Sáamsamal unaj k-nojbeʼenkúuntik Dios

LE SALMISTA Davidoʼ tu yaʼalaj ich payalchiʼ: «Tsʼáaten in wojéelt a yaakunaj tiʼ le jaʼatskab kʼiinoʼoboʼ [...]. Beet in wojéeltik bix unaj in kuxtal» (Sal. 143:8). Sáamsamal ken aajkecheʼ maʼ xaaneʼ ka tsʼáaik nib óolal tiʼ Jéeoba úuchik u síiktech le kuxtaloʼ, yéetel jeʼex Davideʼ, ka kʼáatik xan tiʼ ka u yáantech a beet baʼax utstutʼaan.

Ken jaankoʼon, ken ukʼulnakoʼon bey xan ken k-beet uláakʼ wa baʼaxeʼ, k-ilik beetik «tuláakal utiaʼal u nojbeʼenil Jajal Dios» (1 Cor. 10:31). K-ojleʼ le baʼax k-beetik sáamsamaloʼ jeʼel u taasik nojbeʼenil wa subtsilil tiʼ u kʼaabaʼ Jajal Dioseʼ. K-ojel xaneʼ, jeʼex u yaʼalik le Bibliaoʼ, u Kʼaasilbaʼaleʼ «yéetel kʼiin» bey xan «yéetel áakʼab» táan u takik u pool le máaxoʼob kun binoʼob kaʼan bey xan le uláakʼ máakoʼob ku meyajtkoʼob Diosoʼ (Apo. 12:10). Le oʼolaleʼ toʼoneʼ k-kʼáat eʼes maʼ jaaj le baʼax ku yaʼalik u Kʼaasilbaʼaloʼ yéetel k-kʼáat kiʼimakkúunt u yóol Dios ikil k-beetik baʼax utstutʼaan «bul kʼiin yéetel bul áakʼab» (Apo. 7:15; Pro. 27:11).

Koʼox ilik kaʼapʼéel baʼal unaj k-beetik utiaʼal k-nojbeʼenkúuntik Jéeoba sáamsamal. Le yáaxoʼ yaan yil yéetel le baʼaxoʼob unaj k-tsʼáaik táanil ichil k-kuxtaloʼ, yéetel le u kaʼapʼéeloʼ yaan yil yéetel bix unaj k-eʼesik utsil tiʼ u maasil.

Unaj k-tsʼáaik táanil k-meyajtik Dios

Le ka t-kʼubakba tiʼ Jéeobaeʼ, t-aʼalajtiʼ yaan k-meyajtik tuláakal u kʼiiniloʼob k-kuxtal. T-aʼalaj xan tiʼeʼ «sáamsamal» yaan k-ilik beetik baʼax utstutʼaan (Sal. 61:5, 8). ¿Baʼax túun táan k-beetik utiaʼal k-béeykuntik le baʼax t-aʼalaj tiʼoʼ? ¿Bix k-eʼesik sáamsamal jach tu jaajil k-yaabiltmaj Jéeoba?

Le Bibliaoʼ jach chíikaʼan u yeʼesik baʼax u kʼáat Dios ka k-beete (Deu. 10:12, 13). Teʼ cuadro «Le baʼaxoʼob u kʼáat Dios ka k-beetoʼ» ku chíikpajal jujumpʼéel tiʼ le baʼaloʼob jach unaj u beetik le máax meyajtik Diosoʼ (ilaʼak le táan juʼun 22). Baʼaleʼ wa yaan kaʼapʼéel baʼax tiʼ le ku yaʼalik le cuadro ku kʼaʼabéettal a beetkoʼ, ¿bix jeʼel a wilik máakalmáak unaj a tsʼáaik táanileʼ?

