Eren Akaa Ken Uma Wou Hanma Iyange Sha ci u Icivir i Aôndo

ORPASALMI Davidi ngise er msen hen Yehova ér: “Erem m̱ ungwa erdoo Wou pepe, . . . Tesem gbenda u me za yô.” (Ps. 143:8) Ka wea nder pepe wea sugh Yehova er a nder a we ken sev mbu hev nahan, ú zamber a na wer a tese u akaa a u tsua u eren man gbenda u ú hembe doon u eren a la kpa? Ka u er nahan keng.

Er se tsegh ayol a ase sha ci u civir Yehova yô, ka ‘sea yaan kwagh, shin sea maan kwagh shin sea eren nyityô kwagh kpaa,’ se nôngon sha afatyô wase cii ser se ‘eren akaa cii sha ci u icivir i Aôndo.’ (1 Kor. 10:31) Se fa ser akaa a se eren ken uma wase ayange ayange la aa va Yehova a iwuese shin aa laha iti na. Shi se umbur kwagh u Mkaanem ma Aôndo ma kaa ér Satan ngu senden anmgbianev mba Kristu, kua mbacivir Aôndo sha tar cii ityough, “atetan kpaa, tugh kpaa” la. (Mpa. 12:10) Sha ityôkyaa ne yô, se kange ishima ser se na i saan Yehova iyol shi se tese ser mbamsende mba Satan mbara ka mba aiegh sha u eren Ter wase u sha la icighan tom “tugh man tetan kpaa.”—Mpa. 7:15; Anz. 27:11.

De se nenge sha igbenda i vesen ihiar zevera, er se fatyô u eren akaa hanma iyange sha ci u icivir i Aôndo yô. Gbenda u hiihii yô, ka u tsuan akaa a á hembe lun a inja u eren la hiihii man u sha uhar yô, ka u wan mbagenev ikyo.

Er Se Kure Iceghzwa Yase La Yô

Er se tsegh ayol a ase sha ci u Yehova yô, se tese ser sar se tsung u civir un. Shi se tôndo zwa a Yehova ser se zenden sha igbenda na “ayange ayange” gbem sha won. (Ps. 61:5, 8) Tsô, se kure iceghzwa la nena? Se tesen hanma sev ser Yehova doo se ishima a ishima yase cii nena?

Mkaanem ma Aôndo tese ityom i Yehova a soo ér se er la wang. (Dut. 10:12, 13) Í nger ityom ne ken ngeren u a lu a itinekwagh ér  “Ityom i Aôndo a Ne Se La,” ngu sha peeji 22. Ityom ne cii ka Aôndo a ne se ye, nahan ngi a inja kpishi. Kpa, shighe u i gbe u ú er ityom shon ihiar shin i hembe nahan yô, se er nan ve se tsua ú i gbe u se hii erenee?

Ka se tsua u eren icighantom wase la hiihii, man icighantom ne wa Bibilo i henen man msen u eren man u zan mbamkombo mba Mbakristu kua tom u pasen kwagh ker. (Mat. 6:33; Yoh. 4:34; 1 Pet. 2:9) Nahan kpa, ityom i ken jijingi ia fatyô u tôôn se iyange jimin ga. Gadia ka i gba u se yar tom u uke shi se za makeranta shi se er akaa agen kpishi hen ya. Nahan cii kpa, ka se nôngo sha afatyô wase cii se sôr shighe u yaren tom u uke shi eren akaa agen la se ver sha er akaa ne aa yange se icighantom wase, er u zan mbamkombo mba Mbakristu nahan ga yô. Ikyav i tesen yô, ka sea waan iyol i zan memyol yô, se sôr shighe u memyol la se ver vough sha er se bunde sema mkohol u yange i môm shin mkohol u kiriki shin mkohol u vesen ga, shin se lu her shighe u ortamen u sôron atôônanongo a ve tiônnongo inya la yô. Ashighe agen yô, alaghga se fatyô u eren ityom yase igen ihiar hen shighe môm. U tesen ikyav yô, se fatyô u eren tom u esen Iyou i Tartor la vea tsombor wase, shin shighe u i dugh ahumbe ken makeranta shin hen ijiirtom yase yô, se fatyô u pasen mba ve ze makeranta a vese shin mba ve yaren tom ijiir i môm a vese la kwagh. Sha kpôô yô, ka a gba u se tsua kwagh u se er ken uma wase, er u keren tom u uke shin tsuan kwagh u se hen ken makeranta, shin tsuan azende nahan, ka i doo u se de ser kwagh u a hembe lun a  inja cii la, ka mcivir u Yehova, Ter wase u dooshima je la, a̱ mgbegha se u tsuan kwagh u i doo u se er yô.—Orpa. 12:13.

Wa Mbagenev Ikyo

Yehova soo ér se wa mbagenev ikyo shi se eren a ve doo doo. Kpa Satan gema samber a ieren i or wan iyol i nan ikyo tseegh la kpishi. Tar u Satan ne ngu a ior kpishi mba ve lu “mbawan ayol a ve ikyo tseegh” man “mba iember i iyolough i hembe doon ve” kua mba ve ‘lôôn ken iyol’ yô. (2 Tim. 3:1-5; Gal. 6:8) Ior kpishi ka ve hen er aeren a ve a benden a mbagenev la ga. “Aeren a iyolough” nga ken igbar hanma ijiir cii.—Gal.5:19-21.

