Ifa Napanapen Läng?

EKKOCH aramas ra lükü pwe a mmen weires ach sipwe silei napanapen läng pun esaamwo wor emön a feitiw seni läng me apworausakich usun ena leeni. Eli ra mönüki alon Jises ei: “Üa feitiu seni läng.” (Jon 6:38) Jises a pwal ereni ekkoch nouwisen lamalam: “Ämi oua pop seni ei fanüfan, nge ngang üa feito seni läng.” (Jon 8:23) Met Jises a erä usun läng?

Jises a affata pwe läng, ina leenien Jiowa. A kör ngeni Kot “Semei lon läng.” (Mattu 12:50) Ewe kapas läng a pwal tongeni wewe ngeni fän läng usun met a mak lon Mattu 6:26, TF: “Oupwe chok nennengeni ekkewe mansusu fan lang.” Iwe nge, leenien Jiowa a kon lulutä seni fän läng. Ewe Paipel a apasa: “Kot ewe mi mot won an lenien motun king asen fanüfan [mi kumosumos].”​—Aisea 40:22.

Iwe, ewe ‘Sam mi nonnom läng’ a nonnom lein ekkewe füü? Ewe Paipel a pwal nöünöü ewe kapas “läng” lupwen a fos usun unuselapen läng. Äwewe chök, emön sou makkeei köl fel a erä: “Lupwen üa netä läng förien poum o nengeni ewe maram me ekewe fü ka anomuur lon lenier, met aüchean aramas pwe ka ekieki usun?”​—Kölfel 8:3, 4.

Aapw, Jiowa Kot ese nom lein förian kewe fü, maram, me unuselapen läng, usun chök emön chon täikü ese nom lon ewe kapet a föri. Ina minne, iei än King Salomon iotek ngeni Jiowa atun efinünen ewe imwenfel lon Jerusalem: “Nge ifa usun en, äm Kot, kopwe wesewesen tongeni imweimw won fanüfan? Nengeni, kosap kuch lon läng pwal lon ewe läng mi unusen tekia. Ifa usun, kopwe tongeni kuch lon ei imwenfel üa aüetä?” (1 King 8:27) Pokiten Jiowa ese nonnom lein förian kewe lon läng, menni läng a nonnom lon?

Inaamwo ika aramas ra fen käeö pworausen fän läng ren ekkewe pongkio mi ngüpwir, me ekkoch ra pwal lo lon ewe maram, nge alon Paipel ei mi chök pwüng: “Esap wor eman aramas a küna Kot fän eu.” (Jon 1:18) Jises a äweweei popun lupwen a erä: “Kot Ngün.”​—Jon 4:24.

Inisin aramas a fför seni fituk me chcha, ekkewe mettoch kich mi tongeni küna me attapa. Iwe nge, inisin Jiowa esap usun inisich. Ina minne, lupwen Jises a erä pwe i mi piin nonnom ren Seman we lon “läng,” weween Jises a inisini ewe sokkun inis mi kon ling seni inis meinisin woon fönüfan. (Jon 17:5; Filipai 3:20, 21) Ena leeni Jises a fen piin nonnom ie ren Seman we, ina met ewe Paipel a eita ngeni “läng.” Mi fet napanapen läng? Met a kan fis ikena ie?

Eü Leenien Angang mi Apwapwa

Ewe Paipel a äweweei pwe “läng” ina ewe leeni a fiffis sokkopaten angang ie. A erä pwe fitepükü million chonläng mi tuppwöl ra  nonnom ie. (Taniel 7:9, 10) Emön me emön ekkeei chonläng mei wor en me pwisin napanapan. Pwata sia silei ena? Ren ach nengeni förien Kot kewe meinisin, esor ruu mettoch mi manau ra fokkun löllöfengen, ina popun, sia tongeni lükü pwe förien Kot meinisin lon läng ra pwal sokkofesen. A mmen amwarar pwe meinisin chonläng mi sokkolo napanaper nge ra angangfengen fän tipeeü, iwe, a sokko seni ei fönüfan ikenäi ikewe a weires ngeni aramas ie ar repwe angechu lon ar angang.

Nengeni ifa usun ewe Paipel a äweweei ekkewe angang ra fiffis lon läng. “Oupwe mwareiti ewe Samol mi Lapalap, ämi nöün chonläng kana, ämi mi pwora o aleasochisi an kapas, ämi mi aüselinga alon. Oupwe mwareiti ewe Samol mi lapalap, ämi chon an kewe mwich meinisin lon läng, ämi nöün kewe chon angang mi föri letipan.” (Kölfel 103:20, 21) Ina popun, a fokkun chommong ekkewe angang ra kan fiffis lon läng. Sia tongeni lükü pwe ar angang mi fokkun apwapwa.

A fansoun langattam än ekkewe chonläng eäni ei angang mi apwapwa pwal mwo nge mwen fförütään fönüfan. Me ren ekkewe wokisin, lupwen Jiowa a föratä fönüfan, nöün kewe “ra kölfengen” me “mweireir fän pwapwa.” (Hiop 38:4, 7) Pwal mwo nge emön me lein nöün Kot kewe lon läng a küna feiöch le angangfengen me Kot le föratä mettoch. (Kolose 1:15-17) Pworausen ekkeei angang mi apwapwa a kan fis lon läng a tongeni epiietä ekkoch kapas eis lon ekiekich usun läng me aramas.

Kot a Fen Akkota Pwe Aramas Repwe Feitä Läng?

Pokiten ekkewe chonläng ra angang ngeni Jiowa lon läng mwen förutään ewe fönüfan, iwe Kot ese föratä ewe äeüin pean pwüpwülü ar repwe amasoualo läng. Nge, a ereniir: “Oupwe nöünöü o achomongakemi pwe fanüfan epwe masou remi.” (Keneses 1:28; Fofor 17:26) Atam, i ewe äemönün förien Kot woon fönüfan mei wor an tufichin silei Kot me angang ngeni fän tuppwöl. Itä i semelapen ekkewe aramas repwe fönüeni fönüfan. “Ekewe läng än ewe Samol mi Lapalap echök, nge fanüfan a ngeni aramas.”​—Kölfel 115:16.

Aramas rese kan mochen repwe mälo, ese pwisin nom lon ar ekiek. Kot a chök kapas usun ewe mettoch mälo pwe ina chök liwinin tipisin ar älleasolap. Ika Atam a älleasochis, esap chüen mälo.​—Keneses 2:17; Rom 5:12.

Ina popun, sisap mäirü pwe Kot ese mwo nge fos ngeni Atam usun an epwe feitä läng. Ina minne, ewe fönüfan esap eü leenien sossot fän iten aramas ika mi fichitiir ar repwe feitä läng. Kot a föratä aramas ar repwe nonnom woon fönüfan tori feilfeilo chök, ei kokkot epwele pwönüetä. Ewe Paipel a pwonei pwe “ekewe chon pwüng repwe fanüeni ewe fanü o nonom won tori feilfeilachök.” (Kölfel 37:29) A ffat pwe seni le poputään, Kot ese akkota pwe aramas repwe feitä läng. Ika ina, pwata chök Jises a pwon ngeni nöün kewe aposel pwe repwe nonnom lon läng? Weween pwe Jises a erä pwe meinisin aramas mi mürinnö repwe feitä läng?