Toʼoneʼ k-ilik tsʼáaik táanil ichil k-kuxtal k-meyajtik Dios, ichil lelaʼ táakaʼan k-xokik le Bibliaoʼ, k-payalchiʼ, k-bin teʼ muchʼtáambaloʼoboʼ yéetel k-kʼaʼaytaj (Mat. 6:33; Juan 4:34; 1 Ped. 2:9). Baʼaleʼ maʼ u kʼáat u yaʼal wa chéen le ken k-beetiʼ. Kʼaʼabéet xan k-bin meyaj, k-bin xook yéetel k-beetik u meeyjul k-otoch. Kex beyoʼ k-ilik tsʼáaik táanil k-bin muchʼtáambal yéetel k-beetik uláakʼ baʼaloʼob yaan yil yéetel u meyajtaʼal Dios. Jeʼex ken k-tukult k-bin xíimbaleʼ, k-ilik maʼ k-bin tu kʼiiniloʼob yaan u xíimbaltaʼal le múuchʼulil tumen le superintendente tiʼ circuitooʼ mix tu kʼiiniloʼob ken yanak asamblea. Yaan kʼiineʼ le táan a beetik upʼéel baʼax u kʼáat Jéeobaeʼ, jeʼel xan u páajtal a táakbesik uláakʼ baʼax u kʼáat ka k-beeteʼ. Jeʼex ken a beet limpieza teʼ Najil Reinooʼ, yantech xan u páajtalil a máansik upʼéel jatsʼuts súutukil yéetel a familia; teʼ tuʼux xan ka meyaj wa teʼ tuʼux ka xookoʼ jeʼel xan u yantaltech u súutukil utiaʼal a kʼaʼaytajeʼ. Tiʼ jeʼel baʼaxak ka k-chʼaʼatukult k-beetik ichil k-kuxtaleʼ (jeʼex ken k-yéey tuʼux ken k-meyaj, tak tuʼux kun náakal k-xook wa máaxoʼob ken k-amigotoʼobeʼ) maʼ unaj u tuʼubultoʼoneʼ unaj  k-tsʼáaik táanil k-meyajtik Jéeoba, le Máax beetmailoʼonoʼ (Ecl. 12:13).

Unaj k-kaxtik u yutsil u maasil

Jéeobaeʼ u kʼáat ka tuukulnakoʼon yoʼolal u maasil yéetel ka k-áantoʼob. Baʼaleʼ u Kʼaasilbaʼaleʼ u kʼáat ka u kaxt máak chéen u yutsil. Le kʼasaʼan yóokʼol kaabaʼ chuup yéetel máakoʼob tsʼuʼutoʼob, chéen ku yaabiltkoʼob «u kʼaakʼas tsʼíibolaloʼob» yéetel ku binoʼob tu paach le «baʼax utstutʼaan [u] luʼumkabil wíinkli[loʼobeʼ]» (2 Tim. 3:1-5; Gal. 6:8). Óoliʼ tuláakal máakeʼ baʼaliʼ u kʼáattiʼ u beetik u muʼyaj u maasileʼ. Tuláakal tuʼux yaan «máaxoʼob ku binoʼob tu paach le kʼaakʼas tsʼíibolaloʼoboʼ» (Gal. 5:19-21).

Baʼaleʼ le máaxoʼob ku chaʼik u nuʼuktaʼaloʼob tumen u kiliʼich muukʼ Dioseʼ ku yeʼesik u yutsiloʼob yéetel u yaabilajoʼob tiʼ u maasil (Gal. 5:22). Le Bibliaoʼ ku yaʼalik unaj k-kaxtik táanil u yutsil u maasil. Le oʼolaleʼ bey k-ilik beetkoʼ, baʼaleʼ k-kanáantik xan maʼ k-oksikba ichil u kuxtal mix máak (1 Cor. 10:24, 33; Fili. 2:3, 4; 1 Ped. 4:15). Toʼoneʼ k-ilik k-áantik maases k-sukuʼunoʼob, baʼaleʼ k-ilik xan k-eʼesik utsil tiʼ u maasil máakoʼob (Gal. 6:10). ¿Jeʼel wa u páajtal a kaxtik tiʼ máax ken a weʼes a wutsil teʼ kʼiinaʼ? (Ilaʼak le cuadro  «Le máaxoʼob unaj k-eʼesik utsil tiʼoboʼ», teʼ táan juʼun 23.)

Unaj k-ilik eʼesik utsil tuláakal súutukil, maʼ chéen ken k-il kʼaʼabéetiʼ (Gal. 6:2; Efe. 5:2; 1 Tes. 4:9, 10). Unaj k-tuukul sáamsamal tiʼ u maasil utiaʼal k-ilik bix jeʼel u páajtal k-áantkoʼobeʼ. Unaj u meyajtoʼon k-tiempo, le baʼax k-ojel beetoʼ bey xan le baʼaxoʼob yantoʼon utiaʼal k-eʼesik utsil tiʼ u maasiloʼ. Kʼaʼajaktoʼoneʼ wa k-eʼesik utsil tiʼ u maasileʼ, Jéeobaeʼ yaan xan u yeʼesik u yutsil toʼon (Pro. 11:25; Luc. 6:38).

