E Faape‘ī le Lagi?
E Faapeʻī le Lagi?
UA MANATU nisi tagata e lē mafai ona iloa pe faapeʻī le lagi, ona e leai se tasi na sau mai i le lagi e faamatala mai iā i tatou. Atonu ua galo iā i latou le fetalaiga a Iesu: “Na ou sau mai i le lagi.” (Ioane 6:38) Sa ia faapea atu foʻi i nisi o taʻitaʻi lotu: “O outou e mai i lalo nei; a o aʻu e mai i lugā.” (Ioane 8:23) O le ā na taʻua e Iesu e uiga i le lagi?
Na taʻutino e Iesu o le lagi e afio ai Ieova. Na ia taʻua le Atua “o loʻu Tamā o i le lagi.” (Mataio 12:50) Ae e eseese auala na faaaogā ai e Iesu le upu “lagi.” O se faaaʻoaʻoga, na ia taʻua le atimosifia o le lalolagi, o le “lagi” ina ua ia fetalai: “Ia vaavaai lelei i manufelelei o le lagi.” (Mataio 6:26) Ae peitaʻi, o loo afio Ieova i se mea e matuā mamao ese mai i le atimosifia. Ua taʻua i le Tusi Paia: “Ua iai Lē o loo afio i luga o le faataaliʻoliʻo o le lalolagi.”—Isaia 40:22.
Pe e afio le “Tamā o i le lagi” i le mea o loo iai fetu? O loo taʻua foʻi i le Tusi Paia le vateatea aoao o le “lagi.” O se faaaʻoaʻoga, na tusi se tasi o faisalamo: “Ina ua ou vaai atu i lou lagi, o galuega a ou tamatamaʻilima, o le masina ma fetu na e saunia, o ai ea le tagata faatauvaa ua e manatu mai ai?”—Salamo 8:3, 4.
E leai, e lē afio Ieova le Atua i le vateatea aoao na ia foafoaina, e pei lava ona lē nofo se kamuta i totonu o se kapoti na ia faia. O lea la, ina ua faapaia e le tupu o Solomona le malumalu i Ierusalema mo Ieova, na ia faapea atu: “Pe e afio moni ea le Atua i le lalolagi? Faauta! O le lagi, ioe, o le lagi o lagi e te lē ofi ai; e lē atili ai ea ona e lē ofi i lenei fale ua ou faia!” (1 Tupu 8:27) Pe afai e lē afio Ieova i le lagi o loo iai paneta ma fetu, o fea la le lagi e afio ai o ia?
E ui lava ua suʻesuʻeina e tagata lenā lagi i a latou mea vāai mamao malolosi, ma ua malaga atu nisi i le vateatea, ae o loo moni pea upu a le Tusi Paia: “E leai lava se tasi ua vaai i le Atua.” (Ioane 1:18) Na faamatala e Iesu le māfuaaga ina ua ia fetalai: “O le Atua o le Agaga.”—Ioane 4:24.
O le agaga o se ituaiga o ola e maualuga atu nai lo o le tagata. E lē o faia aʻe le agaga i mea e pei o aano ma le toto, lea e mafai ona vaaia ma lagona e faalogona faaletagata. Ina ua fetalai la Iesu sa nofo o ia faatasi ma lona Tamā i le “lagi,” sa ia faasino atu i se ituaiga o tino sa iā te ia, e sili atu ona mamalu nai lo o so o se ituaiga o tino faaletino. (Ioane 17:5; Filipi 3:20, 21) O lenei nofoaga lea sa nofo ai Iesu o se agaga faatasi ma lona Tamā, ua taʻua i le Tusi Paia o le “lagi.” E faapeʻī lea nofoaga? O ā mea o loo faia i inā?
