Lliwta ruwasun Diosta hatunchanapaq

REY Davidmi khaynata Diosmanta mañakurqan: “Tutallamanta munakuyniykita reparachiway [...]. Maynintachus purinayta yachachiway”, nispa (Sal. 143:8). Qanpas David hinapaschá sapa tutamanta Jehová Diosman graciasta qonki kawsaymanta, yanapaynintapas mañakunki chay p’unchaypi imakuna ruwanaykipaqpas.

Cristianokunaqa ‘mikhushaspapas, ukyashaspapas, imataña ruwashaspapas lliwtan ruwanchis Diosta hatunchanapaq’ (1 Cor. 10:31). Allintan yachanchis ruwayninchiswan Jehová Diosta hatunchasqanchista otaq pisichasqanchistapas. Yachallanchistaqmi Saqraq ruwasqantapas. Bibliaq nisqan hinaqa paymi “tuta-p’unchay” Cristoq wawqenkunata Diospa serviqninkunatapas huchachashan (Apo. 12:10). Chayraykun tukuy atisqanchista ruwananchis Saqraq llulla kasqanta rikuchinanchispaq, kallpachakunanchistaq Diospa sonqonta kusirichinapaq ‘tuta-p’unchay’ payllata servispanchis (Apo. 7:15; Pro. 27:11).

Chaymi yachasunchis imaynatas sapa p’unchay Jehová Diosta hatunchasunman chayta. Ñawpaqta yachasunchis ima ruwaykunachus aswan importante kasqanta, chaymantapas yachallasuntaq hukkunaq allinninta qhawarishanallamanta.

Promesanchistan hunt’ana

Lliwmi Jehová Diosman prometekurqanchis: “Tukuy sonqoywanmi servisqayki, ñannillaykipitaq ‘sapa p’unchay’ purisaq”, nispa (Sal. 61:5, 8). ¿Imatan ruwananchis chay promesanchista hunt’anapaq? ¿Imaynatan sapa p’unchay rikuchisunman Diosta munakusqanchista?

Bibliapin sut’ita willawanchis ima ruwananchistachus Jehová Dios munan chayta (Deu. 10:12, 13). 22 paginapi “¿Imakuna ruwananchistan Dios munan?” nisqa recuadropin willawanchis askha ruwananchiskunamanta, chaykunataqa Diosmi kamachiwanchis, chaymi ancha importante chaykuna ruway. Ichaqa, ¿mayqenkunataq aswan importanteri?

Cristianokunapaqqa Dios serviymi aswan importante, chaymi Bibliata estudianchis, Diosmanta mañakunchis, huñunakuyman predicacionmanpas rinchis (Mat. 6:33; Juan 4:34; 1 Ped. 2:9). Ichaqa manan chaykunallapaqchu tiemponchis kanan; tiemponchisqa kanallantaqmi llank’anapaq, escuelaman rinapaq, wasipi ruwananchiskunata hunt’ananchispaqpas. Chaywanpas tukuy atisqanchistan ruwananchis ama imapas Dios serviyninchista hark’awananchispaq, chaymi huñunakuykunamanpas mana faltayta rinanchis. Maymanpas viajayta munashanchis chayqa, manan qonqananchischu hayk’aqchus watukuq umalli hamunanta, nitaq qonqananchischu hatun huñunakuyninchiskunatapas. Mayninpiqa tupachisunmanmi Dios serviyninchista huk ruwayninchiskunawan. ¿Imaynatan chayta ruwasunman? Yaqapaschá Huñunakuy Wasi limpiaq familiantin risunman. Chaymantapas mikhuna horaspi llank’aqmasinchiskunata, escuelapi compañeronchiskunatapas predicasunmanmi. Chhaynaqa, llank’anata maskhanapaq, estudionchista akllakunapaq, pikunawanchus amigota ruwanapaq, imataña ruwanapaqpas yuyarinanchismi Dios serviyninchis aswan importante kasqanta (Ecl. 12:13).

 Hukkunaq allinninta qhawarisunchis

Jehová Diosninchismi munan hukkunaq allinninta maskhananchista. Saqran ichaqa munan kikillanchispaq imatapas maskhananchista. Paypa kamachisqan runakunaqa “paykuna kikillankutan munakunku”, ‘aycha kusichiyllapin puriyta munanku’, ‘aychankuq millay munasqallantataq tarpunkupas’ (2 Tim. 3:1-5; Gál. 6:8). Yaqa llapan runamanmi mana imapas qokunchu ruwayninkuwan runamasinku ñak’arichiyta. Chaymi pachantinpi rikukun “runaq sonqonpa munasqan” ruwaykuna (Gál. 5:19-21).