Unaj k-meyajtik Dios «bul kʼiin yéetel bul áakʼab»

Baʼaleʼ ¿bix jeʼel u páajtal k-meyajtik Dios «bul kʼiin yéetel bul áakʼab[eʼ]»? Lelaʼ jeʼel u páajtal k-beetik ken k-jach tsʼáa táanil ichil k-kuxtal k-adorartikeʼ (Hch. 20:31). Utiaʼal k-beetkeʼ unaj k-xokik sáamsamal le Bibliaoʼ, k-tuukul tiʼ baʼax ku yaʼalik, k-payalchiʼ mantatsʼ, k-ilik k-bin tiʼ tuláakal le muchʼtáambaloʼoboʼ yéetel k-kʼaʼaytaj jeʼel tuʼuxak ka yanakoʼoneʼ (Sal. 1:2; Luc. 2:37; Hch. 4:20; 1 Tes. 3:10; 5:17).

¿Táan wa k-jach kʼubik k-óol meyajt Jéeoba? Wa beyoʼ, ichil tuláakal k-kuxtaleʼ yaan k-ilik beetik baʼax utstutʼaan yéetel yaan k-eʼesik chéen táan u tuus Satanás. Yaan xan k-tsʼáaik nojbeʼenil tiʼ Jéeoba yéetel tuláakal baʼax k-beetik. Tiʼ tuláakal baʼax k-aʼalik yéetel tiʼ baʼax k-chʼaʼatuklik k-beetkeʼ unaj k-chaʼik u nuʼuktikoʼon le baʼax ku yaʼalik le Bibliaoʼ. Tsʼoʼoleʼ unaj k-kʼubik k-óol tiʼ Jéeoba yéetel k-tsʼáaik k-óol meyajte, tumen letiʼeʼ jach ku tsʼáaik tuláakal baʼax kʼaʼabéettoʼon. Wa xan k-beetik upʼéel baʼax kʼaaseʼ, unaj k-chaʼik u tsolnuʼuktikoʼon utiaʼal u tojkíintik k-beel (Sal. 32:5; 119:97; Pro. 3:25, 26; Col. 3:17; Heb. 6:11, 12).

Le oʼolaleʼ sáamsamal unaj k-ilik k-nojbeʼenkúuntik Dios. Wa k-beetikeʼ yaan k-kaxtik «jeʼelel» utiaʼal k-kuxtal yéetel yaan k-kanáantaʼal tumen Jéeoba tuláakal u kʼiiniloʼob k-kuxtal (Mat. 11:29; Apo. 7:16, 17).

[U tsolajil le oochel teʼ táan juʼun 22]

Le baʼaxoʼob u kʼáat Dios ka k-beetoʼ

• Ka payalchiʼinakoʼon sáamsamal (Rom. 12:12).

• Ka k-xakʼalxokt le Bibliaoʼ yéetel ka k-beet baʼax ku yaʼalik (Sal. 1:2; 1 Tim. 4:15).

• Ka k-nojbeʼenkúunt Jéeoba teʼ múuchʼuliloʼ (Sal. 35:18; Heb. 10:24, 25).

• Ka k-tsʼáa ichil k-otoch baʼax kʼaʼabéet yéetel ka k-il u maas natsʼkuba k-familia tiʼ Dios (1 Tim. 5:8).

• Ka kʼaʼaytajnakoʼon yéetel ka k-kaʼans uláakʼ máakoʼob (Mat. 24:14; 28:19, 20).

• Ka k-kanáant k-toj óolal, ka k-maas muʼukʼaʼankúunt k-fe yéetel ka k-náays k-óol tiʼ baʼaloʼob maʼalobtak (Mar. 6:31; 2 Cor. 7:1; 1 Tim. 4:8, 16).

• Ka k-beet le meyajoʼob tsʼaʼantoʼon teʼ múuchʼuliloʼ (Hch. 20:28; 1 Tim. 3:1).

• Ka k-kanáant yéetel ka k-pʼat limpioi k-otoch bey xan le Najil Reinooʼ (1 Cor. 10:32).

[U tsolajil le oochel teʼ táan juʼun 23]

Le máaxoʼob unaj k-eʼesik utsil tiʼoboʼ

• Tiʼ le sukuʼunoʼob yéetel le kiikoʼob tsʼoʼok u yantal u jaʼabiloʼoboʼ (Lev. 19:32).

• Tiʼ le máaxoʼob yantiʼob wa baʼax kʼojaʼaniloʼ (Pro. 14:21).

• Tiʼ utúul sukuʼun yaan baʼax jach kʼaʼabéettiʼ jeʼel u páajtal k-áantikeʼ (Rom. 12:13).

• Tiʼ utúul k-láakʼtsilil (1 Tim. 5:4, 8).

• Tiʼ utúul sukuʼun wa kiik tsʼoʼok u kíimil u núup (1 Tim. 5:9).

• Tiʼ utúul anciano jach u tsʼaamaj u yóol u meyajt Dios (1 Tes. 5:12, 13; 1 Tim. 5:17).