Okuovola Otyili Konthele Yeulu

OVANTHU vapondola okuhambukwa unene nekevelelo liokuenda keulu! Ekevelelo liokuti omunthu utualako nomuenyo tyina ankhia litavelwa mononkhalelo mbelikalaila nova Musulumanu, nova Hindu, nova Budista, Ovakristau vomouye, novanyingi vahalekesa esuko mongeleya. Vasoka okuti eulu omphangu imwe ongwa, omu ovanthu vayovolwa kononkhumbi, avekelivasa no “vokuankhia.” Tupu, pala ovanthu ovanyingi, onondaka ombu mbapopiwa kohale ombotyotyili: Aveho vahanda okuenda keulu, mahi, nawike uhanda okunkhia opo endeko. Omokonda yatyi?

Inkha onthue tualingwa pala okunkhia nokuenda keulu, ñgeno ovanthu kavetyihandele unene ngetyi ovana vahanda unene okukula ine ngetyi ovakuendye vahanda unene okunepa ine okunepwa? Mahi, ovanthu ovanyingi kavahande okunkhia.

No ngotyo, ovalongesi vapopia okuti konyima yomuenyo wetu omusupi pano pohi, matukakala keulu. Mongeleka, Theodore McCarrick onkhalamutwe yongeleya wahaundapa vali ko Washington, D.C., wai: “Onthue katuatungilwe pala omuenyo ou tuna pano pohi. Tuatungwa pala okukala keulu. Tupu, Ted Haggard omutumini wapinguako wo U.S. Associação Nacional de Evangélicos, yapopia okuti: “Omuenyo walingua pala okuhivilika Huku nokuenda keulu . . . mokonda, ondyuo yetu okeulu.”

Vana vetavela okuti konyima yononkhia omunthu ukakala nomuenyo keulu, vapaka ekevelelo liavo movipuka vehei nawa. George Barna omutumini wovanthu vaovola omalusoke konthele yonongeleya, watala okuti ovanthu ovanyingi vetavela “omalusoke omuenyo, konyima yononkhia, atuka kosinema, noviimbo nono novela.” Ko Florida onkhalamutwe imwe yongeleya yapopia okuti: “Onthue katutyii natyike konthele yeulu, tutyii vala okuti keulu kukala Huku.”

Tyotyili, eulu liapopiwa unene Mombimbiliya. Ngetyi tyipopia Ondaka ya Huku, eulu likahi ñgeni? Omunthu walingwa pala okukala keulu? Inkha ovanthu onondalawa vaya keulu, oityi ovo mavakalingako?

[Ehangununo liolutalatu pefo 3]

Omokonda yatyi ovanthu ovanyingi vahanda okuenda keulu, mahi, vahanda okunkhia navendeko kavehi?