Nenge er ieren i ior mba jijingi u Yehova a mgbeghan ve u tesen dooshima shi lun sar sar shi eren a mbagenev dedoo la i kaha kposo sha wono! (Gal. 5:22) Mkaanem ma Aôndo kaa a vese ér se wa akaa a mbagenev kpaa ikyo. Sha nahan yô, se mba eren akaa a tesen ér kwagh u ior gba se ishima, kpa ka se palegh u wan ave sha akaa a kwagh wase a lu sha mi ga yô. (1 Kor. 10:24, 33; Fil. 2:3, 4; 1 Pet. 4:15) Ka mba nan jighjigh a vese imôngo mbara je ka se hemba wan ve ikyo ye. Nahan kpa, mbananjighjighga kpa ka se nôngo tsung se wase ve. (Gal. 6:10) U fatyô u keren ian ken iyange i nyian ne eren erdoo a ma or u ú zough a nan kpa?—Nenge ngeren u a kaa ér  “Wa Ve Ikyo” la, ngu sha peeji 23.

 Mba veren a ver shighe shin ma mlu u or a lu ker ve nana wa orgen ikyo ga. (Gal. 6:2; Ef. 5:2; 1 Tes. 4:9, 10) Kpa hanma iyange yô, ka se nôngo se fa akaa a a ze mbagenev iyol la, nahan se wa iyol se kegh a kegh u wasen ve shighe u ve pin se yô, ka a lu hen shighe u hagher se je kpaa. Se soo ser se naan mbagenev nyityôkwagh i se lu a mi cii mgbeghaa, ka shighe wase man akaa a ase man mfe u se lu a mi sha ma kwagh kua kwaghfan kpaa. Yehova pase se wang ér, aluer se mba nan ior kwagh, tangen iyol ga yô, se kpa una naan se kwagh a iyoltangen shio.—Anz. 11:25; Luka 6:38.

Eren Icighan Tom “Tugh man Tetan”

Se fatyô u eren Yehova tom tugh man atetan kpa? Een, se fatyô u eren nahan sha u lun a gbashima sha hanma kwagh u se eren ken mcivir wase la cii, shi eren un a uwergban shio. (Aer. 20:31) Se fatyô u ivin uuma asev a icighantom sha u ôron shi gbidyen kwar sha Mkaanem ma Aôndo ayange ayange man u eren msen hanma shighe shi nôngon tsung zan mbamkombo man u pasen kwagh hanma shighe u ian i dugh cii.—Ps. 1:2; Luka 2:37; Aer. 4:20; 1 Tes. 3:10; 5:17.

Se asange asange se mba eren Yehova imba tom ne kpa? Aluer se mba eren nahan yô, hanma kwagh u se eren ken uma wase cii una tese ér sar se u eren ishima i Yehova shi ponon mbaaie mba Satan la kpaa. Se mba nenge tsung ser se na Yehova icivir ken hanma kwagh u se eren man hanma mlu u se nyer ker cii. Ka se de ser atindiakaa a Yehova a hemen se ken kwaghôron wase man ieren yase shi a̱ wase se sha er se tsua akaa a se soo u eren la sha inja yô. Se mba tesen iwuese yase sha ikyo i wan i Yehova a we se man msue u a suen se la sha u suur sha a na vangertiôr shi eren un tom a agee a ase cii. Er se yen yô, ka se ngohol kwaghwan u Yehova kua tsaha na shighe u se er isholibo yô.—Ps. 32:5; 119:97; Anz. 3:25, 26; Kol. 3:17; Heb. 6:11, 12.

Yô, de se za nen hemen u eren akaa ken uma wase hanma iyange sha ci u icivir i Aôndo. Aluer se mba eren nahan yô, se zua a mmem ken asema a ase man mkor u Ter wase u sha gbem sha won.—Mat. 11:29; Mpa. 7:16, 17.

[Ngeren u kiriki/Ufoto u sha peeji 22 la]

 Ityom i Aôndo a Ne Se La

• Eren msen hanma shighe.—Rom. 12:12.

• Ôron Bibilo shi henen i kpaa, nahan eren kwagh u ú henen la.—Ps. 1:2; 1 Tim. 4:15.

• Civir Yehova ken tiônnongo.—Ps. 35:18; Heb. 10:24, 25.

• Se kuren ugbayol mba icombor yase, mba sha iyol man mba ken jijingi man mba ken ishima kpaa.—1 Tim. 5:8.

• Pase loho u dedoo u Tartor shi gema ior ve hingir mbahenen.—Mat. 24:14; 28:19, 20.

• Se eren ityom i kuren ugbayol asev, shi se waan ikyo sha mlu wase u ken jijingi man mbamzeyol asev mba ken ishima, man kwagh ne wa u tsuan iemberyolough i injaa kpa ker.—Mar. 6:31; 2 Kor. 7:1; 1 Tim. 4:8, 16.

• Nenge sha ityom i ken tiônnongo.—Aer. 20:28; 1 Tim. 3:1.

• Ver ishima sha mluashe u ya wase man Iyou i Tartor.—1 Kor. 10:32.

[Ngeren u kiriki/Foto u sha peeji 23 la]

 Wa Ve Ikyo

• Anmgbianev mba nomso shin mba kasev mba ve bee iyol la.—Lev. 19:32.

• Or u nan ye ican a angev shin mzeyol u ken ishima yô.—Anz. 14:21.

• Anmgbian u ken tiônnongo u kwagh a gbe nan hange hange sha ma kwagh u ú fatyô u wasen nan a mi yô.—Rom. 12:13.

• Mba ve lu ngô môm a we la.—1 Tim. 5:4, 8.

• Orkristu u nom shin kwase u nan a kpe yô.—1 Tim. 5:9.

• Ortamen u nan eren tom hen tiônnongo wou taveraa yô.—1 Tes. 5:12, 13; 1 Tim. 5:17.