Ngua Ngerang a Blekeradel er a Eanged?

A REBEBIL er a rechad a omdasu el kmo, ngmeringel el bo dodengelii a blekeradel er a eanged e le ngdirkak a chad el mla ngar er ngii el mei e ouchais er kid el kirel. Alta e te mla obes el kmo a Jesus a dilu el kmo: ‘Ele ngak a mlara eanged el me metengel.’ (Johanes 6:​38) Ngdilu er a rebebil el mengeteklel a klechelid el kmo: “Kemiu a mlariou el mei, e ngak a mlarbab el mei.” (Johanes 8:​23) Ngerang dilung a Jesus el kirel a eanged?

A Jesus a ulterekeklii el kmo a eanged a delengcheklel a Jehovah. Ngulemekedong er a Dios el kmo: “Demak el ngara eanged.” (Matteus 12:​50) Engdi ngii a uluusbech er a tekoi el “eanged” el ngar er a betok el rolel. El ua tiang, ngmilsaod er a melidiul el ua “eanged” er sera ledu el kmo: “Momes a suebek el charm ra milidiul.” (Matteus 6:​26) Me nguaisei, a Jehovah a ngar er ngii a ulterekokl el basio el lekiei er ngii. A Biblia a melekoi el kmo: “Ng ulebeob er ngikel dengchokl er a kingellel er omerreder el ngar bab er a chutem ma ikrel a melidiul; a re chad el ngar iou a mekekerei el di ua chebud!”​—Isaia 40:⁠22.

Me a ‘[Chedam] el ngara eanged’ ngkiei el teloi er a btuch? Ngar er a Chedaol el Llechukl e a melidiul a dirrek el okedongall el “eanged.” El ua tiang a ta er a milluches er a psalm a kmo: “Sel kumes er a melidiul el mrirellii, e kisa buil ma btuch el mlilechang er olsechelel, e ng ngera belkul a chad me ke kmal melatk er ngii?”​—Psalm 8:​3, 4.

Ngdiak el uaisei, a Jehovah el Dios a diak el sebechel el kiei er tia el chutem me a melidiul el Ngii a ulemeob er ngii, el di ua daiksang el diak el kengei el kiei er a chelsel a baks el lurruul er ngii. A King el Salomon er a longedaol er a templo er a Jehovah el ngar er a Jerusalem e ngdilu el kmo: “Ngdi Dios ng kol sebechel kiei er a chutem? Cholebo e ng diak motekau er a eanged el rokir, e mekera e sebechem el motekau er tial Templo el bla kteketekii?” (1 King 8:​27) Me a lsekum a Jehovah a diak el kiei er tia el chutem me a melidiul, e ngbelkul a kmo, ngkiei er a keskelel a eanged?

Me alta e a rechad a mesuub a betok el tekoi el kirel a chutem me a melidiul el ousbech a meklou el mesisiich el mesil me a rebebil a mla mo er a melidiul el mesuub er ngii, engdi a klemerang el tekoi a medung er a Biblia el kmo: “Ngdirekak a chad el mla mesa Dios.” (Johanes 1:​18) A Jesus a silodii a blekerdelel a Dios er a ledu el kmo: “A Dios a reng.”​—Johanes 4:⁠24.

A reng a blekerdelel a klengar el kuk ngar er a bab er a klengar er a di chad. A reng a diak el lrruul er a tech me a rasech, el ngii a sebeched el mesang me a lechub e kede rutechii. Me a Jesus er a lolekoi el kmo ngkiliei er a bita er a Demal el ngar er a “eanged,” e a mle belkul a tekingel a kmo a blekerdelel a klengar er ngii a mle ngarbab er a blekerdelel a klengar er a di chad. (Johanes 17:5; Filipi 3:​20, 21) Me tiang a belkul a kmo, sel basio el lekiliei er ngii a Jesus el obengkel a Demal a lomekedong er ngii a Biblia el kmo “eanged.” Me tiang ua ngera el basio? E ngera el blekeradel a meketmokl er a chelsel?

