Vân Hi Eng Ang Hmun Nge A Nih?

MI ṬHENKHAT chuan vân chanchin min hrilh tûra vân aṭanga lo chhuk an awm loh avângin, vân chungchâng chu hriat chian theih a ni lo tih ngaih dân an nei a. Anni chuan Isua thusawi: “Vân aṭanga lo chhuk ka ni,” tih chu an theihnghilh a ni thei ang. (Johana 6:38) Sakhaw hruaitu ṭhenkhat hnênah pawh, Isua chuan: “Nangni hnuai lama chhuak in ni; kei zawng chung lama chhuak ka ni,” a ti bawk. (Johana 8:23) Isua’n vân chungchâng eng nge a sawi?

Isua chuan vân khi Pathian Jehova awmna a ni tih a nemnghet a. Ani chu “ka Pa vâna mi,” tiin a ko a ni. (Matthaia 12:50) Mahse, Isua chuan “vân” tih ṭawngkam chu awmze hrang hrang neiin a hmang a. Entîr nân: “Elija dam laia kum thum leh thla ruk vân a pin . . . khân, Israel ramah hmeithai tam tak an awm,” a tih khân lei chung lam boruak sawi nân “vân” tih ṭawngkam a hmang a ni. (Luka 4:25) Nimahsela, Pathian Jehova chu lei chung lam boruak aia sângah a awm. Bible chuan: “Ani chu leilung kualkhungna chunga ṭhua chu a ni,” a ti si a.—Isaia 40:22.

“Pa vâna mi” chu arsi awmna vânah a chêng em? Bible chuan hmuh theih vânlâwt pawh chu “vân” tiin a ko tho a ni. Entîr nân, fakna hla phuahtu pakhat chuan: “I vân, i kut chhuakte, thla leh arsi i ruathote khi, ka ngaihtuah châng chuan, ‘Mihring hi eng nge maw a niha, i hriat reng ṭhin ni?’ . . . ka ti ṭhîn,” tiin a ziak a ni.—Sâm 8:3, 4.

Thingrem siamtu chu a thingrem siam chhûnga a awm loh ang bawkin, Pathian Jehova chu a thil siam hmuh theih lei leh vân chhûnga a chên a ngai lo. Chutiang a nih avângin, Lal Solomona’n Pathian Jehova hnêna Jerusalema biak in a hlan khân, heti hian a sawi a ni: “Pathian chu leiah hian a awm tak meuh ang emaw chu? Ngai teh, vân leh vânte vânah pawh i leng lo a ni a; he ka in sakah hian i va leng lo nasa lehzual âwm êm!” tiin. (1 Lalte 8:27) Pathian Jehova chu mita hmuh theih vânah a awm lo a nih chuan, a awmna vân chu eng nge ni ta ang?

Mihringte hian enhlatna chak tak takte hmangin leh vân sâng boruaka zin chhuakin, hmuh theih vân chanchin chu zir chhuak tawh mah se, Bible thusawi: “Tuman eng lai mahin Pathian an hmu lo,” tih chu a la dik reng a ni. (Johana 1:18) Isua chuan: “Pathian chu thlarau a ni,” tia sawiin, hmuh theih a nih loh chhan a hrilhfiah a ni.—Johana 4:24.

Thlarau taksa chu mihring nunna aiin a sâng zâwk a. Chu thlarau taksa chu tisa leh thisen nei a ni lo va, mihringte hmuh theih leh thil hriat theihna dangte aṭanga hriat theih chi a ni ve lo. Chuvângin, Isua’n a Pa nêna ‘vâna’ awm anga a insawi hian, mihring nunna aia sâng zâwk leh ropui zâwk nunna a lo nei tawh ṭhîn tih a sawina a ni. (Johana 17:5; Philippi 3:20, 21) Ni e, thlarau taksa pua a Pa nêna an awmna hmun hi a ni, Bible-in “vân” tia a sawi chu. Chu chu eng ang hmun nge a nih? Chutah chuan eng thilte nge thleng?