Se Nofoaga o Galuega Fiafia
Ua faamatalaina i le Tusi Paia le lagi o se nofoaga o loo tele galuega e faia ai. O loo taʻua ai e faitau selau miliona foafoaga agaga faamaoni, po o agelu o loo nonofo ai i inā. (Tanielu 7:9, 10) O nei foafoaga agaga taʻitasi e iai lona lava uiga e ese mai ai i isi. E faapefea ona tatou iloa? I mea uma o le foafoaga o loo vaaia, e leai ni mea se lua o iai le ola e tutusa lelei, e tatou te mautinoa la, e faapena foʻi le tulaga o mea i le lagi. O loo galulue autasi nei agelu i le lagi e ui e eseese o latou uiga, ma e mataʻina le matuā ese o i latou ma tagata o le lalolagi, lea e seāseā ona galulue autasi.
Seʻi mātau le faamatalaga a le Tusi Paia i galuega o loo faia i le lagi. “Ia vivii atu iā Ieova, outou o ana agelu o ē e malolosi tele ma faataunuuina lana afioga, e ala i le faalogo atu i lona siʻufofoga. Ia vivii atu iā Ieova, outou o ana ʻau uma, outou o ana auauna o loo faia lona finagalo.” (Salamo 103:20, 21) E tele la galuega o loo faia i le lagi. E tatou te mautinoa o ni galuega faamalieloto.
E iai se talaaga umi o le auaunaga fiafia a agelu, e oo atu lava i tuā a o leʻi faia le lalolagi. Ua taʻua i le Tusi Paia, ina ua faavaeina e Ieova le lalolagi, na “alalaga faatasi ma le olioli” atalii o le Atua ma “alalaga i viiga.” (Iopu 38:4, 7) Sa maua foʻi e se tasi o atalii faalelagi o le Atua, le faaeaga e galulue faatasi ma le Atua i le foafoaina o isi mea uma. (Kolose 1:15-17) O lenei faamatalaga manaia o galuega fiafia i le lagi, e ono tulaʻi mai ai ni fesili i lou mafaufau e uiga i le lagi faapea ma tagata.
Pe na Faia Tagata e Ō i le Lagi?
Talu ai na auauna agelu i le Atua i le lagi a o leʻi faia le lalolagi, e mautinoa la e leʻi faia le uluaʻi tane ma le fafine ina ia aināina ai le lagi. Nai lo lea, na fetalai atu le Atua i le uluaʻi ulugalii: “Ia fanafanau ma ia matuā faatoʻateleina, ia tumu ai le lalolagi.” (Kenese 1:28; Galuega 17:26) O Atamu o le uluaʻi foafoaga i le lalolagi na mafai ona iloa le Atua, ma auauna atu iā te ia ma le faamaoni. Sa tatau ona avea o ia ma tamā o tagata uma o le a ola i le lalolagi. “O le lagi, o le lagi lava, e iā Ieova lea, a ua tuuina mai e ia le lalolagi i le fanau a tagata.”—Salamo 115:16.
O le tulaga masani e lē mananaʻo tagata e feoti; o le oti e lē o se mea na tatau ona oo i tagata. Na taʻu atu e le Atua iā Atamu, o le oti o se faasalaga pe a lē usiusitaʻi. Pe ana usitaʻi Atamu, semanū e lē oti.—Kenese 2:17; Roma 5:12.
E lē o se mea la e ofo ai, ona e leai se faamatalaga a le Atua iā Atamu e faapea e alu o ia i le lagi. E leʻi faia le lalolagi e avea ma nofoaga e tofotofo ai tagata, pe agavaa e ō i le lagi. Na faia le tagata ina ia ola e faavavau i le lalolagi, ma o le a faataunuuina lenā fuafuaga a le Atua. Ua folafola mai i le Tusi Paia “e fai lava le lalolagi mo ē e amiotonu, e nonofo ai pea i latou e oo i le faavavau.” (Salamo 37:29) Ua manino le mata o le vai, e leʻi faia tagata e ō i le lagi. Ae aiseā la na folafola atu ai e Iesu le ola i le lagi i ona aposetolo? Pe na uiga Iesu o le a ō tagata lelei uma i le lagi?