Mang e Tin Riyul’ u Murung’agen e Tharmiy?

UW FENI fel’ ni ngan rung’ag e athap ko yan nga tharmiy! Girdien e pi yurba’ i teliw ni bod e Muslim, Hindus, Buddhists, nge girdi’ ni yad ma yog ni yad e Kristiano, nge piin ndariy e teliw rorad, e yad ma lemnag ni bay ban’en nra par nib fas u tomuren nra yim’ be’. Ba ga’ ni yad ma lemnag ni tharmiy e bangi ban’en nib fel’ yaan nra felfelan’ e girdi’ riy ma dariy e gafgow riy ma yira chag ngak e “piin ni yad ba t’uf rorad.” Machane yooren e girdi’ e ma lemnag ni riyul’ fare bugithin ni: Urngin e girdi’ e baadag e yan nga tharmiy, machane dariy be’ ni baadag ni nge yim’. Mang fan ni aram rogon?

Faanra kan sunmiydad ni gad ra yim’ ma gad yan nga tharmiy, ma gathi urngin e girdi’ ni be l’agan’ ngay ni bod e bitir ni baadag ni nge papey nge ilal nge un ko mabgol? Machane yooren e girdi’ e dabun ni nge yim’.

Boch e tamachib e yad ma yog ni tomuren e yafas rodad u fayleng ma gad ra yan nga tharmiy ya aram e gin ni ngad pared riy. Bod rogon ni yog Theodore Edgar Cardinal McCarrick ni immoy nreb e archbishop nu Washington, D.C., ni gaar: “Gathi kan sunmiydad ni ngad pared u fayleng ni aray rogon. Ya kan sunmiydad ni ngad pared u tharmiy.” Ku arrogon ni yog be’ ni i president ko U.S National Association of Evangelicals, ni gaar: “Kan sunmiydad ni ngaud pininged e sorok ngak Got u tharmiy . . . ya bochan ni tharmiy e tabinaw rodad.”

Piin ni ke mich u wan’rad ni bay e yafos u tharmiy u tomuren ni ka nim’ e buchuuw ban’en ni kar nanged. George Barna ni president u reb e company ni ma fith ko girdi’ murung’agen e teliw e ke pirieg ni boor e girdi’ ni kar folgad ko fare “machib ni bay ban’en nra par nib fos u tomuren ni kem’ be’ e kar feked e pi n’ey u boch e kachido nge musik nge ku boch e babyor.” Fare pastor ko Episcopalian nu Florida e ke gaar: “Dariy ban’en ni gad manang u murung’agen e tharmiy, kemus ni gad manang ni tharmiy e aram e gin ma par Got riy.”

Machane tharmiy e aram e machib u Bible nib ga’ fan. Mang e be yog e Thin Rok Got u murung’agen e tharmiy? Kan sunumiy e girdi’ ni nge par u tharmiy, fa? Faanra nge yan e girdi’ nga tharmiy, ma mang e ngar rin’ed u rom?

[Picture on page 3]

Mang fan ni boor e girdi’ e baadag ni nge yan nga tharmiy, ma ri buchuuw e baadag ni nge yim’?