Gebroiki ibri dei fu yu libi fu gi Gado glori

A PSALM SKRIFIMAN David, ben begi Yehovah: „Meki mi yere na mamanten taki sma e fruteri fa yu bun. . . . Sori mi a pasi di mi musu waka” (Ps. 143:8). Te yu e wiki te mamanten èn yu e taki Yehovah tangi gi a nyun dei, dan a de so taki yu e teki na eksempre fu a psalm skrifiman David? Yu e aksi Yehovah fu tiri yu so taki yu kan teki koni bosroiti, èn so taki yu kan handri na a yoisti fasi? A no de fu taki, dati yu e du dati.

Leki futuboi di gi densrefi abra na Yehovah, wi e meki muiti fu ’du ala sani fu gi Gado glori, awinsi wi e nyan noso dringi’ (1 Kor. 10:31). Wi sabi taki a fasi fa wi e libi ibri dei, kan gi Yehovah glori, noso porinen. Wi e hori na prakseri tu taki Satan e taki lei fu den brada fu Krestes, soleki fa Gado Wortu e tyari kon na krin. Fu taki en leti, Satan e taki lei fu ala den futuboi fu Gado na grontapu, èn a e du dati „dei nanga neti” (Openb. 12:10). Fu dati ede, wi abi a fasti bosroiti fu du santa diniwroko gi wi hemel Tata „dei nanga neti”. Na so wi kan sori taki Satan na wan leiman, èn wi kan meki Yehovah en ati prisiri.—Openb. 7:15; Odo 27:11.

Meki wi poti prakseri syatu na tu prenspari fasi fa wi kan gi Gado glori ibri dei fu wi libi. A fosi sani di wi sa luku, na fa wi kan poti den moro prenspari sani na a fosi presi na ini wi libi. Èn a di fu tu sani di wi sa luku, na fa wi kan sori taki wi e broko wi ede nanga trawan.

Tan du san yu pramisi Gado

Di wi gi wisrefi abra na Yehovah, dan wi sori en taki wi wani dini en nanga wi heri ati. Wi pramisi Yehovah tu taki „ibri dei”, wi ben o du san a feni bun, iya, wi ben o du dati fu têgo (Ps. 61:5, 8). Fa wi kan tan du san wi pramisi Yehovah? Fa wi kan sori Yehovah ibri dei taki wi lobi en nanga wi heri ati?

Gado Wortu e sori krin sortu frantwortu Yehovah wani taki wi musu tyari (Deut. 10:12, 13). Wan tu fu den frantwortu dati kari na ini a faki di nen  „Den frantwortu di Gado gi wi”, na tapu bladzijde 22. Na Gado gi wi ala den frantwortu disi, èn dati meki den de prenspari. Efu wi musu poti prakseri na tu, noso moro fu den frantwortu disi na a srefi ten, dan fa wi kan bosroiti sortu wan fu den moro prenspari?

A santa diniwroko fu wi na a moro prenspari sani gi wi. Dati meki wi e leisi Bijbel, wi e begi, wi e go na den Kresten konmakandra, èn wi e teki prati na a preikiwroko (Mat. 6:33; Yoh. 4:34; 1 Petr. 2:9). Ma wi no kan gebroiki a heri dei fu du den sani dati. Wi musu wroko tu, wi musu go na skoro, èn wi musu du difrenti sortu wroko na oso tu. Toku wi e du ala san wi man fu sorgu taki a grontapuwroko fu wi èn den tra sani di wi abi fu du, no e tapu wi fu teki prati na a santa diniwroko fu wi. Iya, wi no sa meki den sani dati tapu wi fu go na den Kresten konmakandra. Fu eksempre, te wi e seti sani fu go nanga fakansi, dan wi e sorgu taki wi de na den konmakandra te a kring-opziener e kon na a gemeente, wi e sorgu tu taki wi e go na a spesrutu dei konmakandra, na a kring konmakandra, èn na a distrikt kongres. Son leisi, wi kan du wan tu fu den frantwortu fu wi na a srefi ten. Fu eksempre, te wi musu krin a Kownukondre zaal, dan wi kan du dati makandra nanga wi osofamiri. Noso te wi abi pauze na wroko noso na skoro, dan wi kan gi kotoigi na sma na wi wrokope, noso na pikin na skoro. Iya, ibri leisi te wi musu bosroiti sortu wroko wi o du, na sortu skoro wi o go, noso sortu mati wi o teki, dan wi wani poti a moro prenspari sani na a fosi presi na ini wi libi, èn dati na a anbegi fu Yehovah, wi lobi-ati Tata.—Preik. 12:13.

 Sori taki yu e broko yu ede nanga trawan

Yehovah wani taki wi e broko wi ede nanga trawan, èn taki wi e du bun gi trawan. Ma Satan e gi sma deki-ati fu prakseri densrefi nomo. A grontapu fu en lai nanga sma di „lobi densrefi nomo”, sma di „lobi prisiri”, èn „sma di e du san a sondu skin wani” (2 Tim. 3:1-5; Gal. 6:8). Furu sma no e prakseri sortu krakti den sani di den e du, abi tapu trawan. „Den sani di sondu libisma e du” de fu si na ala sei.—Gal. 5:19-21.

