Unsa ang Langit?

ANG ubang tawo nagtuo nga imposibleng mahibaloan kon unsa gayod ang langit kay walay bisan usa nga nanaog gikan didto nga makasugilon kanato. Tingali sila nakalimot sa giingon ni Jesus: “Ako nanaog gikan sa langit.” (Juan 6:38) Ngadto sa ubang lider sa relihiyon, siya miingon: “Kamo gikan sa mga dapit sa ubos; ako gikan sa mga dapit sa itaas.” (Juan 8:23) Unsay giingon ni Jesus bahin sa langit?

Si Jesus miingon nga ang langit mao ang pinuy-anan ni Jehova. Iyang gitawag ang Diyos nga “akong Amahan nga anaa sa langit.” (Mateo 12:50) Apan dili lang sa usa ka diwa nga gigamit ni Jesus ang pulong “langit.” Pananglitan, iyang gihisgotan ang atmospera sa yuta ingong “langit” sa dihang siya miingon: “Panid-i pag-ayo ang mga langgam sa langit.” (Mateo 6:26) Apan si Jehova nagpuyo saylo pa sa atmospera. Ang Bibliya nag-ingon: “Adunay Usa nga nagpuyo ibabaw sa kalingin sa yuta.”—Isaias 40:22.

Ang “Amahan nga anaa sa langit” nagpuyo ba sa nahimutangan sa kabituonan? Ang pisikal nga uniberso gitawag usab nga “langit” diha sa Balaang Kasulatan. Pananglitan, ang usa ka salmista misulat: “Sa dihang makakita ako sa imong mga langit, ang mga buhat sa imong mga tudlo, sa bulan ug sa mga bituon nga imong giandam, unsa ba ang may-kamatayong tawo nga ikaw nagahunahuna man kaniya?”—Salmo 8:3, 4.

Si Jehova nga Diyos wala magpuyo sa pisikal nga uniberso nga iyang gilalang sama ra nga ang panday dili mopuyo sa kabinet nga iyang gihimo. Busa, sa dihang gipahinungod ni Haring Solomon ang templo sa Jerusalem ngadto kang Jehova, siya miingon: “Ang Diyos mopuyo ba gayod dinhi sa yuta? Tan-awa! Ang mga langit, oo, ang langit sa mga langit, dili makaigo kanimo; nan, unsa pa kaha kining balaya nga akong gitukod!” (1 Hari 8:27) Kon ang pisikal nga langit dili mao ang gipuy-an ni Jehova, unsa man diay ang langit nga iyang gipuy-an?

Bisan tuod naestudiyohan na sa mga tawo ang pisikal nga mga langit gamit ang dagkong mga teleskopyo ug nakaadto na ang pipila sa kawanangan, tinuod gihapon ang giingon sa Bibliya: “Walay tawo nga nakakita sa Diyos sa bisan unsang panahon.” (Juan 1:18) Gipatin-aw ni Jesus ang rason: “Ang Diyos maoy Espiritu.”—Juan 4:24.

Ang espiritu maoy matang sa kinabuhi nga labaw kay nianang sa tawo. Kini dili nato makita ug mahikap tungod kay ang espiritu walay unod ug dugo. Busa sa dihang si Jesus miingon nga siya nagkinabuhi uban sa iyang Amahan didto sa “langit,” iyang gipasabot nga siya nakabaton ug matang sa kinabuhi nga mas labaw kay sa pisikal nga matang sa kinabuhi. (Juan 17:5; Filipos 3:20, 21) Kining espirituwal nga dapit nga gipuy-an ni Jesus uban sa iyang Amahan mao ang gitawag sa Bibliya nga “langit.” Unsa man kini? Unsay nagakahitabo didto?

