Duim Samting Evriday for Praisem God

DAVID prea olsem long Jehovah: “Evri morning plis iu mekem mi tingim wei wea iu kaen tumas and lovem mi. . . . Plis iu showim mi wei wea mi mas followim.” (Ps. 143:⁠8) Taem iu wekap long morning and iu thankiu long Jehovah from hem mekem iu laef long nara day moa, waswe, iu askem Jehovah for helpem iu long wanem iu bae disaedem and for duim stret samting olsem David hem duim? Ia, masbi iu duim olsem tu.

From iumi dedicate long Jehovah, nomata iumi “kaikai or drink or duim eni nara samting,” iumi “duim evri samting for praisem God.” (1 Cor. 10:31) Iumi savve samting wea iumi duim evriday savve mekhae long Jehovah or nomoa. Bible hem sei tu long “day and naet” Satan accusim olketa brata bilong Christ and evriwan wea worshipim God. (Rev. 12:10) Dastawe iumi laek for worshipim Dadi bilong iumi long heven “day and naet” mekem iumi savve showimaot wanem Satan talem hem no tru and for Jehovah hapi long iumi.​—⁠Rev. 7:⁠15; Prov. 27:⁠11.

Iumi bae storyim tufala important samting wea iumi savve duim for praisem God evriday. First samting hem for duim olketa samting wea important and mek-tu samting hem for tingim narawan.

Duim Wanem Iumi Promisim

Taem iumi dedicate long Jehovah, iumi showimaot iumi laek tumas for worshipim hem. Iumi promisim Jehovah tu hao “evriday” iumi bae duim olketa samting wea hem laekem. (Ps. 61:​5, 8) So wanem nao bae iumi duim for showimaot long God iumi duim wanem iumi promisim? Wanem nao iumi savve duim evriday for showimaot iumi barava lovem Jehovah?

Long Bible Jehovah talem iumi wanem hem laekem iumi for duim. (Deut. 10:​12, 13) Box long page 22 wea sei “Wanem God Laekem Iumi for Duim” hem storyim samfala samting hia. Evri samting hia hem important bikos God nao talem iumi for duim. Taem iumi mas duim samfala samting hia long semtaem, hao nao bae iumi savve which wan nao barava important for duim firstaem?

Barava important samting long laef bilong iumi hem for worshipim Jehovah, wea hem nao wei for studyim Bible, prea, go long olketa meeting, and duim ministry. (Matt. 6:​33; John 4:​34; 1 Pet. 2:⁠9) Bat iumi bae no duim olketa samting for worshipim Jehovah long full day. Iumi mas waka for selen, go long skul, and duim tu staka nara samting long haos. Nomata olsem, taem iumi waka for selen and duim olketa nara samting, olketa samting hia mas no stopem iumi for worshipim God, wea wanfala nao hem for go long olketa meeting. And taem iumi plan for holiday, iumi no laek missim olketa visit bilong circuit overseer, spesol assembly, circuit assembly, or distrik convention. Samfala taem maet iumi savve duim tufala samting long semtaem. Maet evriwan long famili savve waka tugeta for klinim Kingdom Hall. Or maet long lunch taem iumi savve preach long olketa wea iumi waka witim or long brek taem iumi savve preach long olketa wea iumi skul witim. Tru tumas, taem iumi disaedem wanem waka nao for iumi duim, which skul nao for iumi go long hem, and hu nao for iumi fren witim, samting wea iumi disaedem mas no spoelem  wei wea iumi worshipim Jehovah, Dadi bilong iumi long heven.​—⁠Eccl. 12:⁠13.

Tingim Narawan

Jehovah laekem iumi for tingim narawan and duim gud samting for olketa. Bat Satan mekhae long wei for man tingim hemseleva nomoa. Pipol long world ‘lovem olketa seleva, laekem tumas hapitaem’ and “duim olketa samting wea body laekem.” (2 Tim. 3:​1-5; Gal. 6:⁠8) Staka pipol nating tingim hao samting wea olketa duim savve spoelem narawan. Pipol evriwea long world duim “olketa nogud samting.”​—⁠Gal. 5:​19-​21.

Bat pipol wea holy spirit bilong Jehovah leadim olketa no duim datwan. Olketa lovem pipol, kaen long olketa, and duim gudfala samting for olketa! (Gal. 5:​22) Bible talem iumi for tingim narawan firstaem bifor iumi tingim iumiseleva. Dastawe iumi duim olketa samting wea showimaot iumi interest long narawan bat iumi no poke-nose long wanem hem duim. (1 Cor. 10:​24, 33; Phil. 2:⁠3, 4; 1 Pet. 4:​15) Iumi tingim olketa Christian brata and sista, bat iumi laek helpem tu pipol wea no worshipim Jehovah. (Gal. 6:​10) Waswe, iu savve duim eni samting tuday for showimaot iu kaen long narawan?​—⁠Lukim box “Tingim Narawan” long page 23.

