Yvága rekávo

NDÉPA rehose yvágape? Hetaiterei hénte oĩva oparupiete ko múndope heʼi ohoseha avei, umíva apytépe oĩ musulmán, hindú, budista, católico ha umi ndorekóiva rrelihión jepe. Mbaʼépa hína pe yvága ohoseha hikuái? Ojeʼe jepi haʼeha peteĩ lugár neporãva ndaiporihápe jeiko asy, ha ojeʼe avei upépe oĩha ñane hénte omanovaʼekue. Péro oĩramo jepe hetaiterei ohoséva yvágape, ndaipóri omanoséva oho pyaʼeve hag̃ua. Mbaʼérepa upéva?

Oimérõ Ñandejára ñandeapóraʼe ñamano ha jaha hag̃ua yvágape, mbaʼérepa upéicharõ nañamanoséi? Oĩ jave peteĩ mbaʼe jaipotaitereíva, ñahaʼarõntema og̃uahẽ pe ára jahupyty hag̃ua. Pór ehémplo peteĩ mitãʼi ikariaʼyse, ha umi ojegustáva omendase. Péro ndaipóri omanoséva oho pyaʼeve hag̃ua yvágape, jajapo guei oimeraẽ mbaʼe jaikoveségui.

Upéicharamo jepe, heta paʼi ha pastór omboʼe sapyʼamínte jaikoha ko yvy ape ári ha upéi jahataha jaiko yvágape. Pór ehémplo peteĩ arzobispo oikóva táva Wáshingtonpe, hérava Theodore Edgar Cardinal McCarrick heʼi: “Ñandejára ñandeapo jaiko hag̃ua yvágape, ndahaʼéi ko yvy ape ári”. Upéicha avei peteĩ omoakãvaʼekue Asociación Nacional de Evangélicos Estados Unidosgua heʼi: “Ñaime ko yvy ape ári ñamombaʼeguasu hag̃ua Ñandejárape ha upéi jahapáta yvágape. Upépe oĩhína ñande róga”.

Péro naentéroi opensa upéicha, peteĩ karai hérava George Barna ojapóva enkuésta rrelihionkuéra rehe heʼi: “Heta mbaʼe ojegueroviáva oikotaha ñamano rire, oñeguenohẽ síne, músika ha novélagui”. Ha ambue pastór Iglesia Episcopalpegua oĩva Florídape heʼi: “La jaikuaa porãva hína, Ñandejára oikoha yvágape ha upévante”. Añetehápe heta hénte oguerovia ohotaha yvágape, ojeʼe rupínte chupekuéra.

Péro oĩ hetave mbaʼe jaikuaaséva. Pór ehémplo: Mbaʼeichagua lugárpa pe yvága? Añete piko Ñandejára ñandeapo jaiko hag̃ua upépe? Máva mávapa ohóta yvágape ha mbaʼépa ojapóta upépe? Koʼág̃a jahecháta mbaʼéichapa la Biblia ombohovái koʼã porandu.

[Komentário oĩva páhina 3-pe]

Mbaʼérepa avave nomanoséi oho pyaʼeve hag̃ua yvágape?