¿Imanötaq ciëlochö kawë?

PIPIS ciëlopita urämur mana willamashqantsik kaptinmi, tsëchö kawë imanö kanqanta musyantsiktsu niyanmi wakinkunaqa. Pero ¿tsëqa rasumpaku? Jesus, “syelupita[m] uramorqö” ninqantam willamantsik Juan 6:38 (QKW) textoqa. Y tsë tiempo religiösokunatam kënö nirqan: “Qamcuna que patsallapitam cayanqui. Noqaqa sielupitam cä” (Juan 8:23). Mä rikärishun Jesus yachatsikunqanta.

Huk kutim, cielo Dios täränan kanqanta rikätsikurqan Jehoväpaq “sielucho quecaq Dios Yayä” nirnin (Mateo 12:50). ¿Ima ‘sielupaqtaq’ parlëkarqan? Manam huk kuti “rikäyey syelu pishqukunata” nir parlanqan hanantsik ciëlopaqtsu parlëkarqan (Mateo 6:26, QKW). Diosnintsikqa manam hana rikanqantsik ciëlochötsu täran y tsëtaqa musyantsik Biblia kënö niptinmi: “Huk täraqmi kan, kë redondo patsa hanampa, y tsëchö täraqkunaqa chukllushnöllam kayan” (Isaías 40:22).

Tsëqa, ¿estrëllakuna këkanqan ciëlochötsuraq Dios yachan? Hora höraqa Bibliapis “cielo” ninmi Inti o Rupay, Killa y estrëllakuna këkanqan sitiopaq. Tsëpaq parlarmi huk salmista kënö nir qellqarqan: “Makikiwan cielo ruranqëkita, y killatawan qoyllurkuna churanqëkita rikarmi noqa tapukü, ¿imataq wanoq nuna pëta yarpänëkipaq [...]?” (Salmo 8:3, 4).

Kamanqan cielo rurinchö Jehová täranqanman pensëqa, imëka huk carpintero cajonta rurarirnin tsë rurinchö täranqanman pensë cuentachi kanman. Tsëmi rey Salomompis Jerusalén templota rurarirnin kënö nirqan: “¿Kë patsachö Dios täranmantsuraq? ¡Rikë! Ciëlokuna, tsë cielo hanan ciëlokunapis qampaqqa takshallam; ¡tsëtsuraq, kë noqa ruranqa wayichö tärankiman!” (1 Reyes 8:27). Këchö rikanqantsiknöpis Diosqa manam qoyllurkuna këkanqan ciëlochötsu täran.

Tsëmi, mëläya karuman rikäna mäkinayoq kar, y cohëtewan atska kuti ciëloman ëwashqa karpis, “manam pipis ni ime Diosta ricashqatsu” (Juan 1:18). ¿Imanir? Jesus ninqannöpis, “Diosqa Espiritum” (Juan 4:24).

Bibliaqa nimantsik espïritukuna noqantsikpita hukläya kayanqantam. Manam ëtsawan tullutsu kayan, tsëmi ni rikëta ni yatëta puëdentsiktsu. Tsëmi Teytanwan ciëlochö täranqampaq Jesus parlarninqa, espïritunö kawanqan tiempopaq parlëkarqan (Juan 17:5; Filipenses 3:20, 21). Dioswan Jesus täräyanqan mana rikakoq sitiopaqmi Bibliaqa “cielo” nin. ¿Imanötaq tsëchö kawë?

Imëka rurëyoqmi tsëchöqa kayan

Ciëlochö imëka rurë kanqantam Bibliaqa willakun. Y tsëchöqa täräyan atska mana  yupëpaq angelkunam, pëkunaqa Diosllata sirveq espïritukunam kayan (Daniel 7:9, 10). Llapampis manam igualtsu kayan. ¿Y imanötaq tsëtaqa musyantsik? Porque manam Patsachöpis tarintsiktsu ishkë nuna paqwë igual caracteryoq kayanqantaqa, tsëmi rikätsimantsik ciëlochö angelkunapis mana igual kayanqanta. Llapan hukläyayan karnimpis, yamë y huknölla yanapanakur trabajayanqantam Biblia willakun. ¡Kë Patsachö nunakuna kawayanqampitaqa alläpa hukläyam kawayan!

Angelkuna imëka rurëyoq kayanqantam Biblia willakun, kënömi nin: “Jehoväta alabayë, ninqanta wiyakur ruraq kallpasapa angelninkuna. Jehoväta alabayë, ninqanta ruraq soldädonkuna y sirveqninkuna” (Salmo 103:20, 21). Tsë llapanta rurayanqampitaqa ¡alläpa kushishqachi kayan!

Angelkunaqa unëpitanam Diosta serviyan, manaraq kë Patsa kaptimpis pëkunaqa servikäyarqannam. Tsëmi Jehová Patsata kamaptin Diospa llapan tsurinkuna “sinchipa qaparir” y “paqchillapa alabar qallëkuya[rqan]” (Job 38:4, 7). Y huk angeltam Dios nirqan imëkata kamar yanapanampaqpis (Colosenses 1:15-17). Kanan tapukurishun, ¿ciëlochö angelkunanö kawayänampaqtsuraq nunakunata Dios kamarqan?

¿Ciëlomanku llapantsik ëwashun?

Rikanqantsiknöpis, manaraq kë Patsa kamakaptinmi angelkunaqa ciëlochö Diosta servikäyarqanna. Tsëmi rikätsimantsik nunaqa ciëlochö täränapaqtsu kamashqa kanqanta. Adantawan Ëvataqa, “wambrëkikuna katsun y atskaqyäyë y Patsa huntanqanyaq mirayë” nirqanmi Diosnintsik (Génesis 1:28; Hechos 17:26, 27). Patsachö llapan kamashqakunapitaqa Adanllam hukläya karqan, Diosqa pëta kamarqan alli reqinampaq, servinampaq y tsëchö täränampaqmi. Tsëmi Bibliapis kënö nin: “Jehoväpam ciëlokunaqa, pero patsataqa nunakunapa wambrankunatam qoykushqa” (Salmo 115:16).

Tsëmi rikätsikun nuna imanir wanïta mana munanqanta. Y rasun kaqchöqa, manam wanunampaqtsu nunata Dios kamarqan. Sinöqa, Adan mana wiyakoq kanqampitam wanïwan Dios castigarqan. Llapan ninqanta wiyakurninqa manam imëpis wanunmantsu karqan (Génesis 2:17; Romanos 5:12).

Hinamampis, Adan ciëloman ëwanampaq kaqtaqa manam Dios imëpis nirqantsu. Y nunakuna kë Patsachö allikunata rurarirninraq ciëlota ëwayänampaq kaqtaqa manam Dios disponishqatsu. Pëqa munashqa imëpis kë Patsachö nunakuna kawakuyänantam. Y tsë munëninqa manam cambiashqatsu, tsëmi Biblia kënö nin: “Patsachöqa alli nunakunallam tärayänqa, y mana wanushpam tsëchö kawayanqa” (Salmo 37:29). Pero nunakuna ciëloman mana ëwayänan këkaptinqa, ¿imanirtaq apostolninkunata Jesus awnirqan ciëloman ëwayänampaq? ¿Llapan alli nunakuna ciëlopa ëwayänampaq kaqtatsuraq parlëkarqan?