Vân Chungchânga Thudik Zawnna

VANA kal beiseina neih chu thil duhawm tak a ni thei ngei ang le! Thih hnua nun beiseina chu Mosolman te, Hindu te, Buddhist te, Kristianna ram kohhran te, leh sakhaw ngaihsak lo mi tam takte pawhin kawng chi hrang hrangin an nei a ni. Vân chu hrehawm awm tawh lohna leh “hmangaih thi tawhte” nêna intawh lehna hmun, hmun mawi leh nuam tak anga mitthla a ni tlângpui ṭhîn. Chuti chung pawhin, mi tam tak tân chuan he hmân lai thufing hi a dik tlat a ni: Mi tinin vâna kal chu duh ṭheuh mah se, chuta kal tûra thih duh erawh an awm lo, tih hi. Eng nge a chhan?

Thi tûr leh vâna kal tûra siam ni ta ila chuan, naupangte’n puitlin hun an nghâkhlel ang leh nula tlangvâlte’n nupui pasal neih hun an nghâkhlel angin, mi tam tak chuan an thih hun tûr chu an nghâkhlel dâwn lâwm ni? Mahse, thih duh erawh an awm meuh lo.

Chuti chung pawhin, sakhaw thuhriltute chuan he khawvêlah hian khualzin mai kan ni a, vân hi kan awm hlenna tûr hmun a ni an ti tlat tho a ni. Entîr nân, Washington, D.C. archbishop hlui Theodore Edgar Cardinal McCarrick-a chuan: “Leia nung tûra siam kan ni lo. Vâna nung tûra siam kan ni zâwk,” tia a sawi thu târ lan a ni. Chutiang bawkin, U.S. National Association of Evangelicals president hlui pakhat pawhin: “Pathian chawimawi leh vâna kal hi nunin a tum ber a ni . . . vân khi kan in a ni si a,” tia a sawi thu târ lan a ni bawk.

Thih hnua vâna nun beiseitute rinna chuan a tlângpui thuin ṭanchhan nghet a nei mang meuh lo. Sakhaw ngaih dân chungchâng zir chianna company president George Barna-a chuan, mi tam takin “nunna leh thih hnu lama nunna chungchânga an ngaih dân chu cinema, rimawi leh thawnthu ziak ang chi thil chi hrang hrang aṭanga an lâk” a nihzia a hmu chhuak a ni. Florida-a Episcopalian pastor pakhat chuan: “Vân hi Pathian awmna hmun a ni tih bâk chu engmah hriat kan nei lo,” tia a sawi thu târ lan a ni.

Amaherawhchu, vân hi Bible-a chuang thu pawimawh tak pakhat a ni a. Pathian Thu aṭangin vân hi eng ang hmun nge a nih? Mihringte hi vâna nung tûra siam an ni em? Mite vâna an kal a nih chuan, eng nge an han tih dâwn? (w10-E 02/01)

[Phêk 3-naa thu lâk chhuah]

Engvângin nge vâna kal duh an tam hle laiin, chuta kal tûra thih duh erawh an awm meuh thung loh?