Iumi tingim olketa narawan no long wanfala  spesol taem nomoa or from wanfala samting hem happen. (Gal. 6:2; Eph. 5:2; 1 Thess. 4:​9, 10) Bat evriday iumi laek for luksavve long samting wea kasem olketa narawan and willing for helpem olketa, nomata sapos datwan bae mekem iumi no savve duim nao samting wea iumi laek for duim. Iumi laek givim taem, samting wea iumi garem, and iusim savve bilong iumi for helpem narawan. Jehovah talem sapos iumi kaen long narawan, hem tu bae kaen long iumi.​—⁠Prov. 11:25; Luke 6:⁠38.

Worshipim God “Day and Naet”

Waswe, man savve worshipim Jehovah “day and naet”? Ia, hem savve duim olsem taem hem evritaem duim gud olketa samting for worshipim God. (Acts 20:31) Iumi worshipim Jehovah “day and naet” taem iumi readim Bible evriday and ting raonem, prea evritaem, go long evri meeting, and iusim evri chance for preach.​—⁠Ps. 1:2; Luke 2:​37; Acts 4:⁠20; 1 Thess. 3:​10; 5:​17.

Waswe, iumi duim olketa samting hia for worshipim Jehovah? Sapos olsem, olketa samting wea iumi duim evriday bae showimaot iumi laek for mekem Jehovah hapi and wanem Satan talem hem no tru. Iumi laek praisem Jehovah long evri samting wea iumi duim and long eni samting wea happen long laef bilong iumi. Iumi laek followim toktok bilong Jehovah long samting wea iumi talem, wei bilong iumi, and eni samting wea iumi disaedem. Taem iumi barava trustim Jehovah and iusim strong bilong iumi for worshipim hem, datwan showimaot iumi tinghae long wei wea hem lukaftarem and sapotim iumi. From iumi no perfect, iumi hapi for hem kaonselem and disciplinem iumi taem iumi sin.​—⁠Ps. 32:​5; 119:97; Prov. 3:​25, 26; Col. 3:​17; Heb. 6:​11, 12.

Evriday iumi laek duim samting for praisem God. Taem iumi duim olsem, datwan bae strongim iumi and Dadi bilong iumi long heven bae lukaftarem gud iumi.​—⁠Matt. 11:29; Rev. 7:​16, 17.

[Box/Piksa long page 22]

Wanem God Laekem Iumi for Duim

• Prea evritaem.​—⁠Rom. 12:⁠12.

• Readim and studyim Bible, and followim wanem iumi readim.​—⁠Ps. 1:2; 1 Tim. 4:⁠15.

• Worshipim Jehovah witim olketa brata and sista long kongregeson.​—⁠Ps. 35:18; Heb. 10:​24, 25.

• Provaedem wanem famili needim, helpem olketa for fren gud witim Jehovah, and tingim feeling bilong olketa.​—⁠1 Tim. 5:⁠8.

• Preachim gud nius abaotem Kingdom, and helpem pipol for kamap disaepol.​—⁠Matt. 24:​14; 28:⁠19, 20.

• Lukaftarem gud body bilong iumi, gohed fren gud witim Jehovah, and duim samting for mekem iumi hapi, olsem for garem hapitaem.​—⁠Mark 6:​31; 2 Cor. 7:1; 1 Tim. 4:​8, 16.

• Duim olketa waka long kongregeson.​—⁠Acts 20:28; 1 Tim. 3:⁠1.

• Lukaftarem and klinim gud haos bilong iumi and Kingdom Hall.​—⁠1 Cor. 10:⁠32.

[Box/​Piksa long page 23]

Tingim Narawan

• Olo Christian brata or sista.​—⁠Lev. 19:⁠32.

• Man wea sik long body or long feeling.​—⁠Prov. 14:⁠21.

• Wanfala long kongregeson wea barava needim samting wea iu fit for givim.​—⁠Rom. 12:⁠13.

• Wanfala long famili bilong iu.​—⁠1 Tim. 5:​4, 8.

• Christian brata or sista wea hasband or waef bilong hem dae.​—⁠1 Tim. 5:⁠9.

• Elder long kongregeson wea waka hard.​—⁠1 Thess. 5:​12, 13; 1 Tim. 5:⁠17.