Tukuy ima rurasqanchikwan Diosta hatunchasun

REY Davidmi orakuspan nirqa: ‘Kuyapayakuynikimantayá tutapaytaraq uyariykachillaway [. . .], imaynam kawsanayta yachaykachillaway’, nispa (Sal. 143:8). Yaqachá qampas sapa punchaw hatarispayki kawsachisusqaykimanta Jehová Diosta agradecekuspa David hina mañakunki, yanapasuptiki allinta tanteanaykipaq chaynataq allinkunata ruranaykipaqpas.

Cristianokunaqa “mikuspapas tomaspapas otaq huk rikchaqta ruraspapas” kallpanchakunchikmi “Dios honrasqa kananpaq” (1 Cor. 10:31). Sapa punchaw kawsasqanchikpim Jehová Diostaqa hatunchachwan otaq penqaypi churachwan. Chaynataq Bibliapa nisqanman hinaqa yachanchikmi Cristopa wawqenkunata hinaspa Diosta kay Pachapi serviqkunatapas Satanas ‘tuta-punchaw’ acusasqanta (Apo. 12:10). Hinaptinqa, Satanaspa llulla kasqanta qawachisun hinaspa Diospa sonqonta kusichisun ‘tuta-punchaw’ servispanchik (Apo. 7:15; Pro. 27:11).

Qawasunchik imaynatam Diosta sapa punchaw hatunchanamanta. Puntata, yachasun imakunam vidanchikpi puntapi kananmanta hinaspa hukkunapi interesakusqanchikta haykapipas qawachinamanta.

Imakuna puntapi churanamantawan Diosman qokusqanchikmanta

Diosman qokuspanchikqa nirqanchikmi serviy munasqanchiktawan ñanninpi ‘sapa punchaw’ purinanchikpaq otaq tukuy vidanchikpi servinanchikpaq (Sal. 61:5, 8). ¿Imatam ruranchik nisqanchikta cumplinapaq? ¿Imaynatam sapa punchaw qawachinchik Diosta sonqomanta kuyasqanchikta?

Bibliam willawanchik Dios ñoqanchikmanta ima munasqanta (Deu. 10:12, 13).  “Diospa kamachiwasqanchikkuna” niq recuadropim rikurimuchkan imakuna ruranamanta (qaway 22 paginata). Huk otaq iskay kamachikuykuna rurananchik kaptinqa, ¿imaynatam yachachwan mayqenta puntapi churanamanta?

Cristianokunaqa Dios servisqanchikwan tupaqtam puntapiqa churanchik, ejemplopaq: Biblia estudiayta, orakuyta, huñunakuyman riyta hinaspa predicaytapas (Mat. 6:33; Juan 4:34; 1 Ped. 2:9). Ichaqa manamá iñiyninchik allin kananpaq kaqkunallatachu tukuy tiempoqa rurananchik. Llamkananchikpas, estudiananchikpas hinaspa wasipi rurananchikkunapas kachkanmi. Chayna kaptinpas kallpanchakunchikmi chay ruraykuna huñunakuyman rinanchikta hinaspa Dios servisqanchikpi rurayninchikkunata mana harkananpaq. Ejemplopaq, samarinapaq mayman rinanchikpaq tanteaspaqa segurakunchikmi congregacionta watukuq ancianopa visitamusqanwan chaynataq mayqan asambleanchikkunawanpas mana tupananpaq. Wakinpiqa rurayninchikkunata rurastinmi Dios serviypi rurayninchikkunatapas cumplichwan. Ejemplopaq, kallpanchakuchwanmi Huñunakunanchik Salonta familiantin chuyanchanapaq otaq llamkayninchikpi hinaspa escuelanchikpi chawpi punchawta predicanapaq. Chaynataq llamkayta maskaspa, educakunapaq piensaspa, amistadkunata akllaspa  hinaspa imamantapas tanteaspaqa kuyakuq Dios serviypi rurayninchikkunatam puntapi churana (Ecl. 12:13).

Hukkunapaq allinkunata rurasun

Diosqa munanmi hukkunapaq allinkuna rurananchikta. Satanasmi ichaqa mana munanchu chayna kananchikta. Munaychakusqan runakunaqa kanku ‘kikillanpaq munaqkunam’, ‘kikinkupa munasqallanpi purikuqkunam’ hinaspa ‘aychapa munasqallanta’ ruraqkunam (2 Tim. 3:1-5; Gal. 6:8). Yaqa llapan runakunam mana piensankuchu rurasqankuwan hukkunata dañanankumantaqa. Maylawpipas runakunaqa ‘aychapa munasqallantam’ ruranku (Gal. 5:19-21).

