Kiko Ta e Bèrdat Tokante Shelu?

BIDA den shelu! Esei por ta un speransa masha atraktivo pa hopi hende. Mòslem, hindú, budista, miembro di religionnan di kristiandat i asta hopi hende ku no ta interesá den religion ta kere den bida despues di morto den un òf otro forma. Generalmente, hende ta imaginá nan mes ku shelu ta un lugá di bunitesa i plaser, kaminda hende ta haña alivio di sufrimentu i ta bolbe topa ku nan “sernan kerí ku a muri.” Sinembargo, ounke mayoria di hende ke bai shelu, niun hende no ke muri. Dikon?

Si Dios a krea nos pa muri i bai shelu, bo no ta kere ku lo tabatin mas hende ku lo a deseá di muri meskos ku un mucha ta deseá di bira grandi òf meskos ku un hóben ta anhelá pa kasa? Pero mayoria di hende no ke muri.

Apesar di esei, algun lider religioso ta pretendé ku Dios a krea nos pa bai biba den shelu despues di nos estadia temporal riba tera. Por ehèmpel, Theodore Edgar Kardinal McCarrick, arsobispu emérito di Washington, D.C., a bisa: “Dios no a krea nos pa biba asin’akí. Nos a ser kreá pa biba den shelu.” Di mes manera, un eks-presidente di e Asosiashon Nashonal di Evangelistanan di Merka a bisa: “E propósito di bida ta pa glorifiká Dios i bai shelu . . . pasobra shelu ta nos kas.”

Hende ku ta kere den baimentu di shelu despues di morto, tin masha poko informashon pa basa nan kreensia riba dje. George Barna, presidente di un kompania ku ta analisá opinionnan religioso, a haña sa ku hopi hende ta basa “nan punto di bista tokante bida i un bida despues di morto riba ideanan ku nan a saka for di vários fuente manera pelíkula, músika i buki.” Un pastor episkopal na Flórida a bisa: “Nos no tin niun idea kon shelu ta. E úniko ku nos sa ta ku Dios ta biba einan.”

Sinembargo, shelu ta un tópiko importante den Beibel. Kon shelu ta segun e Palabra di Dios? Dios a krea hende pa biba den shelu? Si hende realmente ta bai shelu, kiko nan ta bai hasi aya?

[Komentario na página 3]

Dikon hopi hende ke bai shelu, pero masha poko di nan ke muri?