A Basio er a Betok el Ungil el Tekoi

A Biblia a mesaod er a eanged el kmo ngbasio el betok el ungil el tekoi me a omeruul el meketmokl  er a chelsel. Ngmesaod el kmo te ngar er ngii a rebetok el dart el miliol el blak a rengrir el chelechad el reng el kiei er a chelsel. (Daniel 7:​9, 10) A derta er tirka el chelechad el reng a kakerous a blekerdelir. Kede mekerang e mo medengei el kmo, te uaisei? Ngoeak a reblebelel a Dios el ngar er a chutem, e kede mo medengei el kmo a derta el chad a kakerous a blekerdelir, me ngsebechel el mo ulterekokl a rengud el kmo tirke el chelechad el reng el ngar er a eanged a dirrek el kakerous a blekerdelir. Me nguaisei, engdi tirke el rokui el ngar er a eanged a dmak el oureor el ua ta el chelechad, el ochotii a klou el klekakerous er a blekeradel er tia el beluulechad er a chelecha el taem, el rechad a kmal meringel er tir el dmak el oureor.

Ka momtab er a Biblia a losaod a omeruul el meketmokl er a eanged. “Moldanges er a RUBAK, kemiu el klou a klisichiu el anghel, el olengesenges a tekingel e orrenges a le dung! Moldanges er a RUBAK, kemiu el rokui el olab a klisiich el ngar a eanged, kemiu el mesiou el meruul a soal!” (Psalm 103:​20, 21) Me ngkmal betok a ungil el tekoi el meketmokl er a eanged er a chelechang. Kede oba ulterekokl el reng el kmo a ureor el meketmokl er a chelsel a kmal ungil el ureor.

Ngar er a reksi e a rechanghel a ngar er ngii a ungil el chisel a urerir el ngii a ulemuchel er a uchei er a lobeob a beluulechad el me lmuut er a taem er kid. Ngoeak a Bades el kirel a taem er a lomeob er a beluulechad a Jehovah, e a rechanghel a “dilak el mengitakl,” e dirrek el “uleldiu er a deurreng.” (Job 38:​4, 7) A ta er a rengelekel a Dios a mlo er ngii a ileakl el techellel el oureor el obengkel a Demal el omeob a rokui el tekoi. (Kolose 1:​15-17) Tia el ungil el omesodel a betok el tekoi el meketmokl er a eanged a sebechel el mo uchul a betok el kerim el kirel a klengar el ngar er a eanged me a klechad.

A Rechad, Te Ulebeob el Kirir el Mo er a Eanged?

A lsekum a rechanghel a milsiou er a Dios el ngar er a eanged er a uchei er a lobeob a beluulechad, e ngbelkul a kmo tirke el kot el obekel a dimlak lobeob el kirir el mo kiei er a eanged. A Dios a bai dilu er tir el kmo: “Bo le betok a re ngelekiu, ma ruldidellel a rsechiu bo le kiei er ker me ker er a beluulchad.” (Genesis 1:28; Rellir 17:​26) A Adam a mle kot el chad el ulebeob el nguu a klengar er tia el chutem, e mle medengelii a Dios e milsiou er ngii el oba blakerreng. Ngii a ulebeob el mo demal a klechad er tia el chutem. E le a Biblia a bleketakl el melekoi el kmo: “A eanged a kloklel a RUBAK el di ngii el tang, ngdi beluulchad a le bilsterir a re chad.”​—Psalm 115:⁠16.

Ngdiak a ta el chad el soal el mo mad, e le klechad a ulebeob el diak el kirel el mo mad. A Dios a dilu er a Adam el kmo a kodall a blsel a orrengesmengoit. Oleko Adam a ullengesenges er a Dios, e ngdimlak el mad.​—Genesis 2:17; Rom 5:⁠12.

Me ngdiak el mechas a rengud, a Dios a dimlak el losaod er a klengar er a eanged el mo er a Adam. Me a beluulechad a dimlak el meketmokl el basio el kirir a rechad el mo er ngii me lemeasem a klaumerang er tir, e bo lerredemelel a mo er a eanged. Me a rechad a ulebeob el kirir el kiei er a chutem el diak a ulebengelel, e tiang a moktek er a Dios el di kmedu el mo meketmokl. A Biblia a ouchais er a telbilel el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psalm 37:​29) Me ngbleketakl el kmo, a chad a dimlak lobeob el kirel el mo kiei er a eanged. Me a leuaisei, e ngera uchul me a Jesus a mle iaksok er a rechapostol er ngii el kirel a klengar el ngar er a eanged? A tekingel, ngmle belkul a kmo a rokui el ungil el chad a mo er a eanged?