Diospa espiritunman hina kawsaq cristianokunan ichaqa munakuywan runamasinkuta qhawarinku. ¡Ima munaymi chayqa! (Gál. 5:22.) Biblian kamachiwanchis runamasinchispa allinninta ñawpaqta maskhananchispaq. Chayraykun hukkuna hukkunawan sumaqta qhawarinakunchis, ichaqa mana hukpa ruwananman chapukuspalla (1 Cor. 10:24, 33; Fili. 2:3, 4; 1 Ped. 4:15). Cristianokunaqa ñawpaqtan qhawarinchis iñiqmasinchiskunaq allinninta, kallpachakunchistaqmi mana iñiqkunaq allinnintapas qhawarinapaq (Gál. 6:10). ¿Maskhasunchismanchu kunanpuni pillatapas yanapananchispaq? (Qhawariy  23 paginapi  “¿Pikunatan yanapasunman?” nisqata.)

Tukuy tiempon qhawarichinanchis sumaq sonqo kasqanchista (Gál. 6:2; Efe. 5:2; 1 Tes. 4:9, 10). Arí, kallpachakunanchismi sapa p’unchay runamasinchista yanapakunanchispaq, sasaña ñoqanchispaq kaqtinpas. Mana mich’akuspan tiemponchiswan, kaqninchiskunawan, imapas yachay atisqanchispiwan yanapasunman. Sichus qoykukuq kasunchis chayqa, Jehová Diospas qoykukuqllataqmi kanqa ñoqanchispaqpas (Pro. 11:25; Luc. 6:38).

“Tuta-p’unchay” Diosta servisun

Rikusqanchis hina, “tuta-p’unchaymi” Diosta servinanchis. ¿Atikunmanchu chay? Arí. Chaypaqmi kallpachakuna Dios serviyninchispi, chayman hinataq kawsananchispas (Hech. 20:31). Chaymi Bibliata leenanchis, yuyaymanananchis, Diosmantapas mañakunanchis; kallpachakunanchistaqmi huñunakuykunaman rinapaq, predicanapaqpas (Sal. 1:2; Luc. 2:37; Hech. 4:20; 1 Tes. 3:10; 5:17).

¿Chhaynatachu Jehová Diosta sapankanchis servishanchis? Chhayna kaqtinqa, tukuy imatapas Diosta kusichinanchispaq hatunchananchispaq hinan ruwananchis, chhaynapin Saqrata p’enqachisun. Paypa nisqanman hinan rimananchis, ruwananchispas; imata decidinanchispaqtaq payta yuyarinanchis. Chaymantapas Jehová Diostan agradecekunanchis yanapawasqanchismanta, cuidawasqanchismanta; chaypaqmi tukuy sonqowan paypi confiananchis, tukuy kallpanchiswantaq servinanchis. Sichus imapipas pantasunman chaytaq, hap’ikunanchismi anyawasqanchista yuyaychawasqanchistapas (Sal. 32:5; 119:97; Pro. 3:25, 26; Col. 3:17; Heb. 6:11, 12).

Chhaynaqa Diosta hatunchananchispaq hinan kawsananchis. Chhaynapin “samakuyta” tarisunchis, hanaq pachapi kaq Yayanchistaq wiñaypaq cuidawasunchis (Mat. 11:29; Apo. 7:16, 17).

[22 paginapi fotokuna recuadropiwan]

¿Imakuna ruwananchistan Dios munan?

• Sapa kuti paymanta mañakushananchistan (Rom. 12:12).

• Bibliata estudiaspa chayman hina kawsananchistan (Sal. 1:2; 1 Tim. 4:15).

• Iñiqkunawan kuska alabananchistan (Sal. 35:18; Heb. 10:24, 25).

• Familianchista allinta uywananchistan, hinallataq Dios serviyninkupi yanapananchista (1 Tim. 5:8).

• Predicananchistan, Cristo qatikunankupaq runakunata yanapananchistan (Mat. 24:14; 28:19, 20).

• Payman k’askakunanchistan, qhalilla kanapaq cuidakunanchistan, chaypaqmi tiempota horqona kusirikunapaq (Mar. 6:31; 2 Cor. 7:1; 1 Tim. 4:8, 16).

• Llaqtanpi ruwananchiskunata hunt’ananchistan (Hech. 20:28; 1 Tim. 3:1).

• Wasinchista, Huñunakuy Wasitapas cuidananchistan (1 Cor. 10:32).

[23 foto recuadropiwan]

 ¿Pikunatan yanapasunman?

• Kurak iñiqmasinchiskunata (Lev. 19:32).

• Onqosqakunata, llakisqa kaqkunatawan (Pro. 14:21, NM).

• Imanchistapas necesitaq iñiqmasinchista (Rom. 12:13).

• Familianchispi kaqkunata (1 Tim. 5:4, 8).

• Viudokunata, viudakunata (1 Tim. 5:9).

• Allin llank’aq umallita (1 Tes. 5:12, 13; 1 Tim. 5:17).