Kukimba Bubine pa Mwanda Utala Mūlu

BUYA’BYOPO kwivwana mulangwe wa kwenda mūlu! Lukulupilo lwa kwendelela na būmi pa kupwa kufwa lushintululwanga mu miswelo palapala na Bamizilma, Bene Hindu, Bene Buda, ba bipwilo bya Kine Kidishitu, ne na bavule bene bampikwa kwitabija. Divule bantu bafwatakanyanga’mba mūlu i kifuko kinengele kadi kya nsangaji mwa kukūlwa ku masusu ne kwitana monka na “baswe bafwile.” Bantu bavule basakanga kwenda mūlu, ino i kutupu usakanga kufwa mwa kwendela’mo. Mwanda waka bidi namino?

Shi twadi batungilwe kufwa ne kwenda mūlu, mwene bantu bavule badi ba kwabila kufwa pamo na mwanuke wabila kutama nansha nsongwa wabila kusongwa? Ino bavule kebasakangapo kufwa.

Nansha nabya, bafundiji banenanga’mba mūlu mo motunenwe kwikala, pano panshi twaile kunanga. Kimfwa, Theodore Edgar McCarrick, wadi Eveke mukatampe wa mu Washington, D.C., umo wa mu bavotanga papa, wanene’mba: “Ketwāpangilwepo kwikala na buno būmi. Twāpangilwe kwenda mūlu.” Mo monka, mukelenge umo wadi mwimaniji wa Kitango kya Ntanda kya Bene Leza kya mu États-Unis, wānene’mba: “Kitungo kya būmi i kutumbija Leza ne kwenda mūlu . . . mwanda mūlu mo mwetu.”

Boba bakulupile kwikala na būmi mūlu pa kupwa kufwa, pavule lwitabijo lwabo lwimanine pa mānga ya bitupu. George Barna, mwimaniji wa sosiete imo ifundanga milangwe ya bipwilo, wamwene’mba bantu bavule betabije “milangwe ya būmi ne kwendelela na būmi pa kupwa kufwa itambile ku milangilo idi mu bintu palapala, kimfwa mafilime, minjiki ne bilembwa bya kufwatakanya.” Mu Floride, pashitele umo wa Episkopa wanene amba: “Ketuyukilepo kintu nansha kimo pa mwanda utala mūlu, ino kyotuyukile i kino amba mo mudi Leza.”

Ino mūlu i mwanda wa mvubu wisambilwe’po mu Bible. Lelo kukwatañana na Kinenwa kya Leza, mūlu i bika? Le muntu wāpangīlwe kwikala mūlu? Shi bantu bendanga mūlu, le i kukalonga’mo bika?

[Bishintuludi pa paje 3]

Mwanda waka bantu bavule basakanga kwenda mūlu, ino bapela’ko kufwa mwa kwendela’mo?