O le ā le Mea Moni e Faatatau i le Lagi?

MAʻEU le logoleleia o le faamoemoe o le alu i le lagi! E taofi eseese tagata lotu Musalimi, Hinitū, Puta, tagata o lotu o loo faapea mai o Kerisiano, e oo foʻi i ē e lē fiafia i lotu, e faatatau i le olaga pe a mavae le oti. Ua masani ona manatu i le lagi o se nofoaga matagofie ma fiafia, e maua ai e tagata le mapusaga mai i puapuaga ma toe faatasi ai ma “ē pele ua maliliu.” Ae peitaʻi, o le toʻatele o tagata, ua moni ai le faaupuga e masani ai: E fia ō uma i le lagi, ae e leai se isi e fia oti ina ia alu i le lagi. Aiseā ua faapea ai?

Pe ana foafoaina i tatou e feoti ma ō i le lagi, semanū la e naunau tagata ia feoti e pei ona naunau se tamaitiiti e fia matua, po o se talavou e naunau e faaipoipo. Ae o le toʻatele o tagata e lē fia feoti.

Ae peitaʻi, ua aʻoaʻo e faifeʻau pe a mavae se taimi puupuu i le lalolagi, ona tatou ō atu lea i lo tatou nuu moni o le lagi. O se faaaʻoaʻoga, na sii mai le faamatalaga a Theodore Edga Cardinal McCarrick, o le akiepikopō ua litaea o Washington, D.C., e faapea: “E leʻi faia i tatou e ola i lenei lalolagi. Na faia i tatou ia ola i le lagi.” Na sii mai foʻi le faamatalaga a se peresitene sa iai muamua o le Asosi o le ʻAufaievagelia i Amerika: “O le fuafuaga o le olaga ia viiviia le Atua ma ō i le lagi . . . auā o le lagi o lo tatou nuu moni.”

O i latou e talitonu i se olaga i le lagi pe a oti, e masani ona lē lava faamatalaga e faavae ai lo latou talitonuga. Ua iloa e George Barna, o le peresitene o se kamupani e suʻesuʻeina manatu faalotu, o le toʻatele o tagata ua talia “manatu e uiga i le ola ma le olaga pe a oti, e faavae mai i faamatalaga eseese e maua mai i ata tifaga, musika ma tusi faitau.” Ua sii mai le manatu o se faifeʻau lotu Porotesano i Florida e faapea: “E tatou te lē iloa se mea e uiga i le lagi, pau o lea, o i inā e afio ai le Atua.”

Peitaʻi, o le lagi o se mataupu tāua o loo i le Tusi Paia. E faapeʻī le lagi e tusa ai o le Afioga a le Atua? Pe na faia le tagata e ola i le lagi? Pe afai e ō tagata i le lagi, o ā a latou mea o le a fai i inā?

[Faamatalaga faaopoopo i le itulau 3]

Aiseā e fia ō ai le toʻatele i le lagi, ae e leai se isi e fia oti ina ia alu i le lagi?