Saluwaa Xeelliyaagan Tumay Aybee?

SALUWAA biyo hidootay ay keena ufayssana danddayiyaabee! Isilaamati, Hindduti, Budistteti, Kiristtaane giyo woosa keettaa kaalliya asatinne haymaanootiyaa kallenna daro asatikka hayquwaappe simmin deˈoy deˈees giyo ammanuwaa dumma dumma ogiyan ammanoosona. Asay saluwaa darotoo, “hayquwan shaahettida siiqiyoogeetuura” gayttiyoonne tuggaappe shemppuwaa demmiyo, loˈˈiyaanne ufayssiya soho giidi qoppees. Ubba asay saluwaa baanau koyees; shin yaa baanau hayqqanau koyiya asi baawa. Aybissi?

Nuuni hayqqidi saluwaa baanaadan merettidaba gidikko, issi naˈi diccanau woy issi yelagay machanau amottiyoogaadan daro asay hegaa amottana bessennee? SHin daro asay hayqqanau koyenna.

Hegaadan gidikkokka, guutta wodiyaa saˈan deˈi simmidi, nuuni deˈanaadan halchettiday saluwaa gidiyoogaa sabaaketi yootoosona. Leemisuwau, Waashingten Di Sin issi wode waanna qeese gidida Tiyodor Edgar Karddinal Makariki, “Nuuni merettidoy ha deˈuwaassa gidenna. Nuuni saluwan deˈanau merettida” giidoogee odettiis. Hegaadankka, Yu Es Naashinal Assoseeshin of Ivanjjilikals kase prezidanttee, “Deˈuwaa halchoy Xoossaa bonchanaassanne saluwaa baanaassa; . . . aybissi giikko, saloy nuuni deˈanau giigidaagaa” giidoogee odettiis.

Hayquwaappe simmin saluwan deˈana giidi ammaniyaageetu ammanoy baasettidoy guutta eraana. Haymaanootetu qofaa pilggiya dirijjitiyaa prezidanttee, Jorj Barni daro asay “deˈuwaanne hayquwaappe simmin demmiyo deˈuwaa xeelliyo ogee baasettidoy pilmiyaa, muuziqaanne medhi ekkidi xaafido xuufe milatiya daro qommobatuuna” gidiyoogaa akeekiis. Filoridan Ephisiqophosa woosa keettaa qeesee, “Saloy Xoossay deˈiyoosa gidiyoogaappe attin, nuuni saluwaabaa eriyoobi aybinne baawa” giidoogee odettiis.

Gidikkokka, saloy Geeshsha Maxaafay loyttidi qonccissiyo allaalletuppe issuwaa. Xoossaa Qaalay yootiyoogaadan, saloy ay mala sohoo? Asay merettidoy saluwan deˈnaassee? Asay saluwaa biyaaba gidikko, yan ay oottanee?

[Sinttaa 3n deʼiya misiliyaa]

Daroti saluwaa baanau koyikkonne, ya baanau hayqqanau koyennay aybissee?