?Heven i Olsem Wanem?

SAM man oli ting se yumi no naf blong kasem save se heven i olsem wanem, from we i no gat man samtaem we i aot long heven i kamdaon, blong tokbaot heven long yumi. Be oli fogetem we Jisas i talem se: ‘Mi mi kamaot long heven, mi kam.’ (Jon 6:38) Mo Jisas i talem long sam lida blong skul se: “Yufala i blong ples ya. Be mi mi aot long ples ya antap, mi kamdaon.” (Jon 8:23) ?Jisas i talem wanem long saed blong heven?

Jisas i talem stret se heven i ples we Jeova i stap long hem. Hem i singaot God se “Papa blong mi long heven.” (Matiu 12:50) Nomata se ol man oli yusum sam spesel masin blong mekem ol stadi long skae, mo samfala oli flae olbaot long skae long ol roket we man i wokem blong mekem ol stadi ya, be samting we Baebol i talem i tru nomo, se: “I no gat man we i luk God samtaem.”—Jon 1:18.

Yumi man yumi gat wan bodi blong mit mo blad we man i save luk mo tajem. Be Jeova i no gat wan bodi olsem yumi. Taswe, taem Jisas i talem se hem i stap wetem Papa blong hem long “heven,” hem i min se bifo, hem i gat wan laef long heven we i moa hae i bitim laef blong hem olsem wan man long wol. (Jon 17:5; Filipae 3:20, 21) Baebol i kolem ples ya we Jisas mo Papa blong hem tufala i laef long hem, se “heven.” ?Heven i olsem wanem? ?Wanem i stap hapen long heven?

Olgeta Long Heven Oli Bisi Mo Glad

Baebol i tokbaot heven se i wan ples we i gat plante wok i stap gohed long hem. Hem i talem se i gat plante plante milian enjel oli laef long heven. (Daniel 7:9, 10) Wanwan long ol enjel ya oli gat prapa fasin blong olgeta. ?Olsem wanem yumi save samting ya? Taem yumi lukluk olgeta samting we God i wokem raonabaot long yumi, yumi luk we olgeta evriwan oli defdefren. Taswe, yumi save se i sem mak long heven tu. Be i gat wan samting we i defren. Olgeta enjel evriwan oli joengud mo wok tugeta. Samting ya i defren tumas long  wol tede we ol man oli no wokgud tugeta nating.

I gud blong makem olsem wanem Baebol i tokbaot wok we i stap gohed long heven. “Yufala ol enjel, yufala i strong, mo yufala i gat paoa. Oltaem yufala i stap obei long ol tok blong Hae God, mo yufala i stap lesin long ol samting we hem i talem. !Yufala i mas presem hem! Yufala olgeta long heven, yufala i man blong wok blong Hae God. Yufala i gat paoa, mo yufala i stap mekem ol samting we hem i wantem. !Yufala i mas presem hem!” (Ol Sam 103:20, 21) Taswe i gat plante wok we i stap gohed long heven. Yumi save se wok ya i stap givim glad.

Longtaem finis i kam, stat long taem ya we God i no wokem wol yet, ol enjel oli stap wok wetem glad. Baebol i talem se, taem Jeova i stap putum fandesen blong wol, ol enjel oli “harem gud tumas, oli stap singsing wanples,” mo “oli glad tumas, oli stap singsingaot.” (Job 38:4, 7) Wan long ol pikinini blong God long heven i gat janis blong joen wetem God blong wokem ol narafala samting. (Kolosi 1:15-17) Ol gudfala tok ya long saed blong ol enjel we oli wok wetem glad long heven i save mekem sam kwestin oli kam long tingting blong yu, long saed blong heven mo ol man long wol.

?Plan Blong God Se Ol Man Oli Go Long Heven?

Ol enjel oli mekem wok blong God long heven bifo we God i putum fandesen blong wol. God i no wokem faswan man mo woman blong tufala i gat pikinini we bambae oli fulumap heven. Defren olgeta, God i talem long faswan man mo woman se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol.” (Jenesis 1:28; Ol Wok 17:26) Adam i faswan man blong kasem wan laef we i blong wol ya, mo hem i naf blong save God mo blong mekem wok blong hem. Hem i mas kam papa blong olgeta man we bambae oli laef long wol. “Heven i ples blong Hae God nomo, be wol ya, hem i givim long man.”—Ol Sam 115:16.

Ol man oli no wantem ded. Ded i no wan samting we i stap long plan blong God. God i tokbaot ded olsem panis blong Adam sipos hem i no obei. Sipos Adam i bin obei, hem i no save ded.—Jenesis 2:17; Rom 5:12.

From samting ya, God i no talem wan samting long Adam long saed blong heven. God i no mekem wol ya olsem wan ples blong traem man blong luk sipos hem i naf blong go long heven. God i wokem man blong i laef olwe long wol, mo plan ya blong God bambae i mas kamtru. Baebol i promes se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) I klia se God i no wokem ol man blong oli go laef long heven. Sipos i olsem, ?from wanem Jisas i mekem promes long ol aposol blong hem se bambae oli go laef long heven? ?Jisas i stap talem se olgeta gudfala man bambae oli go long heven?