Mbaʼéichapa ojeiko yvágape?

OĨ UMI heʼíva: “Avave ningo ndoguejýi yvágagui omombeʼu hag̃ua ñandéve mbaʼéichapa ojeiko upépe”. Añete piko upéva? Juan 6:38-pe Jesús heʼivaʼekue: ‘Che aju yvágagui’. Ha heʼi avei umi rrelihión omoakãvape: ‘Peẽ ningo ko yvy arigua, che katu yvagapegua’ (Juan 8:23). Upéicharõ, jahechamína mbaʼépa omboʼerakaʼe Jesús oñeʼẽrõ guare yvága rehe.

Ñepyrũrã haʼe omombeʼu porã Ñandejára oikoha yvágape. Haʼe heʼi Jehováre ‘che Ru yvagapegua’ (Mateo 12:50, NM). Moõpa oĩ pe yvága Jesús oñeʼẽha? Upéva ndahaʼeihína pe yvága jahecháva, ovevehápe umi guyra (Mateo 6:26). La Biblia heʼi Ñandejára oikoha ‘yvatetereive ko yvy apuʼa árigui’ (Isaías 40:22). Péva heʼise haʼe ndoikoiha amo yvate umi arai oĩháme.

Pe salmísta ohaivaʼekue avei: ‘Amañáramo pe yvága, jasy ha mbyjakuéra rehe, nde pópe rejapovaʼekue, haʼe chejupe: Máva piko yvypóra nemanduʼa hag̃ua hese?’ (Salmo 8:3, 4). Koʼápe oñehenói ‘yvága’ umi estrélla ha planetakuéra oĩháme. Heʼise piko upéva Ñandejára oikoha upépe? Nahániri.

Péro ikatu oĩ heʼíva: ‘Jehová ningo ko univérso apohare, upévare oikomantevaʼerã ipype’. Jaʼéta piko avei upéicharõ peteĩ karpintéro ojapo haguére peteĩ rropéro oikovaʼerãha pype? Nahániri. Jahechamína mbaʼépa heʼivaʼekue rréi Salomón oñemeʼẽrõ guare pe témplo Jehovápe. Haʼe heʼi: ‘Ikatúne piko Ñandejára oiko ko yvy ape ári? Pe yvága ijapyraʼỹvagui jepe ndetuichave, mbaʼéicha piko upéicharõ reikóta ko óga che amopuʼãvaʼekuépe!’ (1 Reyes 8:27). Hesakã porãiterei Jehová ndoikoiha umi estrélla ha planetakuéra oĩháme.

Yvyporakuéra oreko umi teleskópio neporãmba jepéva, ha oĩ voi ohómava jasy peve; upéicharõ jepe ‘ni peteĩ yvypóra neʼĩra arakaʼeve ohecha Ñandejárape’ (Juan 1:18). Mbaʼérepa? Jesús heʼi haguéicha: ‘Ñandejára ningo peteĩ espíritu’ (Juan 4:24).

La Biblia heʼi umi espíritu ndahaʼeiha ñandéicha, ikangue ha hoʼóva. Ndaikatúi jahecha ni japoko hesekuéra. Umi espíritu imbareteve ha ivaleve ñandehegui. Upévare Jesús heʼírõ guare oiko hague yvágape Itúvandi, heʼise oiko hague peteĩ espírituicha  (Juan 17:5; Filipenses 3:20, 21). La Biblia ohenói ‘yvága’ upe lugár haʼekuéra oikohápe. Mbaʼéicha piko ojeiko upépe?

Mbaʼépa ojejapo yvágape?

Ñandejára Ñeʼẽ heʼi yvágape ojejapoha heta mbaʼe. Upépe oiko hetaiterei ánhel iñeʼẽrendúva Ñandejárape (Daniel 7:9, 10). Ñande yvypóra enterovete ñanediferénte ojuehegui ñapensávape ha jaiko lája. Upéicha avei amo yvágape umi ánhel idiferénte ojuehegui. Upéicharamo jepe la Biblia heʼi ombaʼapoha hikuái oñondivepa pyʼaguapy ha vyʼápe. Ndahaʼeiete yvyporakuéra oikoháicha koʼág̃a!

Ñandejára Ñeʼẽ heʼi umi ánhel heta hembiapoha: ‘Pemombaʼeguasu Jehovápe peẽ hiʼanhelkuéra imbaretéva, pehendúva iñeʼẽ ha pejapóva hembipota. Pemombaʼeguasu Jehovápe entéro hembijokuái pejapóva hembipota’ (Salmo 103:20, 21). Katuete ovyʼáne hikuái ojapóvo hembiapokuéra.

Umi ánhel ombaʼapo Jehovápe g̃uarã ymaiterei guivéma, ojejapo mboyve ko yvy jepe. La Biblia heʼi Jehová ojapórõ guare ko yvy umi ánhel ‘torýpe osapukái’, ha ‘vyʼapópe ojepopete ha oguerohory’ hague upe hembiapokue (Job 38:4, 7). Peteĩ ánhelpe oñemeʼẽ peteĩ tembiapo iporãitereíva: haʼe oipytyvõ Ñandejárape ojapo hag̃ua opaite mbaʼe (Colosenses 1:15-17). Péro ojejapópa yvyporakuérape oiko hag̃ua avei yvágape?

Jahapátapa jaiko yvágape?

Jahecha haguéicha, ko yvy ojejapo mboyve umi ánhel oservíma Ñandejárape yvágape. Péva ohechauka ñandéve Jehová ndojapói hague yvyporakuérape oiko hag̃ua upépe. Haʼe heʼivaʼekue Adán ha Évape: ‘Peñemoña ha peñemboheta pemyenyhẽ meve ko yvy’ (Génesis 1:28; Hechos 17:26). Adán ningo pe yvypóra ypykue Jehová ojapovaʼekue. Oñemeʼẽ chupe ko yvy hogarã ha haʼe omombaʼeguasuvaʼerã ijapoharépe. Upévare Ñandejára Ñeʼẽ heʼi: ‘Yvága ningo Jehová mbaʼe, yvy katu omeʼẽ yvyporakuérape’ (Salmo 115:16).

Upévare avave nañamanoséi. Ha añetehápe Ñandejára nañandeapói voi ñamano hag̃ua. Adán naiñeʼẽrendúi rupínte ningo opavave ñamano. Haʼe iñeʼẽrendúrire nomanoivaʼerãmoʼã; upéva rangue oikovaʼerãmoʼã tapia g̃uarã ko yvy ape ári (Génesis 2:17; Romanos 5:12).

Upévare Ñandejára arakaʼeve ndeʼíri Adánpe ohotaha yvágape. Jehová ndeʼíri avei ko yvýpe jajuha jahasa asy, jahechauka hag̃ua ñamereseha jaiko yvágape. Haʼe oipotákuri jaiko ko yvýpe opa ára g̃uarã. Upévare Ñandejára Ñeʼẽ opromete: ‘Umi hekopotĩvape opytáta ko yvy, ha upépe haʼekuéra oikovéta opa ára’ (Salmo 37:29). Upéicharõ, mbaʼérepa Jesús opromete ijapostolkuérape ohotaha hikuái yvágape? Heʼisépa upéva entéro ipyʼaporãva ohotaha yvágape?