Diospa espiritunman hina kawsaqkunam ichaqa hukkunata kuyapayaspa llakipayanku (Gal. 5:22). Bibliaqa ninmi hukkunapa necesitasqankuta ñoqanchikpamanta puntapi churanapaq. Chaymi imata ruraspapas qawachinchik hukkunapi interesakusqanchikta, ichaqa cuidakunchikmi vidankupi mana chaqrukunapaq (1 Cor. 10:24, 33; Fili. 2:3, 4; 1 Ped. 4:15, NM). Cristianokunaqa iñiqmasinchikpa allinnintam puntata maskanchik, ichaqa kallpanchakunchikmi lliwpaq allinkunata ruranapaqpas (Gal.  6:10). ¿Pikunata yanapanapaqmi kunallan piensachwan? (Qawariy  “Yanapanata necesitaqkuna” niq recuadrota.)

Manam imapas kaptillanchu otaq huk kutillatachu hukkunapaq allinkunataqa rurananchik (Gal. 6:2; Efe. 5:2; 1 Tes. 4:9, 10). Aswanqa sasa kaptinpas sapa punchawyá kallpanchakusun allinkunata ruranapaq hinaspa chaylla yanapakuq kananchikpaqpas. Allinmi tiemponchikta, kapuqninchikta hinaspa imapas yachasqanchikkunata servichikuyqa. Diosqa prometewanchikmi qokuykuq kaptinchik paypas qowananchikmanta (Pro. 11:25; Luc. 6:38).

Diosta ‘tuta-punchaw’ servisun

¿Imaynatam Diosta ‘tuta-punchaw’ serviyta atichwan? Allinta hinaspa mana samaykuspa Dios serviypi tukuy rurayninchikwan cumplispam (Hech. 20:31). Chaypaqqa sapa punchawmi Bibliata leespa yuyaymanana, haykapipas orakuna, huñunakuyman mana faltakuspa rina hinaspa maypipas predicana (Sal. 1:2; Luc. 2:37; Hech. 4:20; 1 Tes. 3:10; 5:17).

¿Kallpanchakunchikchu chaynata servinapaq? Chayna kaptinqa, lliwpim qawachisun Jehová Diosta kusichiy munasqanchikta chaynataq Satanaspa llulla kasqantapas. Kallpanchakusun imata ruraspapas hinaspa maypi kaspapas Diosta hatunchanapaq. Bibliapa nisqanman hina rimasun, rurasun hinaspa tanteasunpas. Chaynataq yanapawasqanchikmantawan cuidawasqanchikmanta Diosta agradecekusun, tukuy sonqonchikwan confiaspa hinaspa tukuy kallpanchikwan servispa. Chaymantapas, pantaptinchik consejawasqanchiktawan corregiwasqanchikta kasukusun (Sal. 32:5; 119:97; Pro. 3:25, 26; Col. 3:17; Heb. 6:11, 12).

Tukuy rurasqanchikyá Dios hatunchasqa kananpaq kachun. Chaynata ruraspaqa hawkayaytam tarisun, kusikusuntaqmi Jehová Dios wiñaypaq waqaychawasqanchikmanta (Mat. 11:29; Apo. 7:16, 17).

[22 kaq paginapi dibujokuna hinaspa recuadro]

 Diospa kamachiwasqanchikkuna

• Sapa kutim orakuna (Rom. 12:12).

• Bibliatam leena, estudiana hinaspa nisqanta kasukuna (Sal. 1:2; 1 Tim. 4:15).

• Congregacionpim Jehová Diosta alabana (Sal. 35:18; Heb. 10:24, 25).

• Familiatam mantienena, Diosmanta yachachina hinaspa imayna kasqankupi interesakuna (1 Tim. 5:8).

• Diospa Gobiernonmantam predicana hinaspa yachachina (Mat. 24:14; 28:19, 20).

• Cuidananchikmi cuerponchiktawan iñiyninchikta hinaspa imayna kasqanchiktapas kusirikunapaq tiempochakuspa (Mar. 6:31; 2 Cor. 7:1; 1 Tim. 4:8, 16).

• Congregacionpi rurayninchikwanmi cumplina (Hech. 20:28; 1 Tim. 3:1).

• Wasinchiktawan Salonninchiktam cuidana (1 Cor. 10:32).

[23 kaq paginapi dibujo hinaspa recuadro]

 Yanapanata necesitaqkuna

• Congregacionpi yuyaq iñiqmasinchik (Lev. 19:32).

• Onqoywan ñakariq otaq llumpay llakisqa tarikuq (Pro. 14:21).

• Imatapas ñoqanchikmanta necesitaq iñiqmasinchik (Rom. 12:13).

• Familianchik (1 Tim. 5:4, 8).

• Viudo otaq viuda iñiqmasinchik (1 Tim. 5:9).

• Congregacionpi allin llamkaq anciano (1 Tes. 5:12, 13; 1 Tim. 5:17).