តើស្ថានសួគ៌មានសភាពបែបណា?
តើស្ថានសួគ៌មានសភាពបែបណា?
មនុស្ស ខ្លះគិតថា យើងមិនអាចដឹងអំពីស្ថានសួគ៌បានឡើយ ដោយសារមិនដែលមាននរណាចុះពីស្ថានសួគ៌ដើម្បីប្រាប់យើងអំពីទីនោះទេ។ ប្រហែលជាពួកគេភ្លេចថា លោកយេស៊ូមានប្រសាសន៍ថា៖ «ខ្ញុំបានចុះមកពីស្ថានសួគ៌»។ (យ៉ូហាន ៦:៣៨) លោកបានមានប្រសាសន៍ទៅកាន់ពួកអ្នកដឹកនាំខ្លះនៃសាសនាថា៖ «អ្នករាល់គ្នាមកពីផែនដី តែខ្ញុំមកពីស្ថានលើ»។ (យ៉ូហាន ៨:២៣) តើលោកបានមានប្រសាសន៍យ៉ាងណាស្តីអំពីស្ថានសួគ៌?
លោកយេស៊ូបានបញ្ជាក់ថាស្ថានសួគ៌ជាទីលំនៅរបស់ព្រះយេហូវ៉ា។ លោកបានហៅព្រះថា«បិតារបស់ខ្ញុំដែលស្ថិតនៅស្ថានសួគ៌»។—ម៉ាថាយ ១២:៥០
ទោះជាមនុស្សបានសិក្សាស្រាវជ្រាវសកលលោកដោយប្រើកែវយឹតដ៏ខ្លាំងក្លា ហើយមនុស្សខ្លះបានធ្វើដំណើរទៅលំហអវកាសក៏ដោយ តែអ្វីដែលគម្ពីរចែងនៅតែជាការពិត ដែលថា៖ «គ្មានមនុស្សណាម្នាក់ធ្លាប់ឃើញព្រះម្ដងណាឡើយ»។ (យ៉ូហាន ១:១៨) លោកយេស៊ូបានពន្យល់មូលហេតុដែលមនុស្សមិនអាចឃើញព្រះ ពេលលោកមានប្រសាសន៍ថា៖ «ព្រះជាវិញ្ញាណ»។—យ៉ូហាន ៤:២៤
វិញ្ញាណជាប្រភេទជីវិតមួយដែលខ្ពស់ជាងមនុស្ស។ បុគ្គលវិញ្ញាណមិនមានរូបរាងដែលមនុស្សយើងអាចឃើញឬប៉ះពាល់បានដូចជាសាច់និងឈាមឡើយ។ ដូច្នេះ ពេលលោកយេស៊ូមានប្រសាសន៍ថា លោកធ្លាប់រស់នៅជាមួយនឹងបិតារបស់លោកនៅ«ស្ថានសួគ៌» លោកចង់បញ្ជាក់ថាលោកធ្លាប់មានជីវិតមួយប្រភេទដែលខ្ពង់ខ្ពស់ជាងជីវិតជាមនុស្ស។ (យ៉ូហាន ១៧:៥; ភីលីព ៣:២០, ២១) ពិភពវិញ្ញាណនេះជាកន្លែងដែលលោកយេស៊ូធ្លាប់រស់នៅជាមួយនឹងបិតារបស់លោកដែលគម្ពីរហៅថា«ស្ថានសួគ៌»។ តើស្ថានសួគ៌មានសភាពបែបណា? តើមានអ្វីកើតឡើងនៅទីនោះ?
ស្ថានសួគ៌ ជាកន្លែងដែលមានកិច្ចការដែលនាំឲ្យសប្បាយ
គម្ពីរបានពណ៌នាស្ថានសួគ៌ជាកន្លែងដែលមានកិច្ចការជាច្រើន ហើយថា បុគ្គលវិញ្ញាណដ៏ស្មោះត្រង់រាប់រយលានរូបរស់នៅទីនោះ។ (ដានីយ៉ែល ៧:៩, ១០) បុគ្គលវិញ្ញាណនីមួយៗមានបុគ្គលិកលក្ខណៈខុសៗគ្នា។ ម្ដេចបានជាយើងដឹង? ក្នុងចំណោមអ្វីៗដែលព្រះបានបង្កើតដែលយើងអាចឃើញបាន គ្មានអ្វីពីរដែលមានជីវិតគឺដូចគ្នាបេះបិទនោះទេ។ ដូច្នេះ យើងអាចប្រាកដថានៅស្ថានសួគ៌ បុគ្គលវិញ្ញាណក៏មានភាពផ្សេងៗគ្នាដែរ។ គួរឲ្យអស្ចារ្យមែន បុគ្គលវិញ្ញាណទាំងអស់នេះធ្វើការជាមួយគ្នាដោយមានសាមគ្គីភាព នេះខុសគ្នាស្រឡះពីមនុស្សនៅផែនដីដែលកម្រសហការគ្នាបានល្អ។
ទំនុកតម្កើង ១០៣:២០, ២១) ដូច្នេះ មានកិច្ចការជាច្រើនដែលកំពុងសម្រេចនៅស្ថានសួគ៌។ យើងអាចប្រាកដថា កិច្ចការនោះជាកិច្ចការដែលគួរឲ្យពេញចិត្ត។
