Ki mannyer lesyel i ete?

SERTEN dimoun i krwar ki i enposib pour konnen ki mannyer lesyel i ete akoz personn pa’n deza sorti laba pour dir nou ki mannyer i ete. Petet zot in bliye ki Zezi ti dir: “Mon’n sorti dan lesyel.” (Zan 6:38) Zezi ti osi dir avek serten sef relizye ki: “Zot, zot sorti isi menm anba, me mwan, mon sorti lao.” (Zan 8:23) Ki Zezi ti dir konsernan lesyel?

Zezi ti konfirmen ki Zeova i reste dan lesyel. I ti apel Bondye “mon Papa ki dan lesyel.” (Matye 12:50) Me Zezi ti servi sa mo “lesyel” dan plizyer sans. Par egzanp i ti refer avek nou latmosfer konman “lesyel” ler i ti dir: “Zwazo lesyel i annan zot nik.” (Lik 9:58) Me, Zeova i reste bokou pli lwen ki nou latmosfer. Labib i dir: “I annan Enn ki pe reste parlao serk later.”—Izai 40:22.

Eski son “Papa ki dan lesyel” i reste parmi bann zetwal? Dan Labib, liniver i osi ganny apele “lesyel.” Par egzanp, en psalmis ti ekrir: “Kan mon vwar ou lesyel, travay ou ledwa, lalin ek zetwal ki ou’n prepare, ki zonm mortel i ete ki ou gard li antet?”—Psonm 8:3, 4.

Zis parey en sarpantye pa bezwen reste dan en bife ki i’n fer, Zeova osi pa bezwen reste dan liniver ki i’n kree. Se pour sa rezon ki ler Lerwa Salomon ti dedye tanp Zerizalenm pour Zeova, i ti dir: “Eski Bondye pou vreman reste lo later? Lesyel li menm, wi dan lesyel bann lesyel ou pa kapab reste; alor ki nou pou dir lo lakaz ki mon’n batir pour ou?” (1 Lerwa 8:27) Si Zeova pa reste dan sa lesyel ki nou vwar, kote sa lesyel ki i reste ladan i ete?

Menm si zonm in servi bann teleskop sofistike pour etidye lesyel e serten in al dan lespas, sa ki Labib in dir i touzour vre: “Personn pa’n deza war Bondye.” (Zan 1:18) Zezi ti eksplike akoz, ler i ti dir: “Bondye i Lespri.”—Zan 4:24.

En lespri i en kalite lavi ki bokou pli siperyer ki pour en imen. En lespri napa narnyen ki fizik, parey laser ek disan ki nou kapab vwar e touse. Alor kan Zezi ti dir ki i ti reste avek son Papa dan “lesyel,” i ti oule dir ki son lavi dan lesyel ti bokou pli siperyer ki okenn lezot form lavi fizik. (Zan 17:5; Filipyen 3:20, 21) Sa landrwa kot Zezi ti reste avek son Papa konman en lespri i sanmenm sa landrwa ki Labib i apel “lesyel.” Ki mannyer i ete? Kwa ki deroule laba?

En landrwa kot tou keksoz i deroul dan lazwa

Labib i dekrir lesyel konman en landrwa kot i annan en kantite aktivite. I dir ki en  santenn milyon lanz fidel i reste laba. (Danyel 7:9, 10) Sak sa bann lanz i annan son prop personnalite. Ki mannyer nou konn sa? Akoz dan tou sa ki nou vwar otour nou, napa okenn keksoz ki vivan ki egzakteman parey avek en lot, alor nou kapab asire ki dan lesyel osi i annan en gran varyete. Dan en fason enpresyonan, zot tou zot travay ansanm dan linite, en keksoz ki byen rar lo later ozordi.

Remarke ki mannyer Labib i dekrir sa ki arive dan lesyel. “Beni Zeova, zot son bann lanz, ki annan gran pwisans, ki pe fer sa ki i dir, par ekout son parol. Beni Zeova, zot tou son bann larme, zot son bann minis, ki pe fer son lavolonte.” (Psonm 103:20, 21) Alor i annan en kantite travay ki pe ganny fer dan lesyel e nou kapab asire ki sa i bann travay ki anmenn satisfaksyon.

Labib i montre ki depi byen lontan, menm avan later ti ganny kree bann lanz pe servi Zeova dan lazwa. Dapre Labib, kan Zeova ti kree later, bann garson Bondye “ti kriye ansanm dan lazwa” e zot “ti konmans aplodi.” (Zob 38:4, 7) Enn parmi bann garson Bondye ti menm annan sa privilez pour travay ansanm avek Bondye pour kree tou lezot keksoz. (Kolosyen 1:15-17) Sa zoli deskripsyon konsernan sa travay dan lesyel ki deroul dan lazwa i kapab soulev en kantite kestyon dan ou lespri konsernan lesyel ek bann imen.

Eski imen ti ganny kree pour viv dan lesyel?

Vi ki bann lanz ti pe servi Bondye dan lesyel menm avan ki later ti ganny kree, i evidan ki premye zonm ek fanm pa ti ganny kree pour ranpli lesyel avek zot desandans. Me Bondye ti plito dir sa premye koup imen pour: “Fer zanfan e vin bokou, ranpli later.” (Zenez 1:28; Akt 17:26) Adan ti sa premye dimoun pour viv lo later ki ti ganny sa privilez pour konn Bondye e servi li fidelman. I ti pou vin papa bann imen ki zot landrwa reste ti pou lo later. “An sa ki konsern lesyel, i pour Zeova, me later i’n donn imen.”—Psonm 115:16.

Normalman dimoun pa anvi mor; akoz lanmor pa en keksoz ki normal oubyen natirel pour bann imen. Bondye ti mansyonn lanmor avek Adan zis konman en pinisyon pour dezobeisans. Si Adan ti’n obeir, i pa ti pou’n zanmen mor.—Zenez 2:17; Romen 5:12.

I pa sirprann nou alor, ki Bondye pa ti dir nanryen avek Adan konsernan al dan lesyel. Alor later pa ti pou vin en landrwa kot bann imen ti pou ganny teste pour vwar si zot ti merit al viv dan lesyel. Bann imen ti ganny kree pour viv pour touzour lo later e sa plan Bondye pou ganny akonplir a lavenir. Labib i promet ki “bann dimoun drwat pou posed later e zot pou reste lo la pour touzour.” (Psonm 37:29) I kler ki bann imen pa ti ganny kree pour al viv dan lesyel. Alor, akoz Zezi ti promet son bann zapot ki zot ti pou al viv dan lesyel? Eski Zezi ti oule dir ki tou bon dimoun pou al dan lesyel?