 Hlim Taka Hnathawhna Hmun

Bible chuan vân chu hna tam tak thawhna hmun niin a sawi a. Chutah chuan thlarau thil siam rinawm sîng hmun sîng an awm thu a sawi bawk. (Daniela 7:9, 10) Anni chuan mize hran ṭheuh an nei bawk a ni. Chu chu engtin nge kan hriat theih? Thil siam nunna nei hmuh theih zawng zawngah hian inang thlap engmah a awm lo va; chuvângin, hmuh theih loh vânah pawh chutiang bawk chu a ni ngei ang tih kan ring thei a ni. Mak tak maiin, chûng vân lam thil siam nunna neite chuan inrem takin hna an thawk tlâng a; chu chu, mite’n hna an thawh tlân theih vak lohna khawvêl nên chuan a inang lo hle.

Bible-in vâna hnathawh a nih dân a sawi hi han chhinchhiah teh. “A vântirhkohte u, a thu ngaithlaa, a thu zâwm ṭhîn, chaknaa ropuite u, LALPA chu fak rawh u: a sipaihote u, a duhzâwng ti ṭhîn, a rawngbâwltute u, LALPA chu fak rawh u.” (Sâm 103:20, 21) Vânah chuan hna tam tak thawh a ni tih a chiang hle mai. Chûng hnate thawh chu a lungâwithlâk hle ang tih kan hre chiang thei a ni.

Vântirhkohte chuan leilung siam a nih hma aṭang tawhin, hlim takin rawng an bâwl a. Bible sawi dân chuan, Pathian Jehova fate chu leilung A siam lai khân, ‘an zai khâwmin’ “an au” a ni. (Joba 38:4, 7) Pathian vân lam fate zînga pakhat phei chuan thil dang zawng zawng siamnaah Pathian a pui hial a ni. (Kolossa 1:15-17) He hnathawhna hlimawm tak vâna neih thu sawina hian i rilruah vân leh mihringte chungchâng zawhna ṭhenkhat a siam chhuak thei a ni.

Mihringte Hi Vâna Kal Tûra Siam An Ni Em?

Leilung siam a nih hma aṭang tawh khân, vântirhkohte’n vânah Pathian rawng an bâwl a; chuvâng chuan mipa leh hmeichhe hmasa berte chu vân luah khat tûra siam an ni lo tih a chiang a ni. Pathian chuan nupa tuak hmasa ber hnênah: “Chi tam tak thlaha lo pungin, leilung hi luah khat ula,” a ti zâwk mah a. (Genesis 1:28; Tirhkohte 17:26) Adama chu Pathian hre thei a, rinawm taka a rawng bâwl theihna nei lei lam nunna nei hmasa ber a ni a, leia chêng tûr mihringte thlahtu tûr a ni. “Vânte khi LALPA vânte a ni a; leilung erawh hi chu mihring fate a pe a ni.”—Sâm 115:16.

A tlângpui thuin, mihringte chuan thih an duh lo; an tân chuan thihna chu thil pângngai a ni thei lo. Pathian chuan thihna chu thuâwih lote hremna chauh a nih thu Adama hnênah a hrilh a ni. Adama chuan thu âwih sela chuan, thih ni hmêl a hmu ngai lo ni mai tûr.—Genesis 2:17; Rom 5:12.

Chuvângin, Pathianin Adama hnêna vâna kal chungchâng a sawi lang lo pawh hi thil mak a ni lo. Chuti a nih chuan, lei hi mihringte vâna kal tûra an tlâk leh tlâk loh fiahna hmun a ni lo tihna a ni. Mihringte hi leia chatuana nung tûra siam an ni a, chu Pathian thiltum chu a lo la thleng famkim ngei ang. Bible chuan “mi felte chuan ram hi an luah ang a, a chhûngah hian kumkhuain an awm ang,” tih min tiam si a. (Sâm 37:29) Mihringte hi atîrah chuan vâna kal tûra siam an ni lo tih a chiang hle mai. Chuti a nih si chuan, engvângin nge Isua’n a tirhkohte hnêna vân lam nun a tiam? Isua chuan mi ṭha zawng zawngte vânah an kal dâwn a tihna em ni? (w10-E 02/01)