim. 5:8.

• Ipulong so maong a balita na Panarian, tan manggaway babangatan.​—Mat. 24:14; 28:19, 20.

• Asikasoen so pisikal, espiritual, tan emosyonal a bunigas tayo, a mangilalaktip ed pangiyarunsa na maabig iran panagligliwaan.​—Mar. 6:31; 2 Cor. 7:1; 1 Tim. 4:8, 16.

• Pangasikaso ed saray responsabilidad diad kongregasyon.​—Gawa 20:28; 1 Tim. 3:1.

• Pangasikaso ed kipapasen na abung tan Kingdom Hall tayo.​—1 Cor. 10:32.

[Kahon/Litrato ed pahina 23]

 Ipanengneng ed Sikaray Konsiderasyon

• Maedad lan agi.​—Lev. 19:32.

• Sakey a walaay pisikal odino emosyonal a sakit.​—Uli. 14:21.

• Membro na kongregasyon a mankakkaukolan ed tulong a niiter yo.​—Roma 12:13.

• Kapamilyaan yo.​—1 Tim. 5:4, 8.

• Kapananisiaan ya inatey so asawa to.​—1 Tim. 5:9.

• Makulin elder ed kongregasyon yo.​—1 Tes. 5:12, 13; 1 Tim. 5:17.