A no de fu taki, dati den wan di e meki a santa yeye fu Yehovah tiri den, de heri tra fasi! Den sma disi e sori lobi nanga switifasi gi trawan, èn den e du bun gi trawan (Gal. 5:22). Gado Wortu e taki dati wi no musu suku wi eigi bun, ma a di fu trawan. Fu dati ede, wi e du sani fu sori trawan taki wi e broko wi ede nanga den, ma wi no e bumui na ini den tori fu den (1 Kor. 10:24, 33; Fil. 2:3, 4; 1 Petr. 4:15). Wi e broko wi ede spesrutu nanga wi Kresten brada nanga sisa. Ma wi e meki muiti tu fu yepi tra sma di no abi a srefi bribi leki wi (Gal. 6:10). Fu san ede yu no e suku okasi tide fu sori switifasi gi wan sma di yu e miti?—Luku a faki di nen  „Sori den taki yu e broko yu ede nanga den”, na tapu bladzijde 23.

A no soso na spesrutu ten, noso na ini spesrutu situwâsi wi musu broko wi ede nanga trawan  (Gal. 6:2; Ef. 5:2; 1 Tes. 4:9, 10). Nôno, wi musu poti prakseri na a situwâsi fu trawan ibri dei, èn wi musu de klariklari fu yepi den, awinsi a no makriki gi wi fu du dati. Wi musu de klariklari fu gebroiki iniwan sani di wi abi fu yepi trawan, awinsi na wi ten, wi gudu, wi ondrofeni, nanga a koni di wi abi. Wi kan de seiker taki, te wi de klariklari fu yepi trawan, dan Yehovah sa de klariklari tu fu blesi wi.—Odo 11:25; Luk. 6:38.

Wi musu du santa diniwroko „dei nanga neti”

A tru taki wi kan du santa diniwroko gi Yehovah „dei nanga neti”? Iya, dati kan. Èn a fasi fa wi kan du dati, na te wi e tyari ala den frantwortu di abi fu du nanga na anbegi fu wi. Wi musu du dati doronomo, èn wi musu du en fayafaya tu (Tori. 20:31). Wi kan de fayafaya na ini a santa diniwroko te wi e leisi Gado Wortu ibri dei, te wi e denki dipi fu den sani di wi e leisi, te wi e begi doronomo, te wi e meki muiti fu de na ala den konmakandra, èn te wi e gebroiki ibri okasi fu gi sma kotoigi.—Ps. 1:2; Luk. 2:37; Tori. 4:20; 1 Tes. 3:10; 5:17.

A de so taki ibriwan fu wi e du santa diniwroko gi Yehovah na a fasi disi? Efu dati de so, dan ala sani di wi e du na ini wi aladei libi o sori taki wi wani plisi Yehovah, èn taki wi wani sori taki Satan na wan leiman. Wi e meki muiti fu gi glori na Yehovah na ini ala san wi e du, èn awinsi na ini sortu situwâsi wi de. Wi e meki den gronprakseri fu en tiri wi te a abi fu du nanga a fasi fa wi e taki èn nanga a fasi fa wi e tyari wisrefi. Boiti dati, te wi musu teki bosroiti, dan wi e hori den gronprakseri fu en na prakseri tu. Fu di wi abi warderi gi a lobi-ati fasi fa Yehovah e sorgu wi èn e horibaka gi wi, meki wi e frutrow na en tapu dorodoro. Boiti dati, wi e du ala san wi man na ini a diniwroko fu en. Èn te wi leki sondu libisma e meki fowtu, dan wi de klariklari fu teki a rai nanga a trangaleri di a e gi wi.—Ps. 32:5; 119:97; Odo 3:25, 26; Kol. 3:17; Hebr. 6:11, 12.

Meki wi tan gebroiki ibri dei fu wi libi fu gi Gado glori. Te wi e du dati, dan wi sa kisi krakti baka, èn wi lobi-ati hemel Tata sa sorgu gi wi fu têgo.—Mat. 11:29; Openb. 7:16, 17.

 [Faki/​Prenki na tapu bladzijde 22]

Den frantwortu di Gado gi wi

• Begi doronomo.—Rom. 12:12.

• Leisi èn studeri Bijbel, èn du san yu e leri na ini Bijbel.—Ps. 1:2; 1 Tim. 4:15.

• Anbegi Yehovah makandra nanga a gemeente.—Ps. 35:18; Hebr. 10:24, 25.

• Sorgu gi yu osofamiri, yepi den fu kon abi wan moro tranga bribi, èn sorgu taki den e firi koloku.—1 Tim. 5:8.

• Preiki a bun nyunsu fu a Kownukondre, èn meki disipel.—Mat. 24:14; 28:19, 20.

• Wi musu sorgu taki wi e tan gosontu, taki wi e tan abi wan bun matifasi nanga Gado, èn taki wi e firi koloku. Disi wani taki tu dati wi musu meki ten fu abi prisiriten di fiti.—Mark. 6:31; 2 Kor. 7:1; 1 Tim. 4:8, 16.

• Wi musu tyari den frantwortu di wi abi na ini a gemeente.—Tori. 20:28; 1 Tim. 3:1.

• Wi musu sorgu taki wi oso nanga a Kownukondre zaal e tan bun.—1 Kor. 10:32.

 [Faki/​Prenki na tapu bladzijde 23]

Sori den taki yu e broko yu ede nanga den

• Wan owru brada noso sisa.—Lef. 19:32.

• Wan sma di siki, noso di e firi brokosaka srefisrefi.—Odo 14:21.

• Wan memre fu a gemeente di yu man yepi nanga wan sani di a abi tranga fanowdu.—Rom. 12:13.

• Wan memre fu yu osofamiri.—1 Tim. 5:4, 8.

• Wan Kresten brada noso sisa di lasi en patna na ini dede.—1 Tim. 5:9.

• Wan owruman di e wroko tranga na ini a gemeente fu yu.—1 Tes. 5:12, 13; 1 Tim. 5:17.