 Usa ka Dapit sa Malipayong Kalihokan

Sumala sa Bibliya, daghan kaayo ang buluhaton didto sa langit. Kini naghisgot nga adunay nagpuyo didto nga ginatos ka milyong espiritung linalang nga matinumanon sa Diyos. (Daniel 7:9, 10) Magkalahi ang personalidad sa matag usa niining espiritung mga linalang. Sa unsang paagi kita nahibalo niana? Sa makitang kalalangan, walay duha ka buhing linalang ang magkaparehas, busa ikaingon nato nga sama usab niana ang kahimtang didto sa langit. Makapahingangha kaayo ang panaghiusa niining espiritung mga linalang, dili sama sa mga tawo dinhi sa yuta nga wala kaayoy panaghiusa.

Matikdi ang paghubit sa Bibliya sa kalihokan didto sa langit. “Dayega ninyo si Jehova, Oh kamong mga manulonda niya, nga gamhanan sa kusog, nga nagatuman sa iyang pulong, pinaagi sa pagpamati sa tingog sa iyang pulong. Dayega ninyo si Jehova, kamong tanang panon niya, kamo nga iyang mga alagad, nga nagabuhat sa iyang kabubut-on.” (Salmo 103:20, 21) Busa daghan kaayo ang buluhaton didto sa langit. Kita makatino nga kini maoy makapalipay nga buluhaton.

Ang mga manulonda malipayong nag-alagad sa taas nang panahon bisan sa wala pa malalang ang yuta. Sumala sa Bibliya, sa dihang gitukod ni Jehova ang yuta, ang mga anak sa Diyos “nagdungan paghugyaw sa kalipay” ug “misinggit sa pagdayeg.” (Job 38:4, 7) Ang usa sa langitnong mga anak sa Diyos nakapribilehiyo pa gani sa pagbuhat uban sa Diyos diha sa paglalang sa tanang ubang butang. (Colosas 1:15-17) Kining maanindot nga paghubit sa malipayong kalihokan sa langit lagmit magbangon ug mga pangutana sa imong hunahuna bahin sa langit ug sa katawhan.

Gilalang ba ang mga Tawo Aron Moadto sa Langit?

Sanglit ang mga manulonda nag-alagad na sa Diyos didto sa langit sa wala pa matukod ang yuta, dayag nga ang unang lalaki ug babaye gilalang dili aron pun-on ang langit. Hinunoa, ang Diyos miingon sa unang magtiayon: “Magmabungahon ug magdaghan kamo ug pun-a ang yuta.” (Genesis 1:28; Buhat 17:26) Si Adan ang una sa bag-ong matang sa kinabuhi sa yuta, nga makahimo sa pagkat-on bahin sa Diyos ug sa pag-alagad kaniya nga matinumanon. Siya ang mahimong amahan sa tanang tawo nga ang pinuy-anan mao ang yuta. “Kon bahin sa mga langit, iya ni Jehova ang mga langit, apan ang yuta iyang gihatag sa mga anak sa mga tawo.”—Salmo 115:16.

Walay normal nga tawo nga gustong mamatay; ang tawo wala lalanga aron mamatay. Ang Diyos naghisgot lamang ug kamatayon ngadto kang Adan ingong silot sa pagkadili-masinugtanon. Kon nagmasinugtanon lang si Adan, dili gayod unta siya mamatay.—Genesis 2:17; Roma 5:12.

Nan dili ikatingala nga ang Diyos wala maghisgot kang Adan bahin sa pag-adto sa langit. Busa ang yuta dili usa ka dapit diin sulayan ang mga tawo kon sila takos ba nga mopuyo sa langit. Ang tawo gilalang aron mabuhi sa yuta sa walay kataposan, ug kini nga katuyoan sa Diyos tumanon niya sa umaabot. Ang Bibliya nagsaad nga “ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Tin-aw, ang mga tawo wala lalanga aron moadto sa langit. Nan, nganong gisaaran ni Jesus ug kinabuhi sa langit ang iyang mga apostoles? Gipasabot ba ni Jesus nga ang tanang maayong tawo moadto sa langit?