សូមកត់សម្គាល់របៀបដែលគម្ពីរពណ៌នាអំពីកិច្ចការនៅស្ថានសួគ៌។ «ចូរសរសើរដល់ព្រះយេហូវ៉ា អស់ពួកទេវតារបស់ទ្រង់អើយ ជាអ្នកដែលមានឥទ្ធិឫទ្ធិខ្លាំង ហើយក៏ប្រតិបត្ដិតាមបង្គាប់ទ្រង់ ដោយស្ដាប់តាមព្រះសូរសៀងនៃព្រះបន្ទូលទ្រង់ ចូរសរសើរដល់ព្រះយេហូវ៉ា អស់ពួកពលបរិវាររបស់ទ្រង់អើយ ជាពួកអ្នកបំរើទ្រង់ដែលធ្វើតាមព្រះហឫទ័យ»។ (បណ្ដាទេវតាបានបម្រើព្រះយ៉ាងសប្បាយជាយូរយារណាស់មកហើយ តាំងពីមិនទាន់មានផែនដីនៅឡើយ។ យោងទៅតាមបទគម្ពីរ ពេលព្រះយេហូវ៉ាបង្កើតផែនដី នោះបុត្ររបស់ព្រះទាំងអស់បាន«ច្រៀងជាមួយគ្នា» ហើយ«ស្រែកអរសាទរ»។ (យ៉ូប ៣៨:៤, ៧) ក្នុងចំណោមបុត្រទាំងឡាយរបស់ព្រះនៅស្ថានសួគ៌ បុត្រមួយមានឯកសិទ្ធិធ្វើការជាមួយព្រះក្នុងការបង្កើតអ្វីៗទាំងអស់។ (កូឡុស ១:១៥-១៧) ការពណ៌នាដ៏ទាក់ទាញចិត្តនេះអំពីកិច្ចការនៅស្ថានសួគ៌ដែលនាំឲ្យសប្បាយ ប្រហែលជាធ្វើឲ្យលោកអ្នកមានសំណួរស្តីអំពីស្ថានសួគ៌និងមនុស្សជាតិ។
តើមនុស្សបានត្រូវបង្កើតមក ឲ្យទៅរស់នៅស្ថានសួគ៌ឬ?
ដោយសារទេវតាបានបម្រើព្រះនៅស្ថានសួគ៌មុនមានផែនដី នោះបុរសនិងស្ត្រីដំបូងច្បាស់ជាមិនបានត្រូវបង្កើតមកឲ្យរស់នៅស្ថានសួគ៌ទេ។ ផ្ទុយទៅវិញ ព្រះបានមានប្រសាសន៍ទៅគូស្វាមីភរិយាដំបូងថា៖ «ចូរបង្កើតកូនឲ្យចំរើនជាច្រើនឡើង ឲ្យមានពេញពាសលើផែនដីចុះ»។ (លោកុប្បត្តិ ១:២៨; សកម្មភាព ១៧:២៦) អាដាមជាជីវិតថ្មីមួយប្រភេទដំបូងដែលរស់នៅលើផែនដី ដែលអាចស្គាល់ព្រះនិងបម្រើលោកយ៉ាងស្មោះត្រង់។ គាត់មានភារកិច្ចបង្កើតកូនចៅដែលរស់នៅលើផែនដី។ «ឯស្ថានសួគ៌ គឺជាស្ថានរបស់ព្រះយេហូវ៉ា ចំណែកផែនដីវិញ នោះទ្រង់បានប្រគល់ដល់មនុស្សជាតិ»។—ទំនុកតម្កើង ១១៥:១៦
ធម្មតាមនុស្សយើងមិនចង់ស្លាប់ទេ ព្រោះសេចក្ដីស្លាប់មិនមែនជាលក្ខណៈធម្មជាតិរបស់មនុស្សឡើយ។ ព្រះប្រាប់អាដាមថា គាត់នឹងទទួលសេចក្ដីស្លាប់ជាទណ្ឌកម្មក្នុងករណីដែលគាត់មិនស្ដាប់បង្គាប់លោកប៉ុណ្ណោះ។ បើអាដាមស្ដាប់បង្គាប់ព្រះ នោះគាត់នឹងមិនស្លាប់សោះឡើយ។—លោកុប្បត្តិ ២:១៧; រ៉ូម ៥:១២
ដូច្នេះមិនគួរឲ្យភ្ញាក់ផ្អើលទេ ដែលព្រះមិនបានប្រាប់អាដាមអ្វីសោះអំពីរឿងទៅស្ថានសួគ៌។ ហេតុនេះ ផែនដីមិនមែនជាកន្លែងដែលមនុស្សទទួលការសាកល្បងដើម្បីឲ្យដឹងថា ពួកគេសមឬមិនសមនឹងរស់នៅស្ថានសួគ៌នោះទេ។ មនុស្សបានត្រូវបង្កើតមកឲ្យរស់ជារៀងរហូតនៅផែនដី ហើយគោលបំណងនេះរបស់ព្រះមិនទាន់បានសម្រេចនៅឡើយទេ។ សេចក្ដីសន្យាមួយក្នុងគម្ពីរថា៖ «ពួកអ្នកសុចរិតនឹងបានស្រុកទុកជាមរដក ហើយនឹងនៅក្នុងស្រុកនោះ[ផែនដី]ជានិច្ច»។ (ទំនុកតម្កើង ៣៧:២៩) ច្បាស់ណាស់ នេះបញ្ជាក់ថាតាំងពីដើមមក មនុស្សយើងមិនបានត្រូវបង្កើតមកឲ្យរស់នៅស្ថានសួគ៌ទេ។ បើដូច្នេះ ហេតុអ្វីលោកយេស៊ូបានសន្យាជាមួយសាវ័កថាពួកគាត់នឹងមានជីវិតនៅស្ថានសួគ៌? តើលោកយេស៊ូចង់មានន័យថា មនុស្សល្អទាំងអស់នឹងទៅស្ថានសួគ៌ឬ?